Accueil
Envoyer à un ami
Version imprimable
Partager

Festa pè u 31...

è semu sempre à sicutera...
quist'annu dinù, avete da turnà à arruvinavvi in sms pè mandà i vostri auguri !



Festa pè u 31...
Eccu, ci semu... Cum'è tutti l'anni à listessa epica, ùn pudemu mancà l'effervescenza intorn'à u trent'unu. Cum'è tutti l'anni, ognunu si sente dumandà vinti volti à ghjornu "è tù, cosa faci sta sera ?"

U 31 hà i so passiunati. Quelli chì anu decisu capi nanzu ciò ch'elli anu da fà. Sò pronti à spende meza bastunata pè ritruvassi annigati à mez'à i tonti carchi di mousseux nant'à i Champs Elysées à mezanotte, o in un palazzu à Marrakech, chì hè a moda.

Ma a maiò parte di i mutivati di u 31 si ritruveranu in qualchì risturante chì prupone una formula pè a serata, di u gèneru "trè fette di prisuttu compru à La Rocade, un gattivu foie-gras è una buttigliaccia di vinaccia pè 300 eurò. Di siguru, ci vole à avè u custume chì và cun tutta sta messa in scena, i scarpi chì luccicheghjanu è dinù sìgari di l'altru mondu pè fà quellu chì ci capisce in a materia...

Ma a dice oghje un articulu di Libé, e veghje di u 31 ùn sò micca sempre festoni memurèvuli, da leghje quì

Ci sò dinù l'anti-31, quelli chì sò stumagati da tuttu stu cumbugliu, sti soldi spesi pè nunda è tutti st'eccessi di a sucetà di cunsumazione. Per elli esiste a formula "serata davant'à TF1 è e cunnerie d'Artur", è à mezanotte si spenghje tuttu ! È cum'ellu a cantava Hubert Tempête "bouillon cube et vache qui rit, le 31 du jour de l'an, on a dormi jusqu'au deux"...

In quant'à noi, serà a formula "pulenda, figatellu è brocciu in paese", sperendu di francassi a gastro.

È voi, chì fate ?

Lasciate i vostri cummenti !

u 31 di Dicembre 2007
u webmaestru



1.mandatu da pierre jean luccioni u 31/12/2007 18:29
eiu mi sto in casa e tagliu u teleffunu

2.mandatu da Alexandre-Guillaume Tollinchi u 01/01/2008 23:26
Bon annu, pace e salute a voi e a tutti chi vi so cari. Amicizia e sentimenti fraterni.

Novu cumentu :