Accueil
Envoyer à un ami
Version imprimable
Partager

Ursucità è russicità

Perchè sustene à l'ACA ? Si dice chì à A Piazzetta, semu azezi, certe volte appena gattivi, cismuntichi, è per u Sporting. Allora per una volta, avemu postu a dumanda à un giovanu sustenidore rossu è biancu.



Ursucità è russicità
Quale si è parchì susteni à l'A.C.A. ?
Socu un accanitu, ferventi è ghjovanu sustenidori di l'AC Aiacciu. Socu unu di i numarosi abbunati di Timizzolu. Vocu à tutti i macci.

Parchì l'ACA è micca un'antra squadra ?
L'affari hè simplici : sustengu a squadra di a me cità. T'aghju una prifirenza pà sta squadra à quidda di u GFCA postu chì a prima volta chì aghju vistu un macciu di ballò era l'ACA chì ghjucaia. Da chjucu, cuddaiu dighjà in Timizzolu. À st'epica quì, eramu in liga 1.

Ma ùn hè micca parchì socu pà l'ACA chì ùn sustengu micca u Gazelec è spergu ch'eddu s'hà da mantena in liga 2. Sustengu tutti i squadri corsi com'è u sporting o ancu u CAB. Ùn hè chè cusì ch'è no ghjunghjaremu à avanzà, noi Corsi.

Pà rivena à u sughjettu di l'ACA, pensu chì ci hè statu una presa di cuscenza in capu à a ghjenti dopu u mantenimentu l'annu scorsu. Semu di più in più numarosi à cuddà in Timizzolu è à sustena a "Santa Squadra". Pà ciò chì tocca à i sustenidori, ci hè mori ghjovani è ziteddi : prova chì l'ACA è i so sustenidori ani un avvena di gloria insemi. Felicitazioni à l'Orsi ribelli pà u travaglionu ch'eddi facini dipoi u 2002. Ma socu siguru chì ci pò essa ancu di più ambianza. Ni prufittu pà fà una chjama à tutti i ghjovani chì si trovani in J.B. Poli : avemu fattu un antru gruppu di sustenidori in sta tribbuna pà metta un pocu d'animazioni. Avemu pruvatu à fà la contru à Bordeaux è s'hè piuttostu bè passatu. Aviami mori banderi... Ma saria ancu megliu s'eddu ci era à pena di più mondu. À liveddu spurtivu, malgratu ssi dui punti di menu in principiu di staghjoni, pensu chì ùn avemu micca da avè difficultà pà mantena ci. U risultatu di parità in Parighji n'è una bedda prova.

Trà Aiacciu è Bastia...
Si dici chì tuttu Aiacciu hè pà u Sporting ma ùn socu micca d'accunsentu. Di a me generazioni, pochi sò l'Aiaccini à sustena à Bastia prima d'Aiacciu. À u culleghju, tuttu u mondu susteni l'ACA. Una passioni tamanta si faci in ghjiru à l'ACA.

U sabbatu u dui di marzu, ci spiazzemu in Furiani. Spergu chì tuttu s'hà da passà bè à nantu à u tarrenu è ancu fora parchì s'eddu ci hè calcosa chì ùn supportu micca sò i litichi, l'azzuffi è l'altercazioni trà Corsi. Spergu è pensu veramenti chì a me squadra s'hà da impona contru à u Sporting.
Pregu una bona fini di staghjoni pà l'ACA è u CAB, u mantenimentu pà u SCB è u GFCA ! Più ch'è mai FORZA AIACCIU !

Aghjustaraghju chì a lingua hè viva più ch'è mai in Timizzolu : tutti i canti di sustenidori sò in lingua corsa, u speaker parla corsu è ancu a ghjenti parla mori...

Ringraziemu à Ursucciu per a so participazione. Tenimu à precisà chì u scrittu ùn hè una traduzzione. Sò prupositi tenuti è scritti da un ghjuvanottu di 14 anni. Salutemu dinnù a so romba di fà campà a lingua corsa in i canti aceisti.

u 28 di Farraghju 2013
Intervista fatta da U Pettirossu



1.mandatu da Libertà per i panzarotti u 28/02/2013 23:45
U ritrattu pare "A Scola di i Fans" !!!

2.mandatu da Linguaccia u 01/03/2013 06:36
Arrrrggghhhhhhhh......

Desinfurmazione, prupaganda !

" Numerosi abbunati... Di più in più numerosi in Timizzolu... " , o zite' basta à vede un macciu di l'ACA per capì chì sia 'ssu giovanu ùn sà cuntà, sia hè disinfurmazione à l'usu Figaro.

Un'isula in un mare di passione turchina, a Corsica simu noi è solu noi.

A sola squatra di u populu corsu hè u Sporting, u restu hè literatura.

3.mandatu da U pichju u 01/03/2013 07:47
O linguaccia, hè u sgardu è u parè d'un ghjuvanottu...
Mà basta à fighulà l'affluenzi di l'anni scorsi per vede ch'elli sò in crescita ancu s'elli sò belli luntani da noi...

Forza Bastia !
À Corsica hè sola bianca è turchina !

4.mandatu da A stedda u 01/03/2013 09:21
Bravu ! FORZA AIACCIU !!!!!!!!!!!!!!!

5.mandatu da Anto Finitu u 01/03/2013 11:00
Ùn hè tantu simpaticu di burlà si di zitelletti aiaccini

6.mandatu da Capicursinu rancicu u 01/03/2013 11:07
Senza traduzzione ? Ben ch'o sustengu a Bastia, bravu a stu ghjuvanottu, ùn simu micca morti

7.mandatu da Anto Finitu u 01/03/2013 11:42
Piantate di muntà a sega à sti ciucci dopu si credenu di piglià a suprana è si facenu pistà

8.mandatu da Capicursinu rancicu u 01/03/2013 12:01
Aouf cosa dici incu tuttu ciò ch´o vecu intorn'a me inquant'a i zitelli, vede ne unu chì si sprima cusì be in corsu mi face piacè

9.mandatu da Napuliò u 01/03/2013 15:24
Bravu Orsucciu, incù tè feremu una Corsica bianca è rossa. Senza scurdà ci di l'altri picculi club cum´è u GAZ è u SCB bona scenza à elli. Evviva Timizzolu, evviva Orsoni, evviva Aiacciu !!!

10.mandatu da Libertà per i panzarotti u 01/03/2013 17:29
aio ghjè una magagna st'articulu

11.mandatu da Campagnolu u 02/03/2013 04:00
Ùn vecu micca à chì ghjova di criticà 'ssu zitellu… un ghjovanu chì face u sforzu di parlà corsu, ci parla corsu è ci parla di a lingua corsa. À 14 anni dice chì i litichi ùn li piacennu, ch'eo simu tutti corsi, pigliate cunscenza ? À 14 anni hà digià più cerbellu ch'è certi omi maio…
Pè parlà di ssu derby, eiu sò pè Bastia è mi ferebbe piacè ch'ellu vinci, ma oh ghjente simu tutti corsi, ch'ellu ci sia macagne ie, ghjè bè ma micca andà à tazzà si pè un match, in fendu cusi femu listessu chè i parigini o i marsegliesi, diventemu peghju…

12.mandatu da A stedda u 02/03/2013 12:04
Felicitazioni à issu ghjuvanottu chì parla cusì bè u corsu. Aghju avutu un piacè tamantu à leghja iss'articulu. CORSA GHJUVENTÙ, L'AVVENA SÈ TÙ !

13.mandatu da Anto Finitu u 03/03/2013 11:13
"Votre tribune s'est effondrée" l'averà cantatu in corsu o in frencese?

14.mandatu da Altu Taravu u 03/03/2013 12:49
Sò unu Talavesu, raghjoni Suttanaccia, ma sò unu sustenitoru di u Sporting, l'ACA ùn hà micca e valore di a Corsica, l'avemu vistu eri sera in Furiani
In l'Altu Taravu cume in l'atri raghjoni di muntagna in Corsica si sustene u Sporting, a sola vera squadra di u Populu Corsu

15.mandatu da ghjuva u 03/03/2013 16:16
e so bastiacciu ma so stumagatu di ste partite di ballo induve ci minemu fra noi corsi! ah quandu ricevemu i frencesi qui ci volle a esse bravi! e be eu so piu vicinu di i suttanacci che di i frencesi.

16.mandatu da a muredda u 03/03/2013 18:22
Un taravesu chì dici "e valore" è " eri"? Umbeh!!!
Valori corsi arisera, ùn ci n'era. Beddu spettaculu ! Povara Corsica !

17.mandatu da Altu Taravu u 03/03/2013 18:52
Hè piu beddu di scrive cusì, ma hè veru chì erami 16 000 corsi in Furiani sott'una sola bandera
Nant'à i 450 aiaccini c'era 20 scemi è c'era ancu 20 scemi in a Tribuna Petrignani.. Ah hè bedda a mintalità "Semi tutti frateddi"

18.mandatu da Azzezzu u 08/03/2013 01:09
À Corsica un hè sola bianche e turchina ,a Corsica hè bianche e nera. Eiu so azzezu di vede corsi intazzà si cume francesacci o l'"arabacci". So aiaccinu pè u Sporting ma sustenu ancu l'ACA perchè he una squadra corsa cume Bastia o Bucugnà. Ma certi bastiacci cumincianu a m'annerbatu veramente cu a so rabbia contra l'aiaccini e i suttanacci ,certi dicenu che l'ACA un ha valori corsi.. Ma ghje veru che tirà e petre nantu i fratelli Aiaccini so u esrmpiu di valori... Povara corsica ! Stu ghjuvanottu hè un esempiu pè tutti.

19.mandatu da lorsu u 08/03/2013 05:28
He veru ch'in sti 10'anni a popularità di a squadra aiaccina a cresce di ghornu in ghornu.
Une avemu ch'à pusà u nostru sguardu nantu à i "raiseaux sociaux" o ch'à tende l'orechje in i cafe aiaccini, un si parlà piu chi di l'ACA alora chi qualch'anni nanzu era piutostu sparte incu u sporting.
Noi, giovani aiaccini emu ingrandà incu una squadra in D1 in a nostra cità, alora...sustenimu a squadra di u locu ind'u noi campemu

Amichi cismontinchi, ghje una realità : avà ci soi dui squadri in corsica !

20.mandatu da MILITANTU u 12/03/2013 22:05
Leghjendu st'articulu scrittu dà un giovanu mi sò sintitu cuntentu, fieru è pà una volta, uttimistu pà l'avvena di a noscia lingua, di u nosciu populu.

Leghjendu i cumenti scritti dà omi maiò, mi sò sintitu tristu di veda tanta rabbia trà noi, è sicuru chi ciò ch'avemu bisognu sopr'a tuttu ind'è noi sò ciarbelli... Induve sò passati i vosci ???

Eru in a tribuna aiaccina è vi possu assigurà chi canti contr`à u 5 di maghju un ci n'era micca.

Ci voli à sveglià si o ghjenti u nosciu paesi ( u pocu chi ci ferma ) ùn hà bisogniu di tant'odiu trà noi.


21.mandatu da Senza pseudo u 22/03/2013 23:28
Basta o scemi ch'è voi sete . Ghjè un beddu scrittu. Inveci d'esse uniti daretu à a testa mora c'intazziemu trà noi . Un' isula sola bianc'è nera !!!!!! Squadra naziunali

22.mandatu da Bastiacciu u 22/03/2013 23:31
Ùn hè micca bè ciò chì s'hè passatu durante u derby

23.mandatu da Bastiacciu u 22/03/2013 23:31
Senza pseudo ùn hà micca tortu

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta