Accueil
Envoyer à un ami
Version imprimable
Partager

U sundame di u mese : chì selezziunadore pè a squatra naziunale corsa ?

A Corsica ùn hà ancu a so squatra naziunale, ma noi ci pensemu. Cummincemu allora pè u principiu è lancemu u dibattitu : à quale vulete mette cum'è selezziunadore ?



V'avemu digià parlatu nant'à u blog d'una squatra naziunale corsa è di a so bella vittoria 2 à 0 contr'à a Francia in u 1967. Si ne parla di più in più è u gruppu di Facebook "pour une sélection corse de football; hà francatu i 250 membri...

Ma cum'è coach, à quale mettimu ? I candidati sò parechji, è vi prupunemu di vutà in un sundame è di dà u vostru parè innù i cummenti.

Eccu qualchì pruposta :

Freddy Antonetti : u Casinchese hè siguramente l'intrenore corsu u più cumpetente. Noi femu a scumessa ch'ellu pò esse un coach di classa mundiale è chì e so zerghe meritanu d'esse cunnisciute à u livellu internaziunale. S'ellu hè in gamba, hè ancu capace di piglià à Domenech à panette. Allora forza Antò !

Jean-Michel Cavalli : L'Aiaccinu hà una sperienza internaziunale : hè statu à u capu di a furmazione d'Al Nasr di Riyad, di u Wydad de Casablanca, di l'US Créteil-Lusitanos è di Ionikos Le Pirée. Di chè fà trimà Marcello Lippi !

Fanfan Félix : cunnosce bè u ballò corsu per avè intrenatu à L'Isula Rossa durante tanti anni, purtendu a cità balanina sin'à a terza divisione. Ma ùn u pigliemu ch'è s'ellu cambia di cuppa di capelli.

Battì Gentili : Hà intrenatu tutti i clubs aiaccini pussibuli, avà hè in Nantes. Perchè micca ?

Robert Nouzaret : U campione di e falate in segonda divisione hà marcatu i Bastiacci quand'ellu hè venutu in Bastia. Ma forse vulerà selezziunà una volta di più à Dieuze è à Bernard Lambourde ?

Raymond Domenech : Più nimu ne vole, mancu Estelle Denis... Forse chì u puveracciu vulerà piglià a squatra naziunale corsa ?

Giovanni Trapattoni : Da mette in a rùbrica di i coachs azezi cun Antonetti. U sosie di Nicolas Alfonsi hè ancu più impressiunante quand'ellu mughja in alemanu...

Robert Herbin : U Sphinx puderà rilancià a so carriera in Corsica ?

Guy Cimino : S'ellu hè pigliatu cum'è selezziunadore, li ferà una bona scusa pè piantà a so carriera d'attore.

François Tortos : Cugnumatu à France 3 "le sorcier belge", u giurnalistu hè in fatti un fine cunniscidore di u mondu di u ballò. A prova : hè ancu abbunatu à "Onze-Mondial".

André Paccou : Almenu s'è no u pigliemu ùn ci feranu più cacà cun tutte ste storie di razzisimu. Bon, manca appena di classa à cant'à Marcello Lippi o José Mourinho, ma ùn si sà mai. S'ellu si taglia a coda di capelli è s'ellu ùn mette più e so calzette cù e so ciavatte ?

Vincent Tabarani : Ellu sì chì sà manighjà u pulendaghju per fassi rispettà da i ghjucadori. Attenti à e bastunate !

Gilles Simeoni : Da per tuttu, ùn ci n'hè più ch'è per "Gilles" chì hà ancu e so groupies chì u seguiteghjanu in ogni locu. Hà riesciutu u miraculu di fà ghjunghje una lista naziunalista in testa di l'opposizione in Bastia è d'interessà e giovane bastiacce à a pulitica. Allora perchè micca un miraculu à u capu di a nostra squatra naziunale ?

U Père Fouras : Hà pigliatu un colpu di vechju ma hè sempre quellu.

Estrimei : Ùn ci capisce nunda à u ballò, ma u cummentadore u più azezu di u web nustrale ùn parlerà ch'è corsu à i giurnalisti è i ghjucadori. Cusì seranu anch'elli obligati d'amparà a nostra lingua !

D'altre pruposte ? L'aspettemu !

u 23 di Ghjugnu 2008
U Sgaiuffu



1.mandatu da estrimei u 23/06/2008 12:21
a ringraziatti d'avemmi sceltu . s'elli parlavanu tutti u corsu ,forse chi i ghjucatori ci metterianu piu core ? ma nu a so , chi un ci capiscu nunda.
o U Sgaiuffu,
- un so micca azzezu, so passiunatu .

2.mandatu da guus u 23/06/2008 14:37
eiu vecu un trio Sbanditu-Estrimei-Vincent Tabarani

3.mandatu da GWM u 23/06/2008 19:29
sicura ch'ellu hè sempre in gamba, u pilatu di Vinzulasca, postu ch'ellu ha intrenatu u GAMBA Osaka ! in più di quessa, per azzizzà i ghjucatori in campu, si mughja "GAMBATE" in giappunese allora vedi...

4.mandatu da ghisonesi u 27/06/2008 21:12
Avemu sminticatu à Ciccolini, ellu hè ancu capace d'andà à circà quellu Song d'Arsenal per ghjucà cù a nostra squadra naziunale.
Di più, pè e bastunate è e belle parole hè u più forte.

Da mette in concunrenza cù u mitu Antonetti...

5.mandatu da micca nomi u 24/09/2008 15:08
eiu pensu a bernard mosca di nrj corse chi parle asai bè di ballo' è^po anch'ellu a i groupi. mà dà pà me devi esse prisidente è intrenatore

Novu cumentu :