E facciacce di l'estate viste da e zitelle : prima parte, i maschji

U futbalore : U so murale dipende di i risultati di a L1, di a L2 ma dinù di u National è di u CFA. Persuasu d’esse un talentu scunnisciutu, face una curegrafia quand’ellu sente a musica di a Champion’s League à passa u so tempu à criticà l’altri ghjucadori chì anu i «pieds carrés». Ellu di siguru, l’averebbi messu u but...

U rugbyman : Agressivu, ne vole anch’ellu à u mondu sanu (ma sopr’à tuttu à u futbalore) perch’è chì ellu praticheghja un sport chì tuttu u mondu si ne infutte.

U grunge : Adulescente, avia u so t-shirt ACDC, i so capelli longhi è per i più bellucci, un look di surfer. Oghje i capelli sò tagliati, u surf abandunatu ma tene u so tshirt ACDC, è quessa ùn si pò tullerà !

U bobò : Vota à «Gilles», face u teatru, face e mostre di u Centru Culturale Una Volta. U prublema ? Si veste megliu ch’è voi cù i so scarpi Zadig & Voltaire, i so polo Fred Perry è i so pulls Marc Jacobs. Ùn parleremu mancu di u so brushing megliu riesciutu ch’è u vostru.

U spenghjifocu : Iè, ai una uniforma sexy, iè lotti contr’à u focu, iè sì curagiosu è forte... ma nò, ùn piaci à tutte e zitelle ! Infine, dipende s’è tù sì prufessiunale o vuluntare. Perchè chì ùn vulemu micca non più intrattèneti...

U vechjacciu bellu : U «vieux beau» hè una spezia chì disgraziatamente ùn hè micca in traccia di smarisce. Certe volte, accade ch’ellu chjappi qualchì zitella briaca è addisperata in fine di serata. Si ricunnosce dinù à a so unica mescia di capelli chì li ferma nant’à a so chjocca pilata.

U bellu nancu vechju : Bona situazione, hà cunnisciutu u successu, ma sente ch’ellu invechja è s’inchieta. Si pò crucià à L’Idéal, u Rex o u Lamparo. Pè rassigurassi, prova u so pudere di seduzzione, appena cum’è una Cougar. Attenzione, quand’ellu averà 40 anni vi cappierà per una giuvanotta di 20...

U servore plagiste : Hè bellu, brunzatu (ancu arrustitu), sente bonu a rena calda ma disgraziatamente u so cerbellu ùn hè cusì sviluppatu ch’è i so mùsculi. Vene à fà «la saison en Keurse» per fassi e «meufs à donf» è gagner des «tunes», ma ùn vi pagherà mancu un Coca.

U picculu maffiosu : Eccu ne unu chì vi face fantasmà tutte. Nunda ch’è à vedelu site sigura di a so capacità à favvi passà una notte tremenda. Tuttu ind’è ellu hè sinònimu di virilità : a so moto, u so look, i tatuasgi, e so storie (più o menu vere) di braquages... ma in fine di contu, u «bracelet électronique» ùn serà micca tantu à a moda st’estate...

U celibatariu dapoi pocu : Lampatu da a so ex-amica cun quale hè statu assai, ùn ci ponu esse ch’è duie suluzioni : 1. sempre innamuratu, stumacatu da e donne entre in depressione è preferisce stà solu. 2. si n’avvede ch’ellu hà persu troppu tempu cun sta conna (nome novu di a so ex) è vole richjappà u tempu persu. Risultatu, preferisce a quantità à a qualità.

U rumanticu : Siguramente quellu da fughje u più. Tuttu ind’è ellu vi face rende : u so look (sopr’à tuttu a so sciarpa), i so rigali (sopr’à tuttu quella rosula rossa), e so puesie scritte per voi chì site a so musa, i so cumplimenti... Bon, si una sera avete craccatu è site surtita cun stu loser, nigate tuttu sin’à a morte !