Accueil
Envoyer à un ami
Version imprimable
Partager

Corsican cunsumerisimu dream

À noi altri Corsi, ùn ci piacenu micca i « clichés », ma ci piace d'esse allisciati cumu certi a sanu fà. Semu cuntenti di senteci dì ch'è no sariamu un populu « autenticu », ribellu, muntagnolu, attaccatu à a so identità, à a so lingua, è à unepochi di « valori ». A nazione, a tradizione ! Ah iè ? Ci pare sopr'à tuttu chì a Corsica hè u paradisu di a cunsumazione. A prova.



"Cunsumerisimu", di Marcellu Lepidi Acquaviva
"Cunsumerisimu", di Marcellu Lepidi Acquaviva

Obesità di i giovani
A Corsica hè una di e regione induve l'obesità di i zitelli hè a più forte (21% ind'è noi, 18% di media in Francia).

Sigarette
A Corsica hè campione pè a cunsumazione di sigarette ind'è i giovani (38 % ). Serà perch'elle sò menu care ch'è in cuntinente (TVA menu alta). Hè a strategia di l'impuzzicheghju, cum'è l'Americani l'anu fatta per l'Indiani.

Tutti fratelli, tutti cunsumadori
Altru « record » nustrale : quellu di a più forte prupurzione di centru cummerciali per abitanti I Corsi sò i rè incuntestati di u caddie. È ùn ne avemu mai abbastanza, crescenu sempre !

Dissegnu di Dumenica Fumaroli
Dissegnu di Dumenica Fumaroli

Sulidarità ?
23.000 disimpiegati, 60.000 precarii... A sucetà corsa saria differente di a sucetà francese, di più sulidaria... Ma in Corsica, a miseria si piatta. A « precarità energetica » tocca di più in più Corsi, in cità cum'è in paese. Certi passanu u so tempu à mughjà contr'à l'assistanatu, ma mai a sucetà corsa ùn hè stata cusì ineguale. A differenza trà i più ricchi è i più poveri hè più forte ch'è in Francia

À populu fattu bisognu à cumprà
Certe marche di a grande distribuzione è di fast-food rivendicheghjanu d'avè i so più grandi magazini in Corsica. Ùn pudiamu avè « a più grande bibliuteca » o « u più grande sinemà »... Ùn pudiamu avè non più infrastrutture spurtive o di trasporti degni di stu nome. Innò. Noi, semu campioni di i centri cummerciali. A nostra passione, hè a cunsumazione.

Corsican cunsumerisimu dream

Fieri d'esse piaghjinchi
Hè finita a fola di l'anticu populu paisanu è muntagnolu. Oghje 80% di a pupulazione hè piaghjinca, dunque urbana è periurbana. Cumu puderà esse altrimenti, postu chì l'attività ecunomica si face quì? Pianu pianu s'alluntaneghjanu i paesi, è sò di più in più numerosi l'abitanti di Corsica à ùn cunnosce l'internu...

Corsica Uniformizazione
A pupulazione cresce, e cummune di piaghja si sviluppanu. Sò cità nove chì sò surtite di terra st'ultimi quindeci anni. Ma l'urbanizazione, mal pensata, si face n'importa cumu. Da per tuttu, i listessi cummerci, e listesse case, i listessi magazini... In giru à voi, per ste piaghje, hè u listessu paisaghju ch'è n'importa chì periferia d'Auropa.

Vitture
« La bagnole, la télé, le tiercé c'est l'opium du peuple de France » cantava Renaud in u 1975. Hè u giurnale Auto Plus chì a dice : « la Corse est en tête des achats de voitures neuves… 81 nouvelles voitures achetées pour mille habitants, contre seulement 31 pour mille sur le continent ». Hè a grisa per tutti, ma a vittura hè nova. Tuttu và bè.

Ritrattu di Léa Eouzan
Ritrattu di Léa Eouzan

Disneyland paese corsu
Tutte l'agence di viaghju a diceranu : Disneyland hè a destinazione numeru unu di i Corsi. È micca solu pè i zitelli. U sognu americanu sin'à a fine...

A Piazzetta nùmeru 14, auturnu 2012
A Piazzetta nùmeru 14, auturnu 2012

L'île du mullizzu
315.000 tone à l'annu di rumenzule, è un ritardu tremendu per ciò chì tocca à a valurizazione di u mullizzu : a « racolta selettiva » rapresenta solu 7% di e rumenzule di e famiglie. Allora, tuttu hè interratu in i centri diTallone, Prunelli, Vicu... chì sò à tappu. Cumprà, cunsumà è imbruttà... è quale simu ?

Dissegnu di Battì
Dissegnu di Battì

Lingua
3% di trasmissione famigliale. 20% di i liceani. Pocu cuntrastu cun e rivendicazione martellate in permanenza. Tè, in fine di contu, è sì a lingua corsa ùn era più diventata ch'è quessa, una rivendicazione ?

Femu a sbacca
E Corse è i Corsi sò i campioni di a moda. Sempre vestuti bè, mai à l'usu pumataghjescu. À ogni stagione e so marche. Ma di fatti, chì circhemu ? Esse à a moda ? O fà cum'è tutti l'altri ? Sott'à i vestiti, u cunfurmisimu...

Corsican cunsumerisimu dream

l'11 di Marzu 2016



1.mandatu da estrimei u 13/03/2016 08:16
http://www.ulevante.fr/un-projet-insense-de-mouillages-a-fonifavone/

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta