Accueil
Envoyer à un ami
Version imprimable
Partager

U Purtugallu : un paese à vende ?

Pè campà in Auropa, certi sò pronti à more. Fughjenu a guerra, a miseria… Cum’elli sò pazzi ! Oghje si pò cumprà una « naziunalità auropeana » , basta à avè un portafogliu bellu pienu. Dop’à a Lettunia, l’isula di Malta è d’altri, hè u Purtugallu chì hà vulsutu aduprà issu sistema...



Un annu fà, a pulizza purtughese arrestava à Xiaodong Wang. Issu maffiosu chinese, cundannatu à dece anni di prighjò in China pè froda fiscale avia ottenutu un permessu di residenza. Pudia esse ricircatu da interpol, chì primura, postu ch’avia pagatu un mezu milione d’euros...

L’affare hè ghjuntu ghjustu à puntu ! I purtughesi cumminciavanu à avenne una techja di campà ind’un paese vindutu, è po ci vole vede à quale. Stu scandalu porta un nome, quellu di i « Vistos dourados ». Hè natu dà una misura messa in piazza in u 2012 da u guvernu di Pedro Passos Coelho (centru diritta) pè agisce di pettu à a crisa economica. Pigliendu esempiu nantu à l’altri paesi, a pulitica hè quessa : abbraculà e manse di soldi, quelli chì l’anu è tuttu què senzà falli pagà nisun impositu.

U Purtugallu : un paese à vende ?

Quellu chì vole stallassi è ottene un permessu di residenza dendu l’accessu à tuttu u spaziu Schengen deve empie una di ste trè cundizione :

- Investisce più d’un milione d’euros sopr'à piazza o avelli nantu à u so contu
- Cumprà case, o terreni pè piu di 500 000 euros
- A creazione d’o menu dece impieghi

U Purtugallu : un paese à vende ?

Trè anni sò passati, u bilanciu paria bonu : guasi duiemila permessi di residenza marcanzati è u guvernu hà gualantu una miliarda d’euros (d’appressu à u giurnale Pùblico ).

Ci vole à sapè chì sti permessi sò stati distribuiti cum'è bombò. Solu dece dumande sò state ricusate è a creazione d’impieghi sente u pocu (dui dipoi u principu). A dilla franca, ùn si sà micca precisamente ciò ch’ellu hè diventatu stu tesoru è soprattuttu u guvernu ùn face mancu casu di a so urigine. I malfattori/maffiosi chinesi, russi, è tant’altri s’anu trovu un paradisu di più in Auropa.

U Purtugallu : un paese à vende ?

Mentre chì u paese hè vindutu pezz’à pezzi è chì certi si techjanu, u populu purtughese ùn si ne sorte più. U disimpiegu hè sempre cusì impurtante (guasi 14% di ghjennaghju 2015), sò centinaie di persone ch’ùn ponu più pagà e tratte di e so case o appartamenti. In fine, e so case seranu pigliate da e banche.

U Purtugallu : un paese à vende ?

Certe persunalità pulitiche anu riagitu, ancu u direttore di Transparency International. D’apressu à ellu tutti sti soldi mullizzuti ùn puderanu mai aiutà u populu.

U dicesette di nuvembre di u 2014, ondeci funziunarii di u statu purtughese sò arrestati pè corruzzione in quant’à l’affare di i «gold vistos ». C’eranu u patrone di a pulizza di e fruntiere, u patrone di u cunservatoriu naziunale è ancu un’impiecatu di i servizii secreti. U ministru di l’internu, Miguel Macedo hà lasciatu a so piazza u lindumane…

l'11 di Marzu 2015
Saveria



1.mandatu da sardu u 12/03/2015 08:34 (da un teleffuninu)
A prossima hé a grecia?!

2.mandatu da gengis-cane u 12/03/2015 10:49
U prussimu :a Corsica

3.mandatu da Ghjuvanluca u 12/03/2015 12:31
S'afferma di più in più, ù concettu chi tottu si pò cumprà......a sucietà sana si pò cumprà.
Ma à sucietà senza regule morali fala dritta dritta interrata.

Novu cumentu :



Seguitateci nant'à Facebook



Abbunatevi à a newsletter

Circà nant'à A Piazzetta