Accueil
Envoyer à un ami
Version imprimable
Partager

Era un 7 di dicembre in Turinu

U 7 dicembre 1977, hè nivatu è si secca di fretu in Turinu. 15.000 Corsi si ritrovanu à u stadiu cummunale di Turinu. Ùn sanu micca ch'elli anu da assiste à a notte a più magica di tutta a storia di u Sporting...



Era un 7 di dicembre in Turinu
Quandu di nuvembre 77 in Zurigu, l'UEFA disigna u Torino Calcio cum'è avversariu di u SEC Bastia per l'ottesimi di finale di a cuppa d'Auropa, si pensa ch'ella hè a fina di l'aventura pè i Bastiacci. E partite contr'à u Sporting Lisbona è Newcastle anu fattu piacè à tuttu u mondu, ma avà ùn si ride più.

Avà u vidite cusì u Torino, ma tandu hè un ogru. Un tìtulu di campione d'Italia durante a stagione 1975-76, sette internaziunali, è una squadra chì face a paura, cù i so picci di l'attaccu Pulici è Graziani.

I "gemelli" di l'attaccu turinese campione un'annu nanzu, Pulici è Graziani
I "gemelli" di l'attaccu turinese campione un'annu nanzu, Pulici è Graziani

À l'andata in Furiani Bastia ottene una vittoria stretta 2 à 1. Una piccula vittoria basta à i piemuntesi chì sò siguri di passà stu giru.

U ritornu serà difficiule in u famosu Stadio Comunale, teatru di e partite di u Torino Calcio è di a Juventus. Si conta circa 60.000 spettatori in sta serata cutrata di dicembre. Hè nivatu i ghjorni nanzu in a regione di u Piemonte è face un fretu chì si secca.

Tandu l'Italia cunnosce digià u fenomenu "ultrà". I tifosi i più accaniti di u Toro si stallanu in a curva Maratona.

Eccu un ritrattu d'una partita in l'anni 70 :
Era un 7 di dicembre in Turinu

Ma i ghjucadori turchini ùn sò micca soli. Sò 15.000 i Corsi à avè fattu u spiazzamentu. Parechji battelli sò partuti da Bastia, ma sò numerosi à esse venuti da Nizza, Marseglia, Liò, Parigi...

(Ritrattu publicatu nant'à u situ di R. Casamatta, induv'elli ci sò tanti ritratti pocu cunnisciuti !)
Era un 7 di dicembre in Turinu

Ma sì u Torino impressiuneghja, Bastia ùn hè micca senza nunda. Ci hè Johnny Rep, l'attaccante olandese venutu da Valencia è chì avia marcatu à l'andata.
Era un 7 di dicembre in Turinu

U geniu purtivechjacciu Claude Papi tene a so piazza dinù. Avia anch'ellu marcatu una rete à l'andata in Furiani.
Era un 7 di dicembre in Turinu

In difesa, Charlot Orlanducci, u leoni di U Viscuvatu ùn vole sente nunda.
Era un 7 di dicembre in Turinu

È sì Fanfan Félix hè feritu, Pierre Cahuzac titularizeghja un centravanti chì nimu cunnosce, un certu Abdelkrim Merry, dettu Krimau.
Era un 7 di dicembre in Turinu

U Torino si presenta cusì :

Castellini - Danova, Caporale, Salvadore, Mozzini - P. Sala, Pecci, C. Sala, Zaccarelli - Graziani, Pulici.

U Sporting ghjoca cusì :

Weller - Marchioni, Orlanducci, Guesdon, Cazes – Larios, Lacuesta, Papi – Rep, Krimau, De Zerbi.

(U ritrattu vene da Corse Football, un altru tesoru da andà à vede)
Era un 7 di dicembre in Turinu

U restu di l'articulu si deve stà à sente cun sta musica di Vangelis.

Iè, hè cumplettamente passata di moda, è chì pò fà ?

Ella dinù appartene à a storia di Bastia.

L'iniziu di a partita hè à favora di i Taliani. Cumbattivi, organizati, atletichi, i turinesi facenu soiu u ghjocu. E statistiche sò cun elli : anu 60% di liccia di qualificassi. 1 à 0 hè passanu u giru. Basta à fà corre i Bastiacci è à aspettà.

Ma passanu vinti minuti è accade qualcosa di miraculosu. Lacuesta chjappa u ballò, scarta u ghjocu pè Rep, chì dà à Lacuesta è chì rimette pè Larios chì sciacca una cannunata da 25 metri chì finisce in a rete : 1 à 0 per Bastia.

Un'azzione d'antulugia. "Les Bastiais mènent à Turin et Castellini n'en revient pas."
Era un 7 di dicembre in Turinu

Era un 7 di dicembre in Turinu

Ma u Toro hè una squadra di prima trinca. Trè minuti dopu, Graziani mette e squadre à paru : 1 - 1.

Tandu i granata si scatenanu è mettenu a pressione nant'à a difesa corsa, chì strazieghja. Finisce cusì u primu tempu.

U segondu tempu principia cum'è u primu avia finitu è Graziani ne mette un segondu (47u minutu). Face 2 à 1 pè Torino. A logica hè rispettata. Tandu si pensa chì Bastia s'hà da piglià una concia. I Taliani marchjanu versu un trionfu assiguratu, purtatu da u so publicu. I Bastiacci parenu spenti.
Era un 7 di dicembre in Turinu

Era un 7 di dicembre in Turinu

Ma era a notte di Bastia. 51u minutu : Cazes mette a panicca in a difesa taliana, surpresa. Dà à Krimau chì porta a partita à 2 à 2.

