Accueil
Envoyer à un ami
Version imprimable
Partager

Vende a Corsica per empie e casce ?

À u nordu anu i soldi è u tempacciu. In u sud, e casce sò viote è ci hè u sole. I deputati alemani anu prupostu à a Grecia in crisa di cumprà una di e so isule.



Vende a Corsica per empie e casce ?
A Grecia hà più di 6.000 isule diserte à u sole è hè fusciata.

L'Alemani anu i soldi è quassù face tempacciu tuttu l'annu.

U deal hè chjaru : "On vous donne du fric, vous nous donnez Corfou".

È quessa in un imbuleghju di discorsu à a moda "on en a marre de payer pour les feignasses du sud" è di pretensione di ricchi chì sanu chì cù i soldi si ponu tuttu permette.

A pruposta hè seria è piace ancu à i membri di a CDU, u partitu d'Angela Merkel à u putere. Da leghje nant'à LeMonde.fr.

Ind'è i nostri amichi tedeschi a pruposta face fantasmà. Pensate appena, si cotranu tuttu l'annu in i lochi bughjicosi di a Ruhr, allora a pussibilità di cumprassi un'isula à u sole... U giurnale Bild ripiglia sta nutizia chì ne ralegra più d'unu.

Postu chì tuttu si pò cumprà in stu mondu è chì a Grecia, sbaiuccata, cunnosce una crisa tremenda, l'idea face u so caminu è ùn stona à nimu.

Digià in u 93 certi deputati tedeschi avianu prupostu à a Spagna di cumprà l'isula di Maiorca, in e Baleare chì hè frequentata sopr'à tuttu di turisti alemani.

È ind'è noi allora ? Viste e dèbbite di a CTC è quelle di u statu francese (in "faillite" avia dettu François Fillon...), perchè micca vende un pezzu di Corsica à l'Allemagna, a Russia o qualchì riccu amatore di sole ?

Perchè micca vende Rondinara o l'Agriate per finanzà u PEI ? Perchè micca barattà Sperone o e Calanche di Piana contr'à un tunnellu in Vizzavona ? L'isula di Cavaddu contr'à una "station d'épuration" ? Palombaghja contr'à a custruzzione di u stadiu di Furiani ?

Per avà ùn ci hà pensatu nimu, ma quelli chì anu i soldi ùn mancanu micca di pretensione. È quelli chì sò appressu à i soldi ùn si vergognanu di nunda.

À cuntinuvà à esse povera è sottu sviluppata, a Corsica hè cundannata à diventà una preda faciule è dilicata per i ricchi speculatori.

Vende a Corsica per empie e casce ?

u 6 di Marzu 2010
U Sgaiuffu



1.mandatu da estrimei u 07/03/2010 08:59
"À cuntinuvà à esse povera è sottu sviluppata, a Corsica hè cundannata à diventà una preda faciule è dilicata per i ricchi speculatori. "
basteria chi i corsi, ommancu i piu numerosi , fussinu cuscenti di i carcii in cullu ch'elli piglianu , e si pueria parà qualcosa.
ma oghje ne simu a ammentà a citadinità , e a circà u mezu di scruccunà dui soli di piu che l'astri.

2.mandatu da Linguaccia u 07/03/2010 10:57
"Citoyenneté" o Estrimei !!ghjè megliu indè a so lingua d'urigine.. culunialisimu

intelletuale..!!

3.mandatu da anto u 07/03/2010 12:29
Un'avemu lezioni a da a nimu !Simu noi altri corsi chi vendimmu a nostra terra a i strangjeri e se noi simu onesti spazzemu prima davanti a u nostru ziliare .

4.mandatu da Linguaccia u 07/03/2010 13:19
Micca "noi altri "o Anto, mà certi bastardoni di corsi..

