Accueil
Envoyer à un ami
Version imprimable
Partager

Una stonda in un paese novu : U RICCHI$TANU !

Chì tanti Kosovo è altri paisacci disgraziati ! Lascemu corre dinù à st’isulaccia di Corsica… Andemu tutti in u Ricchistanu !



Cusì bellu paese quessu ! Più chè un paese, hè una famiglia, una sterpa ! Micca cum’è quelle di i vostri paisoli, micca cum’è quelle chì si sterpanu in tempu d’elezzione ! A demucrazia, hè u penseru di voi altri umani cumuni. Noi, omi è donne di u Ricchistanu, n’avemu pò d’altri penseri ! Chì fà, iè chì fà di tanti soldi ? Voi chì cantate « Chì fà ? Ci vole à sunnià… ». Ùn dice què a canzona ? Invece, avemu tuttu. « Simu sbanditi… » ! S’è e vostre paghe vi caccianu u laziu, à noi, i nostri soldi ci caccianu u sonniu. Tandu, ci tocca à spende u più pussibile. Altrimente, ci hè da scimisce ! Averiamu vintu tanti soldi per lascià li dorme ? Ùn aghju micca da fà u rancicu quantunque. Hè per quessa ch’avemu bisognu d’idee, di think tank da pudè spulà i nostri soldi è gode di e nostre ricchezze, davanti à voi, micca per cinisimu, ma per davvi a voglia di stantà u vostru pane.

Di fatti, tuttu dipende di a vostra pusizione in u nostru paisucciu. T’avemu l’insù, u mezu è l’inghjò di u Ricchistanu… Per contu meiu, chì stò solu à l’inghjò di u Ricchistanu, ùn possu spende chè 44000$ in vitture, 9200 $ in ghjuvelli è 5300$ à l’annu in talassuterapia. Mi scurdava di a casuccia à 810 000$ chì m’aghju compru. Ma ci hè una manata di ghjente di u Sarcorsicastanu chì si ne caccia cun mecu ! Chì narpie quesse ! Sò dui pignotti chì scumbattenu per rifà u mezu mondu. Chì pretenzione ! Altrimente, giranduleghju u mondu nant’à u mo battellucciu. Risparmiu ancu dui soldi per pudè mi rigalà un viaghju in un spaziu incù Richard Bronson è Virginspace…

Per l’affare di u battellu, fate la finita chì mi ghjocanu à a risa l’altri pretenziunuti. À chì dice chì sò un SDF, à chì si ride di i so quaranta metri. Pare cusì ma a lotta di e classe, ci hè ancu ind’è noi. L’altri pò, i so battelli misuranu circa sittanta metri ! Averanu bisognu quessi d’una piscina in u battellu ? Chì munta sega, quill’altru arabottu… Per avà ci femu ogni tantu duie manghjate d’aligoste inseme, ma vai chì quandu hà da sparisce u petroliu, una sciappata li aghju da sciaccà à stu musginatu… Avà mi colla mì !

Ma a cima, ind’è noi, hè quandu n’avete una techja di tutta sta robba è chì date tuttu ciò ch’avete vintu à l’altri. U megliu hè di fà furtuna ind’è l’armamentu. Prima, perchè hè abbastanza faciule. Ci n’hè poche guerre ! Truverete sempre dui astuti chì si volenu minà o un capistatu zitellescu è techju chì vole ghjucà si la à Risk o Counter Strike. Dopu, quandu vi site arricchitu incù i baulli è i tonti di a pianeta, chjamate i giurnalisti. S’affaccheranu chì sò mosche, sò ! Fate li vede tandu ciò chè vo rigalate à sti paisacci. Aprite puru un uspitale è duie scole à mezu à e ruvine. Face bè. Hè bella sicura chì vi tocca à esse aggalabatu incù i ciffri. St’investimenti custì, ci vole à cuntà li in u prezzu di l’armi. Altrimente, vi ritruvate voi à paghjolu ! Per fà vi valè ancu di più, girandulate in sti paesi caldi. Ci hè un penseru quantunque. Ùn ci vole micca avè a paura di piglià dui ritratti abbraccendu una banda di negrachjoli puzzicosi.

U filantrupisimu, chì parolla bella! Hè quessu u lussu u più altu ! Ùn u ci pudemu permette tutti. Pudete ancu spulà soldi in u messenatu per fà vi dui amichi cari in a squadra di l’artisti merzi. Fate casu quantunque ch’elli ùn s’appiccichessinu troppu. Tenite, Warren Buffet, ùn hà datu quasi tutta a so furtuna à a fundazione di Bill Gates? Mi dicerete chì a pudia fà… À 76 anni, li ferma pocu à campà è, cun ciò ch’ellu s’hè tenutu, ùn abbisogna a limosina di u minimu vechjaia chè vo tuccate voi, mansa di bavacciuloni !!!

u 23 di Farraghju 2008
$b@nditu ™


Novu cumentu :