Chì successu ! Avemu arresgistratu 1359 voti per l'elezzioni di u Catinu di l'annu 2010. Ma nant'à A Piazzetta cum'è in e vere elezzioni, a demucrazia ùn esiste micca. Hè vera ch'ellu si pudia frodà. I falsi elettori, e false precure è i voti in doppiu è in trìplice eranu accettati. Cum'è in a vita...

Quale avia da piglià a successione di Christian Clavier (in 2008) è di Paul Giacobbi in 2009 ? Quist'annu dinù, ùn eranu micca i catini chì mancavanu.

Pè a prima piazza a lotta hè stata accanita è stretta sin'à l'ultimu. Dui picculi voti di differenza solu trà i dui campioni ch'è no semu dunque obligati di dichjarà Catini d'oru ex-aequo : Frédéric Thiriez (15,74%), tercanu anticorsu, catinu intersiderale per avè vulsutu sbarazzassi più d'una volta di i clubs corsi è in particulare di u Sporting. È dì ch'ellu hè statu l'avucatu sceltu da u... PRG in l'affare di l'elezzione di Pascaline Castellani. Di fattu, pudemu rimette dinù à u PRG è à questa quì u primu postu di a classifica. Felicitazioni !

Sta prima piazza hè dunque spartuta cù a FCPE, in particulare a sezzione Corse du Sud di sta federazione di parenti d'elevi. D'appressu à u so rispunsèvule (da ascultà nant'à Alta Frequenza l'insignamentu di a lingua corsa saria pulitizatu è ancu suspettu d'ùn esse laicu (!). Bravu. Hè vera chì tutti l'insignanti di lingua è cultura corsa, in più d'ùn esse cumpetenti, corci, militanti di l'armata di l'ombra (ma chì canale o Ortoli ?) sò tutti chjesali è ne sò sempre à amparà u Pater Nostru à i so sculari. Chì l'omu sia rassiguratu. L'obligazione di a lingua corsa ùn hè micca à u prugramma in 2011, nè in 2012, è siguramente micca in 2020 non più. Scumettemu ? Ma chì li serà pigliatu di vulè fà a pulèmica cù l'insignamentu di u corsu ? A FCPE averia fattu listessu cun l'insignamentu di l'inglese, di a fìsica o di e matematiche ? O forse a federazione hà vulsutu fassi un colpu di pubba è fassi vede cum'è "quelli chì ùn anu micca paura di i naziunalisti" ? Sola a psicanalisi ci puderà aiutà.

Chì u sgiò Pierre-Vincent ùn s'inchieti, l'effettivi di sculari scritti in corsu ùn crescenu micca, è ancu megliu : a lingua corsa ùn s'hè mai purtata cusì male. Hè a quarta lingua parlata in stu paese, daretu à u francese, l'arabu è u purtughese. Ancu di grazia ch'elli ci sò i guardiani di l'egualità è di a laicità per chì a nostra lingua ùn sia un perìculu per a Ripublica... O Ortoli, ùn vedi mancu chì di lingua in stu paese, à mumenti ùn ci n'hè più ? In fine di contu, l'intullerenti è i riazziunarii, sò elli...

Surpresa, in terza pusizione truvemu u Quick, chì hà fattu nasce assai cummenti sti pochi ghjorni. Ancu di più chì dapoi l'apertura, u spaziu davant'à u munumentu (chì si trova ghjustu in faccia) in a memoria di e vittime di a catastrofa ùn hè più rispettatu...

In quarta pusizione, à un votu (solu !) in daretu, l'Equipe de France chì ci hà fattu sunnià quist'annu : Zahia, Kysna, Anelka, Evra, eccetera... Eppò dinù Domenech, Escalettes, i macciacci, è un'eliminazione festighjata in u mondu sanu chì hà fattu dì à Aimé Jacquet : "J'ai honte d'être français". Almenu, averà vintu qualcosa quist'annu...

Per un votu solu, truvemu in daretu u pistunatu u più cèlebre di Corsica, u nostru Jean-Jean di Pappà naziunale, chì hà cunnisciutu a gloria durante l'annata 2010. A so cullata da a 25esima piazza d'una lista à a direzzione d'un uffiziu in qualchì settimana hè entratu in a grande storia di u piston.

Infine, ùn ci n'hè mancu unu nant'à u podium, ma a grande famiglia di a diritta corsa s'hè surpassata in u 2010. L'inseme di i voti di i canditati colla à 17,8 % ! Si mèritanu dunque u premiu anch'elli, un Catinu Speziale per l'inseme di a so òpera. Hè a racolta d'un longu travagliu di i so partigiani :
- Camillou è Ange Santini, capimaghja di u fiascu di a peghju diritta di u mondu (Padduc, AMG 800, schjaffu messu da Sarkozy, bettunizazione à buzeffu, peghju risultatu pè a diritta corsa dapoi chì l'elezzioni esistenu...)
- Jean-Jacques Panunzi chì vole mette fora l'associ di difesa di l'ambiu cun sta grande frasa : "Nous devons nous soulever pour lutter contre le lobby des associations (...) À force d’œuvrer pour la protection du lézard, de la libellule et des crapauds, il ne restera plus que ça et nous, on va disparaitre, je vous le dis !". Seremu d'accordu cun ellu nant'à un puntu : semu veramente in traccia di smarisce, ma micca per e listesse ragioni...
- Hè dinù a vittoria d'Antoine Giorgi chì trova chì 75% di residenze segundarie ùn bastanu micca nant'à a so cumuna. A frasa di l'annu l'hà cacciata ellu : "si on arrête de construire on va tuer la Corse !" Magnificu...
- Ùn ci scurdemu di u coppiu infernale di u Borgu, Paul è Anne-Marie Natali. Arricurdatevi di e cicculate ind'è Sarkozy è di i nomi di lochi di a so cumuna di u Borgu (scusate, Borgaux) cù a celebre "Rue des Castors". In più, anu vintu u cuncorsu di u più bellu giratoghju in 2009.
- Infine, ùn ci scurdemu di i neo-cursisti Stéphanie Grimaldi è Marcel Francisci, chì si sò scuperti un'anima di naziunalisti dapoi i risultati di l'ultime elezzioni : "il faut corsiser l'UMP" hà dettu Stéphanie Grimaldi à RCFM. Anu scupertu ch'ellu c'era un populu, una lingua à salvà, una terra à prutege... Ma sin'avà, durmianu ?

Per finisce, à quelli chì s'inchietanu, i naziunalisti ùn sò micca ultimi in stu classamentu. Per una volta i duri sò piazzati in testa (2,94%) davant'à i molli (2,84%). Facenu megliu ch'è Paul u polpu (0,8%).

Felicitazione à tutti, è cuntinuvate cusì ! Ùn ci hè dubbitu chì 2011 serà un'annata di catinoni chì ci la feranu à fà l'attualità corsa à grandi colpi di bugie, di pazzie, di sumerisimu o di mischineria... È senza elli, A Piazzetta ùn esisteria micca.


Risultati cumpletti :

A maledizzione di l'Ange Santini cuntinuveghja à perseguità l'ex-sceffu di a Corsica.

Dopu à l'episodiu catastròficu di u PADDUC, dopu à u schjaffu di Sarkozy (arricurdatevi : "le Padduc sera notre programme" è dopu Sarko chì dice "le Padduc est mis à la poubelle, c'était un mauvais projet"), dopu à u scumpientu di l'AMG 800 (300 millioni d'euro è forse mai in circulazione), dopu à u pattone à l'elezzioni è mentre ch'ellu deve dinù scunfiniscesi à Anne-Marie Natali i castichi ùn sò ancu à compie per Anghjulu.

Cume s'ellu ùn n'avissi abbastanza cusì, avemu amparatu in Corse-Matin chì Ange Santini hà avutu un accidente di vittura cù una 2 Cavalli nant'à a Balanina.

Rassicuratevi, ùn hè micca statu feritu. A so Jaguar hè solu diventata un "screu" da purtà ind'è Cass'Auto è l'alcotest hà dimustratu ch'ellu ùn era micca briacu.

Ùn pudemu ch'è cunsiglialli di fà caccià l'ochju. Curagiu o Anghjulu, l'annata hè guasi compia...

Siamu franchi. Cun Paul Emploi Giacobbi dettu dinù "The Brain" à u capu di a CTC, a diritta pò dì à vedeci à l'assemblea di Corsica per una bella stonda.

