Infine una nutizia impurtante in stu mese di nuvembre puzzicosu.

Di u so nome Louise Robert, hè ella chì rapresenta a Corsica à l'elezzione di Miss France 2013.

A pulèmica hè nata da Voici chì hà publicatu dui ritratti qualificati di "hot" di a miss.

À voi di ghjudicà...

A fottografa si difende in Corse-Matin : "Je ne l'ai jamais photographiée seins nus, ils étaient tout au plus cachés par ses mains (...) Ce ne sont pas des photos osées, elle était en sous-vêtements et puis ce n'est pas très différent du défile de Miss France".

Ancu a so mamma a dice : "Ma fille est très pudique, (...) elle ne fait jamais de topless, même pas à la plage..."

Tuttu u male sia quì ! Nunda à chì vede cù i ritratti di Valérie Bègue, Miss France 2008, chì s'era tazzata cun Geneviève de Funtanone.

U cumitatu Miss France derà da quì à pocu a so risposta per sapè si iè o nò, averà u dirittu di participà à l'elezzione... l'ottu di dicembre prussimu. U ghjornu di a festa di a nazione !

Noi, à A Piazzetta, avemu decisu di sustenela. È perchè micca una demissione, in diretta nant'à TF1, l'ottu dicembre ?

Forza Louise ! A to nazione ti sustene.

Quist'annu, pè a vostra serata Halloween preferita, sceglite d'esse veramente spaventosu.

Scream ? Cumplettamente has been.
Paul Natali ? Digià fatta.
Sarkozy ? Bof.
Dracula ? Ringard.
Una maschera in plàsticu ? Troppu cumplicatu per beie.
Emile Zuccarelli ? Troppu periculosu, v'avete dà fà minà.

U megliu : vestitevi in Thiriez !

"L'histoire est un éternel recommencement" dice u francese. In corsu quand'elle cascanu e nutiziacce si dice "l'affari sò in francese".

L'affare si passa in u 13 di marzu 1965 è hè u presidente di u club di Montélimar chì hà pigliatu l'iniziativa.

Ci sò 10 presidenti di clubs di u gruppu Sud-Est di u campiunatu di CFA : Annecy, Avignon, Chambéry, Draguignan, Hyères, Louhans, Miramas, Monaco, Saint-Etienne è Port-de-Bouc.

Tutti decidenu d'ùn andà più in Corsica pè a stagione 1965-66, per via di : "l'ambiance hostile et antisportive dans laquelle se déroulent les déplacement en Corse, de l'insécurité des joueurs et dirigeants, de l'insécurité des arbitres" (leghje u libru di Didier Rey La Corse et son football).

I dirigenti di u futbol francese ùn teneranu micca contu di stu bellu mumentu di razzisimu anti corsu. Parechji clubs cuntinentali purteranu ancu u so sustegnu à i dui clubs corsi (Arles è l'AS Champenoise) è ancu L'Equipe ci difende ! Ma sta storia face assai rimusciu in Corsica.

A seguita, a cunniscite. Pocu tempu dopu u SECB è l'ACA culleranu à u livellu prufessiunale in segonda è più tardi in prima divisione. Invece, di u club di foot di Montélimar, ùn ne senteremu più parlà.

Ci sò parechje sumiglie cù a situazione di u 65 è quella d'oghje. In un cummunicatu publicatu u 19 ottobre, u CA di a LFP porta u so sustegnu à... Frédéric Thiriez : Les Présidents de clubs de Ligue 1 et Ligue 2 membres du Conseil d'administration de la LFP réaffirment ce jour leur soutien total au Président de la LFP dans l'action menée pour garantir la sécurité des matches à Bastia.

Ch'ellu avessi purtatu u so sustegnu à Pierre-Marie Geronimi saria statu di più stunante...

Puntu negativu : bon avà a sapemu, anu da falà cutrate nant'à u Sporting.
Puntu pusitivu : nò, u futbol corsu ùn hè micca cum'è l'altri è ùn semu veramente micca fatti per entre in u rangu è in u futbol mudernu, quellu di u business, di Knysna, di i soldi, di Ribéry è d'Aulas...

Eccu l'articuli di Le Petit Bastiais :

Attacchendusi à u Racing Club di Lens, u Sporting si mette in a piazza di u David contr'à Goliath. Fora chì u Goliath in questione hè ancu di più mustruosu è si chjama Gervais Martel, amicu ìntimu di Thiriez.

