Ci dicenu spessu ch'è no semu azezi è gattivi nant'à A Piazzetta. Allora pè scambià appena è pè festighjà à San Valentinu, eccu a nostra playlista di canzone corse d'amore.

Và bè, mancanu parechje belle canzone è tanti gruppi, ma ci vulia à fà una scelta... è tocca à voi à cumplettà !

Per quelli chì ùn facenu a San Valentinu, li ferma a San Ballantine's.

https://www.apiazzetta.com/video/
Jean Paul Poletti : Di tè par Larenzu

Siguramente una di e più belle di JPP.

https://www.apiazzetta.com/video/

Sta canzona hè diventata unu di i più grossi successi di a musica corsa... è di i mittunelli chì volenu fà i macchi cù e zitelle.

L'accordi (DO / SOL / LA min / MI min / FA / DO / SOL) permettenu à n'importa chì scurnachjone cù una ghitarra di pudè truvassi una zitella.

https://www.apiazzetta.com/video/
Tony Toga - Furtunatu par le_politburo_des_UB

L'altra grossa canzona corsa di lover.

https://www.apiazzetta.com/video/

Musica di Ghjanfrancescu Bernardini è parolle di Ghjacumu Fusina. Una di e più belle canzone corse di l'universu.

Un certu Mattei di A Nuvale era innamuratu di Minicola d'Ampriani è li fece sta bella canzona.

https://www.apiazzetta.com/video/
Carlu Rocchi - Canzona pè Maria par le_politburo_des_UB

Tutti quelli chì sò stati innamurati d'una Maria sò stati in depressione nant'à sta canzona.

https://www.apiazzetta.com/video/

Tamantone slow di I Muvrini. Ma i slows ùn esistenu più.

https://www.apiazzetta.com/video/
Carlu Rocchi - Brunetta par le_politburo_des_UB

Bellissimu lamentu tradiziunale di Rusiu.

https://www.apiazzetta.com/video/

Cumu ? Ùn cunniscite micca A Mannella di Corti ?

https://www.apiazzetta.com/video/
I Chjami Aghjalesi - Cor di pantera par le_politburo_des_UB

Bon, e storie d'amore ùn finiscenu micca sempre bè in generale, ma quessa a sapete...

Cantu tradiziunale interpretatatu da Carlu Rocchi, eccu quì a versione di I Chjami Aghjalesi.

https://www.apiazzetta.com/video/
Cinqui sò - N'a funtanedda par le_politburo_des_UB

Ind'i tempi ùn s'andava micca à L'Acapulco pè truvà e donne, ma à a funtana di u paese.

https://www.apiazzetta.com/video/
Cuntrastu di U Strampalatu par le_politburo_des_UB

Nanzu d'esse un'emissione di France 3 Corse presentata da Jean-Vitus Albertini, un "cuntrastu" era una forma di cantu impruvisatu, induve un omu rispondia à una donna. Eccu unu di i più belli cuntrasti chì fubbenu arregistrati.

Hè statu scrittu da un pianellacciu, Ghjiseppu Pietri dettu U Strampalatu. L'interpretazione di Marcu è Òrsula Leoni di E Piazzole d'Orezza in un discu esciutu in 1958 (Le Chant du monde) hè una maraviglia.

https://www.apiazzetta.com/video/

Altru successu maiò di I Muvrini.

Dì...
Tuttu hè finitu ti ne vai
Seremu soli à l'oramai
Face disertu in core à mè...

Ghjuvanfrancescu hè u patrone.

https://www.apiazzetta.com/video/
SURGHJENTI "Ritrattu" par Ultra_White_Forever

Altra bellissima canzona d'amore cantata da Felì, arregistrata à l'epica di I Surghjenti.

Una di e preferite di i corsican lovers nustrali.

Magnificu duo di Marie-Jo cun Felì. Ancu più tristu dapoi chì Marie-Jo Allegrini si n'hè andata, in u 2013.

Articulu scrittu u 13.2.2012. Messu à ghjornu u 14.2.2017.

A salviata hè u biscottu tradiziunale in Bastia per a Festa di i Morti.

Era fattu, in orìgine, cù e fronde di a pianta chjamata salvia (la sauge). Sta pianta passava per dà l'immurtalità, ghjè per què ch'ella era assuciata à u cultu di i morti.

A so forma hè in "S". Ùn vole dì nè "santi", nè "salvia". Hè una spirale chì lega di manera simbòlica u mondu di i morti è quellu di i vivi.

In i tempi, a notte di u 2 di nuvembre, i Corsi lasciàvanu manghjusca è acqua in casa o nantu à u purtellu per chì i morti venìssinu à ritruvà forza.

In Bunifaziu è tutta a Corsica meridiunale si face u "pani di i morti" (una sorte di panetta cù uva è noci), chjamatu dinù "uva siccata". In certi lochi hè diventatu "pain des morts" è per fà menu paura ancu "pain des maures"...


Publicatu u 1u nuvembre 2013
Messu à ghjornu u 27 ottobre 2014

Ritrattu : chjesa di A Trinità, in Aregnu

A salviata hè u biscottu tradiziunale in Bastia per a Festa di i Morti. Era fattu, à l'orìgine, cù e fronde di a pianta chjamata salvia (in francese sauge). Sta pianta passava per dà l'immurtalità, ghjè per què ch'ella era assuciata à u cultu di i morti.

A so forma hè in "S". Ùn vole dì nè "santi", nè "salvia". Hè una spirale chì lega di manera simbòlica u mondu di i morti è quellu di i vivi.

Oghje, u so nome hè ancu statu sfrancisatu è si trova vindutu sott'à u nome di "serviade".

In Bunifaziu è tutta a Corsica meridiunale si face u "pani di i morti" (una sorte di panetta cù uva è noci), chjamatu dinù "uva siccata".

Da leghje nant'à u blog di Canonici

Quessu quì dinù hà cambiatu di nome postu ch'ellu si pò truvà in u cummerciu sott'à u nome di "pain des maures"...

Voir cette publication sur Instagram

Une publication partagée par HAPPY FOOD 🌈 (@potrelinetta) le 1 Nov. 2018 à 10 :03 PDT

A regione di u Nebbiu dinù hà a so spezialità, chjamata "schiaccia pizzicata".

A schiaccia pizzicata, biscottu tradiziunale pè i Santi in #SantuPetruDiTenda #Nebbiu pic.twitter.com/IhZhIFPoNe

— Battì Lucciardi (@Batti_Lucciardi) 31 octobre 2017

A festa di i morti, chjamata "I Morti", si passa in a notte di u 1u à u 2 di nuvembre. Hè un mumentu di scambii trà i morti è i vivi. D'appressu a tradizione, i morti voltanu tandu.

Ma ùn v'inchietate, ùn vi volenu male. Ùn semu micca in La nuit des morts-vivants è ùn si parla micca di zombies. I vivi devenu preparalli solu un bon accogliu : ùn si chjodenu micca e porte, si lascia u focu incesu per ch'elli si scaldinu, li s'appronta di chè beie è manghjà nant'à i tavulini o nant'à e finestre.

Sì l'accogliu li hè piaciutu, si ne tornanu felici in l'altru mondu. S'elli ùn sò micca stati cuntenti, si mettenu in zerga è pruvucheghjanu timpeste chì vi facenu pente d'ùn avè pensatu di più à elli.

Conta Lucie Desideri in u so Almanach de la mémoire et des coutumes a storia d'un paisanu di l'Olmiccia, in Corsica Suttana. Avia previstu d'andà à vende e so castagne in Sartè u ghjornu di I Morti. Ma s'era scurdatu di mette un stuvigliu d'acqua nant'à a so finestra, cumu era l'usu. Avia preparatu i so affari è i so sacchi di castagne, senza pensà à i morti.

In a notte s'hè pisata una timpesta. Acqua, ventu, accendite è toni si scatinavanu nant'à a casa di u disgraziatu. A so moglia li dumandò tandu : "Ai missu i tazzona à i balcona ?". È tandu l'omu capì ch'ellu s'era scurdatu di mette e tazze d'acqua à e finestre è chì i morti si vindicavanu...

In certi paesi ci vulia à purtà stuvigli d'acqua è piatti di castagne in i cimiterii è nant'à e tombe. Avà ste pratiche ùn esistenu più. È invece ch'elli sianu i morti chì venissinu in e case nostre, semu noi chì andemu à vedeli purtandu vasetti di crisanteme à 10 €.

Di più terrificante : accadia di cascà a notte nant'à una prucessione di morti. U so nome : a Squadra d'Arozza (chjamata dinù "A Muma"). Nunda ch'è a so visione vi ghjaccia u sangue. U spaventu hè tremendu. In stu casu quì i morti vi volenu fà vene cun elli in a so prucessiò. Vi danu una candela, ma ùn a pigliate micca ! Vi renderete contu troppu tardi chì a candela s'hè trasfurmata in bracciu di zitellu... Tandu diventa difficiule di sbarazzassine è site diventatu un mazzeru.

Ch'o sinnò, i morti ponu vultà per d'altre occasione impurtante cum'è l'elezzioni per esempiu. Ma quessa hè un'altra storia...

Articulu messu in linea u 29/10/2014, aghjurnatu u 1/11/2017

I Grechi di Fucea (in francese "Phocée") sò sbarcati in Corsica in 565 nanzu à Cristu. Ghjunti in Aleria, sò firmati secchi davant’à a bellezza di u Cateraghju è anu decisu di chjamà stu locu “Kallisté”, vale à dì “a più bella”.

È ciò chì hè incredibule, hè ch’ellu ci sia sempre ghjente per crede à sta fughjichja. Bon, s’ella hè per vende qualchì salciccia di sumere o ricordu made in China à i turisti, perchè micca. Ma hè ciò chì si chjama un "feccu".

Sò parechji l'autori grechi antichi (storichi, geografi...) à avè scrittu nant'à a Corsica. Di ciò ch'è no sapemu, u nome grecu di a Corsica u più anticu cunnisciutu hè "Kurnos" o "Kurnè". D’appressu à Olivier Jehasse hè da avvicinà à una parolla d’origine feniciana, "Kernè", chì vole dì “a corna” è dinù “l’isula luntana” o “l’isula a più luntana”.

“A corna” piuttostu ch’è “l’isula a più bella”, face menu sunnià.

Sta parolla greca “Kurnos” o “Kyrnos” hè diventata scritta in latinu “Cyrnos”. Eccu cumu i Grechi anu chjamatu st’isula.

Esiste un nome ancu più anticu per indittà l’abitanti di a Corsica à l’antichità : hè “Korsoi”. U radicale *kor si ritrova in parechji nomi di lochi, u fiume Cursigliese, a pieve d Cursa, u paese di Corscia… Forse, ci dicenu i storichi, i Corsi di l’antichità si sò chjamati elli stessi cusì.

Da quì veneria a parolla “Corsica”, vale à dì “u paese di i Corsi” (cum’è l’Africa hè u paese di u populu Afri). Diodoru di Sicilia scrive à u primu seculu nanz’à Cristu chì hè cusì chì i Rumani è l’abitanti chjamanu st’isula.

Olivier Jehasse ci ampara ch'è no duvimu quessa à un certu... James Boswell. In u so libru Account of Corsica publicatu in u 1768, l'amicu di Pasquale Paoli scrive chì i Grechi anu chjamata st'isula "Kallisté" per via di a so bellezza. A fake news parte da quì.

Ma perchè ci ai fattu què James ? Forse s'appoghja nant'à u cumentu d'un autore grecu di l'antichità (Denys le Périégète) chì hà scrittu chì a Corsica hè un'isula "piacente". Stu testu serà ripigliatu da d'altri autori per esse trasfurmatu in "bellu" (in grecu "kalos"). Ma ùn hà mai dettu ch'ella era "a più bella"...

Kurnos, Kurnè, Cyrnos, Corsica, Corse è più tardi "île de beauté"... nè hà avutu nomi a nostra isula. Avà si diceria piuttostu "la Keurse". Ma quessa, hè un’altra storia.

Per sapenne di più, leghje l'articulu d'Olivier Jehasse « Non les Grecs ne l’appelaient pas Kallisté » publicatu in u Bulletin de la Société des Sciences Historiques et Naturelles de la Corse, numeru 656, 1989.

Chì i passiunati d'apperitivu in terrazza à u sole ùn s'inchietinu, l'estate venerà, ma micca subbitu. I primi ghjorni d'aprile si chjamanu i "ghjorni pristaticci" o "impristaticci" (in Niolu) o "imprestaticci" o "prestaticci" (in u restu di u mondu).

Di regula u tempu ùn hè bellu. Colpa à i ghjorni chì u mese d'aprile hà imprestatu à u mese di marzu. Cusì dice un'antica fola tradiziunale.

Sta fola dice chì à u mese di marzu, un pastore (un picuraghju) si ne ridia di u mese di marzu. L'inguernu venia di compiesi è u pastore a s'avia francata. E pecure eranu grasse, i so casgi tamanti, i so brocci belli bianchi... è allora si muntava appena a sega.

Dispettosu, si magagnava u mese di marzu : « Marzu, catarzu, figliolu d’un bugnone, facciu l’agnelli tamanti è muntoni, u brocciu tamantu è spurtoni » è cuntinuvava à stuzzicà.

Ma u mese di Marzu hè un biscone. Vole vindicassi è dumanda à u mese d'Aprile d'imprestalli dui o trè ghjorni per vultà à metteli una concia : « O Aprile, u mo fratellu, imprestami u primu è u dui, ch'aghju da fà penta u falsu picuraghju ».

Sulidariu, Aprile li risponde : « U primu u tengu per mè. Ma t'imprestu u dui è u trè » .

Allora, u tempacciu di u mese di marzu face u so grande ritornu d'aprile. Furibondu è azezu fragicu, face nasce una timpesta di quelle maiò. Toni, saette, acqua à sechje è ancu neve per punisce u pastore appena troppu pretensiunutu.

Cusì si spiega chì u tempu hè sempre gattivu u dui è u trè d'aprile. Ma avà chì pastori ci n'hè di menu in menu, chì ne serà ?

San Lurenzu sott'à a neve d'aprile @FTViaStella @Corse_Matin pic.twitter.com/Rn7ddW3PiW

— Jean-Pierre Isacco (@IsaccoJean) April 2, 2022

Articulu publicatu u 02/04/2016 è aghjurnatu u 01/04/2022

Da leghje :
I Pristaticci nant'à u blog bunifazincu
Nant'à u situ In punta di a lingua
È si ne parla nant'à u foru Isula.

A cerimonia era presentata da Chris Rock, chì pensava passà una serata tranquilla. Hè statu u casu, sin'à una magagna nant'à a moglia di Will Smith. Amusciatu, l'attore americanu s'hè pisatu per vindicà a so cumpagna.

Per fà chè ? À voi di sceglie :

Li hà messu (o sciaccatu) un schjaffu o un pattone. Si pò dì dinù un sciambulone (variante : un scialambulone). Certi dicenu ancu un pataffiu (variante : un patanfiu) o un scapizzone.

Certi pumuntichi preferiscenu forse una sciappata (diventatu "une chapatte" in francese).

Will Smith averà pensatu ch'ellu ci vole à minà in bocca à Chris Rock ogni volta ch'ellu parla ? Forse.

Averia pussuttu di metteli una panetta o un scapochju, ma hà sceltu una manera menu dolce.

Ma puderia esse stata peghju pè Chris Rock. Will Smith li averia pussutu messu un cazzottu.

Torna appena è si pigliava una rivista, una tribbia o una concia.

Ma una magagna, puru goffa è merza, meritava un gestu tale ?

U mese di marzu hè riputatu per u so tempu chì varieghja :

"Marzu catarzu" : vale à dì bruttu, goffu.

È dinù :

"Marzu hà sette barette, una a si caccia è l'altra si mette".

L'antichi truvavanu u sole periculosu. Ùn si face casu chì semu sempre d'inguernu, ma pichja in capu :

"Sole marzulinu, di l'omu ne face un strascinu".

o

"Sole marzulinu, di i vechji ne face un sterminiu".

Di marzu ùn ci hè bisognu di vighjà. Bisognu à chjinassi à bon'ora :

"E sere marzuline, appollati cum'è e ghjalline". (appullassi = "se percher, se calmer, se stabiliser").

Avà site prevenuti. Ne cunniscite d'altri ? Aspettemu i vostri cumenti.

Fonte
Vucabulariu corsu - italianu - francese, d'Anton Francescu Filippini, Anima Corsa 1999.
Dizziunariu U Muntese, Albiana 1985.
È dinù Infcor, u dizziunariu in linea di l'Adecec.
Torna d'altri nant'à u foru Isula

Messu in linea u 02/03/2017

A pozza di Ficaghjola (ritrattu gruppu Facebook "Terrenuvacci")

À u prussimu cunfinamentu, è sì l'essenza diventa troppu cara, chjudemu a strada è ci piantemu unepochi di parasoli ?

A storia a cunniscite. Da l'incontru in u 1973 di Petru Guelfucci cun Ghjuvanpaulu Poletti, Saveriu Valentini è Minicale nasce u gruppu Canta u Populu Corsu. Principia cusì una mossa chì scuzzula a Corsica, tandu vergugnosa di a so lingua è di i so canti.

In u 1975 esce u primu discu di Canta, Eri oghje dumane. In I Corsi impinzutiti, Petru Guelfucci dà a risposta à Ghjuvanpaulu Poletti, nant'à un'aria di currente.

Ci canta dinù Lettera di u mulatteru à u Corsu. E parolle sò di Ghjuvanpaulu Poletti ma l'aria hè tradiziunale, in accordu cù a filusufia di u gruppu chì era di turnà à rende à u populu a so tradizione musicale sminticata.

L'annu dopu esce Libertà, u segondu discu di u gruppu. Petru Guelfucci intona Arritti (parolle Filice Filippi, musica GP. Poletti) chì sona cum'è una chjama à a rivolta. Pè a Corsica hè l'epica di a presa di cuscenza è di e speranze sceme.

A strada di l'avvene, terzu discu di Canta, vene in u 78. L'andatura hè sempre quella d'imbulighjà creazione muderne è cultura tradiziunale. Petru Guelfucci face a segonda nant'à i Terzetti di u piuvanu. E parolle di a puesia s'eranu perse. In Sermanu à chì cunniscia una passata, à chì si ramintava duie parolle. Hè cusì ch'elli sò stati ricustituiti i terzetti. Sò stati scritti da u piuvanu (u curatu) di Boziu, Marcu Ghjuvanni Turchini, patriottu paulistu imprigiunatu in Tulò da a ripressione francese dopu à Ponte Novu.

Nant'à u listessu discu si trova A strage di Bustanicu, chì ramenta l'assassiniu di dui pastori bustanichesi da un legiunariu dui anni nanzu. L'evenimentu avia pruvucatu un'emuzione tremenda in a regione. A voce è l'interpretazione di Petru, e parolle di Bartulumeu Dolovici è a musica di Ghjuvanpaulu Poletti ne anu fattu a canzona corsa a più cummuvente.

Un annu dopu sorte u discu Chjamu a puesia. Ci si trova unu di i grandi tubes di Canta, U Vagabondu (parolle è musica GP Poletti).

Petru Guelfucci ci canta dinù Lettera à mamma, induve un sullatu corsu fattu prigiuneru in Alemagna scrive à a so mamma durante a guerra di 14. Hè cantatu in versu piuvisgianu (pulifunia à duie voce).

Nant'à u discu chjamatu Libertà pè i patriotti esciutu in u 79, si pò sente Ribellu. U tonu hè cambiatu. Dop'à a rivolta, eccu u mumentu pè i militanti naziunalisti di a ripressione, di i prucessi è di l'annate di prigiò. I benefizii di u discu vanu à A Riscossa, chì vene in aiutu à i prigiuneri pulitichi.

In l'81 hè u famosu cuncertu in Parigi induve sò arregistrate duie canzone chì anu fattu u successu di Canta, Ci hè dinù (parolle di Ghjacumu Fusina, musica di GP. Poletti) è Ghjennaghju (parolle di Ghjacumu Thiers, musica di GP. Poletti).

L'annu dopu Ci hè dinù hè u titulu di l'album. Si pò sente a voce di Guelfucci per Vergogna à tè (parolle è musica di GP. Poletti). Più chè mai d'attualità nò ?

Citadella da fà (parolle di Ghjacumu Fusina, musica di Natale Luciani) serà forse una di e più belle canzone corse.

Dop'à l'epupea di Canta u Populu Corsu, hè u mumentu di a carriera solu. In u 1987 sorte u primu discu di Petru Guelfucci. Si chjama Isula, è ci sò parechji colpi maestri, cum'è Isula (parolle di Ghjacumu Fusina, musica di Christophe Mac Daniel).

Tutti quelli chì anu u so paese in un spaziu chì và da u Silvarecciu à Carpinetu anu u so innu cù I Paisoli d'Orezza (parolle di Bonaventura Mariani, musica di Mighele Cacciaguerra).

Ancu i nostri cari è ricchi amichi l'abitanti di l'isula di Cavallu sò à l'onore (parolle è musica di Saveriu Luciani).

Ma l'album sanu hè bellu. Ci si trova Cantu (parolle di Saveriu Luciani, musica di Christophe Mac Daniel) è Paisaghji (Parolle di G. Fusina, musica di GP. Poletti).

L'annata 1991 vede a surtita di ciò chì hè a canzona a più cunnisciuta di Petru Guelfucci, cun u so discu Corsica (parolle di Petru Guelfucci, musica di Christophe Mac Daniel).

Hè nant'à stu discu ch'ellu si trova dinù A Tribbiera, adattazione di u cantu tradiziunale, è Canta cun mè (parolle è musica di Petru Guelfucci).

In u 1994 hè l'album Memoria, cù U razu biancu (parolle di Petru Santucci, musica di Christophe Mac Daniel), Cum'ellu hè tristu (parolle di Petru Guelfucci, musica di Mac Daniel).

In u 99 sorte u discu Vita, cù a ripresa di Pow Qow Una altra cità.

Venerà Sì mea in u 2009, induve si ritrova Trà di noi (parolle P. Santucci, musica B. de Nobili), Reame (parolle è musica O. Ancey) o D'Aiacciu à Bastia (cantata da Carlu Rocchi, parolle è musica D. Marfisi).

Ma Petru Guelfucci era dinù a voce di u cantu tradiziunale, ch'ellu ammaistrava cum'è nimu : ch'ella sia a messa (Messa nustrale in Sermanu, 1977), a paghjella o a munudia, (arregistrati cun Voce di Corsica in u 1994 o nant'à u discu Canti corsi in tradizioni, 1993).

U merlu neru, lamentu d'un banditu di u Boziu imprigiunatu.

Ma Petru Guelfucci ùn hè micca mortu. E so canzone, a so voce cuntinuveranu à ribumbà per sempre.

Sì u filmettu ùn si lancia, u pudete vede nant'à YouTube :

Hà tanti nomi in corsu segondu i lochi. In francese hè l'asphodèle.

Fiurisce à u veranu è i so fiori piacenu tantu à l'ape.

In francese : la bourrache

Altri nomi : a frisgia, a burrarca, a burrascia, a burracine.

In francese : campanule
Tutti i fiori di a spezia di e campanelle piacenu à l'ape.

In francese : digitale pourpre

Altri nomi : arba dintale (Evisa), e creste (A Soccia), i campanelli (Vintisari), a sciuppetta (Ciamanaccia), u sciucchettu (Rennu), l'arba catalina (Zevacu)

In francese : fenouil commun

In francese : mauve

In francese : Millepertuis perforé

In francese : l’origan

In francese : panais
Chjamata dinù carotta salvatica.

In francese : pissenlit

In francese : sauge

In francese : souci

In francese : trèfle

Ùn pare micca ma i fiurucci di u trifogliu sò assai melìferi. Ci n’hè di parechje varietà, di fiori gialli, bianchi o malvi.

In francese : lavande

Hè a « lavande » corsa salvatica. Certi a chjamanu « lavande papillon ». U nome sapiente hè Lavandula stœchas.

In francese : lavande.
Hè a varietà cuntinentale di u piumbone. U so nome sapiente hè Lanvadula angustifolia.

In francese : thym corse

Face fiurucci rusini chì muscanu assai. In latinu : thymus herba-barona.

In francese : thym commun

O prunu, tangu... in francese la ronce.

Piantà una lamaghja ? Bon forse ùn a ferete micca... Ma sì un annu lasciate cresce un lamaghjone perchè ùn avete avutu u laziu di dirascà, sappiate ch'è vo ferete piacè à l'ape, chì sò sceme di u so fiore. Più tardi cuglierete e more, è dopu puderete infine passà a smachjatrice.

In francese : coquelicot

È ci sò d’altri nomi da vede nant'à u situ di a BDLC

Chjamatu dinù bàrculu o innacquaghjola.
In francese : renoncule o bouton d'or

In francese : luzerne

In francese : romarin

In francese : germandrée

Era cunnisciuta pè attirà l’ape, a dice u so nome.

In francese : chevrefeuille

Per vede i so altri nomi nant'à u situ di a BDLC

In francese : bouillon blanc

in francese : achillée de Ligurie

In france "bruyère". Di u so amore cuntrariatu, a canzona "Brunetta" dice chì : "Hà fattu cum'è a scopa, hà fiuritu è ùn hè granatu". Ma i fiori muscanti di st'arburettu piacenu assai à l'ape.

In francese "muscari". Hè chjamatu dinù purriolu, fiore di u porru, cipulletta, cipullina, fiore di Sant'Untò... da vede nant'à u situ di a BDLC.

In francese "inule visqueuse". Chjamata ancu pecita, picitella, cepita, pitica, dice a BDLC.

Ritrattu : BDLC / Muriel Poli

FONTE :

Découvrez la liste des plantes attractives pour les abeilles nant'à u situ di u ministeru di l'agricultura

Banque de données langue corse

Plantes de Balogna

Fleurs du Cruzzini

Arburi, arbe, arbigliule (PNRC, 2008)

Fiori è Fiure : Plantes Sauvages de Corse, di Lily Figari è Pierre-Paul Grimaldi (Albiana, 2011)

Flore des maquis de Corse, di Jacques Gamisans (Albiana, 2010)

Articulu publicatu u 16 di maghju 2018, aghjurnatu u 5 d'aprile 2021

Messu in linea u 14/02/2018
Aghjurnatu u 14/02/2021

Fidighjate u nostru filmettu :

Sì u filmettu ùn si lancia, u pudete vede nant'à YouTube :

Ci vole à ricullà à a fundazione di Bastia per capisce u perchè di sta torra. À u XIVu seculu, a Corsica face parte di a Republica di Ghjenuva. Tandu u guvernatore stà in Biguglia. Ma e guerre contr'à i signori corsi chì ùn volenu di a presenza ghjenuvese ne facenu un locu difficiule à difende. Si mettenu allora à circà un locu più siguru, più vicinu di u mare, di manera à pudè cuntrullà i battelli, è à riceve più facilmente l'aiutu di a cità ligure.

Hè cusì chì in u 1380 Leonello Lomellini face custruisce una furtificazione nant'à un'altura, vicina da un picculu portu di piscadori chì si chjama tandu Portu Cardu. Ci hè dinù Portu Vechju (avà currisponde à Ficaghjola), chì hè a marina d'un paese smarritu chjamatu Belgudè (vicinu di Monserratu, sopr'à Bastia).

A prima furtificazione hè dunque un castellu mudestu. I ghjenuvesi a chjamanu Il Fortino, o Castello della Bastia. "Bastia" hè una spressione chì in talianu indetta un picculu forte. Si ritrova spessu in Italia, cum'è in a cità di Bastia Umbra, in a regione di l'Umbria.

Hè sta prima furtificazione chì diventerà u sìmbulu di Bastia. Ùn hè dunque micca una semplice torra ghjenuvese, era un castellu.

Stu castellu ùn serà micca sempre pusessione ghjenuvese. Vincentellu d'Istria u piglierà un tempu, nanzu di cascà torna in manu à a republica ligure.

Ùn hè chè un seculu dopu chì un altru ghjenuvese, Antonio Tagliacarne, dumanda a permissione à a Republica di Ghjenuva di fà custruisce une poche di case. Hè cusì ch'ellu nasce un quartieru intornu à a furtificazione : hè Terra Nova, a cità alta, opposta à a cità bassa, Terra Vechja.

Allora i muraglioni di a cità venenu à esse rifatti. Cù u tempu u primu castellu hè distruttu, per fanne unu più grande. Nasce cusì a citatella cù u Palazzu di i Guvernatori.

Stu primu castellu si truvava sopr'à l'attuale giardinu Romieu.

In u 1604, un guvernatore ghjenuvese acconcia u sistema idrolicu in Terra Vechja è face una funtana, vicina di u Mercà. Nant'à a lastra di sta funtana si vede a stemma di a cità : una furtificazione cun trè torre, sott'à a croce, chì hè a bandera di Ghjenuva.

Si pò vede à u museu di Bastia.

In a catedrale Santa Maria di Bastia, si pò vede una (piccula) rapresentazione di Bastia in un guatru chì rapresenta a Madonna.

A pittura hè di u principiu di u seculu XVII.

À u XVIIIu, una rapresentazione di a stemma di Bastia, d'Accinelli, hè cusì (fonte : Bastia, regards sur son passé)

Cù u tempu ùn si tene più chè a torra, cum'è nantu à a statua di Napuleò, in piazza Santu Niculà (XIXu seculu).

Oghje si vede nant'à e giardinere di a cità.

Oghje si ritrova dinù cum'è stemma di u Sporting. Dapoi l'epupea di u 1978 in cuppa Uefa, i sustenidori bastiacci a cunnoscenu bè.

Le logo actuel maintenu ! @SECBSocios ↘️https://t.co/BuMEBL7y6I pic.twitter.com/dsuf1cipZQ

— SC Bastia (@SCBastia) March 26, 2018

In fine di contu, chì ci hè di megliu pè rapresentà Bastia ?

Bon d'accordu i nomi ùn sò micca sempre piazzati cum'ellu ci vole. Quand'ella hè stata fatta in u 1573, Google Maps ùn esistia micca. Ma ùn hè bella ?

A Castagniccia hè chjamata sott'à u nome di "Le cinque pieve", chì eranu Casacconi, Ampugnani, Orezza, Rustinu è Vallerustie.

"Zinatri" serà u nome di u castellu di Cinarca ?

Per vedela ci vole à andà in a regione di l'Emilia Romagna. Più precisamente in Parma, in u munasteru benedittinu di San Giovanni Evangelista.

Pudete visità farmacia di u XVu seculu (circate "l'antica "spezieria"). Ma ùn mancata a bellissima bibliuteca di u munasteru. Tutta affrescata, hè un giuiellu di u Rinascimentu. A decurazione hè principiata in u 1573.

Hè stata cumandata da un abate, un certu Stefano Cattaneo di Novara.

Nant'à i muri ci truverete una splendida rapresentazione di a battaglia di Lepanto.

Ma pisate u nasu. Ci viderete scrizzioni in latinu, grecu, arabu, ebraicu, cirillicu... Piuttostu stranu l'affare !

Hè quì a làscita di Stefano Cattaneo di Novara. L'abate ci hà lasciatu un messagiu umanistu. Cridia in u diàlogu trà e culture. "Non credeva nella competizione tra culture, nel conflitto. Non si chiudeva nelle sue certezze, era un uomo libero" spiega u grande cutitianu La Repubblica.

Hè discrittu cum'è un abate "ribellu", in cunflittu cun l'autorità chjesale perchè predicava u dialogu trà i cristiani è u mondu musulmanu.

Frà parechje bellezze, truverete à i muri sta pittura à l'affrescu cusì bella di l'Italia, induve si pò vede a Corsica.

Eccu una bella ragione di scopre a cità di Parma. Ci n'hè tante altre, l'aviamu scritta face qualchì tempu.

Dunque, s'è vo passate pè Parma, avà a sapete ch'ellu ùn serà micca solu pè u prisuttu è u parmigianu.

Articulu messu in linea u 03/05/2019

U filmettu nant'à YouTube :

Trè anni fà, A Piazzetta avia publicatu un numeru per incuragisce i Corsi à girandulà in casa soia. u custatu hè tremendu : a Corsica, a cunnoscenu megliu i pumataghji chè i Corsi (micca sempre, ma guasi). Allora perchè micca prufittà di "l'effettu Govid" per andà à scopre un locu chì ne avete sempre intesu parlà, ma induve ùn avete mai messu un pede ?

Sì i cummercianti ùn ci mettenu micca troppu bastunate, bella sigura.

Quand'elli vi dumanderanu "Ch'ai fattu st'estate ?" è ch'è vo rispunderete "aghju visitatu u Crùzinu", calmerà subbitu à tuttu u mondu. U Crùzinu (o Crùzini ?) currisponde à a valle di u fiume di u listessu nome. Sò i paesi di U Salge, Rusazia, Azzana, Pastricciola è Rezza. Belli lochi verdi, è quì omancu serete à u calmu. A muntagna hè magnifica (sott'à u Monte d'Oru, u monte Cervellu, u Trittore). Hè un locu scantatu è in fine di contu pocu cunnisciutu. Hè una pieve chì hà sappiutu mantene unepoche di e so tradizione, cum'è quella di i fochi di a notte di u 31 di lugliu, quella di i mazzeri.

Da leghje nant'à Corse-Matin : La nuit des mazzeri

Voir cette publication sur Instagram

Une publication partagée par #Avista360 (@_ste20) le 10 Déc. 2016 à 1 :09 PST

Una di e regione di Corsica chì soffre u più di a disertificazione. Ma ci n'hè sempre unepochi chì resistenu. Ci vole à dì chì u Boziu ne hà l'abitutine, hè da quì ch'elle sò partute e duie rivuluzione maiò di a nostra storia : quella di Sambucucciu d'Àlandu, contr'à i signori in u 1357, è quella cont'à Ghjenuva, in u 1729.
Prufittatene per vede e pitture à l'affrescu di Sermanu è di U Favalellu, chì facenu parte di e più belle di Corsica."  "

Voir cette publication sur Instagram

E bellissime pitture à l’affrescu di a cappella Santi Niculaiu in Sermanu, pieve di #Boziu. Sò state fatte in l’anni 1450.

Une publication partagée par A Piazzetta (@a_piazzetta) le 26 Mai 2020 à 11 :48 PDT

Trà Galeria è Calvi, quì serete tranquillu. Abandunata da l’omi à l'epica di l’invasi barbareschi, a pieve di Luzzipeu si trova luntana da ciò ch'ellu si chjama "le développement", è tutta a mullizzeria ch'ellu trascina (sin'à quandu). Pocu mondu à u mare, paisaghji salvatichi, è quì vi ricurderete chì u statu ci vulia fà in l’anni 60 una basa per facci e so prove di bombe atomiche. E mine di l'Argentella si ponu sempre vede.

Ciò chì si chjama oghje « l'Esstrêm'sud » hè guasi tutta abandunata à u tuttu turisimu. Dui mesi d'infernu senza nome. Allora hè u mumentu di prufittanne è di scopre unepoche di e so bellezze storiche : u castellu prestoricu d'Araghju, unu di i più belli di l'età di bronzu. Obligazione di piantassi nant'à u situ di Cucuruzzu è di u castellu di Capula. Ne prufitterete per fà un saltu à u museu di Livia. In Càrbini penserete à i Ghjuvannali, nant'à un bellu chjassu patrimuniale.

È perchè micca lampà un ochju in Piantaredda ? Vicinu di u mare, ci hè un situ rumanu. Davant'à ste ruvine di u primu seculu è à cantu à i palazzi di i ricconi, meditate. 2 000 anni d'occupazione di u spaziu, da i Rumani à i e residenze di i Séguéla è Clavier.

Voir cette publication sur Instagram

« No filter », cum’elli dicenu i Corsi #cucuruzzu #capula #altarocca

Une publication partagée par A Piazzetta (@a_piazzetta) le 20 Août 2018 à 5 :37 PDT

#araghju #storia #corsica #casteddu pic.twitter.com/Si4mKall3A

— kissing pigs (@kissingpigs) May 30, 2020

Innò, « Le Désert des Agriates » ùn hè micca un disertu. Era una terra d'impiaghjera di i pastori aschesi è multifinchi. Era ancu cultivata da Capicursini. Prufittate di sti lochi prutetti da u Cunservatoriu di u liturale, è ditevi chì ste belle piaghje eranu prumesse à una bettunizazione sfrenata. Appartenianu à a banca Rotschild chì vulia fanne cummerciu.

Voir cette publication sur Instagram

Une publication partagée par A Tiusella (@atiusella) le 16 Févr. 2020 à 9 :07 PST

Hè a terra storica d'impiaghjera di i pastori niulinchi. Hè per quessa ch'ellu ùn ci hè un veru paese, ma parechji paisoli spapersi, induve l'omi ci anu fattu i so stazzi è compuli per l'animali.

Voir cette publication sur Instagram

Une publication partagée par Thomas Angeli (@thomas__angeli) le 24 Mars 2017 à 9 :58 PDT

O forse preferite u nome di "Les-deux-Sorru" (bof). Sorru Insù sò i paesi di Guagnu, A Soccia, U Pighjolu, Ortu. Sorru Inghjò sò quelli di Vicu, Àrburi, Balogna, Coghja, Murzu (è Muna), Letia, Lòpigna è Rennu. I cunniscite ? Nò ? Allora ci vole à cunnosceli.

Voir cette publication sur Instagram

#corsica #corse#lacorseautrement #corse_ile_de_beaute #locationvacances #locationcorse #vacances #vacancesenfamille #vacances🌴 #voyage #vintagelocationcorse #voyageursdumonde #voyages #landscape #landscapephotography

Une publication partagée par Barthélémy (@bastelicaccia20) le 10 Août 2019 à 12 :01 PDT

In Cinarca penserete à i Cinarchesi, sta dinastia di signori i più impurtanti di Corsica à u Medievu. Si ponu vede poche ruvine di u so castellu, tantu i Ghjenuvesi si sò appiegati à distrugelu, petra per petra. In Casaglione circherete e 150 cupule zuccate in a petra da l'omi di a prestoria.

Infine passerete pè Sagone, per ammirà l'antica catedrale di Sant'Appianu, chì ci rimanda à i tempi i più antichi di u Medievu. Hà una particularità : una stàntara hè stata aduprata in i muri.

Voir cette publication sur Instagram

Une publication partagée par Fab Mariani (@fab.latria) le 16 Févr. 2020 à 8 :34 PST

U situ prestoricu di u Monte Lazzu

Cumu ùn ci saria nunda à fà in Ghjuvellina ? Nunda chè di piglià u tempu di scopre u massicciu di Cima à i Mori ("Les Aiguilles de Popolasca" sè vo preferite), i bagni di Vetta di Muru è u castellu di Serravalle, vi face una bella spassighjata.

Voir cette publication sur Instagram

Castellu di Serravalle, pieve di #Ghjuvellina

Une publication partagée par A Piazzetta (@a_piazzetta) le 12 Août 2016 à 4 :00 PDT

Scuprite a pieve di Corsica a più ribella, quella chì omancu una volta à l'annu piglia a so indipendenza è si taglia da u restu di a Corsica. O si ne fala un pezzu di strada, di ponte, di ligna eletrica è di telefunu.
In Cambia ci truverete e più belle sculture rumàniche, ma dinù stantare è scritture prestoriche (A Petra Frisgiata). È s'è vo a vi sentite, pudete sempre cullà à favvi una paghjella in Rusiu. Ma attenti chì quì i canterini sò pistelli.

U nome di a pieve ùn hè micca u più cunnisciutu, ma purtantu u territoriu di a Rogna hè unu di i più grandi di Corsica. Và da Vivariu à Aleria, passendu pè Antisanti, Ghjuncaghju, Altiani, Pedicorti, Petraserena è Erbaghjolu.

Voir cette publication sur Instagram

Une publication partagée par Grégory Orsini (@grwegg) le 25 Sept. 2019 à 11 :48 PDT

In u core di a Castagniccia ùn mancanu e cose da vede : chjese barocche, cappelle rumàniche, case antiche, spassighjate. Hè normale, a Castagniccia era à u XIXu seculu una di e regione campagnole e più pupulate d'Auropa, è una di e più ricche di Corsica. Dopu sò venuti i guai, ma bellezze ci n'hè in ogni locu.

Voir cette publication sur Instagram

L'ancienne piève d'Ampugnani ⛰🌿🏞🌱🚗💨🌧🍀🏡🏘💒🔔🎶🌳🌰🦎🌫☁️☘🐗🍃🍁🍂 • 📍 Piano, Haute-Corse - #piano #fiumalto #ampugnani #orezza #sanpetrone #montesanpetrone #patrimoine #castagnicciacasincatourisme #castagnicciacasinca #castagniccia #cmmcorsica #igerscorsica #igerscorsica_natura #igerscorsica_architetturapatrimoniu #Corse #Corsica #TopCorsicaPhoto #lacorseautrement #tourismincorse #corse_ile_de_beaute #CorsicaMyLove #tomorrowincorsica #visitcorsica #corsematin #corsica_focus_on #lacorselavraie #corsicatours #corse_en_image #mountains #withGalaxy

Une publication partagée par U GIRANDULÒ 🏕 (@pierrefelix_vautrin) le 18 Mai 2020 à 8 :22 PDT

Voir cette publication sur Instagram

Une publication partagée par Antoine Giudici (@toinoucciu) le 5 Juil. 2015 à 9 :18 PDT

Una legenda dice chì in Fiumorbu cummencianu i bumbagi "turisti corsi fora". Ma supranate a vostra paura per visità sta regione in fine di contu poca cunnisciuta.

Voir cette publication sur Instagram

Une publication partagée par Jean-Christophe MORACCHINI (@jeanchristophemoracchini) le 10 Oct. 2018 à 2 :59 PDT

A valle di u Prunelli principia sott'à monte Rinosu per lampassi in mare in u golfu d'Aiacciu. Quì dinù ùn mancanu i lochi da vede, à principià pè a bocca di Scalella. Piantatevi à vede à Sampieru Corsu in Basterga (o micca, in sulidarità per Vannina), passate pè e strette di Prunelli, Ocana, è salutate u Ponte di i Setti Polli, induve Arrigu Bel Messere hè statu ammazzatu.

Un altru locu mìticu di u pasturalisimu corsu, cù u chjassu di a muntagnera chì và da Galeria à Niolu è pupularizatu da a canzona di a Filetta. Seguitate i passi di a bocca di Caprunale sin'à u rifugiu di Puscaghja. Pigliate un bagnu in Montestremu, spassighjatevi u longu di u Fangu, andate à vede a vechja chjesa piuvana di Chjumi. Sempre sott'à u Tafunatu. Under his eye.

Voir cette publication sur Instagram

Une publication partagée par 🌷𝑺𝒐𝒑𝒉𝒊𝒆 𝑵.🌷 (@sophie.nat) le 2 Mai 2020 à 4 :45 PDT

700 anni di storia, ne face una cità unica in Corsica. Da Terranova à Terravechja, ci vole à piglià u tempu di scopre i tesori di Bastia.

“Pesciu Anguilla”, sottu intitulatu “rumanzu bastiese” hè un libru scrittu in u 1929. Hè cunsideratu cum’è u primu rumanzu in lingua corsa.

U so autore si chjama Sébastien Nicolai, dettu Sebastianu Dalzeto. Natu à E Ville di Petrabugnu in u 1875, travaglierà in l’amministrazione culuniale, nanzu di diventà giurnalistu.

Di furmazione marxista, scrive in parechje riviste è serà unu di i fundatori di a rivista cumunista “Corse Rouge”. In a so opera a critica suciale è pulitica hè forte.

L'azzione si passa intornu à l'anni 1880 in Bastia. L’autore dice ch'ellu hà vulsutu "risuscità l'anima di a Bastia".

L'eroe hè un zitellu d’un quartieru poveru di Bastia, Pépé Morsicalupa, dettu "Pesciu Anguilla". U rumanzu conta a so ascensione suciale è cum’ellu riesce à sorte di a cundizione mìsera.

Ma vultemu nant’à i lochi di u rumanzu. Ecculi quì :

Hè u quartieru pupulare vicinu di u Vechju Portu. Tira u so nome da u ponte chì francava u fiume di u Guadellu.

Hè quì ch’ellu stà Pesciu Anguilla. Cù a so mamma Faustina, lavandara, è u so babbu Furtunatu, piscadore è briacone chì finiscerà per perde u cerbellu.

Ùn era cum’è oghje. Parechji casali sò stati lampati per via di i travagli di a municipalità bastiaccia in l'anni sessanta.

Ne testimuneghja stu ritrattu di u fondu Amadori.

Louis Amadori, “Fonds Amadori – Bastia – U Puntettu,” Médiathèque Culturelle de la Corse et des Corses, consulté le 7 avril 2020, http://m3c.univ-corse.fr/omeka/items/show/1100625.

Hè quì chì Pesciu Anguilla và à vende i so muzziconi è pezzacci di sigarette arricolti in terra per sti carrughji. Oghje si chjama carrughju Vattelapesca.

Chjamatu sempre oghje A Marina, hè u terrenu di ghjocu di i sgaiuffi di Bastia.

Hè a piazza di U Mercà. U mistieru di Pépé hè di lustrà i scarpi. Per quessa parte à circà i clienti cù a so scatula di materiale à girandulà pè a cità.

Dalzeto ci dà infurmazione nant’à l’organizazione di e rivinderole : à l’angulu di u corsu Pierangeli è di a merrìa si mettianu e rivinderole di E Ville. Quelle di Furiani è Biguglia si mettianu da u cantu di San Ghjuvà. Quelle di San Martinu, Petranegra è Miomu à l’oppostu.

Hè l’altru mercatu di Bastia, chjamatu “U Mercà d'I Pè” da i Bastiacci (ritrattu cullezzione d'Albert Fabiani).

Diventata “rue des Terrasses”. I sgaiuffi facenu “u battagliò” è si piglianu à petrate. Pesciu Anguilla si face mughjà chì hà rottu i vetri d’una finestra.

Ci vole à dì chì tandu, pè i sgaiuffi bastiacci, a cità si sparte in duie categurie : quelli di Terranova (o Terrenò), è quelli di Terra Vechja. Carogne d'insù contr'à Cagnette d'inghjò.

A chjamemu oghje “boulevard Paoli”. L’autore parla di i vechji caffè chì oghje ùn esistenu più : I Platanes è u caffè Tellier (ritrattu cullezzione d'Albert Fabiani).

Oghje ùn si vede più, ma u Fangu hè un fiume chì sbuccava in fondu di a piazza Santu Niculà. Induv'ella ci hè avà a rue Carnot c’era un ponte, ci dice Dalzeto. Hè quì chì Faustina è e lavandare bastiacce andavanu à lavà i so panni (cullezzione Albert Fabiani).

Oghje hè carrughju Jean Casale. Dalzeto ci conta cum’ellu era animatu tandu : "una trattoria tuscana, un fornu, un bancalaru, un sigantinu, un ferrale, un scalparu, un cantinaru. È tutta a ghjurnata, si sente canti corsi, taliani è francesi."

Oghje corsu Pierangeli. Hè quì ch’ellu stà u cunsigliere Morfini, u sgiò innamuratu di Faustina chì aiuterà à Pesciu Anguilla.

Oghje carrughju Giafferri. Hè quì, à l’angulu di u carrughju di a banca, chì Zia Minighella tene una cantina.

Sì i poveri stanu à u Puntettu è u Guadellu, i sgiò stanu in i casali corsu Sebastiani, nant'à a Traversa è nant'à a piazza Santu Nicula, induve populu di Bastia và à stà à sente a musica è i cuncerti (cullezzione Albert Fabiani).

U “quai des Martyrs” ùn avia l’aspettu d’oghje. Hè quì ch’elli accorrenu i Bastiacci per purtà succorsu à u battellu di piscadori pigliatu in una timpesta furibonda induve Pesciu Anguilla è u so babbu anu imbarcatu (cullezzione Albert Fabiani).

Hè quì ch’ellu studieghja Pesciu Anguilla. Tandu l’insignamentu hè assiguratu da i frati. Oghje u cullegiu Giraud.

Pesciu Anguilla finisce per diventà un prete stimatu è ammiratu di Bastia, curatu di San Ghjuvà. Ma ùn si scorda da induv’ellu vene è trova u sensu di a so fede in l’aiutu di u populu è di i più poveri.

Pittura di Frédéric Bourgeois de Mercey in u 1839, museu di Bastia.

Cum'è l'Ordre des Architectes de Corse chì hà interpellatu i candidati à l'elezzione municipale (pè tutta a Corsica), i Socios, u Cullettivu Salvemu a Citatella o a cuurdinazione Terra, dumandemu à i candidati à l'elezzione municipale bastiaccia chì hè u so prugettu patrimuniale in generale, è in particulare nant'à unepochi di punti.

Custruitu à u XVIu seculu, hè statu u più grande cunventu di Corsica. Trasfurmatu in ospidale, hè oghje à l’abbandonu dapoi più di trenta anni. A situazione hè dinunziata dapoi anni è anni da un cullettivu di vicini. Ci sò stati parechji prugetti di riabilitazione chì ùn sò sbucciati.

Digià, in u... 2008.

Face guasi trenta anni chì l’anzianu cunventu Santa Chjara aspetta. A prigiò hè abbandunata in u 1993. In u 2002 hè compra da una sucetà immubiliare aiaccina. Dapoi, più nunda per stu bastimentu in piena citatella.

Da leghje in Corse-Matin, sempre in u 2008...

Stu palazzu di sgiò hè statu compru da a municipalità bastiaccia in u 2003. Ci hè statu un prugettu di museu, ma ùn si ne sente più parlà è u casale si ne và di male.

Ne parlava Corse Net Infos, in u... 2011.

Face u chjam’è rispondi à Paese Novu. Abbandunatu à a fine di u XIVu seculu, porta dinù i nomi di Cutone o Paese Grecu.

Un articulu di Corse-Matin, in u 2011

Cù a Scala Santa, replica di quella di San Ghjuvanni in Lateranu di Roma, a cappella di Monserrà hè una di e curiusità è unu di i giuielli di Bastia.

L’antichi muri di “A Bastia”, a prima furtidicazione ghjenuvese di Bastia anu più di 500 anni, ma pare ch’elli sianu pochi à primurassine.

Ben ch’elli sianu stati scritti à i munumenti storichi in u 1936, i scumpienti ùn mancanu. Chì fà per piantà d’arruvinà sti muri chì sò ciò chì a cità hà di più bellu ?

In u 2017 A Piazzetta publicava una Google Map di i chjassi di Bastia, cù i punti d’interessi patrimuniali è storichi. U nostru prugettu, mudestu, di scopre lochi forse micca cunnisciuti da tutti hà fattu nasce un interessu (sughjetti in Corse-Matin è Via Stella, 44.000 visite pè a carta virtuale). I puteri publichi menu. Quì dinù i cantieri ùn mancherebbinu : chjassi da pulisce, muretti da rifà, o da apre per quelli chì sò stati chjosi da i privati.

Avemu fattu una carta di i chjassi di Bastia https://t.co/gTnISZBhSG pic.twitter.com/l0UhhTvWqt

— A Piazzetta (@aPiazzetta) March 6, 2017

A l’abandonu dapoi u 1991, l’albergu di l’anni trenta hà fattu nasce una pulemica in u 2017 dopu chì u prugettu di residenza di lussu sia statu resu publicu. Prevede a dimulizione di a facciata, per turnà à custruiscela è integralla in u prugettu novu.

A sapemu, l’orti di Bastia si truvavanu in San Ghjisè, Lupinu è in u Fangu. Di u passatu campagnolu di a nostra cità fermanu qualchì aghja da salvà (cum’è quella intighjata di Campu Ventosu), terrazze di cultura (à u Machjò), palmenti (in Agliani). Nant’à u fiume di Lupinu fermanu una decina di vechji mulini.

Di u passatu industriale di a cità fermanu l’attelli di i treni, in u Fangu. Un prugettu immubiliare prevede a so destruzzione cumpletta. Sò a memoria di u passatu operaiu di Bastia.

ritrattu : Marius d'Oriano

Chì fà per salvà è mantene i nomi vechji di Bastia ? Sì a doppia tupunimia esiste in Terra Nova è in certi quartieri, chì fà pè u restu di a cità ?

È chì si pò dì di l'orribili nomi dati à e residenze chì sortenu di terra ("Turn Street", "Green Avenue" ecc...)

Speremu ch'elli ci rispunderanu tutti, ch'ella sia in corsu o in francese.

U filmettu dà u schifeghju (infine, forse micca à tutti ?)

Soupe de chauve-souris en Chine. Après on s'étonne pour le nCOV. La chauve-souris transmet aussi la rage. La Chine devrait reformer ses habitudes culinaires. pic.twitter.com/N0d3ymYXBy

— Restitutor Orientis (@RestitutorOrien) January 22, 2020

I poveri abitanti di a cità di Wuhan si difendenu è nant'à e rete suciale. Certi dicenu ch'elli ùn anu mai vistu una spezialità simile ind'è elli. Allora fake news ?

dont post fake news. We ppl in Wuhan never heard of this soup. We are disgusted too by the video. This Coronavirus problem is more likely to be caused by snakes instead of fruit bat, according to a study done by Peking University medical school.

— hhh (@hhh05146721) January 23, 2020

Pussibule. In tutti i casi a storia face pensà à u filmu "Contagion", surtitu in u 2011.

Le bail du #coronavirus me fait grave penser au film Contagion

À la fin presque toute la population mondiale meurt et on découvre que tout a commencé en Chine, par une chauve-souris pic.twitter.com/2Rhrn1SEUn

— 𝕤 *✧･ﾟ* (@sophie_lty) January 22, 2020

Ma vultemu in Corsica. Casca bè, quì a "chauve-souris" ùn si manghja ma ci sò tante manere di chjamalla. A BDLC, Banque de Données Linguistiques Corses, arnese sviluppatu da l'UMR LISA di l'Università di Corsica ne hà ricensatu... trenta trè.

Da vede quì.

A forma a più cunnisciuta hè u topu pinnutu.

Si trova dinù :

u saccu pinnutu è u saccapinnutu
l'acellu tupinu è l'ocellu tupinu
u cinciminellu
u cucozzu è e so variante : u cucuzzu, u caccozzu, u gugozzu, u scuccozzu, u scagozzu, u cacaiozzu , u scurucozzulu, a scucorsula, a scruccozzula , a scaracozzula, a scucorzula, a scofuzzula, a scofuzzula, a schicozzula.

Cumposti cù a parolla "topu" si trova : u topu alutu, u topu pilutu, u topu razzinu, u topu marinu è u topu furagnu.

In Quenza truvemu a pippistrella.

In Coti Chjavari a solapinnuta.

Cù a parolla "razzi" si trova : u razzi pinnutu, u razzi cuddutu.

È si trova dinù :
u falsu cuddonu
u ciccicarò
l'aceddu di i morti


U dizziunariu di l'Adecec Infcor aghjusta :
a ratapinnata è u rattapiluccu
u scafuratu
u scuciozzu
u disaminaghjolu.

Face assai per stu picculu mamìferu. Di chè alimentà a sempiterna discussione "iè ma allora qualessa hè a vera parolla" è "qualessu hè u veru corsu" (ùn vale a pena di circà, ùn ci n'hè).

St'esempiu ci mostra à chì puntu pò esse ricca a lingua corsa. Nant'à e rete suciale i Francesi si battenu trà partigiani di "chocolatine" è di "pain au chocolat".

Noi pudemu bè avè quaranta varietà per "chauve-souris" nò ?