Accueil
Envoyer à un ami
Version imprimable
Partager

U nostru top 20 di e vechje canzone di I Muvrini

Più và, più e vechje canzone di I Muvrini sò belle. Allora avemu vulsutu fà un picculu best of di u gruppu di i fratelli Bernardini, periudu 1979-1991.



U nostru top 20 di e vechje canzone di I Muvrini
I vechji dischi di I Muvrini ùn sò micca i più cunnisciuti, ma certi sò veramente maraviglie.

Pè scopre o ramintacci I Muvrini 80's, avemu circatu di fà un picculu "fiorfiore" (best of).

Da Ti ringrazianu (1979) à À voce rivolta (1991), passendu pè Anu da vultà (1980) è È Campa Quì (1984) o À l'encre rouge (1987) eccu a nostra selezzione è a playlist nant'à Deezer.

Avete di siguru u dirittu d'ùn micca esse d'accunsentu.

1. Amareni

Esciutu in À l'encre rouge (1987), parolle di Ghjacumu Fusina è musica di Ghjanfrancescu Bernardini. Un succesu interplanetariu, bellu nanz'à Sting è Tina Arena.

2. Trà more è campà

Surtitu in À voce rivolta (1991). Quand'ellu si trova una versione "cover" nant'à Youtube, hè segnu chì a canzona face parte di i "greatest hits".

3. Dì

Una di e più grande canzone d'amore corse, ghjucata da tutti i lovers nustrali à a ghitara.

4. Vince per ùn more

Esciuta in È campà quì (1984). Parolle di Ghjuvanteramu Rocchi, musica di GFB. Hè ancu statu u nome d'un gruppu di sustenidori di u Sporting in l'anni 90, per dì quantu sta canzona hè diventata pupulare.

5. È di più chè cusì

Sempre in È campà quì (1984), parolle di Ghjuvanteramu Rocchi :

U mo paese o ghjente care
Un hè solu solè è mare


Bisognu d'aghjustà qualcosa ? Ah iè :

Nè a cumprà nè a vende

Guasi 30 anni dopu, più chè mai d'attualità.

6. Nanna pè i ciucci d'oghje

Nant'à l'album I Muvrini 85 induve ci hè un altru successu : ma ùn si pudianu micca mette tutte...

L'epica induve I Muvrini avianu appena listesse cuppe di capelli chè Van Halen.

7. À voce rivolta

Quessa, ancu Tina Arena a cunnosce.

8. Scelta para

U tìtulu di sta canzona hè ancu diventatu u nome d'un muvimentu pulìticu, per divvi. Per dì quantu sta canzona hè diventata pupulare.

9. Anu da vultà

Attenzione, u dischettu Anu da vultà (1980) hè un tesoru. Purtantu, à l'epica certi paesi di Corsica ùn accettavanu micca i cuncerti di I Muvrini. A leia per ascultallu nant'à Deezer.

10. Venite cun mè

Perchè ? Ùn hè micca una maraviglia què ?

11. Cresce la voce

Esciuta in Anu da vultà, da sente à st'indirizzu nant'à Deezer ma pudete cumprà l'album sanu dinù, hein.

12. À rombu di cantà

In fatti pudete veramente cumprà ancu l'album Anu da vultà.

13. Ghjirulatu

Ùn avete ancu cumpratu l'album Anu da vultà ?

14. Quattru nomi per dumane

Sempre in u dischettu Anu da vultà : A mio terra berculata, a mio terra tribbulata / A mio terra impatrunata, a mio terra s'hè levata (da sente quì).

Hè custì chè no ci rendimu contu chì trent'anni dopu ùn avemu micca veramente avanzatu...

15. A verità si face

Esciuta in u primu discu di I Muvrini, Ti ringrazianu (1979).

16. Lacrime

In u discu di u listessu nome (1986). Da sente quì.

17. Inseme

U più grande slow corsu di tutti i tempi. Tutti i depressivi corsi a stanu à sente nant'à u so iPod. Surtita in È campà quì.

18. Cù lu stessu destinu

A prima versione hè esciuta in u discu di A Riscossa Libertà pè i patriotti (1979) è dopu in Ti Ringrazianu. A canzona dedicata à i prigiuneri a più cummuvente è a più forte.

19. Lettera aperta

Ùn ci hè video nant'à u net ma a pudete stà à sente (è cumprà) quì. In Lacrime (1986) I Muvrini s'adirizzanu à l'omi pulitichi corsi :

Ci n’hè, discorsi pumposi,
Divine infrasate
Chì marcanu bè,
Ma ùn sò, à u to cutidianu
Chè vechje rumanze
È prufezie in più.

Ci n’hè, gluriose tirate
Generose è fiere
Chì rimanu bè,
Mà ùn sò, chè diciulate vane
Sperenze impassite
Chì ùn sbuccianu più

Trà ciò chè vo dite è ciò chè vo fate
Ferma l'illusione di qualchì sperà


Puliticamente currettu ?

20. I rusignoli

Ancu e canzone per i zitelli ch'anu fattu I Muvrini in l'anni 80 sò maraviglie Campemuci (1980) è Rundinella (1981). Parolle di Ghjuvanteramu Rocchi. Ci serà un messagiu puliticu in sta canzona ?


Publicatu u 14/08/2012
Messu à ghjornu u 18/06/2014

u 18 di Ghjugnu 2014
U Sgaiuffu



1.mandatu da Prufessore_Strauss u 14/08/2012 12:34
Ancu : "Un possu più" album "A strada".

