U disegnu hè l'opera di Boemiana, andate à vede u so blog.

Cliccate nantu pè ingrandà a fiura.

Pocu suciale, esce ma ride pocu, riserva i so sguardi è i so surrisi à persone di u so rangu.

Spessu si ricunnosce cù :

U bigliettu di u cuncertu di U2 in Londra (a so canzona preferita hè « With or without you »... o forse hè quella chì passa u più spessu à e serate di u bar...? Hè a listessa, tandu ùn capisce micca e parole...)

A frangia cumu Kate Moss, bè nant'à l'ochji : u peghju serebbe di fà vede u so sguardu ipnoticu à un scunisciutu!

A maschera pè andà sott'acqua o spicchjetti integrali. Servenu à mascà e spressione chì a frangia ùn piatta.

A bocca sempre azeza. Chì una donna di rangu chì si rispetta ùn ride cù nimporta quale... u disprezzu hè naturale è u misteru hè priservatu.

Saccu Vuitton. Hè una tradizione di famiglia (cumu Natale in paese) nant'à 4 generazione.
Ogni donna di famiglia lascia bè pè scrittu st'eredità. Spessu hè in indivisione.

Tacchi à « acu ». Cumu ùn esse azeza s'ellu si marchja una ghjurnata sana nant'à un acu di 12 cm ?! Hè quantunque un investimentu di 400 euro (senza cuntà u « kiné » è u podologu...).

E chjave di l'Audi « à papa » (di u so cumpagnu u veru montasega) o di a so Cinquecentu nova nova (pagata da u divorziu cù u so « ezzzz »). A Cinquecentu pò esse rimpiazzata dà a Mini .

A cuppetta. Chì e bolle facenu prò ad ogni ora ! Tchin !

Fularu Hermès : 7 mesi di creditu à a cunsumazione pè 20 cm di seta fatta da un chinesinu chì anderà à a ritirata à 8 anni...

U chihuahua...sorta d'animale à puru usu decurativu. Segue cù grazia a so patrona è hè sempre assurtitu à ella. U nome ch'ellu porta hè impurtante è assai carcu di sensu (« Princesse », « Carrie », « Chanel », « Dior »...).

iPhone Burberry : « fashion » è mudernu pè una donna chì sà quant'ella vale.

È infine, a carta d'abbunamentu di a sala di musculazione. Carta VIP pè e so seenze Power Plate è i so corsi cù « Jimmy » u so coatch spurtivu (povaru montasega curnutu...).

Nimu l'hà vista, ma Mickael Vendetta, una di e più grande closce chì a Francia hà pruduttu, hà parlatu di a Corsica in l'emissione di tele-realità "La Ferme Célébrités".

U montasega di Groslay (ùn s'inventa micca un nome cusì...) hà dettu a so ammirazione per u nostru paese : "Si y a un pays où j'aimerais vivre c'est en Corse ! Je kiffe trop la Corse ! Là-bas c'est génial !"

Per a bellezza di a so natura ? Ùn ci site micca.

Spiega u sbaccone : "Y a des supers boites de nuit, les gens sont super cools, ils me ressemblent !"

Si n'ampara belle : "Avec mes potes corses on s'éclate, on parle muscu, fringues, look, DJ, bagnoles, guns et jet-ski ! Après on compare nos pecs et nos biscottos, trop cool !"

A Corsica hà infine trovu un'imbasciadore di talentu : "Les jeunes corses je les kiffe, franch'ment, je suis sûr que j'ai du sang corse dans les veines !"

Di siguru, un ghjornu averemu da abuchjaccilu : "J'pense que j'finirai mes jours là bas ! Un jour j'aurai ma villa à Portovèk ! D'ailleurs je pense à me faire tatouer une tête de corse (sic) sur le bras."

Eppò di cuntinuvà : "Je suis un homme libre comme Pascal Olmeta, Tony Montana, David Guetta et Emile Dzoukarèl".

U dibattitu nant'à l'identità corsa avanza.

CLICCATE per INGRANDÀ :

Di siguru, ogni corsu chì si rispetta si deve d'avè almenu unu di st'elementi...

I capelli : cuppa "staraccademizata" cun trè tone di gel.

Ray-Ban : e listesse ch'è quelle di Sarkozy, ma cumprate in Ventimiglia.

T-shirt "panza apparente" : Di preferenza cù una scrittura in inglese ch'ellu ùn capisce micca.

I musculi : techju di "muscu" à a "sala", à u montasega li piace à mustrà i so pec.

Tattuasgiu nant'à u bracciu : u montasega copia i so tattuasgi nant'à i ghjucadori di futbol. Ne riparleremu da quì à 10 anni...

Sguardu azezu : perchè l'aria antipaticu hè assai megliu per fà fughje e donne.

Chapelet : u patennostu hè purtatu di più per fà cum'è Beckham ch'è per fede religiosa, di siguru.

iPhone : per passà a serata à mandà SMS à i fratè. Eppò per u GPS dinù. Ùn si sà mai, omu pò perdesi pè i carrughji bastiacci.