Femuli puru cunfidenza à u venachese. L'omu ci capisce. Ùn vi scurdate ch'ellu hè statu elettu presidente di u Cunsigliu Generale di Corsica Suprana allora chì a diritta era magioritaria, in u 1998. Oghje, a magiorità Giacubbista hè di 2/3.

Per quelli chì anu cunnisciutu i petits fours è e lasagne à u Palazzu Lantivy, l'anni à vene risicheghjanu d'esse quelli di a traversée du désert.

Senza offiziu, senza postu à l'esecutivu, ch'anu da diventà ?

Per Jérôme Polverini si parla di fà "Koh Lanta". Antò Giorgi hà ripigliatu u club di "Des chiffres et des Lettres" di A Sarra di Farru.

Anghjulu Santini s'hè messu à u Prozac. Camillù hà da participà à "Lost".

Rendemu dunque un omàgiu à quelli chì anu fattu avanzà a Corsica st'ultimi anni.

A Piazzetta v'hà fattu un riassuntu di l'emissione cù l'ondeci candidati à e territuriali. A nostra dream team di a pulitica corsa hà dibattitu durante 2 ore. Eccu ne u best of, o ciò ch'ellu ci vole à ritene.

Pudete dinù vede l'emissione sana nant'à u situ di FR3.

Avà, ùn puderete micca dì ch'è vo ùn sapiate micca...

Difficiule di fà peghju ch'è Frédéric Lefebvre. U spezialistu di a pretensione, di a pruvucazione è di a cunneria à l'UMP (hè u so rollu offiziale) n'hà fattu una bella nant'à a Corsica : per ellu sariamu "un petit village gaulois".

Peghju : "nous avons deux Astérix avec Camille de Rocca Serra è Ange Santini".

Dopu à "nos ancêtres les Gaulois", eccu dunque una cacciata nova. 2000 anni dopu, i Corsi sò dunque "ingallizati".

Cum'è metafora, difficiule di fà più chjaru ! Almenu sapemu induve andemu...

- Lugliu 2008 : u PADDUC : aspettatu durante parechji mesi, stu pessimu ducumentu essenziale pè a Corsica hè u fruttu di u travagliu... d'un cabinettu pariginu. Passemu nant'à i sbaglii, e "fautes de frappes" è i "copié-collé" di stu ducumentu chì duvia esse qualcosa di capitale pè i 20 anni à vene.

- Subbitu esciutu, u PADDUC face l'unanimità contr'à ellu : associ, partiti pulitichi, eletti, avisu negativu di u CESC ecc... A sucetà civile corsa s'hè mubilizata cum'è mai, è quessa ùn s'era mai vista !

- Aprile 2009 : Davant'à a e critiche è a zerga generale, segonda liccia pè a diritta corsa : un "PADDUC nouvelle mouture" hè prupostu cù e rimarche di u CESC è di u Conseil des sites. Poche nuvità, sempre listessa visione di u sviluppu di 30 anni fà : sviluppà l'ottelli, u turisimu di bor'di mare.

- Malgradu quessa, u CESC dà torna un avisu negativu, l'associ ùn si calmanu micca, parechji eletti dicenu ch'elli vuteranu contru.

- Ghjugnu 2009 : vene u ghjornu di u votu à l'Assemblea di Corsica. Surpresa ! Spaventati da l'idea di un fiascu maiò, a diritta caccia u votu di u Padduc da l'ordine di u ghjornu.... Ci spiecanu chì : "nous le retirons du vote et il sera l'enjeu des prochaines territoriales !"

- Ferraghju 2010 : Dunque, u Padduc hè diventatu "l'enjeu" di e territuriali di marzu 2010 è u prugramma di l'UMP. Ma una surpresa nova ghjunghje cun a visita di Sarkozy di ferraghju : u presidente di a Ripublica mette u Padduc à a rumenzula, ùn si ne parla più ! Dice ch'ellu ùn hè micca un bon travagliu, micca cumpattivule cù u "développement durable"...

Poca rinfacciata !

Ma Sarko ci spieca ch'ellu ci vole quantunque à vutà per quelli chì anu purtatu u prugettu...

U presidente dice dinù chì Parigi ripiglia a manu nant'à i prugetti di sviluppu di a Corsica. 40 anni di lotta per avè un sùppulu d'autonomia, o piuttostu di decentralizazione chì vènenu di smarisce.

CCVD ! (ciò ch'ellu ci vulia à dimustrà...)