5.mandatu da bancazzà u 07/03/2010 14:00
o zitè, à i corsi, li piacenu i soldi. Allora siamu serii: s'ellu ùn ci hè micca un'uffiziu di u fundariu, un fondu territuriale d'aiutu per e compre (di i corsi), un dirittu di preunzione per i nativi, una lege per sapè qualessa serà a "destinazione" di a compra, una regula legislativa per a superficia acquistata (ùn si puderà cumprà cusì millaii di metri per luttissamenti, ecc.), quale hè chì hà da parà i cumpradori strangeri. Averanu ancu i mezi di ghjustificà 10 anni di "residenza" quì, sopr'à tuttu s'elli sò elettori. Cusinnò, à mezu andà smariscerà l'agricultura, u pocu chì ferma. Eccu a lege è una vulintà pulitica ... Solu què mi dicerete, iè solu què, ma què quantunque.

6.mandatu da estrimei u 07/03/2010 14:55
per contu meiu , c'he un puntu induv'ell'un ci'ole a sturzuna :a NAZIUNALITA.
he un puntellu maiò ,induve si devenu appughjà tuttu so chi cumpone a suciétà corsa .
dopu ch'elli serranu specificati i diritti e i duveri di i naziunali , tandu si puerà acchjarini i diritti e i duveri di quelli di a "citadinità" e di i strangeri

7.mandatu da Linguaccia u 07/03/2010 14:55
I nativi chi so o Bancazzà, quelli chi so nati qui ? Spergu ch'ellu nnè ci vulerà assai di più pe pudè cumprà..spergu sinceramente !!

8.mandatu da Linguaccia u 07/03/2010 15:04
Estrimei "Devoirs et droits so discorsi cume in Francia, a nostra Naziunalità hè erede.avale simu "Français" di naziunalità corsa.. a naziunalità un deve esse un attu puliticu-amministrativu mà una realtà culturale, unatramendera di i nostri antichi qualchi strangeri puteranu forse campà in corsi mà senza esse corsi, sino anderemu pocu a pocu à catrenu e smariscerà à nostra Etnia, ùn femu u sbagliu francese.....

9.mandatu da bancazzà u 07/03/2010 15:46
Vegu chì avemu listesse primure. Un simu à circà u bè è u male in i prugetti. S'ella ùn ci hè una lege, simu fritti; s'ella ùn ci hè una vulintà pulitica, simu fritti; s'ella ùn ci hè una pruposta di "padduc" chì impone d'aggruppà e custruzzione nove, impedisce à cort'andà l'abitazione individuale scantata à mezu prati, s'ella ùn ci hè una scrittura nova di u territoriu è u rispettu di e terre, per impedisce u "mitage" o e custruzzione long'à i stradoni, chì vulemu più sperà? Hè una rivuluzione mentale è fisica di a Corsica è di quelli chì ci stanu, quelli di sempre, "i nativi", è l'altri. Forse chì tandu seria interessante d'aghjustà un criteru lingusiticu, sapè parlà u corsu, per cumprà un pezzu di terra, è micca n'importa induve ...

10.mandatu da estrimei u 07/03/2010 17:07
o Linguaccia ,
dui punti per acchjarinì u nostru cuntrastu:
u 1a: diritti e duveri so duie parulle corse chi hanu a so traduzzione ghjusta in frencese. eu , nu he neggu micca. a u mio parè ci so i diritti e i duveri pè i naziunali, quelli di quellichi hanu a citadinità u so micca i listessi, i strangeri l'hanu dinnù e so d'astri.
u 2u:
dici :a naziunalità un deve esse un attu puliticu-amministrativu mà una realtà culturale, unatramendera di i nostri antichi qualchi strangeri puteranu forse campà in corsi mà senza esse corsi, sino anderemu pocu a pocu à catrenu e smariscerà à nostra Etnia,
he a to manera di pensà , si ne pò forse cuntrasta (nant'a u foru di a Cunsulta Naziunale ?)
ma c'he un puntu chi ,per me , he piu che primurosu he a scelta .
esse corsu d'erei in purei un bastà s'omu un sceglie a naziunalità corsa (naziunalità un ci n'he che una)
i corsi simu tutti , ch'o a voglimu o nò ,di citadinità frencese (simu suttumessi a e legge, paghemu l'impositi , avemu l'assicurenza malatia ....), ci so i corsi chi volenu a naziunalità frencese -di fatti ricusanu a naziunalità corsa - e ci so i corsi chi volenu a naziunalità corsa -e quessi di fatti ricusanu a naziunalità frencese-

11.mandatu da Corsu ingannadu u 07/03/2010 21:42
O amichi, simu à l'òrlu di smarisce.
Ghjé fòrse cusi ch'a nostra storia millenària si deve còmpie, i francesi hanu vintu,micca per via di l'arme m'à piutosttu incu; e soprattuttu l'imbecillità di i nostri
"capi-sumeri" naziunalisti,più primurosi di cuntentà a manca francese, a LDH e tutti 'sse merde.
Còrci che no simu!!!!!

