Accueil
Envoyer à un ami
Version imprimable
Partager

E più grosse emuzioni di u Sporting

Esse sustenidore di Bastia vole dì suppurtà centinaie di macciacci, d'inghjustizie è di culpacci. Ma ci hè dinù qualchì mumentu di gioia. Eccu u best of. Ci scambia di a suppa di musu...



E più grosse emuzioni di u Sporting
È hè per via di sti mumenti chì u Sporting hè più chè u club.

Allora ch'ellu serà forse da quì à pocu campione di L2 (l'ultima volta era in u 1968), ci semu dumandati chì sò state e più grosse emuzioni risentite, in tantu chè sustenidore.

Da Philippe Gottardi à Claude Papi, passendu pè Yves Mangione è Antò Drobnjak, eccu e 17 più grande gioie chì anu fattu a storia di stu club appena speziale.

Di siguru, ùn pudete micca esse d'accussentu... À voi d'arricchisce stu classamentu in i cummenti.

17. Bastia - Martigues 2-1 (cuppa di Francia 1990-91)

Un arbitru calamitosu hè un bonu ingrediente per un maccione. Quellu di stu Bastia - Martigues di cuppa di Francia 1990-91 ùn firmerà micca in a storia, ma fù una partita ricca in emuzioni chì muscanu u futbol di l'anni 90 : Pounewatchy, cazzotti, calci è arbitru impauritu chì fischja un penalty nant'à César Nativi à l'ultima segonda sott'à a pressione di i bastiacci è di pùblicu.

Era bè, u futbol senza i soldi è senza Thiriez...

http://www.dailymotion.com/video/x53h18_bastia-martigues-90-91-un-match-a-l_sport

16. Bastia - GFCA 3-1 (1986-87)

Un picculu derby à i tempi di a D2. Un certu Pierrot Bianconi... E fiure si passanu di cummentu.

http://www.dailymotion.com/video/xlbnj6_sc-bastia-gfca-l-exploit-de-pierrot-bianconi_sport

15. Bastia - OM 4-1 (2003-04)

Mette 4 buts à l'OM hè sempre un grande mumentu, ancu quandu Chimbonda ghjucava à u Sporting.

http://www.dailymotion.com/video/x202xl_bastia-om-la-gifle_sport

14. Monaco - Bastia 0-1 (2011-12)

Una vittoria in luni sera à 4 minuti di a fine davant'à 1000 Corsi chì anu fattu u viaghju, sapendu chì u Sporting ùn vince mai in i grandi mumenti currisponde à una vittoria in finale di a cuppa di mondu, per noi chì semu abituati à soffre.

http://www.dailymotion.com/video/xon656_j23-as-monaco-sc-bastia-le-but-avec-frequenza-mora_sport

13. Bastia - Metz 1-0 (1995-96)

A Francia di Thierry Roland ùn parla chè di u Metz di Pirès è Pouget, leader di D1 nanzu di vene in Furiani. Purtantu, serà un but di l'eternu Antò Drobnjak à 2 minuti di a fine chì infiammerà à Furiani, pienu à tappu sta sera...

http://www.dailymotion.com/video/x691tb_bastia-metz-1-0_sport

12. Nizza - Bastia 0-1 (cuppa di Francia, 1991-92)

U spiazzamentu u più caòticu dapoi Torino, un battellu di a SNCM messu in pistìcciuli, una tribuna di Nizza arruvinata (serà chjosa dopu à stu macciu), più di 100 bombe agrìcule nant'à u terrenu, un ghjucadore nizzardu abbambanatu da una di ste bombe... tandu u ballò ùn era micca veramente un sport.

Vittoria 1 à 0 cù una reta di Piotr Rzepka. Di Fraya è Mangione sò in quarti di finale.


