A Piazzetta - giurnale in lingua corsa | journal langue corse | apiazzetta.com informations, actualités Corse

Chì hè esse corsu ?

U Sgaiuffu — Sun, 23 May 2010 17:13:00 +0200

A creazione d'una selezzione corsa di futbol face nasce un dibattitu passiunatu nant'à l'identità corsa. Quale pò purtà a maglia di a Squadra Corsa ? Chì hè "esse corsu" oghje ?

Per una volta a Corsica hà vintu qualcosa. A selezzione di ghjucadori corsi hà battutu a Brittania è u Gabon durante a Corsica Football Cup.

Era un piacè di vede sta selezzione naziunale corsa, tantu bramata è mille volte dumandata. Per quessa ci vole à felicità l'organizatori di u truffeu, Lucien Felli, Dédé Di Scala è Patrice Paquier di u so travagliu tremendu.

Ma futbol è identità sò spessu ligati. Nant'à u net l'internauti s'interrugheghjanu nant'à i criterii di selezzione di a Squadra Corsa. Per a « Corsica Football Association », i patti sò chjari. Si ponu selezziunà i ghjucadori "d’ascendance parentale ou grand-parentale Corse".

Exit dunque a cumunità di destinu è i "corsi d'aduzzione" cum'è Ghisolfi o Pierre-Yves André, o ancu quelli nati quì cum'è Ben Saada o Khazri.

Invece, ghjucadori chì anu luntane radiche corse ma chì i venenu pocu sò selezziunati, cum'è Damien Tiberi (Sedan) o Grégory Leca (Caen). Nant'à Facebook, certi irunizeghjanu, si leghje : espère que certains joueurs de l'équipe de Corse profiteront de leur séjour pour visiter notre belle île.

I sustenidori bastiacci dibattenu nant'à u forum Camperemu.com di e selezzione di Ghisolfi, Khazri è Ben Saada. Droit du sol o droit du sang ? L'avisi sò cuntrastati.

L'articulu di A Piazzetta nant'à a Squadra Corsa hà fattu nasce cummenti numerosi. Pè Rochjunculu3 : "I baulli chì credini chì u so populu si difinisci par via di u sangu accicati da u razzismu (o a simplicia cunnaria ?), ùn s'avvidini mancu ch'hè a so visioni balorda, mitica è trapassata, chì accillarighja a fulclurizazioni è l'acculturazioni".

Al dilà di una selezzione di ballò, nasce u dibattitu di l'identità corsa. Di solitu ùn sò ch'è i naziunalisti à parlanne in tempi d'elezzioni. A Squadra Corsa pone a dumanda à tutta a sucetà : quale hè corsu ?

À l'ora di a mundializazione, quandu a pupulazione di a Corsica hè crisciuta è s'hè mischjata assai, à un mumentu induve i Corsi sò diventati citatini è chì a leia cù i paesi si perde, chì e culture s'unifurmizeghjanu è chì a lingua si ne morre, chì hè "esse corsu" oghje ?

Ma ùn ci hè micca ch'è a Corsica à cunnosce a so crisa identitaria. Brice Hortefeux è Eric Besson ùn anu pussutu risponde à ciò chì face l'identità francese...

U ritornu di a Squadra Corsa

u webmaestru — Tue, 18 May 2010 02:30:00 +0200

Un annu dopu à u so match contr'à u Congo (1-1 in Mezavia), a selezzione corsa hè di ritornu per un turneu cù u Gabon, u Togo è a Brittania.

À trè settimane di a Cuppa di u Mondu in Sudafrica, a Corsica ghjoca anch'ella u so picculu Mundiale.

Hè nata a Corsica Football Cup cun trè paesi africani (Togo, Gabon, Corsica) è una selezzione di Brittania.

E semi-finali seranu organizate in Aiacciu (Timizzolu) u 18 d'aprile :

Gabon - Togo (scrittu à u prugramma di a FIFA, hè una prima volta per una partita in Corsica !)
Brittania - Corsica

Finale è partita per a terza piazza u 21 in Furiani

.
Da signalà dinù ch'ellu serà u primu macciu officiale di u Togo dopu à fucilata di Cabinda durante l'ultima CAN.

Ste partite vènenu à un mumentu induve u futbol corsu ùn hè mai statu cusì male. Serà l'occasione di riflette in quant' à u so avvene. Stadii calamitosi, gestione caòttica di i clubs corsi dapoi 30 anni, gattiva pulitica di furmazione, manghjerie à tutti i livelli...

"Corsica, terra di ballò" dice l'affissu di u turneu. Di ballò, siguramente. Di ballò prufessiunale, forse più per assai tempu sì ùn si cambianu e pratiche prestu...

A lista di e sfarente selezzioni è tutte l'infurmazioni nant'à u situ ufficiale di a Squadra Corsa, nant'à u forum officiale è nant'à stu blog.

Da leghje dinù l'intervista di Modesto nant'à So Foot.

Corsica - Congo 1 à 1 : puderemu ghjucà a Cuppa d'Africa !

U Sgaiuffu — Mon, 08 Jun 2009 00:01:00 +0200

Bona nutizia dop'à u macciu Squadra Corsa vs Congo. Si l'UEFA ùn vole ricunnosce a Nazione Corsa, puderemu sempre dumandà à ghjucà a CAN cù i paesi africani. Almenu, ùn seremu micca ridìculi...

https://www.apiazzetta.com/video/

Corse - Congo 2009 Interview JM Cavalli
envoyé par forzabastia_2b. - Foot, rugby, surf et encore plus de sports en vid

Nant'à i 202 paesi affidati à a FIFA, u Congo occupa a piazza nùmeru 86.

Pudemu cunclude dopu à a partita di sàbbatu chì a Corsica si situeghja à pocu pressu à stu livellu, trà u Mozambique è u Soudan. Ùn hè digià micca troppu male per cummincià, nò ?

Bon, hè vera ch'è no femu menu bè ch'è a Brittagna chì avia battutu u Congo 3 à 1 annu passatu.

Ma u più impurtante era di fà rinasce una selezzione corsa, di vede e bandere cù a testa di moru è di sente u Diu vi Salvi Regina nanz'à una partita, per vede ciò ch'ellu face, cum'è i "grandi" paesi.

Quessa ùn ci vole micca troppu à dilla chì a FFF ùn vulia sente parlà di "squadra naziunale". Allora chjamemula s'elli volenu "squadra regiunale", ma per noi hè listessa. Avemu, u tempu d'un'ora è mezu sunniatu cum'è ciucci.

È si, un ghjornu, ancu noi, cum'è Andorra, l'Isule Féroé, Malta, San Marino, e Tonga o l'isula di Guam, averiamu a nostra squadra di futbòl ? È si, un ghjornu, a Corsica ci la faria à qualificassi per a Cuppa di u Mondu di ballò ?

Ancu noi avemu dirittu di piglià conce, ruste è chjibe contrà i Messi, Kakà, Ronaldo...

Allora al dilà di e pulèmiche nant'à i criterii di selezzione, salutemu l'iniziativa di a Corsica Football Association è speremu vede prestu a nostra Squadra Naziunale !

Per vede d'altre videò, andate quì.

Squadra naziunale : Corsica vs Congo u 6 di ghjugnu

u webmaestru — Mon, 18 May 2009 00:04:00 +0200
Sta volta hè officiale : una selezzione corsa ghjucherà contr'à u Congo u 6 di ghjugnu prussimu in Mezavia.

N'aviamu parlatu parechje volte. 10 anni dopu à u macciu Corsica - Camerun, 17 anni dopu à Corsica - Juventus, a selezzione corsa hè di ritornu per una partita amichèvule contr'à u Congo.

A partita, organizata da a Corsica Football Association si ghjucherà in Mezavia.

Parechji ghjucadori di L1 anu accettatu di ghjucà per a Testa di Moru : Giuly, Modesto, Bérenguer, Penneteau.

Forse puderemu dinù vede à Squillacci è Flamini.

Quand'ellu si vedenu i nomi di a selezzione, ci dimu chì ancu à un livellu internaziunale, ùn sariamu micca ridìculi.

À u mumentu induve u Sporting è l'ACA sò in difficultà in segonda divisione francese, ùn pudemu ch'è ralegracci d'un tale evenimentu. Prima per mustrà chì u ballò corsu ùn hè micca mortu. È forse pè dimustrà à i presidenti bastiacci è aiaccini chì ghjucadori corsi di qualità, ci n'hè, è chì forse i giovani meriterebbinu appena di più d'avè a so cunfidenza è ghjucà più spessu...

Bon, da sperà dinù ch'elli ùn ci sianu insulte "razziste". Saria peccatu di fassi suspende da a FIFA dopu à una attesa cusì longa...

