Dimula franca, u mundiale sudafricanu hè statu propiu annuiosu, per ùn dì altre cose. À tal puntu chì a ghjente ùn ritenerà ch'è duie cose : u vuvuzela è un animale stranu chì hà u donu d'induvinà l'avvene : Paul u polpu.

100% di riescita
Duie scàtule cun duie bandere sò presentate à l'animale. Nentru si trova di chè manghjà. Quella chì serà scelta da Paul hà sempre vintu. Iè, i capimachja chì gestiscenu l'acquarium alemanu di u polpu ùn anu veramente nunda à fà...

Dapoi u principiu di u mundiale Paul ùn s'hè mai sbagliatu è hà trovu tutti i risultati di a Mannschaft. U polpu face megliu ch'è i prunòstichi di Jean-Michel Larqué !

Chì tanti Bwin, PMU, Winamax è Betclic, hè sempre u polpu chì vince à a fine.

A tal puntu chì u molluscu hè diventatu una star di u net è di i bookmakers è chì passa avà in diretta à a televisiò...

Scumettite chì da quì à qualchì annu vi serete scurdatu di e fìsiche di Leo Messi, di a faccia di Diego Forlan, di e mancate di Fernando Torres, di a prununzia di Schweinsteiger è di u nome di u coach di a Olanda. Invece di quellu pulpone ùn vi ne serete scurdatu.

Per quelli chì facenu e scumesse in linea, sàppiate chì pè a finale hà pronosticatu a vittoria di a Spagna.

Oghje, u tippu hà più di 100.000 fans nant'à Facebook, parechje pagine li sò dedicate è hè ancu statu minacciatu di morte.

È pè u Sporting, ùn puderà fà nunda u polpu ? O Paul, induve ghjucherà Bastia quist'annu chì vene ?

-50... -60... -70% ! Sò i saldi dinù per l'Equipe de France.

Ci vole à crede chì dapoi a Cuppa di u Mondu, a maglia di i "Bleus" ùn si vende più. Ancu megliu : e publicità cun Ribéry è Anelka ùn si vedenu più indocu. I sponsors anu fughjitu è piantatu e so campagne publicitarie (Quick, Crédit Agricole...).

Serà l'imàgine catastròfica di u bus in greva chì anu stumacatu a ghjente è i sponsors ? O quella di a disputa trà Evra è Duverne ? O forse i macciacci di i ghjucadori ? O a chigna di Domenech ? O quella d'Escalettes ?

In tantu, certi prufittanu di u mundiale ridiculu di i Francesi per fà una campagna di marketing. Ma forse micca quelli chì eranu aspettati : hè un associu di sustegnu à zitelli chì soffrenu di handicap.

La Fondation Motrice hà lanciatu a prima publicità anti-Bleus cun stu slogan : "Certains refusent de courir, quand des enfants rêvent simplement de marcher"...

Bisognu d'aghjustà qualcosa ?

"Le néant absolu" (Jean-Michel Larqué)
"Le mardi noir du football français" (Arsène Wenger)
"Le cauchemar du football français" (Christian Jeanpierre)
"J'ai honte d'être français" (Aimé Jacquet)
"J'ai mal à la France" (Thierry Roland)
"La pire équipe de France de tous les temps" (Eric Cantona)

https://www.apiazzetta.com/video/

Ùn s'era mai vista à una cuppa di u mondu è sò l'Irlandesi chì devenu spanzassi.

Ci hè veramente qualcosa di fràcicu in u mondu di u futbol francese è si ne passa tantu ch'ellu hè diventatu difficiule di seguità.

Femu un picculu riassuntu :

- una squadra chì ghjoca cum'è un pede (paria di vede 11 Fabrice Jau nant'à u terrenu)
- parechji clani chì anu fattu schjattà a squadra (i bianchi contr'à i neri, u goffu contr'à u bellu, i banlieusards contr'à tutti... a ci dice un giurnalistu di Le Monde
- ghjucadori senza onore chì sò ridiculizati da piccule squadre (a Nova Zilanda face megliu ch'è a Francia !)
- i giurnalisti di u mondu sanu chì si feliciteghjanu di a disfatta di i Bleus
- insulte di raccaglie (scusate ma Anelka ùn hà micca dettu "va te faire enculer, sale fils de pute !" ma solu "va niquer ta mère, enculé de ta race !"
- un ghjucadore esclusu ma u so presidente chì minimizeghja : "il a été exclu dignement et il est parti dignement" (Escalettes)
- un capitanu chì invece di scusassi parte à caccighjà à a "balance" : "il y a un traitre dans l'équipe, il faut le trouver"
- è torna cummedie, baruffe, insulte, demissioni...


