U duttore Maury hè un geniu. Infine, s'ellu hà esistitu da veru. In verità ùn si sà mancu quale ellu era. Un pseudo ? Un scruccone ? Un briagone ? Un libru finanzatu da u lobby francese di u vinu in l'anni 70, quandu a lege Evin ùn esistia micca ?

Hè un misteriu ma sta bibbia di u sburgnone hè stata turnata à esse editata (edizioni Nil). À noi ci pare chì stu libru fundamentale hè da mette in a categuria di i grandi pensatori francese, in a successione di BHL è di Michel Onfray.

A so lettura ralegrerà tutti l'amatori di comptoir è derà l'impressione à i passiunati d'apperitivi chì beie hè una necessità per esse in salute. Chì tanti yoga, salle de muscu è footing...

Aérophagie ? Sciaccatevi duie cuppette di champagne.

Ménopause ? Dui bichjeroni di Médoc. Perchè, ùn si sà.

Cacarella ? Un Beaujolais.

Pena in capu ? Sopr'à tuttu micca un Efferalgan ! Preferite un stagnone di Sauternes.

Si puderia cuntinuvà cusì :

Angine ? Trè pastizzi on the rocs.

Frebba ? Quattru gin-tonic-cul-sec à prendre au milieu des repas.

Conjonctivite ? Una cascia di Malibu ananas.

Gueule de bois ? Una Suze cù appena di Liptonic.

Invece, nunda nant'à a malatia di DSK.

Lasciate cascà u vostru duttore, a medicina chinese o l'omeopattia. Empiite a vostra cantina di sottu scala piuttostu ch'è a vostra farmacia. Sì a pulizza v'arresta è ch'è vo site à 3 grammi, dite ch'ellu hè per via di u vostru trattamentu. Vi l'aviamu detta, stu tippu hè un tercanu.

Alè, à a salute è ch'ella sia a nostra medicina !

Attenzione ! Ghjovi sera, i mittomani chì volenu fà i spezialisti di vinu sò di surtita.

Avete da sentele tutte : "hà un gustu d'accianella"... "nò, quessu sente a fràgula"... "eiu sentu un gustu di mela, di pera è d'aranciu"...

Hè vera chì uva ci n'hè pocu in u Beaujolais. Tutti sti prufumi ch'è vo pensate sente sò quelli di u plàsticu è di i prudutti chìmichi.

Ma tutti i caffè di Corsica facenu e so "serate Beaujolais" allora ci vole à pruvà di fà u so interessante à u comptoir.

In fatti, nimu a dicerà, ma tuttu stu cumbugliu ùn hè ch'è una scusa per sorte, per beie, è per vultà in casa cù a so scimia nant'à e spalle : "capisci, m'anu furzatu à beie, c'era u Beaujolais..."

Tamanta scusa ! Tuttu què per ùn avè à dì ch'è vo vuliate pigliavvine una sta sera...

Allora, s'ellu ci vole veramente à sorte, almenu fate a resistenza. Ùn fate micca cum'è l'altri, biite vinaccia corsa !

Avà chì ghjunghje infine l'estate è ch'elli sò i primi calori, ripiglianu i rituali di l'apperitivu. Da Macinaghju à Bunifaziu, da a Cinarca à a Castagniccia, e terrazze di i caffè più o menu « brancati » s'empienu di nuvellu a sera venuta.

Ch'elli sianu funziunarii, ritirati, pinzuti, «chauffeurs-livreurs », cougars, prufessiunali di u poker, « Peoples » più o menu cunnisciuti, o simplici ghjucatori di u Skeubeu, tutti s'adduniscenu à l'ora di l'apperitivu pè beiesi un colpu in cumpagnia di i so amichi.

Ma dipoi qualchì annu sò finite e pastizzate ! Cume a cuntrata hè stata rimpiazzata da u poker, in li nostri lochi, Casà o Cinquant'unu sò stati rimpiazzati da u « Rosé ». Oghje l'apperitivistu ùn dumanda più una Moresca mà un Gris, o s'ellu hè cunniscitore di i vinu nustrali, dumanderà piuttostu un Tzaparal Castède, un Fioumichicol, o un Landru.

Mà d'induve venenu e riputazione di i nostri vini ?

Daretu à sti nomi chì tuttu ognunu cunnosce ind'è noi, si piattanu difatti denuminazione più o menu chjare è più o menu cunnisciute, segondu a lucalisazione di e vigne, e famose A.O.C...

Tutti l'anni, dopu à u Salon de l'agriculture, piovenu e medaglie nant'à i nostri vini. Etichette nove fiuriscenu nant'à e buttiglie è ognunu pò vede chì quessu hà a so medaglia d'oru, quill'altru quella d'argentu o di bronzu.

L'omu Corsu si dicerà, videndu quessa chì i nostri vini sò veramente bunissimi. Postu ch'elli si piglianu tutti l'anni tantu medaglie in Parigi, di pettu à altri vini più cunnisciuti cume Bordeaux, Côtes du Rhône o altri.

Di siguru à u mumentu di pagà ognunu si dicerà ch'ellu hè nurmale di fassi bastunà di pettu à tanta qualità è premi. Pagherà u so nettaru di i Dei quantu u so ultimu telefuninu, senza cuntestà.

Ma un ghjornu, circhendu à capisce tuttu st'imbrogliu di medaglie, omu si renderà contu chì stu famosu cuncorsu dà i so premii rughjone pè rughjone, culore pè culore... Chì, di produttori , ci n'hè pochi per ogni AOC (in l'AOC Portovèke, per esempiu, sò 4 !)... Chì ùn anu medaglie che quelli chì si prinsentanu... Chì d'altri cuncorsi o guide ricunisciuti (Vinalies, Hachette...) lascianu « cacahuètes » pè i vini corsi.

Allora francamente, fate piuttostu cume a maiò parte di e ghjente, ùn circate à capisce, prufittate di sta bella serata stivale, di sta bona buttiglia di vinu frescu incù i vostri amichi è....

À A SALUTE !

Trè "apéros géants" eranu organizati in Corsica sta dumenicata : in Bastia, Aiacciu è Calvi. Ma nunda à chì vede cù e 10.000 persone di Montpellier è Nantes.

Hè statu piuttostu l'apperitivu di u fiascu. In Aiacciu eranu quattru, in Bastia ùn c'era ch'è un car di CRS. Ancu LePost.fr si ne ride è scrive chì En Corse: les apéros géants font plouf.

In fine di contu, nant'à Facebook hè u gruppu anti-apéro géant in Corsica chì hà u più successu : più di 3.400 membri.

A Corsica hè dunque spartuta in duie categurie. I pro-apperitivu gigante è l'anti.

I partigiani dicenu chì l'apperitivu maiò hè sinònimu di cunvivialità, d'apertura, di scambiu è d'alcool à bon pattu.
È ci sò l'anti-apperitivone : dicenu chì hè per i pumataghji è i ràncichi, chì u veru corsu spende i so soldi è beie solu à u comptoir.

Difficiule d'analizà a moda di "l'apéro géant". Apperitivu di a miseria è di a solitutine ? Novu ligamu suciale ? "Pied de nez à la crise" cum'elli dicenu nant'à Slate.fr ? O robba di pumataghji è di closce à l'oziu ?

Hè vera chì l'apperitivu tamantu in Corsica hè un sport naziunale è si praticheghja tutte e sere. I Corsi ùn anu aspettatu à Facebook per inventà a sborgna. Ma pigliassi una scimia in Prada à Via Notte o à l'Acapulco hè più classa ch'è di beie una buttiglia di a Cuvée du Barbu pè i carrughji.

In quant'à l'apperitivu maiò di a baracca di a CTC, nimu parla d'interdiscelu...

Sapete chì a moda nant'à Facebook hè di lancià un "apéro géant" (hè ancu stranu chì nimu ùn appia ancu lanciatu sta cunneria in Corsica...)

Cusì, ci hè statu apperitivi giganti chì anu addunitu 10.000 persone in Nantes, 9.000 in Montpellier. À tal puntu chì sta moda cummencia à inchietà i puteri pùblichi.

Pensate... 10.000 persone briache chì si spasseghjanu à tappu pè i carrughji di e cità, spartendusi tizzoni, buttiglie di vinu à bon pattu è bieraccia calda.

Dunque, un giuvanottu vole avè u so apéro in a so cità, Brive. «Le but, c'est de faire parler de Brive, spiegava à u giurnale La Montagne. Je veux que le maire voie qu'il y a encore des jeunes à Brive. Il faut qu'il fasse quelque chose pour éviter que Brive ne se meure.»

Perchè micca ! U tippu passa ancu nant'à France 3 è cummencia à esse cunnisciutu. Ma u nostru amicu hè ricircatu pè escroquerie è violences commises sur conjoint. Hè statu cundannatu à 6 mesi di prigiò per quessa... è hè scappatu. Dapoi 2007, era ricircatu da a pulizza.

Hè appena cum'è si à l'epica, Yvan Colonna avia datu appuntamentu à i so amichi à l'Acapulco nant'à Facebook.

Risultatu, a vigilia di l'apéro géant i pulizzeri sò venuti à circallu è l'apperitivu l'hà fattu à u cummissariatu. Julien Maury averà u tempu di medità tuttu quessa durante qualchì tempu.

Muralità : riflettite bè nanzu di mette una cunneria nant'à Facebook...

L'affare ci vene da u seriu Brigham and Women’s Hospital di Boston.

Ci ampara chì ind'è e donne di più di 40 anni è chì beienu dui bichjeri à ghjornu à settimana ingrassanu menu ch'è l'altre.

Ùn ridite micca, stu studiu hà purtatu nant'à più di 19.000 donne americane, per divvi si i circadori americani facenu bè u so travagliu.

Ma attenzione, si tratta di dui bichjeri à ghjornu in una settimana, è di bichjeri di vinu rossu.

Avà si pò prupone à i nostri amichi di Boston d'apprufundisce appena di più in e so ricerche. Per esempiu, eccu unepoche di dumande impurtantissime :

- E donne di 40 anni è più, ok. Ma l'altri ? Ind'è l'omi di menu di 35 anni, per esempiu ?
- I dui bichjeri di vinu à settimana cunsigliati si ponu beie d'un colpu in una serata ?
- Si pò smagrisce dinù cun 14 bichjeri di vinaccia ? Ancu cù a "Cuvée du Barbu" ?
- Dui bichjeri à ghjornu à settimana, facenu quantu buttiglie à mese ?
- Si pò fà un regime cumpostu di vinu rossu è cacahuètes ?
- Viaghja dinù cù u pastizzu, u gin-tonic è u Johnnie-Coca ?
- L'americani dinù mettenu a soia ?
- À ragiò di quantu scimie à mese si pò perde un chilò ?
- Piuttostu ch'è d'andà à fà u footing, si pò dunque fà l'aperiting ?

Tante dumande senza risposta ch'ellu ci vuleria à schjarisce. Sappiate, amichi di u Brigham and Women’s Hospital di Boston chì a squadra di A Piazzetta hè pronta à fà avanzà a scenza.

À a salute !

Ma serà pussibule di manghjà è di beie tantu in cusì pocu tempu ? O quant'è no pudemu tichjacci trà Natale è Capu d'annu ! Pulenda, caprettu, bûche de Noël, gàmbari, foie gras... Una vergogna !

Di modu generale, e vacanze di Natale sò quelle induve collanu i chilò nant'à a bilancia è u cholestérol in u sangue.

È à u comptoir, ùn hè micca megliu. Trà l'apperitivi pigliati per vede l'amichi chì sò vultati per e feste, u champagne ch'ellu si stuppa pè u 31 è u licore ch'ellu si tocca in famiglia, poche l'occasioni di beie... Quant'è vò l'avete fatti soffre u vostru stòmacu è u vostru fegatu st'ultime settimane !

