E facciacce di l'estate : segonda parte, e fèmine

A tonfia : Hè quella chì corre à pressu à i soldi è u bling-bling. Da cunsiglià à quelli chì anu u Cayenne è chì spèndenu 1000 euro pè serata à L’Acapulco. Campa à colpi di buttiglie di Champagne rosé, di «week-end à Paris» è di sacchi Dior. Per u cerbellu, si ne parlerà un’antru annu. Si cerca di preferenza un mittomanu techju di muscu o un falsu gangster di paccuttiglia.

A carrughjera : Parla cum’è un omu, beie, insulta, fuma è sputa in terra. Li piacenu e vitture, u tunning, i DJ, e storie di braquages è di calibres. Vene à u bar in quad è vi sterpa à tutti à l’apperitivu. In buatta sorte pè circà e storie è vi piglia ancu à cazzotti s’ellu ci vole.

A pumataghja : Un clàssicu di l’estate. Una pizza per sei, u guide du routard annata 1984 compru mezu prezzu nant’à ebay, i capelli cughjosi è i vestiti chì sentenu bonu i refuges di u GR20.

A pinzuta «saisonnière» : Peghju ch’è a grippa. A cantava Aznavour chì «la misère serait moins pénible au soleil». Senza radiche nè famiglia, a stagiunale vene per travaglià l’estate in Corsica... è dopu ùn si ne và più. 6 mesi à Pole Emploi, 6 mesi pigliata à calci in culu da i patroni di pizzerie. Tristu destinu...

A closcia impinzutita : Hè corsa, ma vole «cassà si» di Corsica. Hà un paese, ma s’hè scurdata di u so nome. Sustene l’OM, li piace Ribéry, ascolta u R’n’B è Renan Luce, ùn campa ch’è pè Claude N’Joya. Cunnosce megliu u Marais ch’è a Corsica. Di tutte e manere per ella quì sò tutti imbecilli è incapaci, è peghju «des paysans». «En Corse on étouffe, il faut s’ouvrir.» Allora vai ci !

A pippulaccia : Muriel Robin, Mylène Farmer, Vincent Mac Doom. Un bellu ghjornu, anch’elli anu dettu : «j’aime la Keurse».

A fan di i pseudo-culturali : Ogni gruppu hà e so «groupies». Certe facenu a cullezzione di canterini. Da Canta u Populu Corsu à Mai Pesce, da Notte à I Cantelli, tutti i gruppi anu e so fans. Iè, ancu Antoine Ciosi è Hubert Tempête. Ma attenzione, pensanu chì Bella Ciao è Compañero sò canzone tradiziunale corse...

A fan di ghjucadore di futbol : S’avvicina da a tonfia chì corre à pressu à i soldi. Hè cunnisciuta in u mondu sanu. In inglese si chjamanu «WAG» (wives and girlfriends) e zitelle chì giranu in tornu à i ghjucadori. Sò pronte à seguità ancu i macci di u CAB o di u GFCA nunda ch’è per un futbalore ch’ella lascerà cascà da quì à duie settimane. Segnu particulare : seguita i trasferimenti di i ghjucatori in France-Football.

A neo-naziunalista-ecolo-bobò : Hà scupertu ch’ella era naziunalista dopu à esse cascata innamurata di Gilles Simeoni à Corsica Sera. Citatina, hè naziunalista ma micca troppu (supporta l’équipe de France), ecolò ma micca troppu (viaghja in RAV4), corsa ma micca troppu (di a Corsica ùn cunnosce ch’è a RN 193), rivuluziunaria ma micca troppu (cerca una piazza à u Cunsigliu Generale). È ancu quand’ella s’imbriaca, a face cun muderazione.

A machjaghjola di comptoir : Anch’ella hè naziunalista, ma ella cunnosce per core L’Armata, i commandò di u Fronte di l’anni 80, l’arme di Tralonca in 95 è tutte e storie di culu di u naziunalisimu. Hà un ribellu in oru di 3 chilò è mezu, l’autocollant «souvent conquise jamais soumise» nant’à u 4x4 è u galibre in a boîte à gants. Prublema : crede chì Che Guevara era di Merusaglia è chì per esse corsu basta à cunnosce e parolle di «mort aux vaches».

A zucca : Chjamata dinù «plante verte» in francese. Dice di sì à tuttu, hè sempre cuntenta è ùn hà mai avisu nant’à nunda. Frase preferite : «oui chéri» è «comme tu veux mon amour». Cusì trasparente chì à a fine ùn vi ne rendite mancu più contu ch’ella esiste.

Quella chì si vole ficcà : Dopu à 3 ghjorni di relazione, si stalla ind’è voi. Una settimana dopu, riface a decurazione. Dopu à un mese, i so parenti anu pigliatu a vostra stanza è voi vi ritruvate nant’à u canapè. Ùn vi parla ch’è di matrimoniu, di i nomi di zitelli ch’è vo avite da avè è di sciappà u vostru PEL. Ùn pudete mancu rompe, o sinnò hè ella chì vi lampa fora...