1. Sceglie un lucacciu. Piuttostu ch'è di sceglie un bellu locu, bellu assuliatu è cù una bella vista, preferite un locu goffu, bruttu è dispiacèvule. Cunsiglii : Tighjime, u parking di u Super U, a centrale di u Vaziu. O un locu vicinu d'un ruminzulaghju o di a strada naziunale.

2. Piglià manghjusca per pumataghji. Nè migliacci, nè frittelle, nè roba bona. Solu knackis freschi, corned-beef, Justin Bridou è fasgioli lyophilisés.

3. L'intussicazione alimentaria. Cunsequenza di a vosta manghjuscaccia : finite à l'urgenze. Cusì puderete tastà a bona suppa di l'ospidale.

4. Sceglie bè i so cumpagni. Ùn chjamate micca i vostri amichi. Preferite fà cunniscenze di ghjente : un gruppu di motards, marinari CGT di a SNCM, amicale di i gendarmi di Corsica, gruppu "3ème âge", CRS chtis à a ritirata, riunione di i sosies di Johnny Hallyday, hardos alemani... V'anu da caccià a voglia di fà a merendella !

5. I beaufs à cantu à voi. Sceglite bè dinù i vostri vicini : "Hé Kévin, pass'moi l'pâté ! Rodidon tu l'as mis où l'perniflard ?" Bon curagiu.

6. U Tempurale. Hè finitu l'inguernu ? Pensate... Ùn vi scurdate ch'è no semu sempre à i pristaticci, sti ghjorni di tempacciu chì u mese d'aprile à .imprestatu à u mese di marzu

7. Merendella in "garde à vue". Avete betu troppu vinu è pigliatu a vittura ? Vi site lampatu nant'à u muscatu è vi pigliate pè Sébastien Loeb ? Chì ghigna ! Finiscerete u vostru luni di Pasqua ind'è l'omi in turchinu. O Corsu, ùn ti scurdà di l'alcootest.

8. Ind'è i nostri amichi i pippol. Sò tutti "des amis de la keurse", ma ùn sò micca i vostri amichi. Vulete quantunque andà à pregalli bona Pasqua. Bilanciu d'una visita in u giardinu di Christian Clavier : 500 euro d'amenda. Face caru u spuntinu.

9. Parlate pulitica. Bucchinisti contr'à giacubbisti, mous contr'à duri, simeunisti contr'à angelinisti, roccaserristi contr'à jeanbaggionisti, zuccarellisti contr'à tutti l'altri... ùn mancanu micca i mutivi di baruffe s'è vo discurrite appena d'elezzioni !

Scrittu u 4/4/2010
Mudificatu 9/4/2012

N'avemu digià parlatu, a celebrazione di Pasqua hè principiata cun a dumenica di e palme.

U Ghjovi Santu currisponde à u mumentu induve Ghjesù Cristu pigliò u so ultimu ripastu cù i so discipli.

A tradizione vole chì in memoria di st'ultimu ripastu si manghji a cena domini, vale à dì una suppa di paste è ceci.

Infine hè u mumentu induve si visitanu i sepolcri, chì sò stati preparati in tutte e chjese : in francese reposoir, hè un Cristu in croce, vicinu à l'altare, decuratu cun fiori è candele. Ci vole à visitane un numeru sparu (impair).

Eccu, dopu solu, puderete andà à u Connor's. Ma attenti ch'ellu ci vole à esse in gamba pè a viacruci di u venneri santu !

Quantunque, ùn pudiamu micca passà à cantu. S'hè parlatu assai d'elezzioni nant'à A Piazzetta, un pocu di a San Ghjisè, è si a pulitica hè a prima religione di l'isula, ùn pudiamu stà senza parlà di a Settimana Santa chì principia oghje cù a dumenica di E Palme.

E Palme simbuliseghjanu a ghjunta di Ghjesù in Gerusaleme quand'ellu ci hè statu accoltu cun assai gioia a dumenica nanz'à a Settimana Santa.

Catenacciu, Merendella è Jean-Pierre Pernaut
In Corsica, cum'è in tuttu u Mediterraniu, Pasqua ferma una grande festa è un grande mumentu di celebrazione. È s'ellu si riduce spessu a Settimana Santa à u Catenacciu di Sartè induve a ghjente cerca à fassi piglià in fottò cù u tippu in rossu è à a merendella di u luni chì ancu Pernaut vene à filmà, Pasqua hè sopr'à tuttu un mumentu induv'elli si ritrovanu i Corsi, ch'elli credinu à nò.

Allora circheremu à parlanne innù i ghjorni à vene.

Per sapenne di più nant'à e feste di Pasqua in Corsica, andate à vede ste pagine di l'adecec o ancu queste quì