Accueil
Envoyer à un ami
Version imprimable
Partager

Oghje, ci vole à esse bravi

U 13 nuvembre hè a "Journée mondiale de la gentillesse". Allora siate bravi, almenu una volta à l'annu.



Oghje, ci vole à esse bravi
N'aviamu digià parlatu annu, guasi ogni ghjornu sò organizate "ghjurnate mundiale " d'appena di tuttu, ma sopr'à tutti di n'importa chè (journée internationale du pied, journée nationale de la courtoisie au volant, journée mondiale des secrétaires ecc...).

Casca bè, oghje 13 nuvembre hè a ghjurnata mundiale di a bravezza.

Allora per una volta, circhemu à ùn esse gattivi nant'à A Piazzetta.

Nò, mancu voi chì lasciate cummenti è chì site spessu ancu peghju ch'è i redattori di stu blog. Fate un sforzu, hè una volta à l'annu, solu.

Oghje dunque, seremu bravi.

Oghje dunque, ùn truverete nisun articulu azezu nant'à i danni di a Corsica.

Nunda nant'à i pumataghji chì sò una pulluzione visuale è fìsica pè a Corsica, nant'à a bettunizazione di u liturale, nant'à a bettunizazione di i paesi di l'interiore, nant'à e custruzzioni orrìbile è i lotissements chì scempianu u paisaghju, nant'à a splusione catastròfica di a demugrafia corsa, nant'à a morte à vene di u populu corsu, i disguasti di a droga, u disastru ecunòmicu, u disertu pulìticu, u viotu intersiderale culturale, a disertificazione di l'internu, l'AMG 800, a centrale à u fiul puzzicosu di Lucciana, i ghjùdici antiterruristi alcòlichi, a maffioisazione di a Corsica, l'impustori "gulturels", i maffiuselli mittomani in 4x4, a dipendenza à a cuccaina, à l'essenza, à a sigaretta, à Plus Belle la Vie di a giuventù corsa, e cunnerie di Facebook, Tillate è Twitter, u viotu giurnalìsticu, e pazzie di i naziunalisti ch'elli sianu mous, duri, mozzi o scrucconi, a pulizza gobba, u feuilleton di Bernard Bonnet, e manghjerie è e scruccunate in tutti i gèneri, a custruzzione di u stadiu di Furiani, l'incundizunali di u BTP, a maffia russia, a maffia corsa, a droga corsa, u prisuttu chinese, u figatellu hallal, l'eletti impanzati, i disgraziati in Lupinu, à i Salini è in i paesi dinù, a lingua corsa amazzata, "Mafiosà", l'OM, a manghjeria di a SNCM, e millaie di preservativi di u Cunsigliu Generale, l'accultarazione accelerata, i Corsi cumplessati da a so cultura è a so identità è i flicchi pretensiunuti, Sarkozy, i falsi machjaghjoli in Meindl, e vere closce in Cayenne, l'impustori pulitichi, Frédéric Thiriez, a mittumania generalizata, i depressivi, i pistunati, i pseudo-cursisti di diritta è di manca, i falsi elettori, i falsi tulleranti, i fans di u Tibet, i fans di Birkenstock, i manghjoni, i fanàtichi di l'autoflagellazione, i prefetti, i neo-bobò-ecolò-naziunalisti, e croce azeze di A Piazzetta è quelli chì vanu à vede u cuncertu di Lady Gaga.

Nò, oghje ùn diceremu nunda di tuttu quessa. Ma a ghjurnata internaziunale di a bravezza ùn dura ch'è un ghjornu. Bona notte.

u 13 di Nuvembre 2010
u webmaestru



1.mandatu da Beni oui-oui.. u 13/11/2010 11:24
A trovu "Troppu brava" a piazzetta in stu mumentu... à mè mi piace quella più ghjattiva.

2.mandatu da appinzapalu u 13/11/2010 11:48
ed eiu trovu chi certe infurmazioni un si leghjenu che qui, nanta apiazzetta

si seriu o oui-oui ? perche esse troppu gattivu per nunda trovu ch'ellu ghjova a nunda.ghjè bè, cuntinuvate cusi

forza apiazzetta!!!.....

3.mandatu da corsu u 13/11/2010 12:44
bravo !!!!! a a piazzetta

4.mandatu da Feligiascu u 13/11/2010 13:47
Sgaiuffu presidente, Sgaiuffu presidente !!!

5.mandatu da per ride u 13/11/2010 14:21
Iè, sò d'accunsentu, ci vole à rifiatà appena, è po ne aghju una techja d'esse sempre gattivu. Calchì volta mi pare d'esse un funziunariu di a gattivezza.
Oghje vogliu esse bravu, una volta à l'annu ci vole à piglià risichi, "ciò chì ùn tomba ingrassa" pruverbiu nietchtzeanu (quessu dinò pocu gattivu...).

Hè tantu difficiule à dì ma tengu cari à tutti quanti (sò falzu a sò, ma oghje hè a ghjurnata di a bravezza è basta).

È po mi n'arricordu quand'eru à u liceu tra di noi ci dumandavamu "o, è a quessa, cumu a trovi, hè bella?", è tandu ci n'era unu chì rispundia "ah hè brava!".

Par finisce mi dumandu s'è esse bravu in Corsica, ùn hè micca una gattiva cosa!


6.mandatu da Beni oui-oui.. u 13/11/2010 14:50
Eo so pè un ghjornu mundiale di gattivera...mà unu solu..!

7.mandatu da Beni oui-oui.. u 13/11/2010 15:01
F. Nietzsche ùn avia (è hà sempre) che un tortu maiò...esse tedescu..!!

A filusufia porta à a Saviezza O per ride...ci ghjunghjerai pocu à pocu..

Ghjustu pè risponde à a t'ultim'affirmazione, In Corsica simu indè una sucietà arcaica, esse bravu hè debulezza, più si gattivu è più si temutu...mà forse micca tenutu...!!


8.mandatu da estrimei u 13/11/2010 15:34

ma qual'he qualchissia di bravu?
he quellu chi s'ingolle tuttu?
chi piglia per verità :
- e parulle di Colombani e di quelli chi hanu e "vaches a primes " e chi mughjanu , , in frencese , ch'elli so elli chi facenu campà " l 'interieur "?
- e parulle di tutta sta ghjente di a pulizza e di a ghjustizia chi mughjanu onesta ! e chi svianu u rispettu umanu per ghjunghjene a e so fine?
- quand'elli ci dicenu che no simu tutti listessi e chi tutti i ghjorni - a a cullettività , a i cunsigli generali , nu e merie e ancu nu u privatu - l'impieghi e e prumuzioni so fatti a quelli chi so 'nu a manica?
quandu , a Francia mughja ch'ella he a "patrie des droits de l'Homme " e chi u parlamentu e u presidente di a republica vannu a l'incontru di a vuluntà pupulare di scantassi di l'Auropa?
quandu u pertitu sucialistu frencese face a critica di l'ump e chi tutti i ghjorni face un novu passu a diritta.
quandu i pertiti naziunalisti corsi mughjanu ch'elli volenu difende u Populu corsu e in listessu tempumettenu da cantu a naziunalità.
quandu RCFM ci cunsiglia di parlà corsu e chi in listessu tempu permette a i so ghjurnalisti di struppiallu e quand'ella face un cuntrastu un accetta che u frencese ?
quandu a LDH corsa riceve a Leila Shaid e , a tempu , scumbatte per chi u Populu Corsu si strughji ?
s'ell'he quessa d'esse bravu , eu so gattivu ! ma chi quelli chi sò sinceri , onesti , rispettuosi sianu puru sicuri chi a mio gattivezza nu i tuccherà mai.

9.mandatu da Beni oui-oui.. u 13/11/2010 16:14
Analisa critica è sincera o Estri...d'accunsentu incu tè, simu in Corsica in piena schizufrenia..!!

10.mandatu da per ride u 13/11/2010 19:20
O ESTRIMÈ, scusa ma tutte e to gattivezze l'avii pussute scrive dumane!
Oghje ci vole à esse bravu...sinu à mezanotte (più cà 5ore à tene!)

NIETZSCHE a palisatu di vulè vene à campà in Corsica, ùn hà pussutu, piccatu, saria statu u prima people.
Hà compiu a so vita "scemu". Ma eiu, paragoni ùn ne facciu, ...sinu à mezanotte.

11.mandatu da anto u 14/11/2010 07:00
U mondu in duvè no simu hè di piu in piu cattivu sopratuttu pè noi altri corsi ,dunque s'omu vole campa ci vole a esse cume tuttu u mondu e pè tagliala a l'accorta hè megliu a mustra i so pugni chè u so culu !

12.mandatu da Predator.. u 14/11/2010 09:25
Iè anto, hè vera.. mà qui cume in altrò.. fassi la valè ghjè un ubligu pè sopravive..!!

