Accueil
Envoyer à un ami
Version imprimable
Partager

U sindroma di Stockholm...

Ma chì c'entre Stockholm in un blog in lingua corsa? Chì serà sta malatia chì tocca à i bastiacci? Serà l'affare di u tigliu? Mancu appena ! Di fatti, hè chjachjarendu incù un assessore durante l'ultime elezzione municipale di Bastia chì m'hè ghjuntu in capu u sindroma di Stockholm. Soca, n'averete intesu parlà?



Simu in u 1973, Jen Erik Olsson, un fughjiticciu face un arrubbecciu in una banca, u creditu svedese di Stockholm. Sin'à avà, tuttu và bè. Ùn simu avvizzati à l'arrubbecci à a Posta? Hè un affaracciu tradiziunale! Ma subitu, hà da piglià quattru impiegati di a banca in ustagiu. Li permette què d'ottene a liberazione di u so cumpagnu di carcera, Clark Olofsson. Quessu, s'affacca subitu in a banca per aiutà à u so cumpare. Chì sgaiuffi!

Chì serà a reazzione di l'impiegati di a banca?

Dopu sei ghjorni di neguziazione trà a pulizza è i banditi, l'ustagi si mettenu in pettu à i ladri per difende li. Durante l'inchiesta è u prucessu, ùn purteranu nisuna lagnanza contru à i so rapidori. Megliu, anderanu à visità li in prigiò mentre un impiegata di a banca, innamurata scema di Jen Erik Olsson, si mariterà cun ellu ! Chì tanti Meetic, chè ? Allora, mi dicerete, cosa hè u sindroma di Stockholm?


Trè sintomi per un sindroma

Ci sò trè segni maiò :
- U sviluppu d'un sintimu di fiduccia o di simpatia in pettu à u scruccone.
- U sviluppu d'un sintimu di simpatia di l'agressore in pettu à l'ustagi.
- U spuntà d'un attitudine nimichevule di e vittime, in pettu à e forze di l'ordine o quelli chì volenu ristabilì u dirittu.

Secondu i circadori in psiculugia, stu sindroma sarebe da avvicinà da u cumpurtamentu di e donne battute chì tenenu caru u so maritu ma dinù di i populi chì piglianu a pratesa di i dittatori.

Lu sindroma di Bastia...

In quantu à e cundizione necessarie, ne teneremu sopratuttu una. Ci vole chì u banditu fussi capace à sviluppà una cuncettualisazione ideulogica di manera à ghjustificà a so azzione in pettu à e so vittime. Per esempiu : "Facciu l'arrubbecciu perchè a sucetà capitalista ùn mi permette micca di campà ". È ci n'hè poche d'altre mutivazione simule: " M'affaccu à fà ti a guerra, perchè u to capimachja hè un fascista" o allora "pensa à vutà per mè, s'è tù u voli st'impegu". À a moda bastiaccia, si puderebbe dì : "s'è tù voli i figatelli, vota per Zuccarelli !". E linguacce elle, diceranu chì i "figatelli" sò quelli chì votanu per Zuccarelli...

N'anu ancu fattu una canzunetta :
"Lu sindroma di Bastia
Hè fattu per lu signore
Pienghjenu li bastiacci
Suspiranu à tutte l'ore
Ma lu sedeci di marzu
Passerà l'omu catarzu"

Piccula Bibliugrafia...

CROCQ L., « Les Otages et la violence », document de formation du CISCP, Paris 1998.
CROCQ L., « Pour une nouvelle définition du syndrome de Stockholm », Études épidémiologiques1989 ; 1 : 165-179.
SKURNIK N., « Le syndrome de Stockholm, essai et étude de ses critères. Société médico-psychologique », Ann méd psy octobre 1987 ; vol. 146, nos 1 et 2 : 174-181.
SKURNIK N., « Le syndrome de Stockholm, essai et étude de ses critères. Société médico-psychologique », Ann Méd Psy octobre 1987 ; vol. 146, nos 1 et 2, p. 174-181
JOULE R.-V., BEAUVOIS J.-L., Petit traité de manipulation à l'usage des honnêtes gens, Presses universitaires de Grenoble, 1987, 229 p.
JOULE R.-V., BEAUVOIS J.-L., La Soumission librement consentie, Presses universitaires de France, 1998, 214 p.
Centre d'étude en sciences sociales de la défense, Les Influences psychologiques, éditions Addim, 1999, 210 p.

l'11 di Marzu 2008
Sbanditu



1.mandatu da GWM u 11/03/2008 00:15
Bravu ! eccu un'articulu di quelli ! Ci vulia à pensàla, quessa...Stockholm, Bastia, listessa tuntia...

2.mandatu da Paulu u 11/03/2008 08:07
Si puderia piglià ancu l'esempiu di i Corsi chì anu vutatu à Sarkozy à e Presidenziali : più sò calcicati è più u sustenenu !

3.mandatu da VM u 30/03/2008 00:56
i bastiacci anu paura di l'incunnisciuti, un volenu micca avè un meru piu peghju ch'ava mà un anu micca capi ch'un hè micca pussibile? Ci hè una maledizzione nantu bastia ci vole à aspetta ancu 6 anni per fa qualcosa mà sta cosa un hè micca sicura...

4.mandatu da Lisandrina u 30/03/2008 16:09
Perchè stu paradossu ?

Certi psicòloghi dicenu chì « u zitellu traumatizzatu, fisicamente è psichìcamente più dèbule, chì si trova senza difesa, ùn hà d’altre ricorsu che d’identificassi à l’aggressore, sottumèttesi à tutti i so desiderii, anzì preveneli, finalmente ci trova ancu una certa suddisfazione. »

Stu sindroma si ritrova in parechje situazione, per esempiu, in e viulenze conghjugale, ò trà l’elettore è l’eletti ò ancu dinù cumè qui, trà l’agressore è l’ostaggiu.
Ghjè cumu e persone chì ghjustificanu situazione irregulare. Pigliemu un fattu sèmplice, a venuta in Francia di u culunellu Kadhafi, ò zitè, riflettite !

Hè qualch’induve umani. Circhemu sempre une manera di vede e cose più belle.
Hè bè cunnusciutu, a ghjente chì si lagna u più à a surtita di l’elezzione hè quella chì hà vutatu per a cuntinuità. Hè un speziu di masochismu, iè, hè vera !

Mà, ci vole à esse prudente, troppu lunatismu pò ingenerà prufondi cambiamenti, pensate chì u populu scoglie u so dirigente è povemu capulà prestamente in u altru guvernu. Pensate chì, si oghje tenemu caru à nostri nimichi, riturnarìamu à u tempu di a vendetta, quantunque qualchi volta povemu ponesi quistione.

Aghju l’impressione chì stu sindroma hè omnipresente, ancu in Corsica.
Ùn hè ?


5.mandatu da Sbanditu u 31/03/2008 14:16
Aghju l'impressione chì stu sindroma hè omnipresente, ancu in Corsica.

A saperai tù ! L'ai stu sindroma di Bastia?

6.mandatu da Quill'altru u 31/03/2008 15:49
C’hè quantunque un’affare ch’ùn hè statu pensu da nimu, eppuru da leghje què hè pussibule : Jen Erik Olsson hè statu furmatu in Bastia ! O peghju : hè un agente internaziunale di u zuccarellisimu !

Allora difatti, si tratta di lu sindroma di Bastia, ch’ùn hè mancu appena fattu per li signori… ma per l’assessori !
Allora sè vo site uppunenti à Zuccarelli, l’assessore ùn lu fate più ch’osinnò a prossima volta l’avete da fà per ellu !
Fighjate, lighjiti, avete dighjà i sintomi. Ùn vanu ancu prupostu d’esse in qualchì pusizione per un elezzione qualessa sia, o d’esse permanente per u Partitu ? Aspittate, à da vene…

Ma ùn sunniate o mascii, u parangone trà Stockholm è a merria di Bastia si pianta quì, chì eu, bionde suediane di i magazini, per u Rond Point Noguès ùn ne aghju vistu…

7.mandatu da Fafalà u 31/03/2008 15:55
bionde suediane di i magazini, per u Rond Point Noguès ùn ne aghju vistu…

Chì falsò ! T'aghju vistu manu in a manu incù una zitella pupuluta !!!
In quantu à Jen Erik, a so casata ùn hè micca Olsonn ma Orsoni. Ai intesu male !

8.mandatu da mezzu pinzutu mezzu pinzuti u 31/03/2008 18:17
ùn pensu micca che u populu corsu sìa culpitu di a sindroma di Stockholm, che i corsi, l'ustagi, sviluppinu un sintimu di fiduccia o di simpatia in pettu à u statu francese, u banditu. Pensu che a Francia abbia cumpratu i corsi. Riguardati quali sò i fissazioni di à maiò parte di a ghjuventù corsa, avè una bella vittura, avè un impiegu in l'amministazione.
Bisugna à rinuncià à u nostru cunfortu per comincià à resistè!

9.mandatu da 68ard attardé u 31/03/2008 18:28
U SINDROMA DI STOCHKOLM SI PO RINUMA U SINDROMA DI A CORSICA,in tutti casi per a pulitica.Perchè?In corsica,si sente sempre,u mio merre o u mio cunsigliu generale...,ùn vale nunda,hè qui per mettesi i soldi in stacca.E po quandu ghjunghjenu l'ellezione,hè torna ellettu. Se ùn c'era che una personna che parlava cusi,si puveria capi sta reelezionne,mà quand'elli so caffe interi chi dicenu què e che l'ellettu hè statu riellettu a u primu giru,ti dumandi cume ha fattu.A ghjente dice sempre che ùn vale nunda mà ellu o a so famiglia so u capu di certe cità di po mezzi seculi.E stu sindroma esiste ancu a u livellu naziunale.Si facenu pighjà in capu incù a diritta è Chirac,è ghjè u Sarkozy chi ghjè elettu.Sarkozy,ùn ghjera micca in u guvernamentu,è ùn hè micca di diritta?Cume se a i francesi e ancu a i corsi,li piacia di fassi pighjà in capu. Fermanu 4 anni a supportalu,dopu vereremu.Se l'hè torna elettu,ghjè veradimente che i francesi hannu chjappu u sindroma di stockholm.

10.mandatu da Matteuccia u 02/04/2008 19:36
Bellu articulu perchè un sapia micca ciò ch'era u sindroma di stockholm e chi s'avvicinava di u cumpurtamentu di e donne battute.
E anchu bellu parangonu chi spiegà cumu in bastia a ghjente dicenu gative cose natà zuccarelli e dopu votanu pè ellu...ma l'elezione in corsica tuttu u mondu a sà é pienu d'imbròglj !!

11.mandatu da Lisandrina u 02/04/2008 19:56
Innò. Mi rivendica fora di tuttu què. Mà nimu n'hè salvu ci vole dopu tuttu rimarcalu.

12.mandatu da a balanina (M) u 04/04/2008 22:57
ùn possu di nulla chi eiu ùn so micca bastiaccia!
ùn saranu micca chè i bastiacci chi sofranu di stu sindroma? tutta a corsica? allora mi ne vo in francia... po esse chi ancu a francia hè tuccata? allora, o zitè, simu persi ! Pè l'elezzione prossima aghju da vota in bastia. Pè quale? Pè zuccarelli!
Credu ch'aghju trovu a vera riflessione bastiaccia...

13.mandatu da filippi u 06/04/2008 19:56
Sindroma di Stockolm... Daretu issu testu ritrovu in fattu a situazione pulitica isulana. L'elettori isulani, sò ustagi di i nostri puliticanti! Disgraziamentu hè verità postu chè no simu sott'una listessa gouvernanza dipoi seculi è seculi malgratu u fattu ch'elli un facenu tant'affari per a nostra isula. I nostri eletti tennenu i so elettori à corpi di prumesse (impieghi...) ... paghendu ancu uni pochi di fatture à qualchi famiglie in situazione assai delicate! In fine ghjè cusì u sistema puliticu in corsica...

14.mandatu da Ballarina u 07/04/2008 01:39
Difficiule di fà a leia trà u sindroma di Stockholm è ciò chì si passa in Bastia pà l’elezzione!
Aghju sempre intesu parlà di stu sindroma quand’ellu ci era presa d’ustaggi!
Ci vurria à capisce chì Zuccarelli hè un prenditore d’ustaggi, ch’ellu castiga i so amministrati ? Podassi!
Dicenu i psiculoghi chì i populi piglianu a pratesa di i dittattori. Ùn la sapia micca! sò niscentre!
In lu paradisu di Cubà, duve u savone hè un lussu, è ognunu parla liberu, FIDEL hè tinutu tantu caru chì ghjè u scappa scappa in Florida, à u risicu di compie in lu corpu à lampione di i pescicani? Sò tonti! Hè cusì bravu stu tippu!

In Bastia anu e spalle larghe e linguaccie! Sò sprizzante quantunque di paragunà l’elettori Bastiacci à figatelli. Rimarca chì s’elli sò boni i figatelli, tuttu u lasciatu hè persu! È po sai costanu ochji di beccu!
Ma ci pensu pà fà tutti sti figatelli ci ne vole porchi! È po ci vole à dà li da manghjà!
A sapiate voi chì u bisognu face a legge! Cusì dicianu i me vechji.
Allora finchè i corsi saranu accaniti pà u so benistà, si camparà di sta manera. Sarà difficiule di cambià e cose. Ùn hè?


Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta