L'avete vista, a campagna di pubba per i musei di Corsica ?

"En Corse il y a toujours un musée sur votre chemin", ci dicenu... Ma a verità hè chì a strada sbocca più spessu nant'à ciò ch'elli chjamanu una "décharge sauvage".

Sapete, ci muntemu spessu a sega per fà crede chì noi altri Corsi semu primurosi u nostru ambiu, ch'è no semu tutti difensori di a natura, ch'è no circhemu di priservalla... Ah iè, a cridite veramente quessa ?

Basta à spassighjassi pè i nostri stradò per vede l'accatastere di mullizzu in i nostri ruminzulaghji identitarii... Ogni paese, o guasi, hà u soiu. À chì lampa i so peuneus (nò, in corsu ùn si dice micca "pneus"), à chì ci lampa u so cateru, à chì i so stanghjoni, à chì e so palette... Ci truverete di tuttu.

Iè, i ruminzulaghji salvatichi sò difesi da a lege. Ma ne ferma sempre in Francia... è a magiurità sò in Corsica.

Et qui on est ?

Mandate i vostri ritratti di ruminzulaghji : apiazzetta@free.fr

Purettone, cumuna di u Borgu. Articulu di Corse-Matin

Ruglianu

Brandu

In u curtinese

In Calvi

Alata

Bastia, A Rinella

Pieve

Arbiddara

Mandateci i vostri ritratti !

Amichi luccianinchi, preparatevi à l'impuzzicamentu di a vostra bella cumuna ! Da quì à pocu, l'aria pura ch'ellu si respira in Casamozza averà un'odore appena stranu è u nùmeru di càncheri serà in pienu sviluppu.

Pudemu esse siguri chì u libru di David Servan-Schreiber "Anticancer" diventerà un best-seller in u circondu bastiacciu.

U prefettu Nevache hà sceltu : pè i 30 anni à vene, a Corsica serà alimentata in fiul pisìvu. À u micrò d'Alta Frequenza u prefettu ci rassicureghja "oui ça sera du fioul lourd, mais du fioul lourd light".

Un vèlenu, ma un vèlenu light.

Sàppiate chì e centrale à u fiul pisìvu ùn esistenu più ch'è in i paesi africani o in i DOM TOM, cum'è à a Réunion.

Serà ciò ch'ellu si chjama "le rôle positif de la colonisation".

Quale hè chì si ripiglia appena di baccalà ?

"U turismu hè l'affare di tutti", ci dicia a campagna publicitaria di l'ATC in principiu di stagione.

Iè, ma quandu ùn pudemu più accoglie i turisti, induve i mettimu ?

Allora chì Ange Santini vole fà vene sempre di più mondu in Corsica (a dice ancu nant'à u so blog), si pone u prublemu di a frequentazione (è a saturazione !) di i lochi turistichi.

D'agostu, hè à u mare di Piantaredda chì u bagnu hè statu difesu : "pollution d'origine fécale"... Chì vulete fà ? Vulete sempre di più turisti, ma à un mumentu datu, ci vole chì tutta sta brava ghjente fessi i so bisogni, nò ?

S'hè cuntatu sin'à 300 battelli quellu ghjornu in Piantaredda...

Allora ? Quandu si cummincerà à pensà à chì turisimu vulemu ? Cumu organizà l'accogliu ? Chì infrastrutture ? Cumu prutege i lochi dilicati ?

Per avà a pulitica turistica di a CTC hè "tutti à pelu è tutti à botte". L'Office de l'environnement, ùn s'hè intesu.

Saria bè di rifletteci appena, nò ?

In una intervista à Corse-Matin, Martial Lacroix parla di u prublema di a frequentazione di certi lochi in muntagna.

Frà i più cunnisciuti (perchè assai faciule à ghjunghjeci) ci sò i laghi di Melu è di Capitellu. Circa 2 000 persone à ghjornu in sta stagione !

Purtantu, ùn ci hè ambiu più dilicatu ch'è l'alta muntagna corsa. Imaginate ciò ch'elli ponu fà 2 000 turisti in un situ cusì sensìbule, senza tene contu di e règule elementarie di rispettu di a natura.