Ma passata a festa, capulatu u santu. Avà hè ora di ridiventà serii è di piglià e cose in manu. Dichjarate a treva à u vostru fegatu, ricumminciate à beie appena d'acqua !

Di tutte manere si tuttu và bè, site fusciatu. Dop'à a Natale, u 31, i soldi (ancu à -50%) è a crisa, site sbagliuccatu è sò viote e stacche.

Cunsulatevi cusì : ghjennaghju ùn hè micca un bellu mese. Trà u fretu, l'azizume generale è u tempacciu, ùn perdite nunda à stavvi in casa vostra. Fora ci hè cusì poca ghjente, for'di i briagoni è i losers abituali in perdizione.

Alè, San Ghjorghju per tuttu u mondu, hè a meia ! Curagiu, u veranu hè davant'à noi...

U discorsu ufficiale di i membri hè chì l’affare li permette di pudè piglià nutizie di l’unu o di l’altru, di mantene l’amicizie cun ghjente chì ùn si ponu scuntrà abbastanza spessu, di pudè mandà l’auguri di capu d’annu o di pregà bona festa è bon aniversariu più fàciule è tralallà… Un cornu sì ! Sò pochi à ricunnosce chì l’interessu maiò hè di buscassi à qualchissia, sta manera virtuale essendu sempre percepita cum’è quella di i pinzuti for’di mondu chì ùn cunnòscenu à nimu nù e so periferìe tamante…

A segonda a vi dicu eiu hè sta vuluntà ch’elle anu e ghjente d’impone è di ficcà a so chignaccia nant’à u web per circà d’esiste. È custì tandu si càmpanu. Tutti tutti vi dicu. È tuttu u mondu ci si monta una sega di quelle : imbelliscenu e donne, si trasformanu i tippi, ingiuvanìscenu i vechji è invèchjanu i (troppu) giòvani, citatini làmpanu elogiu à i so paesi cari chì ùn ci còllanu mai è paisani mòstranu ch’elli ùn sò cusì selvàtichi. Ci sò i belli, i grassi è i groppitondi, selibatàrii sunnièghjanu di truvacci l’amore è l’accuppiati si ponu tene qualcusella à u caldu sì casu o mai, barbuti è finochji, sburgnoni è santochji, pulitichi è persunalità cunnisciuti (o micca abbastanza), prufeziunali o disimpiegati, intelettuali è closce. Tutta sta ghjente si cappia alegra di pudè sciaccà l’ultime fottò di e so scimie o di e so surtite cun l’amichi o in famiglia.
Ùn sciàccanu ancu u so estru di u mumentu ?! Quella palesa à tutti ch’ella hè in depressione per attizzassi qualchì porcu in dirotta è l’astru vi lampa à scrittura grassa ch’ellu hè in piena forma soca per fà cagà à l’anziana amica chì l’hà cappiatu cum’è una calzetta intufunata.

Mentre ci lagnemu di sta pazzìa pè a securità à tutti i patti, primura mundiale di i guverni è di e pulizze di tutti i paesi, quelli scrianzati fàcenu u so travagliu à a pulizza chì tandu sà tuttu di a vita, di l’orientazioni pulìtiche, culturale, religiose è sessuali di i so suspetti, è ancu di l’astri chì ùn dumàndanu nunda.

I senterete avà, tutti i casch’è pienghje di a creazione chì fùghjenu à stanghittassi in casa appressu à facciabeccu. Hi ! Hè tutta ropa per i pinzuti, eiu ùn ci entru in ste tràppule quì. U veru Corsu si ne stà à comptoir à beie u so pastizzu troppu zeppu è à manghjà e so chips passate è secche secche ratachjendu cun l’amichi appressu à tutti e guappe chì pupulèghjanu stu mondu.

Perchè st’ànime perse è gioiosi murtuloni chì pascenu è venenu pè Facciabeccu, ci vulerà à ricunnosce chì s’elli ci si vèdenu, ùn si ponu sente...

Tenì, metitàtevila quessa !

A campagna di u guvernu hè intitulata "boire trop" è a videò publicitaria cummencia à fà parla d'ella.

Hè dunque ciò ch'ella hà fattu Rachida Dati u 14 di lugliu scorsu, à a garden party di l'Elysée.

In bomba ceca, Rachida pare avè ne una techja di Bernard Laporte chì s'appiccica appena troppu à u so bracciu. Li manda ancu un bellu :

"d'où tu m'touches ?"

Tandu vene Borloo (un antru spezialistu di e pastizzate à più finì) à calmà i dui ministri...

Alè, à a salute !

Qualchi mesi fà, avemu lampatu sta chjama (naziunale>>>>> porta) contr'à u rancichisimu ind' i bars è altri lochi di suciabilità. Trà i periculi chì divastanu a sucetà corsa, aviamu dinunziatu quellu di i castichi umani chì ùn mettenu mai a soia. Inn'u 2007, speriamu chì e lezzione fussinu amparate mà u custattu per u 2008 rimane chjaru: i rancichi ùn volenu sente nunda, sò sempre di più rancichi, è avà, l'affare sò in francese, cum'è si dice.

L' aviamu dichjaratu per tutti i Santi di u celu : in u 2008, ùn li servimu più ! Eppo... Intrappulati ind'a notte bastiaccia, pigliati dà a cuntentezza di ritruvassi incù l'amichi, beiendu un colpu, avemu fallitu... U rancicu chì beie à contu vostru dapoi tanti anni s'affacca, è, ghjuntu u mumentu di mette a vostra, spunta da u bughju... Vi colla è vi fala, perchè avete presu e vostre risoluzione per u 2008, ma quandu furmulate a sempiterna quistione "è tù chì beii ?", ùn pudete fà altru chi di dumandalli... Un mumentu di sulitudine tremendu...

Ma ùn semu micca soli à crede chì pudemu cambià e cose, allora, fate u piacè ! Chì a nostra mossa ùn diventi micca una bancarotta ! L'estate s'avvicina, incù e so prumesse di turnate... A lotta cuntinuveghja: avemu persu una battaglia ma micca a guerra ! Forti saremu s'è uniti semu !

Estate 2008 : hè mortu Rigalinu, sta volta ùn li servimu !

WE DON'T SERVE !

A dice ancu u dizziunariu corsu, à l'articulu turnata : Inseme di e beiende offerte è pacate da qualchidunu in un caffè"... L'umani mettenu a soia !

Quantu ne cunniscite cusì ? Sò i vostri amichi mà... dopu decine è decine di pastizzate, dopu anni è anni di briachina, ùn l'avete mai visti fà stu gestu rituale è simbolicu, rialzatu di ste parolle sacre : caccendu un bigliettu di a so stacca, "o Ange, ressers-nous".

È cusì beienu à contu vostru dapoi parechji anni... Mà ùn cridite micca ch'elli sianu di quelli disgraziati senza soldi... Pensatevi... Centinaie d'euros di vestiti nantu à elli, "portables" ottimi, vitture à buzeffu, viaghji aspessu (è micca in Corti o in Aiacciu, collanu à fà i "soldes" in Parigi, o à festighjà u carnevale in Rio...).

U peghju hè quand'elli vi dicenu "eiu ùn travagliu micca mà sto bè cusi..." A trappula si richjode sempre di listessa manera : mettite a vostra è ghjunghje u mumentu "è tù, chi beii ? - bah, nunda... umbeh, mettimi puru un "boc""... è què pò durà a serata sana... Quand'elli vedenu affaccà u so giru, vi trovanu sempre una scusa pè scappà... È noi bistiole cuntinuvemu à pagà.

Allora in sti tempi di principiu d'annu, femu sta risoluzione: in u 2008, ùn li servimu più !