Rammintemu chì u RCL hè unu di i clubs preferiti di i francesi è sopr'à tuttu di Thierry Roland. Sapete Lens, u club simpàticu, i ch'tis, a "Marseillaise lensoise" è e canzone di Pierre Bachelet cantante à tutti i macci in Bollaert... tutte ste cunnerie chì piacenu à u "français moyen" è à l'incuscente cullettivu spurtivu di l'héxagone.

Noi, cù e nostre chignacce, e nostre facciacce nere di Corsi chì fischjanu a Marseillaise è chì tombanu i prefetti, chì vulete ch'è no fessimu ? Semu cundannati capu nanzu. Trippa sì i ghjucadori di u nordu eranu di più agressivi chè i Corsi. U capitanu di Lens dichjarava nanz'à u macciu chì : "on doit être plus tranchants, plus saignants. On doit avoir les crocs. On est trop gentillets (...) on doit faire peur, être une formation difficile à manoeuvrer, capable de donner des coups de boutoir à tout moment. On n'est pas assez tueurs." (da leghje in Nord Eclair).

Trippa si Cichero hà sciappatu u mustacciu di un dirigente di Bastia, i culpèvuli seremu noi è l'avemu da pagà cara.

A sapemu, semu Corsi, dunque cundannati capu nanzu. Allora, piuttostu chè di lagnacci è di pienghulà, riflettimu puru à ciò chè no duvemu fà per cuntinuvà à annerballi ancu di più. Eccu parechje piste, à voi di truvanne d'altre...

- Avvelenà a prussima squadra chì vene in Furiani. L'OM avia inventatu i suchji d'aranciu impistati (affare OM - Poznan è OM-Rennes in u 1990). Perchè micca serveli appena di Mouss'or è di Saint-Georges cù appena di Lexomil nentru ?
- David Astorga (sapete u catinu chì nant'à TF1 s'hè fattu ridiculizà da Maradona) hè u novu capimachja anti-Bastia di a CFoot, a tv di a LFP. Ùn ci hè chè da vede i cummenti di l'animatori di sta catena. À ellu li metteremu appena di Roundup in a so Saint-Georges.
- Dichjarà festa naziunale u 17 nuvembre (l'anniversariu di Francia-Bulgaria 1993) è ribattizà Furiani "stadiu Emil Kostadinov".
- Fà di u 12 maghju a "Festa di i poteaux carrés", in omagiu à a finale persa di Saint-Etienne in 1976.
- Fà una statua à Raymond Domenech, l'assassinu di l'Equipe de France.

À voi di truvà a seguita...

https://www.apiazzetta.com/video/
Bastia-Lens 17/10/11 par Cfoot

U sàbbatu 15 ottobre à 4 ore è 10, una baruffa schjattava nant'à u terrenu di Furiani, à qualchì minutu di a fine di Bastia - Lens. Hè goffu, ma cusì si passa nant'à tutti i stadii di ballò di u mondu.

À 4 ore è 20, Frédéric Thiriez facia u so cummunicatu, lagnendusi chì "Ces incidents répétés nuisent gravement à l'image du football français et à celle du club bastiais ", precizendu chì "La Ligue rappelle que le terrain de Bastia est actuellement sous le coup d'un match de suspension avec sursis suite aux incidents du match entre Bastia et Le Mans".

Eccu, semu ripartuti per un'altra tazzata, mediatica sta volta. L'infurmazione passa in prima pagina di tutti i siti d'attualità : Le Figaro, TF1, si ne parlava ancu in u JT d'i>télé : "une fois de plus en Corse... le retour des vieux démons à Bastia... difficile de jouer dans le contexte corse..."

I gattivi Corsi contr'à i bravi Ch'tis, ùn pudiamu micca luttà.

Megliu : u situ di u giurnale Nord Eclair ci ampara chè no semu peghju ch'è l'africani. U goal rimpiazzante di Lens, Hamdi Kasraoui mughjava chì : « C'est pire qu'en Afrique, ici, c'est pire qu'en Afrique ! ». Per noi chì semu razzisti, eccu un'insulta chì marca veramente male. Sapiamu chì u Terzu Mondu cummencia in Corsica, ma quantunque.

Ma pocu dopu u Sporting hà publicatu nant'à u so situ a videò di ciò chì s'hè veramente passatu in u curridore di i spugliatoghji di Furiani. Si vede u difensore di Lens Gabriel Cichero mette un calciu à un dirigente di u Sporting. Diagnòsticu : parechje fratture è intervenzione chirùrgica.

È sì Thiriez pensa chì a Corsica "nuit gravement à l'image du football français", allora hè una bona ragione di cuntinuvà ! Una cosa hè sigura, Bastia ùn vole veramente micca entre in l'orrore di u futbol mudernu...