U Johnnie : iè, ci n'hè chì pensanu sempre chì u Johnnie hè un whisky corsu è di qualità...

E chjave di "l'Audi à papa" : per fà u maccu u sabbatu sera, hè megliu ch'è l'antica 205.

U calzunettu chì si vede : à 60€ u slip, serà megliu ch'ellu si veca, nò ?

E paste : di siguru, a vita di sbaccone face ch'ellu ùn ferma guasi più nunda per manghjà in casa...

S'è vo l'avessite tutti à tavulinu, i giuvanotti corsi techji di Les Affranchis è di u Padrinu chì piglianu in mudellu a facciaccia di Tony Montana, u stadiu Armand Cesari ùn basterà à accoglielli tutti.

Parlanu tutti di colpi à fà è d'affari à piglià per fassi dui soldi, sunnieghjanu di Porsche Cayenne, di Rolex è di spechjetti Ray Ban ("des lunettes à deux balles", a dice ancu Séguéla).

"U galibre" è u bling-bling in mudellu, cume in e banlieues di u 9-3. In e cités pùzziche di Marseglia o di Mantes la Jolie, Tony Montana hè dinù una iccona.

I losers di Corsica è quelli di e banlieues anu listesse ìdule.

Perchè di siguru, l'apprenti-maffiosi ùn finisceranu micca in una villà cum'è quella di Scarface, incù donne è champagne à sbuzeffu. Ma in l'appartamenti bughji di I Salini o di Lupinu.

Piuttostu ch'è di "casse du siècle", finiscerà in un braquage mozzu è mancatu à u Spar o ind'è u panatteru di u locu. Chì gloria !

Tutti quelli chì si sò fatti siccà dapoi un annu anu u meritu di facci riflette à sta dumanda : ghjuverà à qualcosa di sceglie a vita di maffiosu (a malavita dicenu i Taliani), s'ellu hè per finisce stinzatu à 30 o 40 anni ? N'averanu prufittatu almenu, di a so vita, sta povera ghjente ?

Sbanditu L'ACA hà un partinariu famosu in Londra, New-York, Tokyo, Parigi quant'è in Aiacciu. Perchè vi site assuciati à sta tocca di marca ?
ACA Hè stata dilicata sta scelta. Hè vera. Aviamu pensatu ancu à Gucci, Boss o à Dolce Gabbana. Ma Prada, hè propiu a scelta di u core. Hè a scelta di l'identità di u populu. Quale hè chì in Aiacciu ùn hà micca un paghju di scarpi o di spichjetti Prada? In u cuntestu aiaccinu, u spunsuringu Prada, hè una scelta suciale chì permette l'identificazione di u populu rossu à l'ACA!
Sbanditu Era ancu una dumanda di i ghjucatori?
ACA Sicura! A sapite quant'elli sò avvezzi i nostri ghjovani à fà u colla è fala nant'à u corsu Napuliò incù i so vechji scarpi Prada. Quandu elli falavanu nant'à u terrenu, i scarpacci Nike li flagellavanu i pedi. Ùn la facianu mancu à marchjà. Eppò passavanu à a risa. Legea? Chì scumpientu! Ancu Nike face ride. Hè cum'è Reebok o Adidas, hè a marca di i paisanoni o di i scalati, micca di l'Aiaccini!
Sbanditu Hè dunque una scelta identitaria è prammatica. Chì ne dice José Pasqualetti, l'alenatore di a squadra?
ACA Hè cuntentu cum'è un pichju! I nostri giovani puderanu infine ghjucà à u ballò! Vistu a nostra classifica à u campiunatu, era ora! Nanzu, eranu più impenseriti da e reazzione di e sustenitrice feminile chè da l'assalti di e squadre nemiche. Oramai, sò assicurati d'esse nant'à u terrenu cum'è in cità...

A spacca

Chì tanti Sarkozy ! Chì baiocca quessu! Simu NOI i rè di a spacca, di u "m'as-tu vu", di u toc, di u bling bling. In una sucetà chjuca, bisognu ci hè di fassi sente, di fassi rimarcà, di fassi valè per esiste. Incù u vede nasce l'invidia... Musica à tappu per passà nant'à u Vechju Pò o à longu à a Piazza San Niculà. Tacchi alti alti per cullà da u piluccheru finu à l'estetiziana è unghje rosse imbacate per sgrinfià a carta turchina... È sopratuttu, mi ne scurdava, acqua in bocca, silenziu è saviezza. Hè megliu à passà per una zitella muta chè per una diciulona baulla.

Jet schì, Rolex, Quad è Audì: a spacca à l'usu corsu !

