Accueil
Envoyer à un ami
Version imprimable
Partager

5000 persone in Aiacciu cù Parlemu Corsu

Un mondu scemu è una riescita tutale ! A manifestazione-festa di Parlemu Corsu hè stata una campa. À quandu a prussima ?



5000 persone in Aiacciu cù Parlemu Corsu
È sì, piuttostu ch'è di manifestà in l'azizume, s'organizava omu un'addunita festiva ? Era l'idea di u Cullettivu Parlemu Corsu chì dopu à avè riesciutu a prova di fà vene 2000 persone sott'à un tendone in Corti d'aprile 2013, hà riesciutu à fanne vene 5000 in Aiacciu.


Prima, c'era a manifestazione

2000 persone per principià : giovani, studienti, liceani, ma dinù anzianetti è militanti di a prima ora anu manifestatu davant'à a prefettura per dì à u statu chì stu populu vole a cuufficialità.

Anu statu à sente u discorsu di Ghjuvanghjacumu Albertini, chì hà rammintatu u travagliu di i piunieri di a lingua corsa : Anton Dumenicu Monti, Ghjacintu Yvia-Croce, Martinu Frasali, Ghjuvanbattista Stromboni, Pasquale Marchetti, Rinatu Coti, Dumenicantone Geronimi, Ghjuvanteramu Rocchi... chì sariamu stati senza elli, senza a so fede è u so travagliu ? Bisognu ch'è no ùn ci ne scordimu d'elli.

Ci hà dettu chì "u travagliu ùn hè ancu finitu", è hà auguratu chì i cinque "F" scritti in e petre di e vechje case ("Furtuna, fammi fà felice fine") diventinu : "Fiatu, fammi fà felice fiamma".

Da vede i ritratti nant'à CNI è u sugettu di France 3.
Ritrattu : Instagram di guizzu http://instagram.com/guizzu
Ritrattu : Instagram di guizzu http://instagram.com/guizzu


Dopu, a serata

Ma cumu ferà Micheli Leccia à riesce à cunvince tuttu stu mondu di movesi ? 43 gruppi, artisti, sulisti, teatrali, còmichi eranu prugrammati.

C'eranu tutti, o guasi. Nasce ancu l'inchietutine : sì una meteorita casca nant'à Aiacciu, smarisce 95% di a cultura corsa.

Appuntamentu hè datu versu 6 ore Piazza à u Diamante. Si preparanu frittelle è i vitelli arrustiscenu. Certi pruponenu di rimpiazzalli da i CRS.

Pocu à pocu a ghjente ghjunghje. U prugramma hè semplice, ci hè tuttu u mondu. Iè iè, tuttu u mondu. Si principia cù Tutt'in Scena, I Kongoni, Hubert Tempête, I Mantini.

Bon d'accordu, a dumanda chì volta tutti i cinque minuti hè : "bon a lingua corsa và bè, ma induve hè Alyzée ?"

Mumentu forte di sta ghjurnata : quandu Pierre-Laurent Santelli intervene in nome di l'associ di difesa di l'ambiu, cù u testu scrittu da Dumè Gambini ch'è vo pudete leghje quì. Senza lingua è senza terra, chì duvintemu ?


Infine, u Woodstock nustrale

Avà a piazza s'hè empiuta è hè nera di mondu. Cù u pass'è veni, i caffè, quelli chì beienu, quelli chì mastucanu è quelli chì stanu à sente u cuncertu, ci hè statu 5000 persone.

Di l'avisu di tutti hè una riescita. Chì piacè di vede tutti i musicanti. Chjami Aghjalesi, Diana di l'Alba, Canta u Populu Corsu, Surghjenti, Voce ventu, Orizonte, Arcusgi... canteranu canzone oghjinche è canzone d'eri. Una campa !

Gruppi storichi, sulisti è gruppi novi ci facenu passà una seratone.

È Parlemu Corsu ci la face ancu à fà participà i gruppi di sustenidori di u Sporting, di l'ACA è di u Gazélec fiancu à fiancu. S'hè abbasta mughjatu è fattu a lezziò à Bastia 1905 è l'Orsi Ribelli tutta a stagione per signalalla !

Ritratti di Diana Saliceti

D'altri ritratti in l'album Parlemu Corsu di a pagina Corsica Infurmazione
5000 persone in Aiacciu cù Parlemu Corsu

5000 persone in Aiacciu cù Parlemu Corsu

A serata si compie è ognunu si ne rientre in casa soia cù u sìntimu chì una serata cusì, ogni tantu ci face prò. Al dilà di purtà a rivendicazione, ci hè dinù un bisognu di ritruvassi per un mumentu di spartera.

A sucetà corsa hè sfragellata, in mutazione, di pettu à grande interrugazione è incertezze in quant'à u so avvene.

Iè, di ritruvassi cusì ogni tantu face da veru prò.

Alè o Michè, ci vole à turnà à parte !

u 25 di Maghju 2014



1.mandatu da buzz a saetta u 25/05/2014 21:35
Peccatu per quelli chì ùn ci eranu chì ghjurnate cusì belle sò poche. l'altri puderanu dì "c'eru".

2.mandatu da buzz a saetta u 25/05/2014 21:35
Peccatu per quelli chì ùn ci eranu chì ghjurnate cusì belle sò poche. l'altri puderanu dì "c'eru".

3.mandatu da Indria u 25/05/2014 23:57
Eo, ci eru, è cù le me figliolu à chi parlu sempre in corsu ! E mi sò sentitu cunfirmatu in a me scelta ! Tante persone chi sò venute à salutà u me ciucciu in corsu !

4.mandatu da antone u 26/05/2014 00:03
Era una bellissima serata, "trà di noi"... e ghjera benissimu cusi ! a quandu a prussima ? ne ci vole d'altre !
O Gilles avà tocca a te di fà ne una !

5.mandatu da antone u 26/05/2014 00:03
Era una bellissima serata, "trà di noi"... e ghjera benissimu cusi ! a quandu a prussima ? ne ci vole d'altre !
O Gilles avà tocca a te di fà ne una !

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta