U ritornu di Britney Spears!

Womanizer hè u clippu di u so novu albumu "Circus"chì deve esce u 2 di dicembre... E canzone, cumposte tutte tutte da un lugiziale, s'assumiglianu à quelle di l'altre cantatrice americane di u 21u seculu. Briachine, purcherie, u dischettu ùn si vole micca esse una dinunzia di l'epica ma l'illustrazione di a nimfocrazia. Allora, lasciate puru corre u dischettu chì ùn valerà mai ne a voce di Carlu Rocchi ne e ghitarate di i Cantelli.

Ma u clippu pò, caricatura di u cunsumerisimu oghjincu, hè un veru gioiellu! Ùn andate più à cumprà ne Gala ne Voici per vede la spugliata. A face a di per ella... Aiò, a vi pensate chì listessu clippu incù a panza di Maì Pesce è a barba di Dumè Gallet averia avutu tamantu successu? Bon, incù Alizée, Jenifer o Francine Massiani, ùn dicu nunda... È perchè micca???

U prublema di a canzona corsa hè chì ùn la face micca abbastanza à assucià estetica musicale è estetica visuale. Chì pò fà u capuccinu fracicu di u ribellu di u vechju clippu di "l'armata" in pettu à tamantu pezzò?

Aiò, ci averemu da mette noi incù Machja, Ghisonesi, Mazzone, Piratella è Culomba à cantà per salvà a musica corsa?