U sundame di u mese : chì selezziunadore pè a squatra naziunale corsa ?

U Sgaiuffu — Mon, 23 Jun 2008 00:29:00 +0200
A Corsica ùn hà ancu a so squatra naziunale, ma noi ci pensemu. Cummincemu allora pè u principiu è lancemu u dibattitu : à quale vulete mette cum'è selezziunadore ?

V'avemu digià parlatu nant'à u blog d'una squatra naziunale corsa è di a so bella vittoria 2 à 0 contr'à a Francia in u 1967. Si ne parla di più in più è u gruppu di Facebook "pour une sélection corse de football; hà francatu i 250 membri...

Ma cum'è coach, à quale mettimu ? I candidati sò parechji, è vi prupunemu di vutà in un sundame è di dà u vostru parè innù i cummenti.

Eccu qualchì pruposta :

Freddy Antonetti : u Casinchese hè siguramente l'intrenore corsu u più cumpetente. Noi femu a scumessa ch'ellu pò esse un coach di classa mundiale è chì e so zerghe meritanu d'esse cunnisciute à u livellu internaziunale. S'ellu hè in gamba, hè ancu capace di piglià à Domenech à panette. Allora forza Antò !

Jean-Michel Cavalli : L'Aiaccinu hà una sperienza internaziunale : hè statu à u capu di a furmazione d'Al Nasr di Riyad, di u Wydad de Casablanca, di l'US Créteil-Lusitanos è di Ionikos Le Pirée. Di chè fà trimà Marcello Lippi !

Fanfan Félix : cunnosce bè u ballò corsu per avè intrenatu à L'Isula Rossa durante tanti anni, purtendu a cità balanina sin'à a terza divisione. Ma ùn u pigliemu ch'è s'ellu cambia di cuppa di capelli.

Battì Gentili : Hà intrenatu tutti i clubs aiaccini pussibuli, avà hè in Nantes. Perchè micca ?

Robert Nouzaret : U campione di e falate in segonda divisione hà marcatu i Bastiacci quand'ellu hè venutu in Bastia. Ma forse vulerà selezziunà una volta di più à Dieuze è à Bernard Lambourde ?

Raymond Domenech : Più nimu ne vole, mancu Estelle Denis... Forse chì u puveracciu vulerà piglià a squatra naziunale corsa ?

Giovanni Trapattoni : Da mette in a rùbrica di i coachs azezi cun Antonetti. U sosie di Nicolas Alfonsi hè ancu più impressiunante quand'ellu mughja in alemanu...

Robert Herbin : U Sphinx puderà rilancià a so carriera in Corsica ?

Guy Cimino : S'ellu hè pigliatu cum'è selezziunadore, li ferà una bona scusa pè piantà a so carriera d'attore.

François Tortos : Cugnumatu à France 3 "le sorcier belge", u giurnalistu hè in fatti un fine cunniscidore di u mondu di u ballò. A prova : hè ancu abbunatu à "Onze-Mondial".

André Paccou : Almenu s'è no u pigliemu ùn ci feranu più cacà cun tutte ste storie di razzisimu. Bon, manca appena di classa à cant'à Marcello Lippi o José Mourinho, ma ùn si sà mai. S'ellu si taglia a coda di capelli è s'ellu ùn mette più e so calzette cù e so ciavatte ?

Vincent Tabarani : Ellu sì chì sà manighjà u pulendaghju per fassi rispettà da i ghjucadori. Attenti à e bastunate !

Gilles Simeoni : Da per tuttu, ùn ci n'hè più ch'è per "Gilles" chì hà ancu e so groupies chì u seguiteghjanu in ogni locu. Hà riesciutu u miraculu di fà ghjunghje una lista naziunalista in testa di l'opposizione in Bastia è d'interessà e giovane bastiacce à a pulitica. Allora perchè micca un miraculu à u capu di a nostra squatra naziunale ?

U Père Fouras : Hà pigliatu un colpu di vechju ma hè sempre quellu.

Estrimei : Ùn ci capisce nunda à u ballò, ma u cummentadore u più azezu di u web nustrale ùn parlerà ch'è corsu à i giurnalisti è i ghjucadori. Cusì seranu anch'elli obligati d'amparà a nostra lingua !

D'altre pruposte ? L'aspettemu !

À quandu una squadra naziunale corsa ?

u webmaestru — Fri, 30 May 2008 00:00:00 +0200
Si sò ghjucate e partite amichèvule Catalogna - Argentina è Brittagna - Congo. Innù i 208 paesi ricunnisciuti da a Fifa (più ch'è l'ONU...) truvemu Malta, Andorra, San Marino, l'isule di Guam, Vanuatu o e Bermude. Allora perchè micca una selezzione corsa di ballò ?

Sunniemu appena. Qualificazione di a Cuppa di u Mondu di ballò 2014 à u Brasile. À u Stade de France di Saint-Denis, u Diu Vi Salvi Regina hè statu fischjatu da i spettatori cum'è prevista. Ci vole à dì chì a pressione hè tremenda : si ghjoca trà a Francia è a Corsica una piazza di qualificazione à u mundial. U selezziunadore naziunale Freddy Antonetti, cugnumatu "u magu di a Casinca" ùn hà micca salutatu à Raymond Domenech chì l'hà trattatu di "Guy Roux raté avec l'accent corse". U casinchese hà vulsutu ancu minà un giurnalistu di "L'Equipe" nanzu à a partita. I Bleus sò di siguru favuriti ma i picculi Corsi si sbroglianu bè. Semu sempre à zeru à zeru à 10 minuti da a fine, quandu nant'à un attaccu à a limita di u forighjocu i bianchi è neri schjoccanu un but d'antulugia. L'ottantamila spettatori di u SdF stanu zitti è muti : a Corsica hà da ghjucà a prima Cuppa di u Mondu di a so vita...

Bon, ùn ci simu ancu, ma quand'ellu si vede chì s'hè ghjucatu in Barcellona u scontru Catalogna - Argentina è chì i Brittoni anu riesciutu à mette in piazza una selezzione chì hà vintu contr'à u Congo, ci pudemu dì : è perchè micca noi ?

Corsica 2, Francia 0.
Hè peccatu, chì a selezzione corsa hà esistitu è ch'ella avia cumminciatu bè : una vittoria 2 à 0 in Marseglia contr'à a Francia in u 1967.

Dapoi, qualchì partita hè stata organizata in l'anni 90 da u giurnale naziunalistu Paese. Hè venuta per esempiu a Juventus à ghjucà in Mezavia in u 1992 (risultatu finale 0 à 0).

Allora imaginate una squadra cumposta da Ludovic Giuly, François Modesto, Pascal Berenguer, Mathieu Flamini, Nicolas Penneteau, Sébastien Squillacci, Yannick Cahuzac, Grégory Lorenzi, Chaouky Ben Saada...

Pensate veramente ch'ella saria più ridicula ch'è San Marino, Andorra, l'Isule Feroe, Malta o Hong Kong ? Andate à vede a lista di i 208 paesi affiliati à a FIFA. E federazione e più debbule sò quelle di u Nepale è di l'isula di Guam. Aiò, à quessi li mettimu a concia nò ?

Di siguru e difficultà di custituzione d'una squadra naziunale ricunnisciuta da a FIFA sò tremende, cum'ellu a spiega Didier Rey à u giurnale Cuscenza. Siccome a Francia hà da lascià passà què...

Nant'à u net a mubbilizazione s'organizeghja : sò circa 200 à essesi scritti à u gruppu "Pour une sélection corse de football" nant'à Facebook.

Ma senza aspettà una ricunniscenza officiale di a FIFA, nunda impedisce l'organizazione di scontri amichèvuli, cum'è quellu di a Brittagnia. Basta a vuluntà.

Allora ?

Da leghje : Corse : les limites du football identitaire, di Didier Rey.

A selezzione chì hà ghjucatu contr'à a Juventus in Mezavia in u 1992, dop'à a strage di u 5 di maghju in Furiani.

Fottò pigliata nant'à Retrofoot.

FRANCIA : 0 CORSICA : 2 !

u webmaestru — Fri, 28 Dec 2007 01:19:00 +0100
In u 1967, una selezzione corsa di ballò ghjucava à a risa a squatra naziunale francese...
https://www.apiazzetta.com/video/

CORSE : 2 / FRANCE : 0
envoyé par canistrellu

Ci pare incredibile à pensà avà, ma hè purtantu ciò ch'ellu hè accadatu innù un scontru amichevule in 1967... Eccu una piccula videò !

D'altri ligami internet nant'à sta partita :

fidighjate quì
o puru quì
è ancu quì

40 anni dopu, ùn hè micca siguru chì a FFF voglia turnà à organizà a rivincita !

tags : sélection nationale corse, équipe nationale corse