12.mandatu da Linguaccia u 07/03/2010 22:28
O"Corsu ingannadu", mi face piacè di vede chi certi corsi hannu l'occhju Muvrinu. Più che vera !! quande tu dice chi i capizzoni naziunalisti preferiscenu accuntentà quelli chi ci vole vede smari, cumu sarà ?? chi cumplessu averanu, ùn saranu veri corsi forse pè parlà cusi, i corsiso un'"etnia", ghje cusi ch'elli ci chjamavanu i "Sucialisti corsi "chi hannu scrittu "Mains basses sur un île" avale simu ghjustu una "commauté de droit et de destin" e non più una communità storica e culturale, cume tu dice pè fà piace à i francesi LDH e F-M chi quessi hannu salvatu assi populi..allora quandu sentu dì "a colpa e tutta di "l'eletti di u CLAN", iè so rispunsevule pè a pulitica ch'elli facenu mà dicu dinò chi oghje, quelli dicenu battesi pè i corsi è chi faranu à listessa pilitica , quella di l'intégration, so rispunsevuli anch'elli e forse di più perchè elli ingannanu u nostru populu, chi ellu sà chi quessa ùn hè pussibule, poveru populu corsu, hal'eletti ch'ellu merita hè dinu i capi ch'elle ùn merita.........Mà a manca francese sarà cuntenta, què ghje una avanzata tremenda....Ohimmèèè !!

13.mandatu da L.E.F u 07/03/2010 22:42
U vecchju dibatittu ùn hè mortu ellu, mà stu prublema hè statu pinsatu, e aduttatu dà Corsica libera e Femu ..i militanti ùn averanu che pocu affari (cume sempre.sino so trattati di razzisti....) à di perche e decisioni e piglianu quelli chi sanu parlà e chi cumandanu... populu sempre niscentre...per salvà ùn populu ci vole ad esse prontu a sacrifizii mà dinò s'ellu ci vole ad accittà d'esse Chjamatu "Raciste"(perchè a parolla "Razza" in corsu à dinò u sensu pusitivu di Lignée).

14.mandatu da Urbanu... u 07/03/2010 22:54
I "Natiuna-listes" so andati "A Canossa" si so sottumessi, u pinzuttu, dice "passer sous les fourches caudines" di a LDH, ella,po esse cuntenta, pfff chi vergogna... certi volte mi rincresce d'esse corsu...Babbone e Mammone chi un parlanu una cria di francese si dicianu francese pè avè di chè campà mà campavanu corsi...Oghje certi facenu carte d'identità corse e pensanu francese, simu veradimente una "razzaccia"hè ora che no smarischimu.. u mondu anderà megliu.... mà cume vulette fà pè che i corsi ci seguitinu incu un discorsu cusi... preferisceranu vutà pè partiti francesi e fighjà e so intaressi..... ancu s'elli ùn ponu pate i pinzutti e tutti l'altri....

15.mandatu da Corsu ingannadu u 07/03/2010 23:16
Mi so intèsu rispònde pòchi tempi fà,d'un grande "naziunalistu" (nous ne sommes pas communautaristes,nous les integrerons) parlendu di u troppu ghjundidicci,(quessa a risposta vale quelle di zuccarelli e sterpa...)
Per còntu méiu un ripresentanu più u POPULU CORSU STORICU


16.mandatu da Linguaccia u 07/03/2010 23:27
O corsu," ils s'integrerons" mais le voudront-ils ? li ai postu a quistione, e po un "simu cummunautariste" ghje un penseru republicanu e ssu capizzone era sicuramente Francs-macon, e noi ci simi integrati à a Francia ??chi simu di a stessa civilizazzione!!, ùn simu "communautaristes" mà difendimu un populu corsu sfarente di u populu francese ùn hè una cuntradizzioni tamenta ?? hè indegna di u capu puliticu quessa !!

Per mè quessu e forse u naziunalistu famosa mà ghje un picculu corsu ..crepatura !! AGHJU DECISU INCU QUELLI DI MO FAMIGLIA Di UN ANDà PE NIMU U 14 !!

17.mandatu da Corsu ingannadu u 07/03/2010 23:50
Parenu folle, parlenu d'integra sempre più ghjenté,allora chi simu minoritari.
Si elli un so "communautariste", eiu si.(u 14 ponu fiscà u mio vòtu)

18.mandatu da L.E.F u 08/03/2010 08:00
Femu cume i nostri fratelli "Arabi" , l'Algerini elli hannu cacciatu i francesi e purtantu eranu nati qualà dapoi 6 o 7 generazzioni, 130 anni di presenza hè eranu integrati nè cunsideratu cume Algereni, mà U fln ùn avia à fà piace à nimu....Hè GHJERA DI MANCA.... allora i capi Patriotti corsi saranu più stupidi che " l'Arabi".. Ci hè dà ponesi à quistione, corci a noi altri !!!

19.mandatu da abazurditu u 08/03/2010 11:54
so veramente inchietu di leghje i vostri cummentarii qui. veramente so dibattiti chi duverianu esse chjari oghje ghjornu . Chi simu? a corea di u nordu? u cummunitarismu? u populu? chi vole di tuttu que? nulla. I prublemi un so micca custi o zitelli. A quistione oghje e di sape quale he chi ha veramente u putere di decisione in Corsica . Oghje quelli chi l'anu so l'UMP, Sarkozy e po tutta a clicca.!!!!!!! Allora dumenica TIREMULI FORA. E dopu in viaghju s'accuncierà a somma.

20.mandatu da L.E.F u 08/03/2010 12:58
Dice cusi O Abaz... tiremuli fora !! mà una volta cacciati, se quelli ch'averanu u putere facenu contra i corsi, dumanderai di cacciali dinò ..o sarai di quelli chi diceranu avà ci "simu si stemu" , cume l'eletti Francesi ?!? ùn poi tene à contu e pruposte di campagna perchè saranu quelle chi saranu appiicate, o allora ci burlanu ?!?..Ci vole avè l'onestà di dì ancu quandu naziunalisti si sbaglianu e difendenu gattiva pulitica pè u so populu, u veru,... micca quellu inventatu à sapè induve, pè à sapè quale..!!

21.mandatu da paulu u 08/03/2010 13:03
Quand'ellu si leghje certi cummentarii si capice bè perchè a Corsica hè ind'a merda è chì i clanisti sò sempre in piazza dapoi generazioni è generazioni. Cumu ghjente, chì si dicenu naziunalisti, ponu chjamà à ùn vutà naziunalistu ? A scelta ùn pò esse o tuttu o nunda. Ancu s'ellu ci ponu esse discussioni, a scelta per un naziunalistu ùn pò esse chè in favore di quelli chì si battenu à chì piglianu i colpi dapoi tanti anni : Corsica Libera.

22.mandatu da estrimei u 08/03/2010 13:04
Dice cusi O Abaz... tiremuli fora !! mà una volta cacciati, se quelli ch'averanu u putere facenu contra i corsi, dumanderai di cacciali dinò ..o sarai di quelli chi diceranu avà ci "simu si stemu" , cume l'eletti Francesi ?!?

firmerà """ abazurditu """

23.mandatu da L.E.F u 08/03/2010 13:06
Eo dicu un affare, i capi detti naziunalisti si cumportanu cule l'eletti detti "u CLAN" ci cuntanu folle è una volta in piazza facenu cume li volenu elli, e quelli chi l'hannu eletti so sempre ingannati, e ùn mi dite u cuntrariu, e po a quelli chi dicenu di piglià a CTC, fora di ssu padduc ùn puderanu parà altru nunda...u restu, so e legge repubblicane chi diregennu...e sapemu in chi sensu !!!! disgraziatamente pè noi altri !!!

24.mandatu da linguaccia u 08/03/2010 13:11
Cume o Paulu ? Quandu u naziunalisti di sempre vede chi e pruposte cunadannu a ragio di ssu cumbattu a more, face assai male..quelli piglianu colpi e vera so quelli di CL, mà nè dannu altre tantu a so populu di una certa manera, e sè u scopu ghjè di piglà colpi ghjunghje à ùn esse più che "Copropriètaires" di a nostra casa allora lascemu fà puru tutti sti lotissements e stu padduc, o mancu averemu un econumia ae i corsi camperanu megliu...

25.mandatu da Corsu ingannadu u 08/03/2010 15:16
O ghjènte un si po più parlà di Populu,di sangue corsu,ma quale simu divintati ??
Oramai u discorsu naziunalistu serà stampatu a quellu di u NPA e a LDH.
Quandu dicu che no simu fritti, ghjé disgraziamente vera.(d'altronde un vutàradiu micca naziunalistu per via chi un mi ripresentanu più).
Aghju tòrn' à di : IE SO CUMMUNITARISTU : i mei per cumincià e dopu l'altri !!

26.mandatu da anto u 08/03/2010 15:21
Eccu o ghjente u nostru divettu u piu cattivu :ci caccemmu l'occhji tra di noi allora chi un 'avemu che una cosa a fa :unisceci pé spazza tutti sti manghjoni chi si spartenu a Corsica di poi sempre .Ma qual'è chi un 'ha un figliolu ,o un parente chi a trovu un travagliu grazia a Rocca Serra o Giacobbi ?E ghjuntu u scutinu ci vole a paga e so dèbite .Eccu induv'ellu si trova cio chi ci face sparisce ,un simu piu maestri di u nostru destinu !!!!!!

27.mandatu da estrimei u 08/03/2010 16:31
o Corsu ingannadu,
dici:IE SO CUMMUNITARISTU : i mei per cumincià e dopu l'altri !!
quelli chi votanu a Giacobbi , a u conte di Cala Purcina ,a Zuccarelli..... a pensanu cusi : volenu e piezze, i mercati , a cunsiderazione per elli e pe i soi e si ne impippanu di u Populu.
eu un so micca cummunitaristu , so naziunalistu : mi ricunoscu di una nazione (ancu s'ella un he ricunisciuta) e vogliu campà nantu a terra di u mio Paese 'ncu i listessi diritti che i mio cumPaisani.

i pertiti pulitichi , ancu naziunalisti ,un ripresentanu che l'edee di una perte(i so pertitenti) ; un ellettore un he micca sempre d'accunsentu 'ncu tutte e pruposte di una lista (eu aghj'ha vutà CL e ci sò qualche cose chi un mi gherbanu).
si noi , u Populu , so purtemu un discorsu naziunalistu, i pertiti sò cundanati a seguità.
oghje i pertiti (CL e FC ) pratecanu piu a lingua francese che a lingua corsa , mettenu in davanti a citadinità e mettenu da cantu a naziunalità. tocca a noi di mettelli i termini

28.mandatu da Corsu ingannadu u 08/03/2010 17:51
O amicu estrimei, tutti l'elétti che tu ammènti, so eletti da quale ?Da i "corsi "(u populu),
ie e a mintengu so cummunitaristu (ci so di i corsi ch'un so micca naziunalisti, chi si dicenu francesi m'a chi campanu a l'usu corsu chi parlenu sempre in corsu ecc..;allora chi certi "natios" so sempre a sfrancisa ecc...,).
Ma chi ghjè una nazione senza un populu?? Per me a Nazione ghjè a cuscenza d'appartène a una Cummunita Storica ligatta che la è,da una Lingua,una storia,una religione ecc..,e quessa simu in traccie di perdella (a cuscenza).

29.mandatu da linguaccia u 08/03/2010 17:58
O Anto, un ci caccemu l'occhji, ùn si criticheghja nè e personne nè e piazze, cum'elli a facenu quelli di i" partiti francesi", parlemu di d'IDEULUGIA, di prughetti si sucietà, o nostru destinu ùn n'hè simu più maestri perchè ghjente scritti nant'è liste si permettenu di votà dunque di "piglià decisione pè i corsi", aiutatti ch'elli so pè u "clan" ci vole à tuppà a surghente, naziunalisti averebbe vintu in 92, incu solu corsi nant'à e liste...ssa ghjente ùn devenu esse scritti, allora chi certi dicenu " ponu esse scritti dopu a 10 anni "( cume in kanaky, d'altronde..) pè mè devenu parte dopu a "10 anni di sole, basta" !!
Soli i corsi so in casa soia in Corsica !! Volerebbe ghjustu chi i mo figlioli sianu strannieru induve elli, andate appena inde sse scole e ssi culleghji e ppo viderette so simu sempre in corsica, "ùn fate i bobo"..
O Estri, capiscu quandu ti dice "tocca a noi", mà ghjente elletti, s'apoghjerani nant'à u so successu pè impone à so leghjimità, e l'omi in piazze so sempre più suvitati (sopratuttu in corsica..) e tandu ùn ti steranu mancu più a sente..allora chi si numerosi simu a ù, andà a vuta o a minacciali di vutà contru, allora tandu di ponu ascultà, per elli ùn ci hè che u votu chi conta, cume "i clanisti", o populu u lancianu cantà, CUME SEMPRE !!!

30.mandatu da Esse o un'esse u 08/03/2010 21:00
Ci'ole a fa parte tutti i strangeri ,ancu ch'elli chi so maritati cun i corsi,ci'ole dinno piglia l'A.D.N di i corsi per sape s'elli so veramente corsi.
Ci'ole a ritruva l'A.D.N di i corsi chi so morti ,cumbattentu Roma ,(la bataille du champ de myrthe) chi deve esse ind'é u fiumorb'u.
Ci'ole a definisce qualé so i veri corsi ,osinno cumu fa

31.mandatu da Corsu ingannadu u 08/03/2010 21:29
Perchè c'e un adn corsu? E i corsi esistenu veradimente ? Humbè !!!!! E a corsica ghjè un'isula??E i nostri antenati un'eranu di a pianeta marzu omancu.!!!!

32.mandatu da L.E.F u 08/03/2010 22:36
Chi cerchi l'Adn si razzistu, forse ci saranu i "geni corsi" mà andemu indé ssu sensu pigliemu l'etnia e a cultura, quale populu campava in Corsica in 1769 ? portughese, arabi, francesi, chinesi, afgani, polonesi, no eranu i corsi, !! chi ghjeranu ?: africani , americani, asiatichi ?? no !! europeani, latini !! Chi parlavanu ? Arabu ebreu ?? no corso e tuscano, eranu buddisti, musulmani, animsiti ?? no catholichi !! ùn vulianu nè ghjenuvesi nè francesi, e i so antichi ùn vulianu nè i saracini !! A bandera corsa chi riprasenta: A Sottumissioni a l'Islam, inno u cuntrariu, e chi di di u nostru innu, tuttu fora di "Laique, allora se vo ùn sapete cio ch'elli so i corsi, ghjè chi vi ne site scurdati o peghju che vo l'avete rinigatu, mà perchè s'allienazione? pè piace a ùn so quale, perchè ????? I corsi stavanu dighjà qui 300 anni fà , quelli chi falanu chi so i so discendenti, quessi soli so i veri corsi mà sarebbe forse obbligati di piglià i furesteri maritati e assimilati à i corsi, mà l'altri no , si no smarisce smariscerà l'anticha razza di Cyrnu...tandu stemu puru incu a Francia, o mancu averemu a securità..e u confortu. e trippa pè a LIBERTA !!!! Vince pè un more ma micca More pè Vince (L'elezzioni)..

33.mandatu da Esse o un'esse u 08/03/2010 23:49
So u scientificu aghju fattu ricerche ,so andatu assai luntanu , i mio antenati eranu digia in filitosa é un eranu micca catholichi ,eranu Athé ,é parechji corsi so sempre athé é nostre mammone digianu ,é a natura ,hé cusi.
So u veru razzistu corsu ,i zitelli in casa parlanu corsu ,a mé moglia parla dinno u corsu ,manghjemu corsu , u cumpremu nunda di so chi ghjunghje da fora ,u so mai surtitu di u mio paese ,dapoi a scola .
Aghju capre é pegure ,ortu,a mio moglia ampara a scola in casa a i zitelli,aghju fattu a mio casa solu , cun l'aiutu d'amichi.
Manghju cume l'antichi ,melu ,latte ,pesci ,cogliu frutti di mare hummm,,cullanu per a mio moglia ,hé una vera amazone .
I paisani mi chjamanu u cignale spiritu ,dicenu dinno anc"assai ché tu si corsu.

34.mandatu da L.E.F u 09/03/2010 08:26
Un ci hè bisognu di campà cume à a preistoria pe esse corsu, màsolu un scurdassi di cio che no eramu veradimente, esse "athé" oghje un vole di dumane, U XXI seculu sara u seculu di u ritornu di e "religione e di l'indentità", a digia ancu u pinzuttu "Malraux" un perdimu troppu e nostra, ci puteremu rivenne forse.. e po esse athé un vole di esse contra e ghjese chi ci so in ogni paese e ùn vole dinò "esse maometanu".... i corsi di filtisosa ùn eranu "athés" avianu a "fede di tandu" cultu di l'antichi e politeismu e po so stati cristianizzati, mà una religione chi un a mai cacciatu veradimente a cultura populare ch'ellu c'era nanzu...cume i baschi o l'irlandesi...

35.mandatu da linguaccia u 09/03/2010 08:32
Mà perchè vulè diventà cio ch'ùn simu ????????????? firmeme cio che simu e populu corsu sarà vivu e un smariscerà, un femu tantu casu a e "scimità" francese: laicité, universalisme, metissage, pacifisme, mentalità ""peace a and love droga chi ruvinatu e nostre mente e quelle di a nosttra ghjunventu dipoi o mancu 50 anni e forse ancu di più ..

36.mandatu da linguaccia u 09/03/2010 08:38
ESSE CORSU GHJE TUTTU CIO CHE SO SIMU? TUTTA A NOSTRA CULTURA E A NOSTRA STORIA, E SOPRATUTTU UN ESSE CHE CORSU.....

37.mandatu da P 08 u 09/03/2010 08:44
Salute a tutti !! Vecu chi simu tutti inchietu pe a nostra "Razza" ghje "bon e gattivu" segnu a tempu...di chi latu l'affari anderanu....ùn si sà!!, speremu mà dinò femu....qualcosa, mà micca "allienazione" o "rinigazione"

"Les peuples qui survivront seront ceux qui ont la plus longue mémoire" F.Nietzsche

38.mandatu da SP u 28/05/2010 19:07
ASSESSORIA ACADÊMICA, INTELECTUAL, EMPRESARIAL E TECNOLÓGICA

Empresa especializada em assessoria em LIVROS, MONOGRAFIAS, TCC´s, PRÉ - PROJETOS, ARTIGOS etc.
Somos uma equipe especializada em assessoria e orientação de trabalhos universitários, ou qualquer outro trabalho que exija em sua estrutura a aplicação de metodologia cientifica. Estamos no mercado há 18 anos, sendo 6 na Internet hospedados nas páginas www.dissertacaoetese.com.br e www.helpuniversitarios.com.br, e inscritos de forma jurídica sob o CNPJ: 11.641.989/0001-39, responsável por uma cooperativa composta por mais de 500 profissionais entre Mestres e Doutores com especializações dentro da área de orientação e metodologia cientifica.
Nossos professores comprometem-se com a elaboração de trabalhos INÉDITOS, além de bibliografias atuais, de forma que todos os trabalhos são passados por um sistema de capta possíveis plágio pela internet, garantindo assim a afirmação aqui realizada.
Vale frisar que apesar de haver uma exposição de nossa parte, o inverso não precisa ocorrer, já que o sigilo de nossos clientes é uma máxima observada em nosso cotidiano empresarial
Consulte nosso mega Promoção !!!!!

Entrem em contato agora mesmo:

www.helpuniversitario.com.br www.dissertacaoetese.com.br

Telefone 24hs : (011) 2626-9225

Email: monografias.tese@gmail.com
































Novu cumentu :