Cum'è tutta a piaghja, u territoriu d'Aleria hè cambiatu assai in furia in pochi tempi. Hè qualcosa chì vi preocupeghja ?
Ci hè statu bella sicura un cambiamentu fondu cù u crescimentu di pupulazione. Ghjente ghjunta da qualsiasi parte, corsi di ceppu o nò, ma oramai tutta ghjente di quì. U caratteru fundiu di quelli lochi novi d'abitazione longu a piaghja, hè appuntu quellu d'una spergugliera di fatti. Quella duve tutt'ognu nutrisce à sò modu u raportu à u locu. Quellu anticu, fattu da leva in pulleva è quellu novu segondu strutturazioni mentali è riprisentazione simboliche ch'anderebbenu bè in qualsiasi parte di u mondu. Si ne ghjunghje à ciò chì i sociolochi chjamanu a "distrutturazione antropologica", vale à dì -per riassume- l'assenza di cultura pupulare cumuna trà persone d'un listessu territoriu. A quistione chì si pone ùn hè dunque micca quella di l'origine di tutt'ognunu ma quella di sapè ciò ch'elli serebbenu l'arnesi d'una pedagogia suciale à prò d'una andatura spartuta. Eccu à a lestra ciò ch'elli sò i nostri penseri da circa 25 anni in quà.

Chì sò e cunsequenze di sti cambiamenti ?
A cunsequenza a più à gallu hè quella d'una assenza d'usanze. Vale à dì l'assenza di tempi, di lochi è di gesti ch'appianu sensu per tutti è permettinu di fà cresce u sintimu d'unità cumunitaria. Simu in lu registra di a cultura pupulare duve l'idea d'appartenanze à un gruppu passa spessu pè a ritualisazione (religiosa o nò) di u fattu suciale. L'esempii sò numerosi è mi vene in core quellu di a sant'Andria o di a Birba ; denominazione sferente d'una listessa pratica segondu ch'ella sia di fede cristiana o di garbu prufanu. I zitelli mascherati vanu da porta à porta à chere robba ch'elli sparteranu dopu. Aldilà di quellu "donu è contradonu" chì permette di fà sucetà, hè dinò a leia trà leve vechje è nove ch'omu mette in ballu custì. L'effettu più prifondu di a deritualisazione hè appuntu quellu d'un mudellu di vita duve a parolla "paisanu" vede strittisce u so cuntenutu semanticu. Da a spressione d'una forma di "parentia suciale" si ne ghjunghje à parlà di ghjente chì stanu à listessu locu... ma tandu ùn basta da ch'elli sianu inseme è fà populu.

Chì si pò fà tandu ?
Cumu detta nanzu, u nostru impegnu hè quellu di u longu andà è di i raporti di prussimità. In lu 1992, avemu rilanciatu a nostra cunfraternità appuntu per un prugettu di pace. A parolla essendu da capisce in la so accezzione etimologica chì rimanda à u fattu d'unità è d'unione. Chì per sicura, ùn basta à fà piantà a lita da chì a ghjente si cuncogli. A pace cum'è no a dimu, piglia i so puntelli in tutte e scumpartere chjuche è grande chì no riescimu à almanaccà. U cantu, a festa paruchjale è tutte l'altre, e veghje, u tempu ch'omu dà è quellu ch'omu riceve sò u nostru prugettu, a nostra pruposta pè una sucetà più felice. Almenu a ci pruvemu segondu i nostri mezi più chjuchi chè maiò. Hè dinù u sensu di l'associu san Marcellu in Oriente chì a si prova à listessu modu. Sè a cumpagnia li dà una manu, l'associu arricoglie digià in giru à a so presidente dinamica, Mélanie Nigon, ghjente fidate à e cause cumune da fà un paese in Aleria. Addunisce dinò un centu di partenarii (imprese cù associi piaghjinchi è d'altrò) felici di mettesi in ballu è finanza (à 90 % di u bugettu sanu) a so cusì bella andatura ricca di riflessione è pruposte per oghje è per dumane.

Eccu u riccu prugramma di a dumenicata.

Ci serà u filmu "Lascia stare i santi" :

Bon, tuttu u mondu cunnosce e regule di a morra, o ci hè bisognu di ramintalle ?

St'anticu ghjocu era cunnisciutu da i Rumani è forse ancu da l'Egizziani. Esiste ind'è parechji populi di u Mediterraniu. In u meziornu di a Francia si chjama mourre, in Italia morra, in Sardegna murra.

Il gioco della #morra #samurra

Une publication partagée par Gianlorenzo Janzo Lenza (@janzo75) le 26 Août 2017 à 3 :31 PDT

Dapoi pocu, ci hè ancu un campiunatu corsu.

È avà per intrenassi, esiste ancu l'appiegazione. L'idea hè di dui giovani sardi chì anu creatu Sa Murra, u primu ghjocu di morra nant'à smartphone.

Pudete ghjucà contr'à un robot. Ma ci hè ancu di più divertente : pudete ghjucà contr'à ghjucadori reali in diretta, cunnettati è messi in rete via a piattaforma di l'appiegazione. Ci vulia à pensacci !

Bon d'accordu, mancanu i rimori, i mughji, è l'odore di u pastizzu. Forse in una prussima versione ?

In entrata : Aviate previstu salmone affumaticatu, òstrice, foie gras, un pain surprise... Lasciate corre u pesciu ! Prima chì u salmone hè caru. È cum'ellu vene da luntanu, cuntribuite à spende l'energia. Ciò chì ùn và micca cù e vostre bone resoluzioni pè l'annu novu di participà à salvà u pianeta !

Invece, manghjate puru l'òstrice corse. Sò più bone è ricircate fora di ind'è noi. L'avemu sopr'à locu, allora prufittemune ! Cù un sprichju di limone (nustrale è micca trattatu), hè una campazione !
U foie gras, perchè micca. À cundizione ch'ellu ùn sia micca quellu di u Gers ! Sceglite un foie gras corsu ! Iè chì esiste ! Ne truverete di siguru vicinu à ind'è voi. Allora fate un sforzu !

In quant'à u pain surprise, fatelu da per voi ! Ùn hè tantu cumplicatu. Di siguru, piglierete prudutti micca impurtati è micca industriali : una fetta di furmagliu pecurinu o caprunu, una fetta di prisuttu, una di furmagliu di porcu... È s'è vo ùn pudete passavvi di i prudutti di u mare, andate à u mercatu, cumprate zinzì per esempiu. I piscadori corsi si feranu un piacè di cunsigliavvi.

U piattu principale : Aviate previstu a dinde aux marrons... Fatela finita ! Una bona pulenda cun brocciu, figatellu è ove fritte. Cusì semplice è cusì bonu. A farina pisticcina, si trova in ogni locu. L'ove ? In n'importa chì eppisseria. Pè u brocciu è u figatellu, andate à vede direttamente un pruduttore. Ùn cunniscite à nimu ? Dumandate puru à A Piazzetta chì elli sì chì ci capiscenu.
Altra suluzione : u caprettu cù i pomi. Cumprate tuttu ind'è u vostru macellu è dumandate prudutti corsi ! Ùn vi vergugnate micca !

Da evità quantunque : A pulenda cù i knacki. Francamente, lasciate corre.

U dulciume : a tradiziunale bûche... Aiò ! Piantate tuttu ! Sbattulate o chè ? Dop'à u furmagliu cù a cunfittura di fichi, prupunite clementine, brocciu cù l'acqua vita, una torta pisticcina, un fiadò... Troppu semplice ? Allora fate une schjuma di brocciu, aghjustate qualchì goccia di mele, pisticciuli di canistrelli cù amàndule è marrons glacés. Imbulighjate è date à stu sugillastòmacu un nome orìginale pè impressiunà i vostri invitati.

È per beie ? Surtite da l'urdinariu, basta cù stu Champagne ch'ùn hè mancu bonu ma ch'ellu ci vole à beie per fà cum'è tuttu u mondu. Ci n'hè abbastanza vini corsi nò ? Cubi di Barbu pè i briaconi è rossu di Patrimoniu o di u Sartinese pè i palàtichi fini. Per esse di più "tendance", sappiate chì ci hè bunissimu "muscat pétillant" fattu in Corsica !

L'avantagi : I prudutti corsi esistenu sempre (per avà...) è i cunsumatori ch'è no semu anu sempre a scelta. Allora, perchè ùn micca principià l'annata fendu un attu militante chì ùn vi custerà micca un trasferimentu in Parigi cù a DNAT ?

In più, s'è vo site dillusu, puderete sempre andà à lagnavvi direttamente ind'è i pruduttori ! Ma aspettate appena, in stu periudu di feste sò appena sott'à pressione è pigliate i risichi.

Eccu, s'è vo ùn aviate edee per u vostru ripastu di u 31 avà sapete chì fà. Attenti à l'eccessi è à a pulizza nant'à e strade.

È cum'ellu dice Jean-Pierre Acquaviva : bona robba !

https://www.apiazzetta.com/video/

U 3 di maghju si festighjeghja in Bastia u Cristu Negru.

Segondu a tradizione, stu crucifissu saria statu scupertu in u 1428 da dui piscadori di Terra Vechja.

I Bastiacci sò attaccati assai à sta festa cum'ellu a mostra u mondu chì vene à seguità a prucessiò.

L'occasione per noi di mustravvi qualchì ritrattu di a prucessione chì parte da u Vechju Portu pè seguità i vechji carrughji bastiacci è cullà sin'à a Citatella.

Cliccate nant'à un ritrattu per ingrandallu.

A paghjella

A paghjella, l’averete intesa più nant’à l’onde di RCFM o d’Alta Frequenza chè in live, à a Santa di u Niolu, in a fumaccia di u Central in Corti o nant’à una scena di spettaculu. Da un arte pupulare, pare chì a paghjella fussi diventata un cantu elitista, più per una manata di pinzuti in cerca d’esotisimu chè per noi altri. Dimmula franca è chjara, quale hè chì canta semprer a paghjella ? Nimu o quasi. Andate puru à dumandà à i giovani cumu si canta a paghjella. Unepochi di passiunati a vi la saperanu spiegà ma seranu bellu più numerosi i giovani corsi à ballà a tettonica chè à impaghjellà… Tuttu què per dì chì sta pratica si perde è ch’elli sò scarsi i giovani paghjellaghji è chì l’inghjocu maiò, mi si pare ch’ellu fussi più da visticà à u pianu di a quantità di i paghjellaghji chè da quellu di a definizione scentifica è indarna di e qualità di a paghjella. L’anziani ùn la sapianu forse micca discrive ma elli sì chì a sapianu cantà… Micca cum’è mè…

I paghjellaghji

U prublema, ùn hè micca tantu quellu di a paghjella ma quellu di i paghjellaghji. La farà a ricuniscenza di l’UNESCO à sviluppà u cantu in paghjella ? S’ella hè di nò, à chì ghjuverà sta ricuniscenza, altru chè à scrive nant’à u Guide du Routard, chì i paisoli di Rusiu è di Sermanu sò tenuti da i santissimi lochi di a paghjella, u « Cantu Maestru di u Populu » Invece di circà ricuniscenze in altrò, l’impegnu u più maiò, mi si pare ch’ellu fussi quì. Sò e scole di cantu chì ci vole à prumove.

A metafora di a Corsica

L’affare di a paghjella mi face pensà à Petru Rocca, u fundatore di a rivista A Muvra, quandu, dopu a prima guerra mundiale, avia vistu una muvra ingabbiata in un museu pariginu. Per ellu, era quessa a metafora di a Corsica è di i Corsi. Dopu l’affare di a publicità à prò di u turisimu “Réserve naturelle de vos vacances”, u periculu di fà di a Corsica una riserva di « sioux » per ripiglià e parolle di Poletti, mi si pare ch’ellu cresca. E ricuniscenze, l’avemu à palate. Hè ricunisciutu u cane « cursinu », u salame, u vinu, u muscatu, l’oliu d’alivu, u mele, è u casgiu anu l’AOC. Scandula è a maiò parte di e nostri lochi sò tenuti da maraviglia è prutetti da lege è labelisazione di tutte e mamme…

E minurità sò un casticu

Invece, l’omi è e donne di stu paese, à leghje à l’ultimu numeru di Marianne, sò sempre tenuti da una minurità di ghjente storte chì rompe e stacche di a santa maiurità. Tenite : venneri scorsu, durante un dibattitu urganizatu da l’Università è u CNRS nant’à a quistione di a diversità culturale è di a ricunniscenza di e minurità dette regiunale, s’hè intesu tuttu ! Ne vulete bugie ? « Il est permis aux élèves de terminale de passer le bac dans la langue régionale de leur choix », « lorsque j’entends parler de langue régionale, je pense immédiatement au risque de repli sur soi et au communautarisme. C’est quand même bien qu’on puisse parler tous ensemble grâce au français… ». Mancu parlu di ste riturnelle à prò di a diversità culturale à l’infora di u territoriu francese è à prò di l’unifurmisazione à l’internu, hè megliu à esse cioncu ! Quandu omu vole tene un discorsu strutturatu è argumintatu, vene ghjuvativu à a dimustrazione d’illustrà lu di modu fattivu. Aspettemu sempre !

U Statu, u marcatu, u piacè è a cultura

Allora, a paghjella, cumu la farà à francà si di tamantu pesu ghjacubinu ? Prima, pare chì a pressione di u Statu cali appena. Ùn ci pò impedisce d’impaghjellà ! Un antru elementu da piglià in contu hè chì parechji giovani, s’elli ùn cantanu più per via di a so indiatura, a facenu senza riflette, « naturalmente ». Si parla in francese ma, in fatti di cantu, hè u corsu chì ci vole à aduprà. Sottu sottu, ancu piatta è incuscente, ci serà forse una mutivazione suldaghja… À i turisti, ùn li piacenu micca i nostri canti ? S’elli ùn venenu micca apposta in Corsica, ci venenu dinù perchè avemu ste specificità ch’elli anu persu elli. Saranu forse nustalgichi di e so anziane culture regiunale ! Eppò, ciò chì pò salvà a paghjella, hè u piacè. S’ella hè un casticu di cantà la, tandu, lascemu la puru. Hè st’articulazione trà u piacè è l’interessu chì puderà forse discità e voci di i paghjellaghji addurmintati. Per quessa, ci tocca à creà spazii di trasmissione. A Piazzetta, quessa, peccatu ch’ella fussi cusì ma ùn la pò fà…

Aiò, ùn vale a pena d'annerbati è di dì ch'o sò un malcridente, ch'ellu ci vole à sbattizami o ch'o sò un membru d'Al-Qaida.

S'aghju sceltu stu titulu, hè ghjustu per divvi chì oghje hè Venneri Santu. Ghjè a cummemurazione da i cristiani di a Passione : u suppliziu di Cristu in Gerusaleme è a so crucificazione à u monte Golgotha.

Ùn avete capitu nunda ? Bon, vi ferma u filmu di Mel Gibson, ancu s'ellu hè appena troppu sanguinosu cum'è adattazione.

2.000 anni dopu, u missaghju di Cristu hè sempre cusì forte è numerose sò e cunfraterne à tramandallu. Da per tuttu in l'isula, si facenu e via cruci (u caminu di croce) chì ramintanu e suffrenze di Ghjesù.

A cumemurazione a più cunnisciuta hè di siguru u catenacciu in Sartè (un annu l'evenimentu hè ancu statu ritrasmessu in direttu à a televisione giappunese) è in segonda pusizione ghjunghje l'incatinatu di Bisinchi.

In Brandu si face a Cerca, induve e quattru cunfraterne di u paese facenu prucessioni da una cappella à l'altra, nant'à tuttu u territoriu di a cumuna. E donne à st'occasione portanu a faldetta, una rota chì copra u capu è ogni cunfraterna hà fattu una pulezzula, tessutu cù e palme. S'è vo avete l'occasione d'andacci, hè propiu da vede !

Ci vole dinù à manghjà magru u Venneri Santu, : ma ùn v'inchietate, più ch'è qualchì ghjornu è pè Pasqua si manghjeranu i campanili in Bastia, Caccavelli in Aiacciu, è da per tuttu migliacci, bugliticce è kinder surprise !

N'avemu digià parlatu, a celebrazione di Pasqua hè principiata cun a dumenica di e palme.

U Ghjovi Santu currisponde à u mumentu induve Ghjesù Cristu pigliò u so ultimu ripastu cù i so discipli.

A tradizione vole chì in memoria di st'ultimu ripastu si manghji a cena domini, vale à dì una suppa di paste è ceci.

Infine hè u mumentu induve si visitanu i sepolcri, chì sò stati preparati in tutte e chjese : in francese reposoir, hè un Cristu in croce, vicinu à l'altare, decuratu cun fiori è candele. Ci vole à visitane un numeru sparu (impair).

Eccu, dopu solu, puderete andà à u Connor's. Ma attenti ch'ellu ci vole à esse in gamba pè a viacruci di u venneri santu !

Quantunque, ùn pudiamu micca passà à cantu. S'hè parlatu assai d'elezzioni nant'à A Piazzetta, un pocu di a San Ghjisè, è si a pulitica hè a prima religione di l'isula, ùn pudiamu stà senza parlà di a Settimana Santa chì principia oghje cù a dumenica di E Palme.

E Palme simbuliseghjanu a ghjunta di Ghjesù in Gerusaleme quand'ellu ci hè statu accoltu cun assai gioia a dumenica nanz'à a Settimana Santa.

Catenacciu, Merendella è Jean-Pierre Pernaut
In Corsica, cum'è in tuttu u Mediterraniu, Pasqua ferma una grande festa è un grande mumentu di celebrazione. È s'ellu si riduce spessu a Settimana Santa à u Catenacciu di Sartè induve a ghjente cerca à fassi piglià in fottò cù u tippu in rossu è à a merendella di u luni chì ancu Pernaut vene à filmà, Pasqua hè sopr'à tuttu un mumentu induv'elli si ritrovanu i Corsi, ch'elli credinu à nò.

Allora circheremu à parlanne innù i ghjorni à vene.

Per sapenne di più nant'à e feste di Pasqua in Corsica, andate à vede ste pagine di l'adecec o ancu queste quì