Accueil
Envoyer à un ami
Version imprimable
Partager

U nostru top 20 di Felì

"La musique adoucit les mœurs", dice u francese. In tempi di campagna accanita, hè u mumentu d'andà à vede à Felì per i so cuncerti in Bastia è Aiacciu. Bisognu ci n'hè ! Allora eccu e nostre "Felì Greatest songs".



U nostru top 20 di Felì
Dopu à Diana di l’Alba tocca dunque à Felì di festighjà i sò 25 anni di canzona. U casinchese serà solu in scena à u teatru di Bastia u 18 di marzu (digià cumplettu, canterà dinù u 19 !) è in Aiacciu u 27.

Una voce, una ghitara, una puesia di Ghjuvanteramu Rocchi : eccu l’ingredienti chì sò bastati à fallu duvintà una legenda di u cantu nustrale. Apprufittemu ne pè vultà nant’à a so opera, da u primu 33 giri « Campà » à « A dì ti » passendu pè « E nove ».

« E nove » essendu l'album riferenza assuluta in qualità di simplicità è d’interpretazione. Stu discu cunsideratu cume unu di i più belli di u cantu nustrale hè statu fattu cun : una ghitara è un pianò.

Allora campemuci appena vultendu nant’à i tubes di Felì cù u nostru, eccu top 20.

20. Terra è onde

Esciuta in lu primu discu Campà. A prima criazione di a coppia GT Rocchi - Felì. A prima d’una longa seria.
U nostru top 20 di Felì

19. Ci campanu i mei


18. U sunadore

Chì tanti « je me souviens moi de ce musicien » u nostru sunadore ellu si ch’ellu sà sunà ! Esciuta in l'album Ancu tù.

17. O cari

Attenzione, tubone. Bon quessa l’emu tutti imparata à scola. S'è vo sunate di ghitara, site obligatu di cunnoscela. Nò ? Allora andate à amparà l'accordi nant'à Sunemu.net.

16. Dammi tù

Site casinchese ? Avete un gruppu ? Allora cantate "Dammi tù". Esciuta in u bellissimu "À voline più".
U nostru top 20 di Felì

15. Di stu paese

Chì ne serà di stu paese ? Chì fà, noi altri chì ci simu nati è chì ci vulemu campà ? Unu di più chì pone a dumanda !

14. Rittratu

Una di e più belle canzone d'amore.

13. Inamurichjate

A canzona di i corsican lovers. Successu guarantitu per fà u maccu à a ghitara.

12. Tantu manchi

Quessa, face pienghje ancu à Poutine. Custì cantata da Petru Guelfucci.

11. O corsica la mea

O Corsica mea, Corsica nostra, Corsica vostra, ùn imbulighjate micca tuttu, si parla bè di quella di Felì !

10. À dì ti

Esciuta in u dischettu di u listessu nome. Una vera canzona di scena !

9. Chjama di u Castagnu

Dopu à u Lamentu di u castagnu di Paoli di Tagliu l’arburu à pane volta pè purtacci un missaghju : "Ùn ti mancherà nunda nè legne nè ligname, frutti ne lamparaghju da cacciatti ogni fame". Ùn si sà sì a sò chjama ghjunghjerà sin’à e casce di Gifi…

8. In mediterraniu

Un'altra di E Nove. Torna stu vechju sognu di fratellanza trà l’ « isule in cullana è surelle »… Da vede quì, ripigliatu ancu da Sébastien Tramoni è l'Ensemble Instrumental de Corse.
U nostru top 20 di Felì

7. Ùn dite nunda

L’ingannu vistu d’una manera unica in u cantu nustrale. Ci scambia da « Cor’di pantera » o « Piscaia », quì a parolla ghjè à a difesa.

6. Sò d’inde mè

Ancu s’ellu hè rinnumatu pè e sò canzone piene di malincunia, Felì sà dinù mette appena di tazzu. Da stà à sente quì.

5. Quand’è tù balli

À un'epica duve a ghjente dice « la musique keurse ça endort » o « faut un DJ ou ça va être la mort » Felì hà fattu ballà à tutti solu cun a so ghitara. Grossu successu !

4. Sona

In stu novu dischettu si ritrova a vulintà di l’artistu di dà un culore più festivu. « Sona » n'hè u più bellu esempiu. Bon dopu si sà chi Felì ùn serà mai Patick Sébastien… è hè megliu cusì.

3. Stà torna appena

"Stà torna appena", a canzona ch'è no ùn canteremu micca à certi eletti. Ùn hè cusì ?

2. À voline piu

Musica, parolle, rìtimu, interpretazione, ci hè tuttu !

1. Golu

The greatest hit !

A puesia di GT Rocchi nant’à u fiume Golu hè una meraviglia. Felì a canta accumpagnatu da un simplice pianò. A so interpretazione hè magica è ne face una di e più belle canzone corse. Un capu d’opera !

Aldilà di a so carriera solu si pò sente dinù ind’i primi dischi di i Surghjenti. Pè esempiu a prima versione di « A mossa » nant’u discu « A me patria » o a prima versione di « Ritrattu ».

U tandem lurdacciu Rocchi - Felì ci accumpagna dapoi 25 anni. U cantadore cun a so voce dolce è putente hà sappiutu dà un toccu di persunalità à a so opera essendu à tempu sputicu è mudernu. Cum'è Ciosi è d’altri, i casinchesi anu u galabu è a manera pè fà vive a puesia à traversu u cantu. Felì ellu, s’hè impostu cum'è maestru di s’usu di cantà !

In cuncertu à u teatru di Bastia u 18 (cumplettu...) è u 19 marzu 2014.
In Aiacciu u 27 à l'Espace Diamant.

u 14 di Marzu 2014
Cignalacciu



1.mandatu da anto u 15/03/2014 16:58
Hè ghjustizia Féli hè un cantadore e un pueta tremendu ,e sopratuttu un omu di prima trinca ,chi face onore a u nostru paèse .

2.mandatu da Polpulatu u 17/03/2014 10:09
E a canzona "qui" ?
Per me he ella a mio preferita ! So pertutu un Svizzera 2 anni fa per ampara l'horlogeria e mi mette sta canzona al menu una volta per ghjorni !

3.mandatu da samantha fox u 19/03/2014 21:31
Felì je t'aiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiiime

4.mandatu da J G u 20/03/2014 07:51
Canta , canta Felï , cu i to canti , c'incanti ! ! !

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta