Accueil
Envoyer à un ami
Version imprimable
Partager

Un festivale pè rende omagiu à Jacques Luciani in Corti

Hà da principià u 18esimu festivale Jacques Luciani in Corti. L'occasione di turnà à scopre tuttu ciò ch'ellu ci hà purtatu.



Jacques Luciani face parte di sta ghjente à quale ùn si rende micca abbastanza omagiu. È purtantu, li duvemu assai. Partutu troppu prestu (in u 1982, avia 54 anni), a so vita hè stata quella d'un passiunatu di a lingua è di a cultura di u so paese.

Istitutore curtinese, hè numatu in postu in Sermanu in l'anni 50. Custì, hè culpitu da i canti, e paghjelle, l'ambiu musicale cù i viulunisti è sunadori di rièbbula di a pieve. Capisce ch'ellu hà davant'à ellu un tesoru in perìculu ch'ellu ci vole à salvà. A sorte manda in stu paese un prete pueta, Gregale (Prete Filippi di Tòcchisu).

Dop'avè arregistratu è interrugatu i detentori di sta cultura pupulare, passanu à l'azzione è fondanu u gruppu A Mannella, in u 1958 (da vede i ritratti nant'à u situ Corti d'eri)

Grazia à Jacques Luciani, A Mannella serà u primu gruppu à cantà a paghjella nant'à una scena è à arregistrala nant'à un discu. Seranu elli i piunieri.

L'affare ùn hè micca semplice. L'anni di dopu guerra sò quelli di a negazione di a tradizione corsa. I Corsi si vergognanu di ciò ch'elli sò è giranu u spinu à a so cultura.

A prima interpretazione d'una paghjella nant'à a scena di L'Aiglon in Corti finisce in fischji. Listessu in Bastia. Corse-Matin conta chì Jacques Luciani hà rispostu : « Fischjate puru, ma i nostri antenati cantavanu cusì ». A Mannella hà tenutu forte, è hè cusì ch'ella principiò l'aventura. Più tardi, venerà u Riacquistu è a presa di cuscenza...

Ma Jacques Luciani hè statu dinù un piunieru di a lingua corsa in i media. À a radio prima, nant'à l'onde di RMC, è dopu nant'à FR3. Piunieru dinù di l'insignamentu di u corsu, à u liceu Pasquale Paoli di Corti.

Jacques Luciani face parte di quelli chì anu apertu una via.

Oghje, ci hè un festivale di musica è di ballu in Corti chì porta u so nome. Hè l'associu Ghjuventù Curtinese chì si dà di rimenu è chì l'organizeghja dapoi una decina d'anni.

Tutti l'anni, parechji gruppi di paesi sfarenti facenu dimustrazione di e so tradizione musicale è di i so balli. Quist'annu cascherà i 18 è 19 lugliu, I paesi invitati sò a Russia, a Martinica, l'Ecuador. A Corsica serà presente cù i gruppi Ochju à ochju è Vitalba.

Da vede u prugramma in detagliu nant'à a pagina Facebook.

Perchè micca favvi un girettu tandu ?

Un festivale pè rende omagiu à Jacques Luciani in Corti


u 14 di Lugliu 2014



1.mandatu da J G u 16/07/2014 06:28
A ringrazià a paizzetta , per rimentacci chi a cultura corsa more e po rinasce di e so cendere
cume a nostra machjia chi brusgia ma si riface pianu pianu e chi malgradu u focu spampaneghja sempre

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta