Accueil
Envoyer à un ami
Version imprimable
Partager

Video : da induve vene a torra di Bastia ?

Da u Sporting à i pacchetti di canistrelli passendu pè e giardiniere di a cità, a torra si vede in ogni locu quandu s'ammenta à Bastia. Ma cunniscite a so orìgine ?




Fidighjate u nostru filmettu :


Sì u filmettu ùn si lancia, u pudete vede nant'à YouTube :


Biguglia, a prima capitale ghjenuvese

Ci vole à ricullà à a fundazione di Bastia per capisce u perchè di sta torra. À u XIVu seculu, a Corsica face parte di a Republica di Ghjenuva. Tandu u guvernatore stà in Biguglia. Ma e guerre contr'à i signori corsi chì ùn volenu di a presenza ghjenuvese ne facenu un locu difficiule à difende. Si mettenu allora à circà un locu più siguru, più vicinu di u mare, di manera à pudè cuntrullà i battelli, è à riceve più facilmente l'aiutu di a cità ligure.

Hè cusì chì in u 1380 Leonello Lomellini face custruisce una furtificazione nant'à un'altura, vicina da un picculu portu di piscadori chì si chjama tandu Portu Cardu. Ci hè dinù Portu Vechju (avà currisponde à Ficaghjola), chì hè a marina d'un paese smarritu chjamatu Belgudè (vicinu di Monserratu, sopr'à Bastia).

U situ di u castellu di Biguglia
U situ di u castellu di Biguglia

1380 : a fundazione di Bastia

A prima furtificazione hè dunque un castellu mudestu. I ghjenuvesi a chjamanu Il Fortino, o Castello della Bastia. "Bastia" hè una spressione chì in talianu indetta un picculu forte. Si ritrova spessu in Italia, cum'è in a cità di Bastia Umbra, in a regione di l'Umbria.

Hè sta prima furtificazione chì diventerà u sìmbulu di Bastia. Ùn hè dunque micca una semplice torra ghjenuvese, era un castellu.

Stu castellu ùn serà micca sempre pusessione ghjenuvese. Vincentellu d'Istria u piglierà un tempu, nanzu di cascà torna in manu à a republica ligure.

Ùn hè chè un seculu dopu chì un altru ghjenuvese, Antonio Tagliacarne, dumanda a permissione à a Republica di Ghjenuva di fà custruisce une poche di case. Hè cusì ch'ellu nasce un quartieru intornu à a furtificazione : hè Terra Nova, a cità alta, opposta à a cità bassa, Terra Vechja.

Allora i muraglioni di a cità venenu à esse rifatti. Cù u tempu u primu castellu hè distruttu, per fanne unu più grande. Nasce cusì a citatella cù u Palazzu di i Guvernatori.

Stu primu castellu si truvava sopr'à l'attuale giardinu Romieu.

A stemma di Bastia : una furtezza cun trè torre

In u 1604, un guvernatore ghjenuvese acconcia u sistema idrolicu in Terra Vechja è face una funtana, vicina di u Mercà. Nant'à a lastra di sta funtana si vede a stemma di a cità : una furtificazione cun trè torre, sott'à a croce, chì hè a bandera di Ghjenuva.
Video : da induve vene a torra di Bastia ?

Si pò vede à u museu di Bastia.

Ancu in pittura

In a catedrale Santa Maria di Bastia, si pò vede una (piccula) rapresentazione di Bastia in un guatru chì rapresenta a Madonna.
Video : da induve vene a torra di Bastia ?

A pittura hè di u principiu di u seculu XVII.
Video : da induve vene a torra di Bastia ?

L'evuluzione di a stemma

À u XVIIIu, una rapresentazione di a stemma di Bastia, d'Accinelli, hè cusì (fonte : Bastia, regards sur son passé)
Video : da induve vene a torra di Bastia ?

A torra

Cù u tempu ùn si tene più chè a torra, cum'è nantu à a statua di Napuleò, in piazza Santu Niculà (XIXu seculu).

Oghje si vede nant'à e giardinere di a cità.

Sin'à u Sporting

Oghje si ritrova dinù cum'è stemma di u Sporting. Dapoi l'epupea di u 1978 in cuppa Uefa, i sustenidori bastiacci a cunnoscenu bè.
Video : da induve vene a torra di Bastia ?



Eri oghje è dumane ?

In fine di contu, chì ci hè di megliu pè rapresentà Bastia ?
Video : da induve vene a torra di Bastia ?

Video : da induve vene a torra di Bastia ?

u 30 di Ghjenaghju 2021


Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta