Accueil
Envoyer à un ami
Version imprimable
Partager

U top 20 di Diana di l'Alba

Antone Marielli è i so cumpagni principieranu à a fine di ferraghju un giru anniversariu pè i so vint'anni di scena. Apprufittemu di l’occasione per vultà nant’à l’opera di stu gruppu. Eccu u nostru top 20.



U top 20 di Diana di l'Alba
Diana di l'Alba, tuttu ognunu cunnosce, sò quelli chì mettenu a concia à Black Eyed Peas d'appressu à un'inchiesta fatta da u Museu di a Corsica.

Ma sò dinù sette dischetti, da u magnificu primu album (chjamatu sempliciamente Diana di l'Alba in u 1980), à a rifurmazione di u gruppu in u 1994 (è u dischettu Pueta in u 1996) à l'ultimu Indiature in u 2013.

Eccu u nostru top 20, è avete u dirittu d'ùn esse d'accunsentu.

20. Canterini

Sta contradansa scema purtata da i viulini di Ceccè Brunini, Ghjuvan’Liviu Casalta è Ghjiseppu Ersa hè diventata una vera bomba in cuncertu ! Esciuta in Sumenti d'acqua (1998).

19. 1769

Di siguru unu di l’umagi i più cummuventi à i morti di Ponte Novu. Esciuta in Pueta (1996).

18. Pueta

Quessa una volta ch’omu l’hà in capu, ùn si ne và più !

17. È avà

“È avà ch’emu da fà ?” Vinticinque anni dopu à “chì fà” d’Antone Ciosi sempre listessa dumanda cusì bè posta.

16. Sartè

Una legenda dice chì Dumenicu Bucchini l'hà messa in sunneria di u so telefuninu.

15. U Buschettu di l'Ariola

Perchè u primu dischettu di stu gruppu hè un tesoru di canzone tradiziunali. Cum'è U pinu tunisianu, A Berlina o U buschettu di l'Ariola. Ma dinù u magnificu Lamentu di l'alivi . Per seguità e parolle pudete andà quì.

14. Petrosgiani

A più famosa di e canzone à l’usu “manouche” di Diana è un omagiu à u populu rumenu. U swing à a fine hè tremendu !

13. Lasciala passà

Una di e numerose adattazioni di u gruppu. Una storia d’un paese landanu ch’averia pussutu accade ind’è noi. Hè una ripresa di u canterinu kabile Idir.

12. Lingua corsa

A nostra lingua si persunificheghja pè dicci chì “ùn voddu micca mora” ! Difficiule d’ùn esse toccu. “Ne serete in stu mondu una rubbaccia lazza”...

11. A ghitarra

Quessa a cunniscite, ghjè a preferita di e donne. Certi amparanu à sunnà di ghitarra pè pudè cantà què à e zitelle. Bon, ùn viaghja micca sempre.

10. Zia Maria

Entrimu ind’u Top 10 cù un ritimu di rumbà. Un ritrattu à more di rise di certe evuluzione suciale “abusive”. Dopu à zia Maddalena tocc’à zia Maria di cunfonde New york è Peru Casevechje. Da stà à sente quì.

9. Amerindianu

L’indiani d'America, un tema pocu adupratu in a musica corsa. Averemu forse paura di scopreci un paragone...

8. Bandera mora

Quale ùn hà mai messu a manu in pettu sintendu à quessa, quand’ellu era à u liceu ?

7. A concia di Luigi Piombu

L'avemu tutti sunniata, nò ? Da ascultà nant'à l'ultimu dischettu, Indiature.

6. A pìzzica

Una tarantella di e Puglie, indiavulata è incursifichita. Quale hè chì dicia “la musique keurse ça endort” ?

5. Ghjochi

Un capu d’opera di puesia nustrale.

4. Senti figliolu

Una mamma chì supplicheghja u so figliolu d’ùn parte in guerra. Sta canzona ricacciata di u primu discu hè una bella lezziò à tutti quelli chì ci spieganu chì i Corsi sò sempre partuti vulinteri “la fleur au fusil".

3. U cervu corsu

Cunnisciuta sopr'à tuttu pè a sò musica tremenda, u spiritu casticatu di stu cervu volta sempre à dicci e sò verità. Stu testu di Paulu Susini di a Serra hè forse unu di i più belli è di i piu arrabiati !

2. A cispra

Un altra di sottu scala. L’adattazione di a canzona calabrese “Brigante se muore”. Ci face vultà di manera stupenda à l’epiche di e vespare Corse.

1. Mediterraniu

È fà è fà, "Mediteraniu" ferma “the absolut hit” !


Musiche anziane o muderne, nustrale o landane, puesie schiette o testi aperti... Emu pruvatu di fà un giru in l’universu di Diana di l’alba è di ricacciane u megliu. Ma ben d’altre canzone averianu pussutu esseci: Terraticu, Spassatempu, Anghjula Dea, Candida mamma, Trosti, Caldanelle, L'usina di Cànari... In tantu, quellu chì hà sta playlista in vittura pò viaghjà luntanu.

Ci seranu trè cuncerti eccezziunali per u giru di i vint'anni di u gruppu : u 21 in Portivechju, u 26 in Bastia, u 28 in Aiacciu.

Situ ufficiale

u 17 di Farraghju 2014
Cignalacciu



1.mandatu da U Rib u 17/02/2014 17:36
The absolut greatest hit hè GHJOCHI

Eppo ci hè dinù Anghjula Dea, Che Guevara...

2.mandatu da Panighi u 17/02/2014 18:46 (da un teleffuninu)
A berlina hé dino una bella canzona


3.mandatu da henry smart u 17/02/2014 19:07
Petrosgiani he un omagiu à Manuel Valls ?

4.mandatu da Ernestu u 17/02/2014 19:26
"A concia di Luigi Piombu" = +++ !


5.mandatu da sardu u 18/02/2014 12:03
da veru belle ,l' aghjiu sentite tutte!!

6.mandatu da Filomenu u 18/02/2014 16:01
AIO !!! ANGHJULA DEA quantunque !!! ;-)))

7.mandatu da corrado de lu salentu u 18/02/2014 16:18
a piu bella hè sicuramente GHJOCHI

8.mandatu da petru u 18/02/2014 18:57
E vera chi i Black Eyed Peas hannu da fa a prima parte
di Diana a u teatru di Bastia u 28 ??? ... una consecrazione per elli ... ( i Black Eyed Peas ben intesu...)

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta