Accueil
Envoyer à un ami
Version imprimable
Partager

Veolia, Easy-jet... Ste World Company chì si volenu cumprà a Corsica

Tempi fà, hè l'uffiziu San Ghjorghju chì s'era impatrunitu di l'isula. St'ultimi anni, sò e World Company chì vedenu in a Corsica una terra suldaghja... Postu chì ghjè u soldu chì face cantà u prete, seranu capaci i nostri pulitichi à fà fronte à l'assaltu di l'imprese?



Veolia, Easy-jet... Ste World Company chì si volenu cumprà a Corsica
Quandu Veolia si traveste in Kyrnolia per allusingà l'Università...

Simu d'aprile 2006, sei mesi dopu chì Dominique de Villepin abbia rigalatu a SCNM à Veolia. Qualchissia chjama à Antone Aiello, u presidente di l'Università di Corsica. Li prupone di creà una scola di tennulugia alta nant'à i mistieri di l'acqua. Oppostu à a privatisazione di l'insignamentu superiore è impenseritu da a manumessa d'imprese maiò nant'à a vita lucale, li face capì chì l'Università ùn hè ancu quella di Veolia. Ma sò chjuccuti...

In u 2006, a CSC, un sindicatu studientinu prupone l'elezzione d'una persunalità esteriore : Dumenicu Orlandi, u patrone di Kyrnolia... Fatt'è fine, hè u piscadore naziunalistu Gherardu Romiti chì serà elettu à u CA. Era prupostu da un antru sindicatu, a Ghjuventù Indipendentista. Listessu ghjornu, Jacques-Henri Balbi face entre à Ricardo Petrella in u Cunsigliu Scentificu. Hè sopratuttu cunnisciutu per e so critiche in pettu à e multinaziunale di l'acqua.

Oramai, l'appettitu di Veolia si gira versu u trasportu internu. Quale hè chì averà a maestria di i treni in u 2010? Sottu sottu, in i curridori, scumbattenu da fà soi u trinichellu è via, u trasportu di u mulizzu incù u trenu... Tandu, ùn li mancherebbe più chè à apre un impresa di beccamortu da ch'elli ci portinu ancu in campusantu...

Easy-Jet ma big azezume

S'hè amparata in a simana chì a cumpagnia Easy-Jet ùn sarebbe micca candidata à a chjama d'ufferta lampata da a CTC. Perchè? À contu soiu, u quadernu di e cariche seria fattu per ch'ella vinci a CCM. È s'è e cundizione serianu stabilite, micca in funzione d'Easy-Jet è di a CCM ma di i bisogni di i Corsi?

Duie passate per una lezziò

L'inghjocu maiò per l'avvene, hè a nostra capacità à mantene à prò di u cummunu, u rapportu di forza trà l'interessu publicu è l'interessu finanziariu di e multinaziunale. A crisa finanziaria, ancu s'ella ci costa caru, ramenta quantu in demucrazia u puliticu deve avè a suprana nant'à l'ecunumia. Oghje chì hè oghje, i soldi sò suldati. Hè scorsu u tempu di l'invasione barbaresche à colpi di mazzette è di pistulettate. Ch'elle fussinu nant'à e torre o in altrò, di sentinelle, ùn n'avemu sempre bisognu?

A fame di certi ci puderebbe rode ancu l'anima. Denaru, acqua è focu, si facenu strada in ogni locu...

u 14 di Dicembre 2008
Veosaurus



1.mandatu da estrimei u 14/12/2008 08:29
bè ! o Veosàuru !
bella pagina d'infurmazione!
un sapia micca chi a csc era diventatu un sindicatu di vinduti !
he , quantunque , vergugnosu chi certe infurmazione s'amparinu di ribatullu !
torna una volta vogliu ringrazià a Piazzetta per tutti i sforzi ch'ella face per apreci l'ochji

2.mandatu da vinz della conca u 14/12/2008 23:21
Mi pare esse megliu chi l'impieghi dipendannu di l'intraprese private e micca di l'eletti!
Camillu, Paulu u grassu, Fanfan u senatore e l'altri un cuntrollenu micca Veolia, Easyjet e tant'altre, ma cuntrollanu u caminu di ferru, a ccm e ancu l'uffiziu idrolicu!
Sarrannu peghje e world companies, verramente?

3.mandatu da boris u 14/12/2008 23:35
iè o vinz, ghjè peghju.

e "world company" so qui per fà i soldi. cio chi l'interessa he di fà i benefizii, pocu impreme l'omi è u sviluppu di stu paese. una volta fatti i benefizii, si ne vanu, rivendenu, delucalizeghjanu, mettenu fora. st'intraprese un vedenu che u so interessu, e so azzioni so pensate in altro, à millaie di chilometri di qui.

ieghja u casu di butler cù a CCM...

trà u liberalisimu è u clientelisimu, u menu male he ancu u segondu

4.mandatu da estrimei u 15/12/2008 08:14
so forse nicentre, ma mi pare chi se no vuliamu -u Populu Corsu- puderiamu suttumette u liberalisimu e u clientelisimu a una pulitica generosa chi rispetta a tutti.
per disgrazia, ci he troppu ghjente chi crede chi so ch'o dicu so sogni e chi un pudemmu che suttumetteci.
aa ! s'aviamu u curaggiu di cacciacci i machi di l'ochji , e di suttummette tutti sti scrucconi!

5.mandatu da Veosaurus u 15/12/2008 08:30
O Vinz, sò d'accunsentu cun ciò chè tù dici.
À contu meiu, u monopolu, ch'ellu sia privatu o publicu, hè assai pessimu per noi. Fattu si stà chì pianu pianu, à u monopolu publicu di u Statu via u clanu, si sustituisce un monopolu privatu chì puderia esse ancu più dannevule per i Corsi. À u monopolu d'un tale o d'un tale, li preferiscu una situazione di cuncurrenza. Ci avvidimu, per esempiu, chì u monopolu di a grande distribuzione accresce i prezzi à a cunsumazione.

6.mandatu da estrimei u 15/12/2008 10:55
o Veosàuru ,
custi, un so piu d'accunsentu. avemu a prova, in Corsica ,forse di piu che d'astro, chi a cuncurenza he una scusa . quelli chi ammaetranu u cummerciu si sentenu per fà i prezzi ; ch'ellu sia nu a "grande distribuzione", nu e farmacie , 'nde i mercanti d'essenza..... e in astro , ognunu po rimarcà , ch'elli si sentenu per circà u prezzu u piu caru chi l'accunsente ee dopu u varieghjanu di qualchi centimu

7.mandatu da U Pastore Arrabbiatu u 15/12/2008 11:36
O Veosaurus, sò d'accordu ancù te.

Ma.. simu una pìcula ìsula, cù poche ghjente. U fattu è chi, si Carrouf si face 2 "géants" (aiacciu e bastia), ghje quasi un monopolu ! Pensu chi a cuncurrenza, ci vole a aiutala, micca cume a faccenu i nostri elletti e tutti quelli, ma quantunque, gestisce la.

Per me, u prublemu, e primu di cacciassi 95% di a classa pulitica lucale.. e dunque ci vole un mezzu di communicazione web tv per dà vere informazione economiche a i corsi, tutti, ancu quelli di a diaspora (in lingua corsa).

8.mandatu da GWM u 15/12/2008 11:39
forse ci pudemu aspettà un veranu "à a greca", s'ella cuntinuveghja cusi...

9.mandatu da vinz della conca u 15/12/2008 12:31
Sta questionne nantu a cuncurrenza chjama altri dibattiti, pensate a l'infurmazioni in u nostru paese, Corse Matin è solu, è bellu u risultatu...
Pè parlà di cunsummazione, speremu chi l'affacata di una world company cume leclerc facce suà mustaccione cappia!
Altrimente pensu chi duveremu seguità a parolla di GWM!

10.mandatu da Veosaurus u 15/12/2008 16:57
Spessu, sò listessi demucrati chì criticheghjanu l'unilateralisimu di l'USA è chì sustenenu quì un monopolu, à quandu privatu, à quandu publicu, o un clanu...

A suluzione ùn hè u multilateralisimu è u pluralisimu, in fatti di stampa, di trasporti, di pulitica...?

11.mandatu da estru miau u 15/12/2008 17:06
è di donne dinù !!! ;-)

12.mandatu da Quill'altru u 15/12/2008 18:09
Si dipende o Veosaurù. U liberalisimu th'à e so limite. Ùn pensi micca chì certi sittori devenu esse di a putenza publica ? L'acqua hè patrimoniu universale sicondu ti pare logicu chì a so gistione sia ind'è e mani di u privatu ?
Bellu articulu, pone quistione di primure per a nostra sucetà...

13.mandatu da Taravesu u 23/01/2009 00:59
eiu so d accunsentu cu cio chi si parla da i multinaziunali di l acqua, ma inquant a i quiddi di l aria no. Pensu ch iddu ci vurria d apra u marcatu di a concurenza di l'avio. ghje sicura chi una cumpagnia come easyjet un ha da vena in Corsica par fa pochi soldi e ghjusta apuntu ,hè quissa a legge di u marcatu. Saria ora ch'edda sighi una cumpagnia nova ancu s edda he straniera, chi faceni parechji anni ch edda scrucuneghja a i corsi a ccm.
ci vo a pinsa a quiddi chi parteni suventu in francia e sopratuttu i corsi chi faceni studii o chi so obligati a travadda qua. Ci voli a veda quantunqua i prezzi pà i "residenti" dighja, e pa quiddi ch un so residenti,vali a di quiddi chi piddani u bigliettu da marseglia par fa 300km.pochi i bastunati !!!
alora pensu che si,ci voli una vera apartura di ssu mezu di trasportu e tantu meddu pa a ccm

Ma nimu un ha amparatu qualcosa

Novu cumentu :