2.mandatu da Rantanplanu u 14/08/2012 12:37
E dì chi certi criticheghjanu i Muvrini...

Dopu à avè fattu tuttu què è purtatu cusi in altu a canzona corsa d'oghje, chi vulete rimpruveralli ?


3.mandatu da Unt''è finu u 14/08/2012 12:48
Di tutte manere I Muvrini anu piantatu di cantà ind'è l'annate 90 innò ?

4.mandatu da Unt''è finu u 14/08/2012 12:48
Di tutte manere I Muvrini anu piantatu di cantà ind'è l'annate 90 innò ?

5.mandatu da fan di l'anni 80 u 14/08/2012 16:18

6.mandatu da fan di l''anni 80 u 14/08/2012 16:20
ci vole dinù à salutà st'omu tamantu ch'hè GHJUVANTERAMU ROCCHI

chi sariamu senza omi cusi ?

un ringraziu per tuttu.

7.mandatu da Fiumorbacciuazezu u 14/08/2012 23:04
E veru anu fattu belle canzone stu gruppu di merda rancicu

8.mandatu da Anto u 15/08/2012 09:28
E piu belle l'anu fatte elli.


9.mandatu da Birkenstortu u 15/08/2012 16:39
Amareni ❤❤❤
Vince per ùn more

Anu da vultà
Quattru nomi per dumane


Chi putenza... Cumu ùn pudete admirà u tippu chi hà fattu què ??

I Corsi sò inghjusti o Ghjanfrancè... Ma noi, a sapemu.

Thanks for all.

10.mandatu da Grossu panzutu u 16/08/2012 10:17
Va be s'elli facenu un cuncertu cun ste canzone mi mettu davanti e striduleghju cume una groupie!


11.mandatu da Pumata u 16/08/2012 10:19
Un di e piu belle discugrafie di a musica corsa! Missaghji pulitichi chjiari e be purtati! Piccatu ch'elli avessinu sceltu a via di u puliticamente currettu pè sudisfà un publicu piu largu! Fermeranu quantunque pistelli di a nostra musica!

12.mandatu da Assicuratix u 16/08/2012 11:52
I muvrini oghje he vera si vendenu. A tutti i sensi. Anu adupratu u style: "politiquement correct". Per me hé un peccatu tamantu. Ma ci vole a di chi musicalemente un anu mica circatu a fa prugressi. I 5 accordi di u principiu so sempre qui. Peccatu. In piu di quessa e discursate a 3 franchi di jfb ohimeeeeee. Esse artistu, esse sinceru, esse ezigente, hé una cosa difficiuleeeeeeeeeeeee ohhhhhhh !.....

13.mandatu da Ziu Santu u 20/08/2012 16:55
-Castaniccia sì

Sò parechje e belle canzona ma per mè i Muvrini si sò arristati di fà musica à partesi di a fine di u novanta incù tuttu u rispettu ch'aghju per Ghjuvan'francescu u restu hè per i turisti

14.mandatu da stumacatu u 21/08/2012 19:09
"I Muvrini" ?

Hanu bè prufitatu di u ventu di "u riaquistu" per fà i so affare !!

E e so piu belle canzone so di st'epicà...

Oghje, un li stogu mancu piu à senta : show bizz e basta !

15.mandatu da mmi un colpu à beie u 18/06/2014 13:54
ùn mi sô mai piaciuti assai I Muvrini, ma aghju tamantu piacè à sente parlà à Ghuvan' Francescu à a televisiô francese: trovu chî rileva u livellu di a discursata , ch'ellu parlessi in corsu o in francese.

E' pô s'ellu hè rancicu quessa ùn a sô , ma a fundazione UMANI ghjè ellu chî a porta in Corsica!

16.mandatu da hantzu u 18/06/2014 14:07
Hè un tippone GFB. Ùn cappia micca

17.mandatu da Ghjanpa u 18/06/2014 17:21
Mi ramentu è prime serate à la creazione di Canta u Populu Corsu c 'èra u babbu ghjuliu, Ghuvan' Francescu , alanu, è tanti alti, da core i salutu.

18.mandatu da usbirbatupentitu u 19/06/2014 20:25 (da un teleffuninu)
forse v''arricurderete di quand'' eranu zitelli,
l''amparavate da e veghje à piglià treni è battelli
prumettendu u monde mari, Avveni senza penseri
di figliuloni cari, ne pudete esse fieri......
Quale serà ssu giuvanottu...

19.mandatu da mmi un colpu à beie u 20/06/2014 07:16
o cà ùn vi scurdate d 'aiutà " les exilés " nant'à ULULE più chè 2 mesi è ammanca sempre 6000€!!! fatellu cunnosce in giru à voi

20.mandatu da babbò u 20/06/2014 14:32
GFB hè piu ch'un gran cantadore e puetu,e statu sopratuttu un militantu di a causa corsa e un difensore di a nostra lingua,ma e statu dilusu cume tanti corsi e patrioti di l'epica per i "capi machja" chi si so servuti di a lotta e di a mossa naziunale per u contu soiu

21.mandatu da babbò u 20/06/2014 15:12
a Stefanu;u piu bellu omagiu a i clandestini,a a lotta armata e a u Fronte.
" in un locu francu di scordu, ha da nasce a filetta,da tè,da tè"
a ringraziati o Ghjuvan Francè

Novu cumentu :





Seguitate A Piazzetta nant'à Facebook


Ricircà nant'à A Piazzetta