Sta squadra hè cusì stumacante chì ancu in u locu induve stanu i Francesi, i Sudafricani anu festighjatu a vittoria di u Mèssicu.

L'Equipe de France hà decisu di passà à a risa in Mondovision è ùn hè siguramente ancu finitu.

Chì serà a prùssima nutizia ?

Anelka riintegratu ? Ribery chì annunzia a so ritirata ? Gourcuff chì annunzia a so cunversione à l'islamu ? Sarkozy chì dissolve a FFF ? Mathieu Valbuena chì s'hè impiccatu in a so stanza d'ottellu ? Laurent Blanc chì ricusa a selezzione ? Domenech chì si ne fughje nanz'à l'ultimu macciu di a Francia ? Villepin chì mette una panetta à Thierry Henry ? Escalettes tichjatu di colpi da Abidal ? Footix plasticatu ?


Cun questi quì, tuttu diventa pussibule...

Ci sò pienu di ragioni d'apprezià u Mèssicu :

Salma Hayek
a Corona
Carlos Santana
u Subcomandante Marcos
E misteriose Cités d'Or
i Pepitos
u filmu La Chêvre
i Mariachi

Dapoi u 17 di ghjugnu, ci n'hè un altru : l'eliminazione di a Francia à a cuppa di u mondu di futbol.

U penalty di Cuauhtémoc Blanco (37 anni) manda a Francia di Ribery è Anelka in casa soia, squadra qualificata di " la plus antipathique, la plus arrogante, la plus frimeuse, la plus bling-bling de ce Mondial sud-africain " da Marianne.

Voi chì aviate a paura di suppurtavvi i turisti a faccia pinta in bleu-blanc-rouge cù a maglia di Sidney Govou nant'à e spalle intraccia di mughjà "olololo chompions du monde rodidon !" pudete dorme tranquilli.

Tequila per tutti !

Nimu cunniscia u vuvuzela sin'à qualchì settimana fà. Oghje, più nimu u supporta.

U situ di a FIFA ne dà a definizione : "Imaginez le barrissement d'un éléphant et multipliez-le par des milliers de spectateurs, vous obtiendrez une petite idée de l'ambiance qui règne dans un stade sud-africain."

U tazzu hè infernale, ancu davant'à a televisiò.

Dopu à trè ghjorni di cumpetizione, ci n'hè digià una techja. S'ampara chì in Sudafrica ci hè digià una ruttura di stock di boules quiès per ùn più avè à sente stu rimore di diavule.

I ghjucadori francesi si ne sò lagnati. Gourcuff : "On ne peut pas communiquer, c'est hyper gênant." L'olandesi l'anu difesi durante i so intrenamenti.

Hè quantunque megliu di sente i cori di un " You'll never walk alone " ch'è e trumbittate infernale di i vuvuzela chì ci danu l'impressione d'esse in un vespaghju.

Imaginate un macciu in Furiani senza canti nè "Sò elli" ma cun stu bufuneghju cuntinuu...

Allora e petizione è gruppi anti-vuvuzela nant'à Facebook si sò multiplicati.

Megliu : a ripressione cummencia. Un sudafricanu hè statu cundannatu à 6 mesi di prigiò per avè tombu u so cane à colpi di vuvuzela.

Ma piuttostu ch'è d'esse sempre azezi, perchè ùn micca lancià u vuvuzela nustrale ? Postu chì ancu noi l'avemu in Corsica : si chjama "u cornu" o "u culombu".

Eccu, a Cuppa di u Mondu hè principiata è ne pigliemu per un mese di futbol è di vuvuzela.

Aspettendu a qualificazione (un ghjornu) di a Squadra Corsa à i Mundiali, fidighjemu appena à quale si pò sustene...

Voi dinù, fate e vostre pruposte in i cummenti !

Sudafrica : ci hè sempre una simpatia per a squadra di u paese organizatore. Tuccherà à i Bafana Bafana di fà un miràculu. È pò a Sudafrica hè in u gruppu di a Francia.

Mèssicu : nunda ch'è pè u grande Hugo Sanchez, a terribile maglia in 98, a manera di i ghjucadori di cantà u so innu naziunale, pè Cuauhtémoc Blanco chì hà inventatu u gestu tènnicu u più goffu di u mondu, è ancu pè Salma Hayek. E dinù perchè u Mèssicu hè in u gruppu di a Francia.

Uruguay : Pè Enzo Francescoli è l'altri grandi ghjucadori di stu picculu paisucciu (Ruben Sosa, Paolo Montero, Pato Aguilera, Daniel Fonseca...) è per José Batista (l'espulsu u più rapidu in CdM : 40 segondi di ghjocu). È dinù perchè l'Uruguay hè in u gruppu di a Francia.

Argentina : u più grande paese di u mondu di futbol. Ùn si contanu più i tercani (Batistuta, Kempes, Milito, Messi...), i tonti (Maradona, Caniggia, Palermo...), i gattivi (Simeone, Heinze, Veron), è i goffi (Tevez). Nunda ch'è pè l'ambianza à a Bombonera. Tutti i 4 anni sò i più forti, è tutti i 4 anni fiascanu. Sta volta, serà a bona ?

Grecia : nunda ch'è pè stu but di Charisteas è a faccia di Barthez dopu. Quantunque...

Inghilterra : Più ch'è pè sta squadra, ci vole à sustene l'Inghilterra pè i so sustenidori. L'inglesi sò quelli chì si spiazzanu i più numerosi per vede a so squadra è seranu parechji in Africa dinù. Nunda ch'è per e facce è e panze di i so sustenidori. Rispettu.

Stati Uniti : Bah, in memoria di u puverettu di Greg Vanney...

Allemagna : A Mannschäft ùn hè forse micca a più grande, ma u paese chì hà datu Harald Schumacher, Seville 82, u Kaiser Franz, der Bomber è Rudi Völler merita u rispettu. Cum'è sempre, seranu presenti.

Deutschland über alles !

https://www.apiazzetta.com/video/

Serbia : cumu ùn avè simpatia per u paese di Dzajic è Drobnjak ?

Ghana : Peccatu, Essien hè feritu. Ma ùn vi scurdate chì st'omu hà cunnisciutu anch'ellu l'Apo Beach è a fiera di u casgiu.

Olanda : Rep, Cruyff, Van Basten, u grande Ajax, Gullit, Rijkaard, Bergkamp è l'orribile Stanley Menzo. Paisucciu di grandi ghjucadori, a Olanda hà sempre avutu u futbol u più bellu è u più spettaculare. Ma di siguru, l'aranci ùn vinceranu micca à a fine.

Giappone : heu... bon perchè micca ?


Camerun : U paese di u grandissimu Roger Milla. Sì u Sporting hà vintu qualcosa in a so vita, hè grazia à ellu. Eppò ci hè un anzianu bastiacciu, un certu Alexandre Song.


Italia : Una bona ragione di sustene a Squadra Azzura ? Marco Materrazzi l'omu di a finale 2006, di siguru. Hè ellu chì hà fattu compie a cumedia di l'annate "I will survive". Nunda ch'è per quessa, à ringraziatti, Matrix !

Nova Zelanda : C'eranu i All Blacks in rugby, eccu i All White in ballò. Bon, micca sigura ch'elli passinu u primu giru. Nunda ch'è per u so sìmbulu naziunale cum'è u nostru : a filetta.

Brasile : Anu tuttu vintu, anu i più grandi ghjucadori, u pùblicu u più passiunatu... Ùn hè tantu originale di sustene u Brasile (almenu cusì site siguru di perde pocu).

Curea di u Nordu : Trà e duie Curee presente à u Mundiale, scegliite quella di u Nordu. Nunda ch'è per i spechjetti di Kim-Jong Il, l'ultimu stalinianu di u mondu

Purtugallu : I Purtughesi facenu parte di sti paesi chì anu sempre belle squadre chì ùn vincenu mai à a fine, arricurtatevi di l'annate Scolari... Ancu si Cristiano Ronaldo ci fatica i rossi è verdi ponu andà luntanu. O micca.

Spagna : Forse una di e squadre e più forte. Ùn anu mai fattu nunda dapoi seculi è seculi sin'à l'ultimu Euro induve i losers si sò discitati. Eppò nunda ch'è pè a faccia di Puyol cù u so stracciu nant'à u capu...

Honduras : Perchè micca s'è vo ùn avete paura di pigliavvi una concia. Eppò nunda ch'è per u so capitanu di ghjocu, un certu Amado Guevara.