Accueil
Envoyer à un ami
Version imprimable
Partager

Mafiosa vs Derrick

Cumparativu di e duie serie. Induvinate quale hè chì vince ?



Mafiosa vs Derrick
A storia :
Mafiosa (prununzià "mafioz" o "mafiosà") conta a storia d'una capimachja d'un clanu corsu maffiosu. Bon, perchè micca ? L'idea hè interessante. Derrick quella d'un fliccu alemanu... Hè menu orìginale.
1 puntu per Mafiosa

I persunagi principali:
L'ispettore Stephan Derrick hè solu contr'à tutti i gattivi d'Alemania, sèmplice è senza eccessi. In Mafiosa i trafficoni nustrali anu un accentu pinzutu di quelli ma capiscenu u corsu. Guy Cimino hè un sceffarellu di a Brise de mer è in a segonda stagione ci hè ancu Joey Starr. Aiò, Guy Cimino contr'à Joey Starr...
1 puntu pè Derrick

I figuranti
L'avantagiu di Mafiosa hè chì fidighjate a seria nunda ch'è per vede e facce ch'è vo cunniscite. Truverete bè un amicu à voi chì si face stinzà o un cumpagnu di scola chì era cun voi à u CM2 è chì hà giratu male (trasporta a droga, stu baullu). Invece, cunniscite à nimu in Alemagna.
1 puntu pè Mafiosa

U rìtimu
Dìmula franca, Mafiosa hè una seria loscia. Ci annuiemu è ci hè accudutu d'adrumintacci davant'à un episodiu. À cantu, ancu Derrick hè di più rìtimatu. Suspense, azzioni, muvimentu, ribattulate... Ci piglia di più u tedescu ch'è a seria di Canal.
1 puntu pè Derrick

L'attori :
A capimachja di u clanu Sandra Paoli (Hélène Fillières) hè pocu cunvincente in capimaffiosa. Pare ghjucà u rollu di una "diaspò" chì volta in Corsica ma chì ùn ci capisce nunda. Ci dumandemu ciò chì Jean-Pierre Kalfon face custì. Jean-François Perrone è Eric Fraticelli sò quelli chì ghjocanu u megliu. Ma Guy Cimino contr'à Joey Starr, aiò...
Invece Horst Tappert chì ghjoca Derrick hè sempre quellu : sèmplice, seriu è efficace. U rigore alemanu à l'usu Franz Beckenbauer. A glassa...
1 puntu pè Derrick

U scenariu
Der Kommissar , ispettore pocu viulente è malignun deve truvà i gattivi chì spessu prufittanu di a miseria pè fà e so malfatte (droga, maccarellisimu, tràffichi...). Iè, ci hè una crìtica suciale ind'è Derrick ! In Mafiosa cunniscite u scenariu capunanzu. Basta di leghje "Les Parrains Corses" o Corse-Matin... I scenaristi di Canal Plus ùn anu inventatu nunda.
1 puntu pè Derrick

Bilanciu : Mafiosa 2 - Derrick 4 !
Fà una seria nant'à u milieu corsu, perchè micca. Tandu peghju s'ella accresce i "clichés" nant'à i Corsi, di tutte manere avà semu abituati. Ma a seria hè una dillusione. I scenaristi di Canal seranu sott'à lexomil per fà una seria cusì soporìfica ? L'attori parenu pocu cunvinti da u so rollu. Finalmente pare esse una seguita di "Plus Belle la Vie". Hè dì chì a seria hè presentata cum'è u fiorfiore di a pruduzzione francese...

Aspettendu a seguita, sàppiate chì Derrick esiste dinù in DVD.

u 19 di Sittembre 2010
U Sgaiuffu



1.mandatu da estrimei u 20/09/2010 09:08
o Sgaiu' ,
un hai micca fattu i conti :
rigallu ("subvention") di l'assemblea di Corsica a maffiosa 200 000€ --derrick = nunda
nantu a Via Stella , un certu Bonavita arrabbiatu ,chi piglia a difesa di Maffiosa, e cundanna quelli chi ci so opposti --- Derrick =nunda.

2.mandatu da muammar u 21/09/2010 11:07
Pa contu meiu, in mafiosa, nisun attore un hé credibule, francesi cume corsi, mentre chi in "un prophète" , u filmu (chi vale pocu) duve Niels Areststrup (!) ghjoca u rolu di Carlu Pieri! Ci hé dà rimarcà chi l'attori francesi (Arestrup e ancu l'arabu) parlanu megliu u corsu e so assai piu credibule che l'attori isulani...

3.mandatu da Sbandita.. u 21/09/2010 11:47
Mafiosa !!! eo ùn u fideghju mancu...è po l'attori "isulani" o "muammar" ùn hè mancu sicura ch'elli sianu corsi in veru....mà perchè Carlu Pieri...?? puderebbe esse dinu u "u bellu Alain" o ancu "Mariani" NO ??

4.mandatu da attentiàlochji u 21/09/2010 11:54
ùn emu ancu vistu nunda, pare ch'elli approntinu un filmone nant'à L'AFFARE BONNET, custi si ch'emu da ride; digià chi nant'à VIA STELLA facenu filmucci o "CACATE" spieghendu ci cio ch'elle hè a "PAJELLA"...cum'ellu dice u pinzutu " N'EN JETEZ PLUS LA COUR EST PLEINE !!!"

5.mandatu da topupinutuazezzu u 21/09/2010 13:39
si ne parlava anchu a "dite a vostra" eri !

u peghju ghjè chi a maio parte di i Corsi a si godenu sta "seria"...

6.mandatu da muammar u 21/09/2010 16:05
@sbandita : pinsava a Pieri pa l'andatura di u tipu é i capelli grisgi... Ma hé vera ch'un so micca i magoni chi mancanu inde noi...
Pà cio ché di l'attori isulani, ti possu assicurà chi assai (ch'ellu sia in mafiosa o u prophète) so corsi "da veru" ...

7.mandatu da per ride u 21/09/2010 21:03
MAFIOSA hè una vera merda!

Nimu ùn ci crede, ste storie ùn parenu mancu à pena vere, tuttu puzza u falzu...

Prova si ne chì u capimachja hè ...UNA DONNA, cosa propiu impussibule in casa nostra.

Mi pare quì u spripositu u più tremendu, a cosa a più inghjuliosa per noi tutti.

In CORSICA SÒ L'OMI CHÌ CUMANDANU, puntu è basta!!!!!

8.mandatu da anto u 22/09/2010 06:05
Fate cumè mè ,un feghju mai a télévisione e u so mancu di cio che vo parlate !!!Ci volè avè assai tempu a perde pè fighja simule cunnerie !!

9.mandatu da Niculaio di u cateraghju u 16/10/2010 22:24
A sferenzza ghje che l attore orst tappert(derrik) è dija mortu.. L astri so sempre vivi!... Puntu chi conta doppiu pè maffiosa!...

10.mandatu da luc u 17/05/2012 16:02
"La Corsica e Nizza non debbono appartenere alla Francia; e verrà un giorno in cui l'Italia, conscia del suo valore, reclamerà a ponente e a levante le sue province, che vergognosamente languono sotto la dominazione straniera." Giuseppe Garibaldi, 19 maggio 1882, da Caprera mirando le coste della Corsica

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta