Accueil
Envoyer à un ami
Version imprimable
Partager

Ùn si fuma più... ma si puzza di più

Face un mese ch'ellu hè difesu di fumà innù i lochi pùblichi. Ma s'ellu hè smaritu u fume nocivu di a sigaretta, innù i caffè, pub è discuteche si senteria di più a puzza di u sudore...



Ùn si fuma più... ma si puzza di più
L'equazione hè semplice. Innù i lochi di a night, ci hè u mondu, face u caldu è si balla. Tandu si suda, è cum'ellu ùn ci hè più l'odore di a sigaretta pè copre l'odore di u corpu umanu, si puzza.

Ci vole à dì chì i 4.000 prudutti chìmichi chì entranu innù a cumpusizione di una sigaretta ci la facenu à piattà l'odore puzzulente di u corpu umanu scatinatu di u sabbatu sera. Serà forse u fattu di l'arsènicu, u pollonium, u piombu, l'ammoniac, u pirenu o unu di i 60 cumpunenti chì danu u càncaru.

Eccu ciò ch'ellu si dice dapoi u primu di ghjennaghju è l'interdizzione di fumà innù i lochi pùblichi. Avemu vulsutu andà per vede (è sente) innù i lochi di surtita di u sabbatu sera in Bastia. U custatu hè terribule : in certi lochi s'ellu ùn ci hè più stu fume chì vi pizzicava l'ochji è v'impuzzicava i vestiti, si sente veramente un odore di calzetta vechja è di gymnase.

Vi piaceria di passà un sabbatu sera à u Cosec di u Fangu o à u Pascal Rossini d'Aiacciu ? bof.

Allora i patroni di bar si strappanu i capelli. Digià ch'elli anu straziatu per impedisce à a ghjente di fumà ch'ellu ci vole à truvà in furia e suluzioni. A risposta puderia vena da difusori di prufume. Ma costanu caru, è cumu piace à tutti ? In un bar di Bastia ci hè un tale odore forte di vanilla artifiziale ch'è vo ùn pensate ch'è à piglià u vostru bichjeru à corri corri è à scappà...

Allora, l'avemu veramente da pienghje, a disparizione di sta sigarettaccia ?

Chì preferite ? U "fumer tue" o u "ne pas fumer pue" ???

Date u vostru parè...

u 29 di Ghjenaghju 2008
u webmaestru



1.mandatu da GWM u 30/01/2008 11:03
In'cuntinente, si capisce sta puzza chi ci so manse di cughjoni, mà ind'è noi a ghjente so puliti. Voilà.
Allora eiu mi campu senza sta fumaccia.

2.mandatu da Sbanditu u 30/01/2008 11:32
Faci a publicità per i prufumi?

3.mandatu da GWM u 30/01/2008 11:50
è tu pè Job-Bastos ?

Novu cumentu :