Accueil
Envoyer à un ami
Version imprimable
Partager

Donne, lingua è sucetà corsa

Emu scrittu nant’à Pasquale Paoli, site stai assai azezi. Emu scrittu nant’à a cuntracezzione, vi ne site infuttuti. Allora, emu da circà d'azzizzavvi cù un sugettu passiunante per voi, cari lettori di A Piazzetta : A LINGUA è u so usu.



Donne, lingua è sucetà corsa
EH EH EH à cosa pensate ? Ùn vi scurdate micca ch'è no simu e Spuzzette. Emu da circà di parlavvi incù appena di seriu di lingua, di donne è di sucetà corsa.

SCENA 1 : Una dumenicata in famiglia - In paese à l’ora di u pranzu

U babbu urganizeghja a ghjurnata :

À u figliolu : “O Pasquà, dopu meziornu andemu à vede à L’USCC à ghjucà à ballò ?
À a figliola “O Chjara, et toi avec Maman, qu’est-ce que vous faites cet après-midi, hein ?

…Epic Fail di a trasmissione di a lingua in famiglia.

SCENA 2 : Una serata trà amichi :

Una sera, “eramu una bella squadra”, ma micca tuttu era cumunu è, ghjustu à puntu, a lingua.

Entranu una coppia ind’è Hubert Tempête, è u mio amicu i saluta :

À l’omu : “Bona sera” incù passione è virilità.
À ella : “eh, bonsoir” incù un accentu appena pinzutu.

Eiu, spuzzetta, stumacata, li aghju dumandatu :
Ma chì faci ? Parli corsu à l’omu è micca à a donna ?

Ellu : “Ao ma s’ella ùn parla mancu corsu, quessa. Bon chì bei tù ?

È fù cusì chì a serata continuvò senza parlà mai più corsu !

SCENA 3 : a lingua di l’amore ?

Una notte, dop'à una serata piena di rosébienfrais (per ella), è di paghjellaàugomptoir (per ellu) un giovanu si porta una zitella tutta caruccia in casa. Imaginate bè chì ciò chì piacìa tantu à a zitella era issa virilità tutta corsa : vesta millet, foetus di Johnnie, è crâne rasé.

Cummencia u mumentu caldu caldu di l’amore.

Ella, piena di cunfidenza è à u puntu di … li mughja :
PARLAMI CORSU, ma PARLAMI CORSU

Ellu, perturbatu cumplettamente da sta dumanda, hè statu incapace di compie l’affare.

Allora, a nostra lingua ùn pò esse quella di l’amore ?!


A lingua ghjè l’affare di tutti è tocca à ognunu, omi è donne, d’impegnassi per fà di a nostra lingua, una lingua di famiglia, d’amichi è sopr'à tuttu d’amore ! <3

Articulu publicatu in u numeru 27 di A Piazzetta.

u 9 di Marzu 2017
E spuzzette



1.mandatu da giacomoni u 14/03/2017 15:23
Sò donna è ne sò fiera !!!

Novu cumentu :