11. Bastia - Reims 1-0 (2011-2012)

But miraculosu di Khazri à u 91u minutu. È a Corsica sana torna à sunnià di L1... Semu di ritornu ?

http://www.dailymotion.com/video/xosw27_j24-sc-bastia-stade-de-reims-frequenza-mora-l2-saison-2011-2012_sport

10. AC Aiacciu - Bastia 0-1 (2009-2010)

Bastia hè muribondu. In l'ultimi di u classamentu, u Sporting si batte per ùn more è per salvassi in L2. U macciu ùn hè micca arangiatu è a vittoria strappata 1 à 0 face sperà torna appena. Tamanta gioia per sta sola vittoria fora di casa quist'annu.

Ma ùn si puderà evità a falata in National...

http://www.dailymotion.com/video/xcteki_ac-ajaccio-sc-bastia-le-resume-plan_sport

9. Lens - Bastia 1-3 (2011-2012)

Un macciu sott'à pressione dop'à l'affare Cichero à l'andata. Si Lens vince, volta in a corsa à a cullata. Ma u Sporting mette 3 buts in 10 minuti, sinònimi di L1 per i turchini. Strana visione d'un stadiu tamantu, cun 20.000 cumplettamente silenziose è 300 bastiacci scatinati. Ùn semu talmente micca avvezzi à a vittoria...

http://www.sc-bastia.net/v4/?p=14571

8. Lyon - Bastia 0-1 (Cuppa di a Liga 2000)

Quarti di finale di a Cuppa di a Liga in Liò. L'OL hè campione di Francia è torce tutti i so avversarii. Bastia ellu ùn hà mai vintu fora di Furiani quist'annu. Frédéric Née marca in u primu tempu ma l'OL di Sonny Anderson punta forte. À l'ultima segonda (92 esimu minutu !) l'arbitru fischja un penalty pè a squadra d'Aulas. Stumacati, anderemu dunque à e prulungazioni... Ma Eric Durand caccia u tiru di Tony Vairelles. Jean Pruneta pienghje...

http://www.dailymotion.com/video/x301c5_lyon-bastia-2000-coupe-de-la-ligue_news

7. Bastia - Nancy 0-0, 3-0 ap. (cuppa di Francia 1991-92)

Quarti di finale di a cuppa. Bastia in D2 riceve u Nancy di Zavarov, Zitelli è Vairelles tandu in D1. Zeru à zeru dopu à 120 minuti. Bruno Valencony caccia tutti i penaltys in un'ambianza sudamericana indescrittibile...

http://www.youtube.com/watch?v=paeFUdT5R-g

6. Bastia - Monaco 2-2 (1994-95)

Un arbitru chì face n'importa scatena sempre u pùblicu. Unu di i macci i più surrealisti in Furiani. Tandu Bastia perde sempre in casa soia è si dirige versu a falata in D2. Ma De Pandis fischja tuttu pè Monaco, è nunda per u Sporting.

2 à 0 pè Monaco, incidenti, invasioni è rivuluzione nant'à u terrenu... L'arbitru face arrestà u macciu in un'ambianza ostile. U publicu surreccitatu face 20 volti a "olà" allora chì i ghjucadori sò in i spugliatoghji è tandu ùn si sà si a partita hà da ripiglià.

Ripiglierà, è u Sporting vulterà à 2 à 2 in un'ambianza tremenda. Bilanciu : terrenu suspesu, macciu persu... Ma u Sporting ùn perderà mai più in Furiani quella stagione.

http://www.dailymotion.com/video/x50tvz_bastia-monaco-saison-1994-1995-le-f_sport

5. Bastia - Steaua Bucarest 3-2 (cuppa UEFA 1997-98)

Bastia manca u so macciu è perde in furia 2 à 0 contrà u Steaua di Lacatus. Ma a rivolta sona in a segonda parte per vultà à 2 à 2 cun duie rete di Prince, eppò 3 à 2 cun Mendy... Più chè un but è u Sporting hè qualificatu. Tuttu Furiani ci crede, mughja, punta cum'è mai... I ghjucadori di Bucarest ùn capiscenu più nunda è ùn sanu più induv'elli stanu di casa.

Ma a partita finisce cusì. U Sporting hè eliminatu ma stu macciu entra in a legenda.

http://www.dailymotion.com/video/x8uid7_sc-bastia-steaua-bucarest-coupe-uef_sport

4. Bastia - Nancy 1-0 (1993-94)

Una capata di Laurent Casanova manda u Sporting in L1 dop'à tanti anni di strazi è dui anni solu dopu à a catastrofa. Record di cartucciate in Corsica sta notte...

http://www.dailymotion.com/video/x2rpfe_25-mai-1994-bastia-retrouve-la-d1_sport

3. Bastia - Créteil 2-1 (2010-2011)

Una vittoria è u Sporting serà campione. Ma Créteil ùn vole sente nunda è a partita ferma à 1 à 1. Fermanu 10 segonde à ghjucà. Una volta di più, u Sporting passa à cantu à una grande occasione. Cum'è sempre...

Ma Sylla segna una rete venuta da ùn si sà induve è Furiani si libereghja di tanti traumatisimi è di frustrazioni accatastati durante anni è anni. Cù Hantz, Bastia ùn hè più a squadra di i macciacci è ritrova a L2.

Record di decibeli arregistratu nant'à u but di Sylla. È tuttu què ùn hè chè terza divisione...

http://www.dailymotion.com/video/xilq6q_j39-sc-bastia-us-creteil-le-resume-national-champion_sport

2. Bastia - St Etienne 2-1 (finale di a cuppa di Francia)

Solu trufeu vintu da una squadra corsa. Roger Milla è Louis Marcialis entrenu in a storia.

1. Torino - Bastia 1-2 (UEFA 1977-78)

Nunda chè u synthé di Vangélis vi dà a carne pulina. Johnny Rep, i guanti rossi di Krimau in a neve è Castellini n'en revient pas...

Fora di categuria : Bastia - Grasshopers Zurich 1-0 (UEFA 1977-78)

Ùn hè micca tutti l'anni chì un but manda u Sporting in finale di una cuppa d'Auropa. Claude Papi ùn hè micca un umanu, hè un diu.

u 1mu di Maghju 2012
U Webmaestru



1.mandatu da Uniti vincerrmu u 01/05/2012 01:45
Popopo m aghju da mette a pienghje o ghjente!! U sporting e a mo vita, u mo sangue!!! Uniti sin a vittoria e contr a francia!!!

2.mandatu da ccc u 01/05/2012 02:14
Nizza -Bastia u derby di Garibaldi

3.mandatu da Tesoru u 01/05/2012 02:15
Un seculu di passione... SPORTING CLUB DI A CORSICA!

4.mandatu da Alta strada u 01/05/2012 03:33
Pudemu aghjustà Bastia Sedan 2002 ancu sì l'affare si finisciarà male in finale...
È m'arricordu d'un maccione in Furiani dinò in 2002 contr'à Lens (à l'epica leader di a D1), perdiamu 1 à 0 eppo emu vintu 3 à 1 cù rete di PRINCE, JAU è VAIRELLES... Ùn vi spiegu micca a l'ambianza di scemi ind'à nostra tribuna EST!!!!

5.mandatu da 1981 u 01/05/2012 06:53
e katalinsky e douis pienghjenu sempre?

6.mandatu da Michè u 01/05/2012 12:33
match 7 : Valencony, feritu à i polzi, purtava per stu macciu bracciuletti "stregati" arrigati da u Senegal da Mamadou Faye.

7.mandatu da KüG u 01/05/2012 12:45
è chi si po ammirà in tribuna est nant'à a rete di Rodriguez ? u striscione di l'immurtali ULTRAS BASTIACCI (à 01:35).

8.mandatu da KüG u 01/05/2012 12:49
e ci vulerebbe à buscà quellu "tract" diffusu u ghjornu di a partita à u stadiu è in cità? si trattava di Thierry Roland, di "gaulois", di scapera di l'arbitru, ecc.

