Hè bravu Cyril Lignac, hà fattu una bella emissione nant'à a Corsica, senza clichés. Ùn s'hè micca risu di noi è ùn hà parlatu nè di viulenza, nè di razzisimu, nè di saucisson d'âne.

Bon, hà fattu cum'ellu pudia, ci hà mustratu a fabricazione di "le broutch" è avemu vistu "la figadèl". Ma quessu ùn era micca u prublemu.

M6 hà vulsutu mustrà i Corsi "authentiques" : un pastore simpàticu, un bravu tragulinu, un purcaghju di prima trinca, è ancu una banda di cacciadori chì cantavanu ghjustu. Avemu vistu dinù una "mamma corse" à l'antica.

Ma c'era un prublemu, nò ?

Mancavanu i veri Corsi d'oghje, les vrais gens cum'ellu dice u francese. I veri Corsi d'oghje ùn sanu micca fà u brocciu, ùn vanu micca à caccighjà, ùn sanu micca fà a differenza trà un lonzu è un prisuttu.

I veri Corsi d'oghje manghjanu i knackis, u sabbatu ùn collanu micca in paese ma puntanu u caddie à Géant Casino. Manghjanu di più Caprice des Dieux chè brocciu passu, ci hè di più mittomani in Cayenne in circulazione chè di mulatteri. Sò più numerosi à campà in HLM è in lotissement ch'ellu ci n'hè chì respiranu l'aria pura di e nostre muntagne. È sò più numerose e tonfie piene di cuccaina chè e donne chì staccianu a farina pisticcina.

M6 ci hà mustratu una fiura di a nostra identità chè no vuleriamu vede, ma ch'ùn esiste guasi più. Quessa l'identità hè annigata in un tsunamì di cunsumerisimu mundializatu techju di TF1, di Quick, di grandes surfaces è di reality show.

Allora piuttostu chè di vede a realità in faccia, femu nece di crede chì sta sucetà corsa esiste sempre, chè no semu sempre differenti di l'altri, allora chè no semu cum'è l'altri.

Unu di i prutagunisti di u filmu hà dettu c'est ça la Corse. O micca.

Per una volta a Corsica hà vintu qualcosa. A selezzione di ghjucadori corsi hà battutu a Brittania è u Gabon durante a Corsica Football Cup.

Era un piacè di vede sta selezzione naziunale corsa, tantu bramata è mille volte dumandata. Per quessa ci vole à felicità l'organizatori di u truffeu, Lucien Felli, Dédé Di Scala è Patrice Paquier di u so travagliu tremendu.

Ma futbol è identità sò spessu ligati. Nant'à u net l'internauti s'interrugheghjanu nant'à i criterii di selezzione di a Squadra Corsa. Per a « Corsica Football Association », i patti sò chjari. Si ponu selezziunà i ghjucadori "d’ascendance parentale ou grand-parentale Corse".

Exit dunque a cumunità di destinu è i "corsi d'aduzzione" cum'è Ghisolfi o Pierre-Yves André, o ancu quelli nati quì cum'è Ben Saada o Khazri.

Invece, ghjucadori chì anu luntane radiche corse ma chì i venenu pocu sò selezziunati, cum'è Damien Tiberi (Sedan) o Grégory Leca (Caen). Nant'à Facebook, certi irunizeghjanu, si leghje : espère que certains joueurs de l'équipe de Corse profiteront de leur séjour pour visiter notre belle île.

I sustenidori bastiacci dibattenu nant'à u forum Camperemu.com di e selezzione di Ghisolfi, Khazri è Ben Saada. Droit du sol o droit du sang ? L'avisi sò cuntrastati.

L'articulu di A Piazzetta nant'à a Squadra Corsa hà fattu nasce cummenti numerosi. Pè Rochjunculu3 : "I baulli chì credini chì u so populu si difinisci par via di u sangu accicati da u razzismu (o a simplicia cunnaria ?), ùn s'avvidini mancu ch'hè a so visioni balorda, mitica è trapassata, chì accillarighja a fulclurizazioni è l'acculturazioni".

Al dilà di una selezzione di ballò, nasce u dibattitu di l'identità corsa. Di solitu ùn sò ch'è i naziunalisti à parlanne in tempi d'elezzioni. A Squadra Corsa pone a dumanda à tutta a sucetà : quale hè corsu ?

À l'ora di a mundializazione, quandu a pupulazione di a Corsica hè crisciuta è s'hè mischjata assai, à un mumentu induve i Corsi sò diventati citatini è chì a leia cù i paesi si perde, chì e culture s'unifurmizeghjanu è chì a lingua si ne morre, chì hè "esse corsu" oghje ?

Ma ùn ci hè micca ch'è a Corsica à cunnosce a so crisa identitaria. Brice Hortefeux è Eric Besson ùn anu pussutu risponde à ciò chì face l'identità francese...

Nimu l'hà vista, ma Mickael Vendetta, una di e più grande closce chì a Francia hà pruduttu, hà parlatu di a Corsica in l'emissione di tele-realità "La Ferme Célébrités".

U montasega di Groslay (ùn s'inventa micca un nome cusì...) hà dettu a so ammirazione per u nostru paese : "Si y a un pays où j'aimerais vivre c'est en Corse ! Je kiffe trop la Corse ! Là-bas c'est génial !"

Per a bellezza di a so natura ? Ùn ci site micca.

Spiega u sbaccone : "Y a des supers boites de nuit, les gens sont super cools, ils me ressemblent !"

Si n'ampara belle : "Avec mes potes corses on s'éclate, on parle muscu, fringues, look, DJ, bagnoles, guns et jet-ski ! Après on compare nos pecs et nos biscottos, trop cool !"

A Corsica hà infine trovu un'imbasciadore di talentu : "Les jeunes corses je les kiffe, franch'ment, je suis sûr que j'ai du sang corse dans les veines !"

Di siguru, un ghjornu averemu da abuchjaccilu : "J'pense que j'finirai mes jours là bas ! Un jour j'aurai ma villa à Portovèk ! D'ailleurs je pense à me faire tatouer une tête de corse (sic) sur le bras."

Eppò di cuntinuvà : "Je suis un homme libre comme Pascal Olmeta, Tony Montana, David Guetta et Emile Dzoukarèl".

U dibattitu nant'à l'identità corsa avanza.