Ùn hè micca quistione d'accusà i fresteri, chì certi Corsi anu poca primura di a natura, è si e piste ci ghjunghjianu, sarianu i primi à facci u quad, u jet o a moto !

Allora ? À quandu una presa di cuscenza di i Corsi (ùn si parla mancu di l'eletti...) di a preservazione di l'ambiu è di i lochi dilicati, nanzu à u sviluppu ecunòmicu ?

I camping car nant’à e strade
Un grande clàssicu di l’estate in Corsica : u turistu cù a so caravana o u so camping car. Quale ùn s’hè ritruvatu daretu à una lumaca à dui à l’ora impussibule à duppià ? Ùn vale a pena d’annerbassi è aspettate à settembre…

Tourist Invaders
Iè, a sintimu digià dì da quì : hè u turisimu chì face campà a Corsica. Ma perchè avè paura di dilla ? E centinaie di turisiti lampati nant’à e spiaghje di l’isula sò dinù un’agressione ! Chì tanti « Space Invaders » ! È sè no pruvassimu di campà d’altre cose ch’è di u turisimu ?

U « petit train »
Chì cità corsa si franca u so trinichellu colmu di turisti, vechji cucchi di preferenza, cuntenti cum’è pichji di fassi un giru ? U peghju hè ch’elli ùn si rendenu micca contu à chì puntu sò ridìculi…

I pippol
A grande cumedia di l’estate cummencia cù e pagine pippol di Corse-Matin. Ogni ghjornu, un pippulacciu. Sempre listessa falsitutine : li piace a Corsica, l’autenticità di stu bravu populu appena connu ma tantu sinceru. Tuttu què per campà in e so villà-bunker u più luntanu pussibule da i paesi. Poveri à noi, cuntenti di serve a suppa à sti mullizzi…

Tuttu ciò chì cummencia per « beach »
Beach soccer, beach party, beach volley… Ma perchè toccu l’estate ci vole à mutassi in tontu di i sport imbecilli, cun short è tàmbara à l’aria ? È ùn parleremu mancu di a cumedia di u jet è di u quad o di u carnavale di u « turisimu verde » (accro branche, via ferrata, canyoning…)

Cundannati à diventà un populu di muzzi per turisti ?
Cun 110 millioni di visitadori à l’annu, u Mediterraniu hè a più grande attrazzione turistica di u mondu, luntanu davanti à Disneyland. In i 20 anni à vene, stu sciffru serà multiplicatu per dui. U turisimu attira soldi faciuli è appititti d’investiscitori. Ma à quale prufittanu sti soldi ? Chì piazza per l’identità è a cultura in a Corsica di dumane ? Seremu cundannati à diventà i servi di stu turisimu ? Finalmente sò poche e differenze cù i paesi sottusviluppati.

I saccadò cun calzette è ciavatte
I campioni di u mondu di u gattivu gustu si danu tutti appuntamentu durante dui mesi in Corsica. Quandu averanu da capisce ch’ellu ùn ci vole à mette calzetta sott’à a sàndala ?

E buatte di notte
Altra pulluzione statinale, a cuncurrenza di e buatte corse à grande publicità di serate sempre più pazze è di DJnacci guizzi. « Et qui on est », dicia quellu…

Un scempiu eculògicu
Ùn si ne parla mai, ma chì serà l’impattu di u turisimu nant’à l’ambiu ? Cù una pupulazione duppiata à u più forte di l’estate, chì ne serà di u trattamentu di l’acque brutte, di e stazioni d’epurazioni ? Chì ne serà di a surfrequentazione di certi siti, in bor di mare cum’è in muntagna ? È dì chì per certi, ùn ci hè abbastanza ghjente chì ghjunghje…

U fresteru chì cerca à cumprà
Pensate stà tranquillu in paese, luntanu da u cumbugliu tontu di a piaghja l’estate. Ma eccu ch’elli scalanu unepochi di fresteri, in brama d’una casa da cumprà. Dimmula chjara : ÙN CI HÈ PIÙ NUNDA DA VENDE IN CORSICA.

Conclusione
L’estate rende sia connu, sia azezu. Sceglite u vostru latu !

Sò parechji ghjorni chì una mansa di mullizzu vene à accatastassi nant'à e marine da Santa Severa à Bastia.

D'appressu à Gilles Zerlini di l'associu di difesa di l'ambiu U Polpu sta pulluzione hè d'orìgine taliana, d'appressu à ciò chì si pò leghje nant'à e buttiglie è i sacchetti, l'hà spiegata à l'AFP.

Segondu à ellu, sta pulluzione saria piuttostu antica. Ste tonne di mullizzu si spasseghjanu siguramente dapoi parechji mesi... o forse ancu parechji anni.

L'orìgine pudarie esse a regione di Napuli, induve si sà chì i prublemi di trattamentu di u mullizzu sò tremendi dapoi parechji anni.

Tè ? Una nave taliana chì vene à lampà a so merda vicinu à e coste di Capicorsu... Ùn vi ramenta nunda ? Saria u grande ritornu di una storia sìmile à e fanghe rosse di a Montedison, 35 anni dopu ???

Eccu digià à Santa Maria chì vene. Ci annunzia a rinfriscata è u principiu di a fine di l'estate.

I cummercianti cummencianu à fà i so conti (cum'è tutti l'anni ci diceranu chì a stagione hè stata pessima...) è in e vitrine di i magazini si ponu vede digià e veste d'inguernu è e cartine pè a rientrata di i zitelli.

Da davvi a picondria...

In tantu si prepara una dumenicata d'infernu : da u ghjovi 14 sin'à dumenica, a Corsica sana hà da bolle. Da per tuttu, feste pè l'Assunta Gluriosa (u 15) è San Roccu (u 16), mumenti di grande devuzione in i paesi (quantu scumettite chì Corse-Matin hà torna da fà a so "une" cun stu vituperiu di Dutronc è a so minestra di ceci in Monticellu ?).

Mumenti di grande devuzione dinù in i balli di paesi è e buatte : quantu litri di Johnnie anu da passà l'Acapulco è Via Notte ? Siguramente parechji ettolitri...

U 15 d'agostu hè dinù sinònimu di ciò chì i giurnalisti lucali chjamanu le grand chassé-croisé du 15 août. Si ne voltanu in casa soia centinaie di turisti rossi inciapati runzicati da u sole è u GR20, mentre ch'elli ne ghjunghjenu d'astri in brama di mare è d' écran total.

Tutti anu da lampassi nant'à u primu Super U ch'elli trovanu per fà e so pruviste di salciccia è di prisuttu sott'à cellophane, chì anu un gustu più vicinu di quellu di u plasticu ch'è di a carne purcina.

Pensemu dunque à tutti i disgraziati chì travaglianu sta dumenicata nant'à i porti, in l'aeroporti è à e casce di i supermercati. Anu da vedene passà croce di l'Auropa sana, à a ricerca d'una valisgia persa o di un saucisson d'âne ch'elli sò i soli à pudè manghjà...

U casticu di a diaspò
Ùn parlemu mancu di i paesi chì vedenu e so dream team di diaspò ricustituite, sempre pronti à dà e so lezzioni nant'à tuttu. Da a manera di fà ghjucà Thierry Henry è Trezeguet à u sviluppu ecunomicu di a Corsica passendu pè "cumu si dice u plafond in corsu", sanu tuttu (di siguru ùn sò micca tutti cusì i corsi di a diasporà, ùn cumminciate micca à scrive i vostri mails d'insulte, ma quantunque, certe volte ci hè di chè scimisce, nò ?)

Serà dunque difficiule di fughje u cumbugliu generalizatu di u 15 agostu, quist'annu dinù.

È dì ch'elli volenu custruisce tutta l'ecunumia di stu paese UNICAMENTE nant'à u turisimu... Pover'à noi.

Curagiu, più ch'è duie settimane à tene.

U 4 d'agostu, a pulluzione ci hè, ma hè poca poca...

A nutizia hè stata publicata u 4 d'agostu à 10 ore da a Prefettura marittima di u Mediterraniu. Ci spiegava chì un battellacciu avia scaricatu mulizzi è petroliu, dece ghjorni fà è chì un velu di petroliu si stendia in punta à u paisolu di Galeria.

In a serata, casca un antra nutizia AFP chì ci rassicureghja. "Hè passatu un elicotteru è ùn hà vistu nunda"... Soca, da Tulò, duve ella hè stallata a Prefettura marittima, ùn anu vistu nunda... Dunque, a nutizia rassicurante di u ghjornu hè chì vista da Tulò, a pulluzione chì imbruttisce a Corsica hè poca... Bravi!!!

U lindumane, hè ghjornu...

Dopu, ghjè acqua in bocca! U 5, nisuna nutizia ci vene data nant'à sta pulluzione. Solu affare da ritene, l'Uffiziu di u Circondu porta una lagnanza contru à X. Vistu a debbulezza di u periculu, i capizzoni decidenu d'ùn micca inizià u pianu Polmar. Ùn ci hè penseru, pudemu turnà à i nostri capatoghji d'istatina è accoglie à Tante Jeanne sbarcata appena avà in paese...

U 6 d'agostu, u bagnu hè pruibitu!

"La nappe d'hydrocarbure détectée au large de Galéria dans la soirée du dimanche 3 août n'en finit plus de causer des dégâts." Ùn la dimu micca noi, hè Corse-Matin chì a dice... Cum'è in quellu affaracciu di Tricastin, simu à l'affollu di Radio Prefettura...

Baccalà è mulizzu per Corsica?

L'avianu detta i Mantini chì l'estate, tutt'ognunu si mettia à cantà per vince si dui soldi... Ci hè da scumette chì "l'auturità", partute in vacanze in Tombouctou averanu avutu pocu laziu di mette e mani in pasta è per l'occasione, in u mulizzu... Astuti ch'elli sò, ci anu purtatu di fole in canzone, una volta di più...

Hè quessa a decisione chì inzerga l'usteriaghji. Mentre si sviluppanu i voli low-cost in Europa, capiscenu male u perchè di sta misura chì à contu soiu, averà un impattu negativu nant'à i so rivenuti.

U turisimu : da a quantità à a qualità?

Fattu si stà chì a crescita di u volu Parigi-Bastia averà di sicuru una cunsequenza nant'à i cunsumatori. S'ella vene cara assai a destinazione "Corsica", averebbe da calà, di modu mecanicu, a quantità di i turisti. Per mantene o accresce i so rivenuti, ci volerà à accoglie turisti più carchi à soldi chè quelli oghjinchi è avè per scopu di sviluppà a qualità nant' à a quantità. Prima perchè ci lascianu di più soldi è secondu perchè u costu cullettivu di u turisimu rivene più bassu. Si capisce faciule. Ancu puru s'ellu ci vole à mudernizà le, l'infrastrutture acquale, stradale o purtuarie ùn averanu à esse cusì pisive chè in l'andatu d'un turisimu quantitativu di pumataghji è di ranciconi...

A mundialisazione di u turisimu

Ma oghje chì hè oghje, sta logica pare ch'ella venissi appena simpliciotta. Accresce a qualità contru à a quantità ùn vene cusì faciule. Da u dì à u fà, ci hè quant'è da u tesse à u filà, dice u pruverbiu...
Prima perchè l'ottelli nustrali di trè o quattru stelle sò scarsi. Averemu dunque un ufferta di trasportu carissima per un pruduttu turisticu mezanu. Secondu, vistu a cuncurrenza in u settore di u turisimu, di e mode, di e brame di e ghjente è sopratuttu di u so putere cumpraticciu, st'evuluzione, ancu s'ella pò pare bona, si palesa difficiule da mette in ballu senza un aiutu forte à prò di a mudernisazione nun solu di l'ottelli ma dinù di a qualità di l'ufferta turistica à u pianu di l'attività è di i servizii resi à i cunsumatori.

Campà di u patrimoniu

Infine, st'evuluzione à prò di u qualitativu vene appuntu da ramintà à u puliticanti quantu u pruduttu turisticu "Corsica" abbisogna cure è prutezzioni di tutte e mamme. A valurisazione di i nostri circondi ùn si deve più fà solu per ideulugia à prò di a difesa di a "terra", ma di dinù di modu utilitarista, interessatu, prammaticu, à prò di u sviluppu ecunomicu. In stu filu custì, e nostre machje è a nostra identità, sò a nostra più grande ricchezza...