A storia :
Mafiosa (prununzià "mafioz" o "mafiosà") conta a storia d'una capimachja d'un clanu corsu maffiosu. Bon, perchè micca ? L'idea hè interessante. Derrick quella d'un fliccu alemanu... Hè menu orìginale.
1 puntu per Mafiosa

I persunagi principali:
L'ispettore Stephan Derrick hè solu contr'à tutti i gattivi d'Alemania, sèmplice è senza eccessi. In Mafiosa i trafficoni nustrali anu un accentu pinzutu di quelli ma capiscenu u corsu. Guy Cimino hè un sceffarellu di a Brise de mer è in a segonda stagione ci hè ancu Joey Starr. Aiò, Guy Cimino contr'à Joey Starr...
1 puntu pè Derrick

I figuranti
L'avantagiu di Mafiosa hè chì fidighjate a seria nunda ch'è per vede e facce ch'è vo cunniscite. Truverete bè un amicu à voi chì si face stinzà o un cumpagnu di scola chì era cun voi à u CM2 è chì hà giratu male (trasporta a droga, stu baullu). Invece, cunniscite à nimu in Alemagna.
1 puntu pè Mafiosa

U rìtimu
Dìmula franca, Mafiosa hè una seria loscia. Ci annuiemu è ci hè accudutu d'adrumintacci davant'à un episodiu. À cantu, ancu Derrick hè di più rìtimatu. Suspense, azzioni, muvimentu, ribattulate... Ci piglia di più u tedescu ch'è a seria di Canal.
1 puntu pè Derrick

L'attori :
A capimachja di u clanu Sandra Paoli (Hélène Fillières) hè pocu cunvincente in capimaffiosa. Pare ghjucà u rollu di una "diaspò" chì volta in Corsica ma chì ùn ci capisce nunda. Ci dumandemu ciò chì Jean-Pierre Kalfon face custì. Jean-François Perrone è Eric Fraticelli sò quelli chì ghjocanu u megliu. Ma Guy Cimino contr'à Joey Starr, aiò...
Invece Horst Tappert chì ghjoca Derrick hè sempre quellu : sèmplice, seriu è efficace. U rigore alemanu à l'usu Franz Beckenbauer. A glassa...
1 puntu pè Derrick

U scenariu
Der Kommissar , ispettore pocu viulente è malignun deve truvà i gattivi chì spessu prufittanu di a miseria pè fà e so malfatte (droga, maccarellisimu, tràffichi...). Iè, ci hè una crìtica suciale ind'è Derrick ! In Mafiosa cunniscite u scenariu capunanzu. Basta di leghje "Les Parrains Corses" o Corse-Matin... I scenaristi di Canal Plus ùn anu inventatu nunda.
1 puntu pè Derrick

Bilanciu : Mafiosa 2 - Derrick 4 !
Fà una seria nant'à u milieu corsu, perchè micca. Tandu peghju s'ella accresce i "clichés" nant'à i Corsi, di tutte manere avà semu abituati. Ma a seria hè una dillusione. I scenaristi di Canal seranu sott'à lexomil per fà una seria cusì soporìfica ? L'attori parenu pocu cunvinti da u so rollu. Finalmente pare esse una seguita di "Plus Belle la Vie". Hè dì chì a seria hè presentata cum'è u fiorfiore di a pruduzzione francese...

Aspettendu a seguita, sàppiate chì Derrick esiste dinù in DVD.

Passemu nant'à u fattu chì a seria Mafiosa (prununzià "mafiosà" o megliu : "mafioz") hè per noi esagerata. Di tutte manere, e fizzioni, filmi è serie tv sò sempre esagerazioni di realità.

Passemu nant'à a fiura ch'ellu dà di a Corsica, di tutte manere di i maffiuselli ne ridemu ancu noi è tantu megliu s'ellu cuntribuisce à facci passà per gattivi.

Ma quantunque... quandu l'americani pruducenu Jack Bauer, Dr House, The Shield, i Sopranos, Dexter, Desperate Housewives, Prison Break è Les Experts, tuttu ciò chì i tercani di i scenaristi francesi cù i mezi di Canal+ riescenu à fà hè "Mafiosà, le clan".

Quandu à Hollywood ci sò 40 scenaristi chì travaglianu nant'à una seria, in Francia sò dui. U risultatu si vede sùbbitu...

À principiu fidighjate pè curiosità, dopu hè pè circà e facce ch'è vo cunniscite ind'è i figuranti, infine fidighjate pè ride.

L'interessu hè dunque di vede si u pizzaiolu chì s'hè fattu stinzà hà da vultà, s'è vo ricunniscite u bar induve si sò tazzati è s'è vo riescite à vede a vostra vicina chì v'hà dettu tutta cuntenta "oh ! j'ai eu un rôle de figurante dans Mafiosà !!! Je vais jouer une passante qui passe au second plan !!!" (authentique).

Ma s'ellu hè per fà una seria pè ride, eranu megliu "I Storti".

Bon, d'altre idee di serie tv per i scenaristi di Canal+ :
- "Les Experts - Casamozza" : una seria nant'à a "pulizza scentifica" (sic) in Corsica, incù custituzione di "fausses preuves" ind'è a ghjente.
- "SDAT - unité spéciale" : a vita di a SDAT in Corsica, incù porte sbundate, vechji scuzzulati è donne minate.
- "Dr House in Falcunaghja" : incù Guy Cimino in u rollu di Dr House azezu à l'ospidale di Bastia.
- "Prigiò Break" : 2 episodii solu, basta di mandà un fax.

È voi ? Chì pensate di Mafiosa ? D'altre idee di serie tv ?

Belluccia è scherzosa, a miss meteo di Canal+ li (ci) face scimisce à tutti! Sta Brittona appronta una cacciata è una scimità tutte e sere. À quandu dice à Gérard Schivardi chì da vutà per ellu perchè li piace u O%, à quandu dice à Elisabeth Guigou : « Vous êtes ma patronne, puisque vous avez été la garde des sottes »...

Belluccia sì ma micca assai difficiule incù i masci. U so tippu, Julien Doré, pidochju rifattu, s'avia vintu a Nouvelle Star 2007. Ma dicenu d'altri chì sarebbe oramai incù Guillaume Canet...

https://www.apiazzetta.com/video/

A puderemu vede nuda in cristu, st'estate, in un filmu nant'à Brigitte Bardot "La fille de Monaco"...

https://www.apiazzetta.com/video/

Sà ancu fà a rivuluzione, à fiancu à a vechja Arlette Laguiller, sbiguttita... "Una sola suluzione, femu a rivuluzione" !

Ahmed Zumar ci spiegava qualchì ghjornu fà, davanti à a mubilizazione dèbbule in Balistra ch'ella cala a demugrafia militante in Corsica.

Manc'appena ! Perchè tantu pessimisimu ? I Corsi oghje sanu mubilizassi pè e grande cause chì meritanu d'esse difese.

L'ultima chì hà fattu a prima pagina di Corse-Matin : quella di a TNT

Sapete, a TNT... micca quella chì salta, l'altra : a télévision numérique terrestre, st'immensu prugressu di l'ummanità chì vi permette di riceve l'emissioni di Direct 8, TMC, NT1, Waika9...

Puderete cusì fidighjà e ridifusioni di l'episodii Derrick, Hélène et les garçons, Les Cordier juge et flic, u Télé-achat o i clips di Pascal Obispo tuttu què gratisi è in qualità numèrica, per piacè.

Perchè ci vole à sapè chì oghje si sterpanu innù i paesi... È cumu sarà ch'ellu si chjappa à NRJ 12 in Brusticu è micca in Pedipartinu ??? Allora s'infiaranu i dibattiti di i cunsiglii municipali, chì si spiccianu di vutà muzioni per chì u relais li mandi appena di ciò chì a televisione francese sà fà di megliu.

Ci vole bè ch'ella sia rotta a frattura numèrica, nèh ?

Iè chì i Corsi sanu mubilizzassi per chì u nostru paese entri infine in a mudernità è u prugressu !

Marina Raibaldi hè siguramente a più bona ragione di fidighjà à Corsica Sera.

Una bella capirossa chì parla corsu cun l'accentu cruatu è chì vi dice chì dumane hà da fà bellu tempu è 26 gradi in Bustanicu è 25 in Peru Casevechje, ùn hè megliu ch'è di vede à Jean-Vitus chì vi parla di u PEI è di Camille de Rocca Serra ?

A dice ella stessa ch'ella hà sempre avutu a primura di parlà corsu à a televisiò : "A minima di e cose quand'è vo ghjunghjite hè d'amparà a lingua è di parlalla. Hè una forma di rispettu. Site ricevutu, allora ci vole à amparà a lingua."

Per cunnosce megliu à Marina Raibaldi, pudete ascultà l'emissione Palisà nant'à u situ d'Alta Frequenza.

Serete surpresu d'amparà chì studiente era una militante indipendentista cruata indiata chì hà ricusatu di cantà l'innu iuguslavu davanti à u dittatore Tito. Li hà custatu qualchì ghjornu di prigiò...

Nunda ch'è per quessa, forza Marina !

Eccu chì tutta a Francia pienghje avà u so PPDA, lampatu fora da TF1.

D'appressu à certi osservatori, saria torna un colpu di Nicolas Sarkozy, u DRH di TF1.

PPDA pagheria per avè apparagunatu Sarko à un "petit garçon dans la cour des grands", frasa chì hà fattu ride à Claire Chazal, ma micca tantu à u presidente ch'ellu intervistava... Da vede quì.

Tristu destinu per quellu chì biia u champagne in diretta à l'antenna è chì festighjava l'elezzione di Sarko, bellu nanzu chì i risultati sianu dichjarati... Fidighjate quì !

In tantu, vistu chì u postu di u 20 heures u più guardatu in Auropa hè viotu, noi dumandemu u ritornu di Jacques Bastianesi. U PDG di TF1, Nonce Paolini chì hè di U Lugu di Nazza, u puderia pistunà, nò ?

Si ragiunerà di e lingue regiunale è di a so ricunniscenza à l'assemblea naziunale stu dopu meziornu. Ma ùn ci serà nisun votu. Attenti dunque à e chjachjare è i belli discorsi !

Un prublema di fondu cuncerna a mudificazione o nò di a custituzione : a lingua di a ripublica hè solu u francese o ci serà una piazza pè e lingue regiunali ?

Si sà chì certi diputati dumanderanu a mudificazione di a custituzione, d'altri sò contru è si cuntenteranu d'una sèmplice lege.

Ma al di là di u simbòlicu, basterà per salvà e lingue chì sò in periculu ? I Brittoni, Alsassiani, Baschi, Occitani si sò mubilizati è si parla d'un dibattitu stòricu. Ma cosa ne pudemu aspettà di manera cuncreta ? L'avvene a ci dicerà.

In tantu LCP cù a so emissione Ca vous regarde organizeghja un dibattitu chì serà ritrasmessu sta sera à 9 ore. A squatra di A Piazzetta hè stata cuntattata per participacci, in diretta pè webcam ! Serà Sbanditu à andacci !

Infine una vera web TV corsa ! Eccu ciò ch'ellu ci mancava veramente ! Jean-Vitus è Marina Raibaldi anu da inchietassi, hè nata CorsigaTiVi.

Ci pruponenu ancu di scucinà. È custì facenu megliu ch'è e sòsule di Vincent Tabarani (manghjate da Ghjuvanpetru Acquaviva).

Per vede tutte e videò cliccate quì

Ùn ci la facia micca à truvà u puverettu di Thierry Gilardi antipaticu. Purtantu avia tuttu contr'à ellu : cummentava i macci nant'à TF1 è dunque era di siguru pro-squatra francese à fondu. Passava u so tempu à muntà a sega i telespettatori nant'à e fisiche di Zidane o di Franck Leboeuf. Ma ùn a sò, seranu forse state e so orìgine taliane o u so passatu à cummentà e partite di u calcio nant'à Canal+ chì u mi rendianu simpàticu.

L'omu u più antipàticu di u mondu
Ma sopr'à tuttu Gilardi pigliava a piazza di quellu chì porta u titulu di "omu più antipàticu di u mondu" : Thierry Roland.

Ci vole à dì chì u tippu hà tuttu contr'à ellu : una chigna à pattoni di français moyen, una vuciaccia chì m'arrega u vòmitu è un accentu chì vi dà a voglia di spenghje a televisiò, rancicu ancu di più ch'è un capicursinu è simpaticu cum'è un knacki. Ma sopr'à tuttu l'omu hè cunnisciutu pè e so edee pulitiche vicine di u FN è i so pruposti à a limita di u militante lepenistu : s'era dichjaratu in un'intervista à un giurnale di strema diritta pè l'Algeria francese (!) è per a pena di morte.

A caricatura di u 'beauf'
In somma, a caricatura di u beauf, bestia, antipaticu, razzistu. In Francia sò parechji à quale dà u schifeghju : andate à vede sta pagina chì ricensa tutti i so pruposti memurabili di bestialità, cum'è :

"Pourquoi la France ne gagne pas ??? Ben c'est la faute aux enculés !!!" (in 2002)... Grande mumentu di puesia è di fair-play , à stà à sente quì.

Da sente dinù un azzuffu trà ellu è u so cumpagnu Larqué d'antulugia induve i dui lonzi sò vicini di pigliassi à cazzotti.

Anti corsu...
Ma ind'è noi hè statu cunnisciutu pè u so anti-cursisimu primariu, sopr'à tuttu durante l'epupea di Bastia in 78, induv'ellu hà riesciutu à mettesi tutti i Corsi contr'à ellu è à diventà u sìmbulu di ciò chì a francia face di peghju.

Più ch'è Marbeuf, Poniatowski, Bonnet è Christian Clavier reuniti. Bon custì esagereghju appena, ma m'averete capitu.

Allora, u spavechju Thierry Roland di ritornu pè cummentà l'Euro 2008 di ballò nant'à TF1 ??? In sti tempi sarkuzisti induve "tuttu diventa pussibule", n'avemu a paura.

Purtantu, ramintemuci una frasa di Thierry Roland in 1998 : "après ça, on peut mourir tranquille".

Dece anni dopu, aspettemu sempre.