In quantu à l'omi, spessu, à chì si sciacca i pomi li face scimisce... Ùn sò cusì e bastiacce è l'aiaccine à spulà tutti i so soldi in sacchi goffi ma Sonia Rykiel è frisgiati di tutti i culori? Mancu parlu di i so scarponi è di i panni cumprati in Parigi o in Marseglia per fà bè. In quantu à a mascara, bisognu ci n'hè! Si saperebbe s'ella era corsa Monica Bellucci! Fatt'è fine chì La Redoute, ghjè per e goffe! In quantu à l'omi chì strazianu per scuntrà à qualchissia è chì facenu nice di truvà piacè bivendu u champagne, u Johnny o u Ballantines, li tocca à mette una buttiglia à ogni "santa briachina". I disgraziati piacenu pocu è micca à e fantine. "Tè, què, ghjè a meia!". Ma u s'aliscianu ancu elli u mustacciu... Ruloghju Rolex o Breitling? Passeranu i dui, sopratuttu s'ellu face l'apertura di Via Notte è di l'Acapulco. U spaccone, per ch'ellu fussi compitu, ci vole ch'ellu fussi un nighter!

A spacca, a cuscenza è u cumpurtamentu puliticu

Ben ch'ella fussi scritta assai in u piacè, a stonda è u gode, a spacca ùn hè mancu appena staccata da a cuscenza pulitica di u spaccone. Ci hè liata pedi è mani. U spaccone, hè un edunista. Ma sottu à u so versu bravacciu postu chì spula i so soldi à prò di l'altri, ghjè ellu chì si vole fà valè. U spaccone hè un individualista primurosu assai di u sguardu di l'altri. Vole fà sunnià à l'altri. Infine, pare chì a spacca fussi di modu paradussale un attitudine di sottumissione più chè d'emancipazione cullettiva. U spaccone hà persu unepoche d'illusione. Ùn crede à altru nunda chè à sè stessu è ancu... Attenti, i nostri pulitichi, per u più, ancu elli sò spacconi è di e volte ancu scrucconi!

https://www.apiazzetta.com/video/

A paura di u sclassamentu suciale

Spessu, più chè un segnu di ricchezza, a spacca palesa sia a paura di vede si sclassà à u pianu suciale, di falà e scale, sia a vuluntà di fà rimarcà a furia è l'impurtenza di a riescita. S'è no chjamemu i primi angusciati, i secondi, sò pidochji rifatti. Ùn hè vera chì di falà e scale face male? Hè dinù sta paura chì a face à mantene a dipendenza di i Corsi versu u clanu. Hè quellu chì hè debbule chì si cerca una prutezzione. U spaccone, d'una certa manera, ghjè un cacagliulone...

Attenti chì u troppu stroppia

Ma a spacca dumanda quantunque una certa misura, un intimu di delicatezza, un andatura linda è un stile affinatu assai. U troppu stroppia! Trop de rimmel è t'es plus belle... Troppu lucichime è sì mischinu... Hè un arte, un sportu, hè una manera di campà attempu in u gruppu ma dinù per pruvà d'esce da sta tribù. Cristacciu, seremu tutti spacconi???

Un metrosessuale hè un omu urbanu chì s'impenserisce assai di a so estetica. In Corsica, da u stile tralasciatu paisanone à a moda oghjinca, hè passata una revuluzione di e mente. Ùn la dicenu micca, ma i masci corsi, purtivechjacci, aiaccini, balanini o bastiacci, si frustanu u musu incù pilinghi nanzu di copresi a faccia d'unguente idratente. À vede i giovani corsi, si pò dì ch'elli sò diventuti, cum'è David Beckham, Pascal Obispo, Jean-François Bernardini, Brad Pitt, Alain Orsoni, George Clooney è Frederic Miscialaccu, primurosi assai di a so apparenza. Soca ci sarà qualchì sbagliu in stu listinu ma ahù, à certi calalumi, li farà piacè !

Un metrosessualisimu corsu?

Oramai, ancu i più paisanoni u s'aliscianu u mustacciu! A barba vechja di trè ghjorni, micca segnu di lascia corre agrosessuale anticognu, palesa piuttostu un segnu di moda corsa, di metrosessualisimu nustrale, isulanu.

Mentre si parla sempre d'identità incù nustalgia è u tremulu in bocca, ci hè dunque da dumandà si s'ellu ci hè un metrosessualisimu corsu, nustrale, sputicu ! Sarebbe què u segnu d'un evuluzione di a nostra sfarenza culturale ma attempu d'una custruzzione identitaria specifica. Un adattazione di a nostra cultura à u mondu mudernu è una mudifica di questu quì attempu sbarcatu in paese...

Un identità plurale

Cusì, pianpianinu, vidimu spuntà per e nostre cantine bughjicose, unepochi di paghjellaghji metrosessuali. Maì Pesce, s'ellu si tene a voce a più bella di Corsica, pare chì a so fama cali appena ind'è a ghjuventù feminile, più in brama di pezzò metrosessuali à l'usu Svegliu d'Isula ch'è d'agrosessuali sticchiti è minchjò à l'usu Chjami Aghjalesi.

Si pò dunque esse, oghje, attempu Corsu, cantatore, metrosessuale, vole si dì, una "Corsican beauty", à l'usu di I Cantelli, chì sò più unti è fini ch'è belli cum'è mè !