9.mandatu da ANTO u 01/05/2012 14:43
Qual'hè chi mi po assicura chi tutte sse fole valenu i morti di Furiani ?

10.mandatu da Michè u 01/05/2012 17:15
match 13: a partita ùn finisce micca à 1-0 mà 2-1: rete di Perez et Laurent.

11.mandatu da u webmaestru u 01/05/2012 17:35
Hè veru o Michè. Eccu a bona video :

12.mandatu da Talavesu u 01/05/2012 19:47
Semu tutti Bastiacci per u calciu,un club chi ci fa esse fieri di a nostra storia cummuna!
Forza Bastia e a Corsica....

13.mandatu da u miumese u 01/05/2012 21:58
SIMU CAMPIONI !!!!!


15.mandatu da Duttor' Caseddu💼 u 02/05/2012 22:44
Socu un vecchju supporter pumontincu di u Sporting, ma sustengu dino l'ACA o u Gaz...
Aghju vistu ghjuca: Trésor, M'Pele, Rep, Djazic, Baratelli, Leroy, Zimako, Papi, Marcialis, Pantelic, Olmeta, Tarantini, Heidkamp(!), Félix, Bauda, Larios, Lacuesta, Milla, Krimau, Fiard(!), Nativi, Franceschetti, Drobgnak...e ni passu tant'altri!
Pa' me, u piu bellu ricordu e quiddu maccionu contra Karl Zeiss Iéna (7-2) incu quidda 'ruletta' di Mariot in u 78! Aghju tinutu u bigliettu e ancu quiddi di Newcastle, Torino, Zurich e ben sicuru di Eindhoven...
Forza Bastia e ancu Aiacciu!

16.mandatu da Duttor' Caseddu💼 u 04/05/2012 01:26
Seti tutti diventati muti o chi?
Quant'a me sara u coghju di Marti sera chi metti u tempu pa passa!
Chi furtuna saria di vede qualchi derby a prossima staghjoni!!!

17.mandatu da Enid Blyton u 04/05/2012 16:03
Ghjeu Bastia n'aghju à pipà. Da tutta manera in ssa squatra so tutti frusteri, u football ci hè l'opium di u nosciu populu è ùn vi scurdeti micca chi Furiani hé u fruttu di sta cunnaria cumuna.

18.mandatu da Claude E. u 04/05/2012 21:14
e soppratuttu a sola cosa chi resta in sta povera isula... e cio chi resta di u spiritu dinu

19.mandatu da Luca (L'Aquila, Italia) u 05/05/2012 00:03
A tutti quelli che anche in terza serie non hanno abbandonato lo Sporting e anzi con ancor più forza hanno continuato a gridare "Ti seguita u mio core induve chè tu sia...", da L'Aquila nel cuore dell'Italia i più sinceri AUGURI per la seconda promozione consecutiva!

Anche grazie à a squadra turchina... combattete per non perdere la vostra identità, e con essa le NOSTRE comuni radici!

Sperando che l'A.C.A. e u G.F.C.O. dinù raggiungano i loro obbiettivi... FORZA BASTIA!!!


Naturalmente...
Un penseru pè e vittime di a tragedia di Furiani u 5 di Maghju di u 1992.
Un penseru per tutti l'Eroi di Ponte Novu.

20.mandatu da henry smart u 11/05/2012 10:14
per me firmerà sempre una tribuna in terra cu tutte ste vittime . A i tempi di a ghjustizia paolini serebbenu stati impiccati tutti i capimachja naziunalisti di u club di l'epica.

21.mandatu da Le type qui fait des bras d'honneur u 16/05/2012 15:00
Nantu à u macciu di Liò (numeru 8) ci so dui sbaglii:

- Liò ùn era micca campione di Francia à st'epica (era una squadra di capre tandu)
- U penalty era à a fine di e prulongazione (120isma minutu) è micca à a fine di u tempu nurmale.

Eccu ;-)

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta