È s'è vo erate malatu senza sapella ?

Un studiu di circadori americani dice chì l'addizzione à i siti di rete suciali (cum'è Facebook è Twitter) si pò apparagunà à un'addizzione à a droga o à l'alcool.

Pè i scentifichi di l'università di Chicago saria più difficiule d'arrestà di fumà ch'è d'arrestà di "pokà" nant'à Facebook.

Femu un test : quantu volte andate à ghjornu nant'à Facebook, per vede ciò ch'elli dicenu i vostri amichi (spessu sò cunnerie, ma bon...) ? Quantu volte andate à vede ciò ch'ella(ellu) face a(u) vostra(u) ex ? Quantu state tempu à aspettà cum'è un lonzu, chì qualcosa si passi nant'à Facebook (spessu, ùn si passa nunda, ma bon...).

Si a vostra prima azzione di u ghjornu hè di cunnettassi nant'à FB, è a vostra ultima nanzu di chjinavvi hè di lampacci un ochju, allora site tocchi.

U fenòmenu di dipendenza à ste rete suciale hè rinfurzata da l'applicazioni nant'à i teleffunini. Attenti à l'overdosa... I malati campanu male d'ùn esse più in leia cù stu mondu virtuale, st'amichi più o menu veri.

D'altronde, u 6 ferraghju era dinù a Journée mondiale sans téléphone portable.

Bon alè, circate à cappià appena stu mondu virtuale è campate appena in u mondu reale. Ci hè un filmu, un libru o un apperitivu chì v'aspetta. À u peghju, ci hè a pagina Facebook di i fans d'A Piazzetta chì conta più di 6.200 membri.

Ci site voi ?

Hà cumminciatu u filmu nant'à u "commandò Erignac" (leghje l'articulu in Corse-Matin ). Si chjamerà "Les Anonymes - Ùn pienghjite micca".

Si pò discorre di a scelta di stu sugettu. Ùn serà micca appena troppu à bon'ora per fà una fizzione nant'à un sugettu sempre d'attualità ? Chì serà a visione di u scenaristu nant'à qualcosa di sempre frescu, mentre chì parechji prutagunisti sò sempre in prigiò, chì tante famiglie sò sempre in a suffrenza ? Chì riteneranu a ghjente di a versione di Pierre Schœller ? Davant'à a qualità di u telefilm calamitosu nant'à l'affare di e paillottes "Mission Sacrée;, ci hè di chè accoglie sta nutizia cun angoscia.

Ùn si pò ghjudicà nanzu d'avè vistu u filmu, ma ci hè di chè interrugassi.

Allora piuttostu chè di fà un filmu nant'à un sugettu chì ùn face ancu parte di a storia, eccu qualchì idea.

"Aleria 1975" : cun Leslie Nielsen (ancu si l'attore hè mortu) in u rollu d'Edmond.
"Le Pont de la rivière Golu" : nant'à a battaglia di Ponte Novu, cun Nicolas Cage in u rollu di Pasquale Paoli è Michel Galabru in Louis XV.
"Le Chemin des Dames" : nant'à u macellu di a guerra di 14-18 cun Kad Merrad, Jacques Bastianesi è Richard Bohringer in u rollu di i suldati corsi stirpati in prima linea.
"Sur la route de Montedison" : nant'à l'affare di i fanghi rossi in 1972.
"Elu malgré moi" : cun Jean Dujardin in u rollu di Camille de Rocca Serra.
"Il était une fois la CFR" : nant'à u muvimentu di a Corse Française et Républicaine, cun Cauet, Gérard Jugnot è Thierry Roland pè i primi rolli.
"Borgu 1768 : Corse 1, France 0" : nant'à a battaglia vinte da l'armata corsa nant'à quella di a Francia.
"Fraude Academy" : Quessu, u cunniscite tutti.

À voi di truvanne d'altri...

Serà a fine di l'altore ? L'ocellu mìticu di a muntagna corsa, in francese gypaète barbu hè più chè mai minacciatu di morte. L'infurmazione ci vene da u situ Ambiante.

Quattru anni fà, c'eranu una decina di coppii. Annu, ùn ci n'era più chè sei. Oghje ùn sò più chè cinque.

Hè difficiule di sapè qualesse sò e cause, ma si pensa chì l'altore ùn trova più di chè manghjà. L'altore si nutrisce di baschicci è trova di menu in menu animali morti in a muntagna. E muvre sò poche, è bande di capre è di pecure ci n'hè sò di più in più scarse.

Oghje a minaccia di vede l'altore smarisce di Corsica hè seria ci dicenu l'associ di difesa di l'ambiu. L'avemu da lascià more ?

S'è vo vi n'erate scurdati, sappiate chì l'inguernu face u fretu, è quand'ellu face u fretu, ci hè a neve.

Incredibile nò ?

L'episodiu nivaghjolu chì ci vene da Siberia hè in bocca à tutti è alimenta tutte e cunversazioni.

Eccu u top 10 di e frase e più prununziate in Corsica st'ultime quarant'ottu ore :

• Chì fretu !

• Hè nivatu ? Quantu ci hè centìmetri ?

• Buh la neige oh ! Mets la photo sur Facebook !

• Il passe chez toi le portable ?

• Quandu anu da vene EDF à rimette l'elettricità ? Dumane chjamu u forum di RCFM.

• Je te l'avais dit d'acheter le Cayenne pour passer Vizzavona...

• Ancu cù a vesta Millet si pò crepà di fretu ! J'aurais du prendre la North Face.

• Et le chasse-neige il passe quand ?

• Ci serà u macciu sàbbatu in Furiani ?

• Cumu si mettenu ste catene di m...

Almenu, cù a neve a ghjente parlanu...

Aviamu digià dettu chì l'indignati in 4x4 ùn facia micca assai seriu. U ritrattu di Corse-Matin di u 30 ghjennaghju hè ancu peghju.

Allora chì da per tuttu in u mondu l'indignati sò giovani addisperati disimpiegati, chì battenu a closcia in brama d'un travagliu, u ritrattu di l'indignati corsi d'Air France pare una pubba pè Ted Lapidus o pè e Ray-Ban Aviator.

Aiò o zitelli, fate un sforzu ! Per esse un veru indignatu, ci vole à esse vestutu cum'è un disgraziatu !

Heu ! = kikou
Oh ! = salute, cumu stai oghje ?
Kif ? = chì faci ?
Ghjng = ghjungu
Tasp = t'aspettu
Spct = spicciati !
MCF ?!? = ma chì faci ?
Longu. = Trovu ch'è tù sì veramente longu à vene.
Vab ? = và bè ?
Bnnt = bona notte
Mip = mi piace
Mip AAA = mi piace assai assai assai
Staz = sta sera
Tenimacap = tenimi à capu
Titengacap = ti tengu à capu
Trgz = ti ringraziu
Nimp = n'importa chè
MNF = mi n'infuttu
PIT = panza in terra
Chjmm = chjamami
Vap = vai pianu
VAFL = vai à fatti leghje
A dp = à dopu
A dm = à dumane
A prst = à prestu
TTGC = ti tengu caru
MMKI = mi manchi
TTVB = tuttu và bè
Mistum ! = mi stumachi
TMIC = ti manghjinu i corbi !
O connu ! = :-(
KIFCC = chì facciaccia...
Kib staz ? = chì bei sta sera ?
Per kwale voti ? = per quale voti ?
CFPVPSC ?!?= Cumu faci per vutà pè stu connu ?
Aghju da sciaktt 1 KBD = Aghju da sciaccatti una capata
MAT staz ! = metti a toia sta sera !
Flikacci !!! = fate pianu chì ci sò i flicchi nant'à a strada
Penankap... = aghju passatu una bunissima serata, ma credu ch'aghju betu appena troppu
Ki macciacciu = u Sporting hà persu, una volta di più...
Sì megliu tù ! = mi pare chì sta zitella hè propiu bella, nò ?

À voi di truvà a seguita...

E 38.000 firme di a petizione pè u rispettu di u 5 di maghju ùn anu micca ghjuvatu à nunda. Noël Le Graet (presidente di a FFF) è u mustacciutu u più antipaticu di u mondu, Frédéric Thiriez (presidente di a LFP) anu fattu un cummunicatu cummunu (nant'à u situ di a LFP ), induve s'ampara chì :

La Fédération Française de Football et la Ligue de Football Professionnel ont décidé ce vendredi d’un commun accord qu’aucune rencontre comptant pour une compétition professionnelle ou amateur ne se jouera ce 5 mai 2012 sur l’ensemble du territoire, en mémoire des victimes du drame de Furiani qui a eu lieu il y a 20 ans, le 5 mai 1992.

Hè dunque una vittoria tremenda pè u cullettivu di e vittime di a catastrofa. Ma u cummunicatu hè chjaru : si parla solu di u 5 maghju 2012, è micca d'una decizione definitiva.

L'ogettivu iniziale hè di mette in piazza una ghjurnata di cummemurazione, tutti l'anni, nant'à u mudellu inglese. È quessa, ùn ci semu ancu.

U 5 di maghju 2013 casca in dumenica. Si ghjucherà ?

V'arricurdate di l'orrìbile lipdub di l'UMP ? Pensavamu tutti ch'ellu era impussibule di fà peghju.

Ebbeh nò, a squadra di campagna di François Hollande hà trovu mezu d'esse ancu più ridìculu. Anu battizatu stu cosu "le geste de ralliement de François Hollande".

Ùn si sà micca ciò ch'ellu significheghja, ma i puveretti di Gérard Darmon, Benjamin Biolay, Harlem Désir o ancu u disgraziatu di Jack Lang si ritrovanu in stu scumpientu di u net. Da vede quì.

I corci.

Speremu chì a campagna di e legislative corse serà cusì ricca. À quandu u "gestu di campagna" di Jean-Christophe, Camillù, Sauveur, Gilles, Simon o Jean-Jean ?

Avete rimarcatu cumu nant'à certe carte metteò, a Corsica hè vicina da a Francia ? Ci vole à crede chì a tectonicca di e placche ci punta ogni ghjornu appena di più versu a costa francese.

Serà forse per quessa, chì certi preferiscenu l'OM à i club corsi ?

Purtantu, a Corsica s'hè spiccata da u cuntinente francese circa 25 milioni d'anni fà, è in realità hè bella più luntanu è à u meziornu chè quessa.