Ùn pare mancu vera à i 15.000 Corsi chì sò venuti.
Era un 7 di dicembre in Turinu

Accade allora un culpacciu per i piemuntesi. Rep mette un colpu di govitu à Mozzini chì casca seccu è chì finisce à l'ospidale. Torino hà fattu i so dui scambiamenti è oramai duverà ghjucà à 10 contr'à 1...
Era un 7 di dicembre in Turinu

Era un 7 di dicembre in Turinu

Ferma avà appena più di vinti minuti à ghjucà. Ammusciati d'esse ghjucati à a risa in casa soia, Torino si porta di manera massiccia à l'attaccu.

À u minutu 67, i Bastiacci sò assaltati è si difendenu cum'elli ponu. Krimau ricupereghja un ballò lampatu à a metà di u terrenu è fila solu solu versu a gabbia taliana.

U giuvanottu maruccanu chì nimu cunniscia piglia u ballò, traversa tuttu u terrenu, si ritova di pettu à Terraneo u purtiere talianu (Castellini hè surtitu, feritu), è cum'è un grande marca u terzu but...

Incredibile, Torino 2, Bastia 3 !
Era un 7 di dicembre in Turinu

A fiura di Krimau, à dinochji davant'à 15.000 Corsi, cù i so guanti rossi in a neve, face oramai parte di a storia.

Avà ùn ci sò più ch'è i sustenidori bastiacci chì si facenu sente à u stadiu cumunale.

Sò poche l'occasione pè u populu corsu di cunnosce u sìntimu di vittoria cullettiva. Quella notte, ondeci ghjucadori cù a maglia marcata di a testa di moru facenu nasce e stelle in l'ochji di i Corsi.

Pare ch'elli avessinu vindicatu à 700 anni di duminazione è d'umiliazione...


Era un 7 di dicembre in Turinu

I Bastiacci ponu andà à salutà u so publicu. Cum'ellu dice Hubert Tempête, "la fête continue..."
Era un 7 di dicembre in Turinu


È tandu, a cuufficialità in i giurnali...

Ritrattu : argusfoot.com
Era un 7 di dicembre in Turinu

U resucontu di u famosu ducumentariu di u poveru Michel Moretti


A partita sana, cù i cummenti di l'epica di Pierre Cangioni


u 6 di Dicembre 2014
U Sgaiuffu



1.mandatu da sardu u 06/12/2014 17:54 (da un teleffuninu)
TORO MERDA ALÉ,TORO MERDA ALÉ,TORO TORO TORO MERDA ALÉ!(pé i turinisti micca torinesi!) Forza JUVE!!!!!! Scusate u sfogu...

2.mandatu da sputicu u 06/12/2014 19:14
u 7 DI dicembre

3.mandatu da 3637 u 06/12/2014 23:06
ci hè statu ALERIA , u SECB è quelli chì hà vissutu què, mai si ne scurderanu...tandu si!

4.mandatu da acquaviva u 07/12/2014 09:50
chi ricordu:aviamu cantatu u culombu nenzu di rientra ne u miticu cumunale cu a curva maratona bullente.PECCATU NE L'ARTICULU UNA FRASA DEGNA DI A PRUPAGANDA CULUNIALE FRANCESE:800 ANNI DI DUMINIU??U LIAMU CU I PIEMUNTESI O L'ITALIA?????????????????

5.mandatu da Patanok u 07/12/2014 11:35 (da un teleffuninu)
Serata cutrata di nuvembre... U 7 di dicembre...
Forse c hè un picculu sbagliu ;-)

Per u restu ghjè una bella cannunate per a vigilia di a festa naziunale!

6.mandatu da anto u 07/12/2014 11:52
e a cazzuttata tamanta cù i taliani, a timpesta nanta u batellu....

7.mandatu da sardu u 07/12/2014 12:35 (da un teleffuninu)
C'eri acquaviva??

8.mandatu da antone u 07/12/2014 12:40
Perchè? Genuva ùn hà micca culunizatu a Corsica? I Corsi ùn si sò rivultati contru à i Genuvesi in u 1729?

c'ere ancu tandu o Acquaviva ?

9.mandatu da sardu u 07/12/2014 13:31 (da un teleffuninu)
Stù a parlà di calciu eiu acquaviva,un hé pruvucazione a mia...

10.mandatu da acquasalita u 07/12/2014 22:41
o antone chi raportu tra Genova e Torino ? in piu in l'italia di tandu una cità o una regione ne dominava un altra , un si po parlà di culunialisimu . eramu supranati micca culunisati , un ci sbagliemu d'epica .

11.mandatu da acquaviva u 10/12/2014 14:01
FORZA ACQUASALITA!! IN TURINU C'ERU O SARDU E PER ANTONE LEGHJI BE CIO CH'AGHJU SRCITTU:U RAPPORTU TRA GENUVA E L'ITALIA ?????RIPETTU SO ARGUMENTI DI PRUPAGANDA CULUNIALE FRANCESE TIPU RIOLACCI E ALTRI CANI DI GUARDIA DI A REPU FRANCESE CUME FUNU DI L'URSS.PRESTU HA DA FINISCE U SO REGNU QUELLU DI L'IMPUDENZA E DI L'ANIME DANNATE DI L'UNA E INDIVISIBILE.

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta