U 17 nuvembre 1993 hè appena u Ponte Novu di u futbol francese. L'Equipe de France deve piglià un puntu per qualificassi è andà à a World Cup 94 à i Stati Uniti. Basta un picculu puntu, un match nul goffu goffu è nimu vede cumu si puderia passà altrimenti. Ma in faccia d'elli ci hè una squadra di scemi, a Bulgaria di l'azizoni Stoitchkov, Letchkov, è di u barbutu Trifon Ivanov.

A partita principia bè, à u 32esimu minutu Eric Cantona mette u ballò in fondu à a rete, 1 à 0 pè i Bleus. U più duru hè fattu è Thierry Roland face u maccu nant'à TF1 : "cette fois mon p'tit Jean-Mimi, je crois que c'est in ze pocket !"

Ùn a sanu ancu ma oghje hè u ghjornu di gloria d'Emil Kostadinov. 37esimu minutu, corner pè a Bulgaria. U tippu mette una capataccia : 1 à 1. U Parc des Princes si tace è Thierry Roland cummencia à sudà.

U segondu tempu hè una partitaccia. A Francia ghjoca cù a paura è i Bulgari, scatinati sanu ch'ellu s'hà da passà qualcosa. U ventu gira.

Fermanu cinque minuti à ghjucà. U publicu canta "on est qualifié, on est qualifié, on est, on est..." è Thierry Roland lampa e so magagne fràgiche, appena troppu cunfidente. "Vous savez où ils ont réservé leur hôtel nos Bleus ? Jean-Pierre Papin va enfin visiter Los Angeles !"

Ma chì ghjoca in l'Equipe de France ci hè dinù David Ginola. Fermanu 20 seconde. Coup-franc vicinu di l'angulu per a Francia. Ginola face n'importa chè è manda un centru n'importa cumu, qualificatu più tardi da Gérard Houiller di "crime contre l'Equipe de France". U selezziunadore francese peta un piombu in cunferenza di stampa è accusa "El Magnifico" d'avè mandatu "un exocet à travers le cœur du football français". Iè iè.

Fermanu 10 seconde. Kremenliev ricupereghja u ballò, chì face a passa à Balakov chì dà à Penev.

Fermanu 5 seconde. Penev manda in davant'à u nùmeru 7 bulgaru, Kostadinov.

Fermanu 3 seconde, a Francia hè sempre qualificata. Kostadinov entre in a difesa francese, cuntrolla u ballò è arma u so tiru. I difensori sò innù u brocciu.

Ferma 1 seconda. Kostadinov manda un pichju sott'à a transversale. 2 à 1. A Francia fidighjerà a cuppa di u mondu à a televisiò, a Bulgaria si qualificheghja.

90+10 : Tuttu ciò chì Thierry Roland trova à dì hè : "OYOYOYOyoyoyoyoyo..."

Traumatizata, a Francia metterà una bella stonda à rimettesine.

Dapoi stu ghjornu, u 17 nuvembre hè festighjatu in parechji lochi di Corsica è pè certi Emil Kostadinov hè diventatu un veru diu.

https://www.apiazzetta.com/video/

Fattu u 17/11/2012
Messu à ghjornu u 17/11/2014

Chì successu ! Avemu arresgistratu 1359 voti per l'elezzioni di u Catinu di l'annu 2010. Ma nant'à A Piazzetta cum'è in e vere elezzioni, a demucrazia ùn esiste micca. Hè vera ch'ellu si pudia frodà. I falsi elettori, e false precure è i voti in doppiu è in trìplice eranu accettati. Cum'è in a vita...

Quale avia da piglià a successione di Christian Clavier (in 2008) è di Paul Giacobbi in 2009 ? Quist'annu dinù, ùn eranu micca i catini chì mancavanu.

Pè a prima piazza a lotta hè stata accanita è stretta sin'à l'ultimu. Dui picculi voti di differenza solu trà i dui campioni ch'è no semu dunque obligati di dichjarà Catini d'oru ex-aequo : Frédéric Thiriez (15,74%), tercanu anticorsu, catinu intersiderale per avè vulsutu sbarazzassi più d'una volta di i clubs corsi è in particulare di u Sporting. È dì ch'ellu hè statu l'avucatu sceltu da u... PRG in l'affare di l'elezzione di Pascaline Castellani. Di fattu, pudemu rimette dinù à u PRG è à questa quì u primu postu di a classifica. Felicitazioni !

Sta prima piazza hè dunque spartuta cù a FCPE, in particulare a sezzione Corse du Sud di sta federazione di parenti d'elevi. D'appressu à u so rispunsèvule (da ascultà nant'à Alta Frequenza l'insignamentu di a lingua corsa saria pulitizatu è ancu suspettu d'ùn esse laicu (!). Bravu. Hè vera chì tutti l'insignanti di lingua è cultura corsa, in più d'ùn esse cumpetenti, corci, militanti di l'armata di l'ombra (ma chì canale o Ortoli ?) sò tutti chjesali è ne sò sempre à amparà u Pater Nostru à i so sculari. Chì l'omu sia rassiguratu. L'obligazione di a lingua corsa ùn hè micca à u prugramma in 2011, nè in 2012, è siguramente micca in 2020 non più. Scumettemu ? Ma chì li serà pigliatu di vulè fà a pulèmica cù l'insignamentu di u corsu ? A FCPE averia fattu listessu cun l'insignamentu di l'inglese, di a fìsica o di e matematiche ? O forse a federazione hà vulsutu fassi un colpu di pubba è fassi vede cum'è "quelli chì ùn anu micca paura di i naziunalisti" ? Sola a psicanalisi ci puderà aiutà.

Chì u sgiò Pierre-Vincent ùn s'inchieti, l'effettivi di sculari scritti in corsu ùn crescenu micca, è ancu megliu : a lingua corsa ùn s'hè mai purtata cusì male. Hè a quarta lingua parlata in stu paese, daretu à u francese, l'arabu è u purtughese. Ancu di grazia ch'elli ci sò i guardiani di l'egualità è di a laicità per chì a nostra lingua ùn sia un perìculu per a Ripublica... O Ortoli, ùn vedi mancu chì di lingua in stu paese, à mumenti ùn ci n'hè più ? In fine di contu, l'intullerenti è i riazziunarii, sò elli...

Surpresa, in terza pusizione truvemu u Quick, chì hà fattu nasce assai cummenti sti pochi ghjorni. Ancu di più chì dapoi l'apertura, u spaziu davant'à u munumentu (chì si trova ghjustu in faccia) in a memoria di e vittime di a catastrofa ùn hè più rispettatu...

In quarta pusizione, à un votu (solu !) in daretu, l'Equipe de France chì ci hà fattu sunnià quist'annu : Zahia, Kysna, Anelka, Evra, eccetera... Eppò dinù Domenech, Escalettes, i macciacci, è un'eliminazione festighjata in u mondu sanu chì hà fattu dì à Aimé Jacquet : "J'ai honte d'être français". Almenu, averà vintu qualcosa quist'annu...

Per un votu solu, truvemu in daretu u pistunatu u più cèlebre di Corsica, u nostru Jean-Jean di Pappà naziunale, chì hà cunnisciutu a gloria durante l'annata 2010. A so cullata da a 25esima piazza d'una lista à a direzzione d'un uffiziu in qualchì settimana hè entratu in a grande storia di u piston.

Infine, ùn ci n'hè mancu unu nant'à u podium, ma a grande famiglia di a diritta corsa s'hè surpassata in u 2010. L'inseme di i voti di i canditati colla à 17,8 % ! Si mèritanu dunque u premiu anch'elli, un Catinu Speziale per l'inseme di a so òpera. Hè a racolta d'un longu travagliu di i so partigiani :
- Camillou è Ange Santini, capimaghja di u fiascu di a peghju diritta di u mondu (Padduc, AMG 800, schjaffu messu da Sarkozy, bettunizazione à buzeffu, peghju risultatu pè a diritta corsa dapoi chì l'elezzioni esistenu...)
- Jean-Jacques Panunzi chì vole mette fora l'associ di difesa di l'ambiu cun sta grande frasa : "Nous devons nous soulever pour lutter contre le lobby des associations (...) À force d’œuvrer pour la protection du lézard, de la libellule et des crapauds, il ne restera plus que ça et nous, on va disparaitre, je vous le dis !". Seremu d'accordu cun ellu nant'à un puntu : semu veramente in traccia di smarisce, ma micca per e listesse ragioni...
- Hè dinù a vittoria d'Antoine Giorgi chì trova chì 75% di residenze segundarie ùn bastanu micca nant'à a so cumuna. A frasa di l'annu l'hà cacciata ellu : "si on arrête de construire on va tuer la Corse !" Magnificu...
- Ùn ci scurdemu di u coppiu infernale di u Borgu, Paul è Anne-Marie Natali. Arricurdatevi di e cicculate ind'è Sarkozy è di i nomi di lochi di a so cumuna di u Borgu (scusate, Borgaux) cù a celebre "Rue des Castors". In più, anu vintu u cuncorsu di u più bellu giratoghju in 2009.
- Infine, ùn ci scurdemu di i neo-cursisti Stéphanie Grimaldi è Marcel Francisci, chì si sò scuperti un'anima di naziunalisti dapoi i risultati di l'ultime elezzioni : "il faut corsiser l'UMP" hà dettu Stéphanie Grimaldi à RCFM. Anu scupertu ch'ellu c'era un populu, una lingua à salvà, una terra à prutege... Ma sin'avà, durmianu ?

Per finisce, à quelli chì s'inchietanu, i naziunalisti ùn sò micca ultimi in stu classamentu. Per una volta i duri sò piazzati in testa (2,94%) davant'à i molli (2,84%). Facenu megliu ch'è Paul u polpu (0,8%).

Felicitazione à tutti, è cuntinuvate cusì ! Ùn ci hè dubbitu chì 2011 serà un'annata di catinoni chì ci la feranu à fà l'attualità corsa à grandi colpi di bugie, di pazzie, di sumerisimu o di mischineria... È senza elli, A Piazzetta ùn esisteria micca.


Risultati cumpletti :

Avemu avutu da aspettà à u 75u minutu è u sigondu but di Gourcuff per fà a festa è crede in a vittoria.

Hè vera chì u Luxembourg, forte di i so 500.000 abitanti, cù a so squadra naziunale d'un niveddu CFA sigondu à Robby Langers (quarta divisione francese, cume u Gazelec è u C.A.B.) era un avversariu maiò per i nostri francesi. Unu di i ghjucatori, Leweck, hè ancu statu elettu "meilleur barman 2009 et 2010". Per dì vi !

Chì pinsà di u publicu di Saint Symphorien ? Un spitaculu cusì beddu era talmente luntanu in a so memoria chì hà fattu a "ola" per u primu but è hà cantatu a Marsegliesa à alta voce per u sigondu !

Un terzu è i sindicati ùn avarianu più u laziu di fallà in carrughju per luttà contru à a riforma di e ritirate.

In fin di contu, c'era di più spetaculu per Italia - Serbia (macciu arrestatu dopu à 6 minuti di ghjocu).

Chì saria statu s'ellu era un scontru contru à a squadra Corsa ? Chì risultatu ? Chì reazzioni di u publicu ?

-50... -60... -70% ! Sò i saldi dinù per l'Equipe de France.

Ci vole à crede chì dapoi a Cuppa di u Mondu, a maglia di i "Bleus" ùn si vende più. Ancu megliu : e publicità cun Ribéry è Anelka ùn si vedenu più indocu. I sponsors anu fughjitu è piantatu e so campagne publicitarie (Quick, Crédit Agricole...).

Serà l'imàgine catastròfica di u bus in greva chì anu stumacatu a ghjente è i sponsors ? O quella di a disputa trà Evra è Duverne ? O forse i macciacci di i ghjucadori ? O a chigna di Domenech ? O quella d'Escalettes ?

In tantu, certi prufittanu di u mundiale ridiculu di i Francesi per fà una campagna di marketing. Ma forse micca quelli chì eranu aspettati : hè un associu di sustegnu à zitelli chì soffrenu di handicap.

La Fondation Motrice hà lanciatu a prima publicità anti-Bleus cun stu slogan : "Certains refusent de courir, quand des enfants rêvent simplement de marcher"...

Bisognu d'aghjustà qualcosa ?

"Le néant absolu" (Jean-Michel Larqué)
"Le mardi noir du football français" (Arsène Wenger)
"Le cauchemar du football français" (Christian Jeanpierre)
"J'ai honte d'être français" (Aimé Jacquet)
"J'ai mal à la France" (Thierry Roland)
"La pire équipe de France de tous les temps" (Eric Cantona)

https://www.apiazzetta.com/video/

Ùn s'era mai vista à una cuppa di u mondu è sò l'Irlandesi chì devenu spanzassi.

Ci hè veramente qualcosa di fràcicu in u mondu di u futbol francese è si ne passa tantu ch'ellu hè diventatu difficiule di seguità.

Femu un picculu riassuntu :

- una squadra chì ghjoca cum'è un pede (paria di vede 11 Fabrice Jau nant'à u terrenu)
- parechji clani chì anu fattu schjattà a squadra (i bianchi contr'à i neri, u goffu contr'à u bellu, i banlieusards contr'à tutti... a ci dice un giurnalistu di Le Monde
- ghjucadori senza onore chì sò ridiculizati da piccule squadre (a Nova Zilanda face megliu ch'è a Francia !)
- i giurnalisti di u mondu sanu chì si feliciteghjanu di a disfatta di i Bleus
- insulte di raccaglie (scusate ma Anelka ùn hà micca dettu "va te faire enculer, sale fils de pute !" ma solu "va niquer ta mère, enculé de ta race !"
- un ghjucadore esclusu ma u so presidente chì minimizeghja : "il a été exclu dignement et il est parti dignement" (Escalettes)
- un capitanu chì invece di scusassi parte à caccighjà à a "balance" : "il y a un traitre dans l'équipe, il faut le trouver"
- è torna cummedie, baruffe, insulte, demissioni...


Sta squadra hè cusì stumacante chì ancu in u locu induve stanu i Francesi, i Sudafricani anu festighjatu a vittoria di u Mèssicu.

L'Equipe de France hà decisu di passà à a risa in Mondovision è ùn hè siguramente ancu finitu.

Chì serà a prùssima nutizia ?

Anelka riintegratu ? Ribery chì annunzia a so ritirata ? Gourcuff chì annunzia a so cunversione à l'islamu ? Sarkozy chì dissolve a FFF ? Mathieu Valbuena chì s'hè impiccatu in a so stanza d'ottellu ? Laurent Blanc chì ricusa a selezzione ? Domenech chì si ne fughje nanz'à l'ultimu macciu di a Francia ? Villepin chì mette una panetta à Thierry Henry ? Escalettes tichjatu di colpi da Abidal ? Footix plasticatu ?


Cun questi quì, tuttu diventa pussibule...

Ci sò pienu di ragioni d'apprezià u Mèssicu :

Salma Hayek
a Corona
Carlos Santana
u Subcomandante Marcos
E misteriose Cités d'Or
i Pepitos
u filmu La Chêvre
i Mariachi

Dapoi u 17 di ghjugnu, ci n'hè un altru : l'eliminazione di a Francia à a cuppa di u mondu di futbol.

U penalty di Cuauhtémoc Blanco (37 anni) manda a Francia di Ribery è Anelka in casa soia, squadra qualificata di " la plus antipathique, la plus arrogante, la plus frimeuse, la plus bling-bling de ce Mondial sud-africain " da Marianne.

Voi chì aviate a paura di suppurtavvi i turisti a faccia pinta in bleu-blanc-rouge cù a maglia di Sidney Govou nant'à e spalle intraccia di mughjà "olololo chompions du monde rodidon !" pudete dorme tranquilli.

Tequila per tutti !

Cum'è s'ellu ùn ci n'era micca abbastanza cusì per u puverettu di Raymond. A cuppa di u mondu di futbol ùn hè ancu principiata chì l'Equipe de France hè digià à a risa.

Parechji ghjucadori sò stati messi in causa in un scàndalu di proxénétisme sur mineure . È cum'è sempre cun i Bleus, l'affare hè ridiculu :

U maccarellu saria un certu Abdou, un anzianu di l'emissione... "A la Recherche de la Nouvelle Star" (ci hè megliu cum'è CV...). L'affare si passava à u Café Zaman nant'à i Champs Elysées.

I ghjucadori messi in causa sò Govou, Ribery, Benzema è Ben Arfa.

Nunda di veramente grave per l'internaziunali francesi (for'di u maccarellu, nimu hè statu messu in esame per avà), ma eccu qualcosa chì ferà piacè à a FFF è à i so sponsors à qualchì settimana di u Mundiale in Sudafrica.

Cungratulazioni dunque à Adidas, TF1, Johnny Hallyday, Christian Jeanpierre è à a SARL La Cave Bastiaise.

Da leghje nant'à LeMonde. fr : L'affaire Ribéry conforte le côté un peu ridicule des Bleus

A sapete bè, a Francia ùn meritava micca di qualificassi per a Cuppa di u Mondu di futbol.

L'ondeci stracci bleus-blanc-rouge ùn anu mai riesciutu à alzà u so ghjocu è sò l'Irlandesi à esse statu i più boni nant'à u terrenu.

In fin'di contu, hè a manaccia di Thierry Henry chì permette à a squadra di Domenech di qualificassi.

Cusì, u ghjucadore francese passa di u statutu di catinu naziunale à quellu di closcia internaziunale.

U web hè scatinatu contr'à quellu chì tutti ghjudicheghjanu cum'è un antipaticu di prima trinca, siguru d'ellu è pretensiunutu.

U primu à tirà una fucilata hè Tony Cascarino : Henry hè un scruccone è un falsone. A dice in u Times.

Chì fucking disgrace !

U giurnale purtughese A Bola dinù ricunnosce una vergogna è una scruccuneria di quelle maiò.

Ladru, falsu, scruccone, vergogna... ne vulete di più ?

L'internauti irlandesi caricatureghjanu Henry in ghjucadore di basket, di hand, di base-ball...

Sola nutizia pusitiva di a serata : Domenech ferma selezziunadore di a Francia.

Bon, for'di quessa, iè semu azezi neri è bischemu. Iè u ballò ùn hè micca solu un sport. Iè semu partigiani è micca fair-play.

È cum'ellu a dice u più grande biscone di u mondu : "quand'ellu hè stu toxicò di Maradona à marcà di a manu contr'à l'Inghilterra, tuttu ognunu trova què maccu..."

N°1 : U Fighting Spirit Irlandese
L'Eire ùn hè una squadra maiò di ballò. A so migliò perfurmanza hè un quartu di finale à u Mundiale 90. Pochi ghjucadori cunnisciuti è stelle di u futbol. Ma in u tempacciu di Dublin, davant'à 80.000 cori scatinati è cù a so rabbia, l'Eire pò batte ancu i più grandi.




N°2 A Guinness
Và bè ch'ella ci piace a Pietra, ma quantunque, a Guinness...




N°3 Croke Park
Croke Park hè unu di sti stadioni chì anu una anima è induv'ellu si sente a forza di u passatu. Croke Park sò 80.000 sustenidori chì vi piglianu à e trippe. Sin'à u 2005 hè riservatu à i sporti gaèlichi è difesu à i sporti brittànichi. Face dunque pocu tempu ch'ellu si pò ghjucà à ballò è à u rugby in stu tempiu di l'identità irlandese.

https://www.apiazzetta.com/video/

N°4 Il Trap
Giovanni Trapattoni, o unu di l'intrenori i più maligni di tutta a storia di u futbol. Un palmarès tremendu, una legenda di u calcio, è sopr'à tuttu un caratteracciu è un azizume di quelli neri. Peghju ch'è Frederic Antonetti ! Avà u vechju Trap intrena l'Eire per un ultimu cumbattu : andà à u Mundiale 2010.

https://www.apiazzetta.com/video/

https://www.apiazzetta.com/video/

N°5 The Pogues
Gruppu mìticu di a pop folk di l'anni 80-90, a so musica piena d'energia è di whiskey hè quantunque astr'affare ch'è Renan Luce, Pascal Obispo è Vincent Delerm, nò ? Fidighjate què e tronscie !

https://www.apiazzetta.com/video/

N° 6 George Best
Bon và bè, u tippu era di l'Ulster, micca di l'Eire. Ma era sopr'à tuttu u ghjucadore u più maccu di tutti i tempi. Un tippu capace di ghjucà briacu zuffu è di sciaccà ne trè in un macciu ùn pò esse ch'è un marzianu. Qualchì citazione cèlebre :

"In 1969 aghju piantatu e donne è l'alcool. Sò stati i 20 minuti i peghju di a mo vita".

"Aghju spesu assai soldi in l'alcool, e donne è e vitture di sport. U restu, l'aghju spulatu".

"Avia una casa vicina di u mare. Ma per andà à u mare, ci vulia à passà davant'à un bar. Ùn aghju mai vistu u mare."

U "Quintu Beatles" morre in 2005 à 59 anni. 300.000 irlandesi à u so interru. Ghjornu di dolu naziunale.

N°7 : U2
Ancu si Bono ci pompa appena certe volte, ùn vi sminticate mai chì l'Irlanda ci hà datu U2.

https://www.apiazzetta.com/video/

N°8 : Qualchì filmone
Alè, una piccula lista di filmoni. Sì à a fine di Bloody Sunday (di Paul Greengrass) ùn avete micca a voglia di pienghje, ùn site micca un umanu. Ma dinù The Commitments, Au nom du père, Michael Collins, o ancu Hunger nant'à a storia di Bobby Sands.

https://www.apiazzetta.com/video/

N°9 Surella d'Irlanda di Canta u Populu Corsu
Dimmula francamente : Surella d'Irlanda di GP Poletti hè una di e più belle canzone corse di tutti i tempi (di preferenza u tremendu live Au Théâtre de la Ville).

https://www.apiazzetta.com/video/

N°10 : Thierry Henry, Franck Ribery, Raymond Domenech è Thierry Roland
Bisognu à aghjustà qualcosa ?

]]> https://www.apiazzetta.com/photo/art/imagette/1705302-2305336.jpg https://www.apiazzetta.com/10-ragioni-di-sustene-l-Irlanda_a704.html tag:https://www.apiazzetta.com,2026:rss-963601 Fri, 13 Jun 2008 23:17:00 +0200 co U Sgaiuffu