10 ragioni d'ùn micca fà rigali pè Natale

Di tutte manere, Babbu Natale, l'avemu fattu prighjuneru, u Culunellu è eiu (fighjate in u foru di Mirvella, è capiscerete.

Eri sera, u Culunellu è eiu, dopu à l’articulu tremendu di Mister Palu nant’à a Gazetta, aviamu à fà prighjuneru à Babbu Natale, l’infamu, cume dighjà annunciatu, ma deviamu fà prestu chì, eramu tutti i dui aspettati à a Taverna da qualche femine à sangue caldu…
U nostru pianu era simplice : sapiamu d’un informatore sicuru chì Babbu Natale, ancu s’ell’ùn venia micca in Mirvella, passava quantunque in Lambraschera, a pieva corsa a più vicina di noi.
Dopu à dece ore di viaghju à cavallu (ùn vi sminticate micca chì simu, in teuria, in u 1756 ! A cavallu, dunque !), ghjunghjiimu infine à a fruntera.
Quallà, dopu à esce esciuti senza prublemi di duana (teniu un’lasciatu-passà di a manu di u Cavaglieri !), eriamu fora di Mirvella ! Ancu l’aria hè sfarente quì. Ùn si rispira micca u stessu aria, a vi dicu da veru ! U paese chì era à cantu à noi, u più « mirvellaciu » di i paesi fora di Mirvella (è allora, ùn ci era micca un connu chì avia dettu chì a Corsica era a più vicina di l’isule luntane ! Hè listessu) era pupulatu da omi di gran valore ch’ùn avianu paura di nunda, salvu podasse di Mirvella ! Seria bè ch’o dumandessu u nome di stu paese, rientrendu in Mirvella, per sapè induve simu andati, quantunque. Ma st’omi fieri è curraghjiosi, quasi mirvellacci, anu dinù femine è zitelli, è dunque zitelli chì aspettanu à Babbu Natale. Avemu sceltu a casa a più vicina induve ci era una famiglia, è ci simu spartutu u travagliu : eiu, sò cullatu nant’à u tettu per surveglià a ghjunta di u vechju barbutu, è u Culunellu, hè firmatu à a porta, à u casu duve pruveria à scappà per quì.
Duie ore dopu, vedì infine un strascinu vulante avvicinàssi, tiratu da quattru regine… scusate… quattru renna… Nantu, una spezia di vechju barbutu. Da vicinu, ùn paria più vechju… ùn paria mancu barbutu chì a so barba si vidia ch’ella era falsa. Cuntrariamente à cio ch’elli credenu millioni di zitelli in u mondu, u tipu ùn paria micca d’esse quì per rigalà i zitelli di u mondu sannu, ma solu per survegliàlli è tene un ochju particulare nant’à i parenti, per via di a cunsumazione, grazie à un mediu degnu di « 1984 » di George Orwell. Eccu cio ch’ellu avia fattu di a Festa Christiana : a festa di a cunsummazione per via di a niscentria di i ciucci.
Piattatu daretu à u caminu, aspettaiu ch’ellu s’avvicinessi di più : tuttu andava d’incantu, ùn m’avia micca vistu. È pò, quandu fù nant’à u caminu per lampà quì i rigali, mi precipitò nant’à ellu, è, nant’à u tettu, ci simu battuti. U tipu ùn paria surpressu, ma si diffendia bè, è à a so manera di battessi, si sentia bè ch’ellu ùn era micca vechju. Detta ssa cosa, essendu u più intrenatu, fù eiu chì vincì, chì in qualche minute, l’aviu abbaluticatu à colpi di calcii degni di Rocky. U fallò di u tettu, sempre incuscente per fàllu passà à u Culunellu. Per gagnà u tempu, pigliiamu u strascinu vulante, è, in duie minute, eramu di ritornu in u Borgu-di-Mirvella, triunfanti.
Babbu Natalu fù affidatu à Mister Palu chì u cunducì in prighjone per interugàlu. U sctrascinu vulante fù a più bella presa di guerra è certi sapientoni mirvellacci u studieranu per invisasgià di custruiscene d’altri. A ricumpenza di u guerrieru ci aspettavanu tutti i dui in a Taverna induve avemu finitu a nostra serata.

O zì, vi ricurdate voi di l'aranci in i scarpi. Natale era tandu una festa riligiosa. Bastava u pocu per fà festa. Pasqua è a so settimana santa eranu forse più significativi è più forte in valore per i corsi,
Cù u bisinessu di Natale, mi vene in core ch'ella hè stata un'invenzione capitalista (americana), cum'è a festa di e mamme (istituita da Petain è Vichy di manera ufficiale), chì quì dinù sò l'americacu ch'anu principiatu à fistighjà à modu soiu e mamme.
Spinghjite l'urdinatori è e televisiò una volta à mese è urganizatevi una veghja, cum'è l'aghju sempre fatta in u mo castellu di Cuccuruzzu, dipoi più di 3000 anni ...
Chjamate à Papi, ch'ellu venga cù a so ghitarra, ch'ellu canti è ch'ellu fia cantà a ghjente. Pensate à invità qualchì vichjettu chì campa solu. Averà sempre qualcusella à cuntà à sta giuventù. Una volta à mese, pensateci, è pruvate à parlà è à fà parlà corsu, quant'ellu si pò . .