13.mandatu da Assaigattivu u 14/11/2010 10:10
Chi goia, stà mane possu odià u mondu sanu !
Eri, stavu messu à a turtura. Un era umanu. Un averaghju tinutu una ghjurnata di più.

14.mandatu da estrimei u 14/11/2010 11:54
eu, un aghju micca vulsutu fà cume l'astri, e a ghju vulsutu fa a rubbaccia nenzu a eri.
oghje l'affari so cambiatti , e c i 'ole ch'o mi palesi: so bravu , so qualchissia di bè e a dilla fanca:
- e parulle di Colombani so ghjuste: " les vaches a prime revitalisent l'interieur " . gratune a elli e " stations e essenza " ponu campà ; a Safer po funziunà, e e terra duverà aspettà 10 anni per esse vinduta a l ' "agents immobiliers" (sapete st'impieggu famosu chi passiuneghja oghje a nostra ghjuventu )
- ancu di grazia ch'elli ci so a pulizza e a "ghjustizia " chi hanu che un poenseru : fà chi tutt'ognunu campi bè nu u rispetti di l'astru .
- evviva a cullettività , i cunsigli generali , n e merie e ancu u privatu : l'impieghi e e prumuzioni di a nostra ghjuventu so assicurati.
- a Francia he a "patrie des droits de l'Homme " e quelli chi dubbiteghjanu 'n'anu che andà a vee in astrò.
- a grande maghjurità di i frencesi chi votanu si spertenu tra pertitu sucialistu e 'ump e s'opponenu tra di elli , d'altronde unu he a "gauche" e l'astru a diritta
- so i pertiti naziunalisti corsi chi difendenu u Populu corsu e certe scelte , ancu s'elle so difficile, so quelle chi ci volenu.
- RCFM he a ra diu induv'ellu si parla corsu . ognunu face cum'ellu pò.; e so vulemu salvà a lingua piantemu di fà e critiche chi un ghjovanu a nunda e participemu a a pratica a sta lingua corsa muderna chi rimpiezza quellu vechju parlatu chi un he micca di i nostri tempi
- s'ella un c'era stata a LDH corsa per fà vena a Leila Shaid in Corsica, qual'he chi l'averia fatta ? e a i ghjorni d'oghje u nostru Paese deve "evolua " (a quess a parulle un vi c'aspettavate, che?)e apresi a d'astra ghjente e a d'astre "culture" .
un s'he pussutu impone l'esperanto, pruvemu a fà una razza - no razza no he una parulla inghjuliosa -, una "cummunità "duve ognunu puera amparà a lingua e a cultura di l'astru e per chi tutt'ognunu si capische si parlerà americanu - no , americanu no , - si parlerà chinese postu ch'elli so elli , oghje i piu ricchi di a pianetta.
e per compie , vi vuleria salutà e basgiavvi a tutti : che vo siate bravi o gattivi , ricchi o poveri , scrucconi e appasci o ghjent'onesta . simu tutti ghjente..... e po u sapete, u dettu : tuttu l'amore vende da l'utule.

15.mandatu da Predator.. u 14/11/2010 11:59
O Estrimè, ai appaspatu a Cucaina..,??

16.mandatu da per ride u 14/11/2010 14:44
O Estrimè, ti guasti u sangue! Fà pianu, à rombu di frasturnati t'ai da piglià calchì male (ti facciu e corne).
Aghjà ch'è no semu pochi pochi à discorre in corsu, s'è tù ti ne vai tù (à cent'anni!) saremu ancu più pochi. Tandu appaciati è leghji A PIAZZETTA senza pigliala in seriu.
Campemu un sunniacciu è basta.
È prestu ci spataremu ...pà u sempre.

17.mandatu da estrimei u 14/11/2010 16:33
a ringraziatti o per ride.
ma ti sbagli, so pienu di sperenza.
'ncu tutti sti solli dati pe a "culture corse" da a ctc ( di piu che 400 OOO€ per 2009 ), tutta sta ghjente chi lotta per difende u nostru Populu .....
simu beati!
per tene contu di i to cunsigli, feraghju cumu unu , mezu intrunatu , di i nostri paesi , a u quale annunziavanu a fine di u mondu , e chi rispose "campi mi e a figliola di Curneriu"

18.mandatu da Mayà u 14/11/2010 16:44
A tutti, ùn vi nè fatte, in 2012, tutti i nostri guai seranu compie una volta pè tutte...è po sperenza o Estrimè, u Guvernu Fillon II ci salverà..sina tandu..

19.mandatu da Harry cumandu u 14/11/2010 18:38
Incu i francesi ci cole sempre à esse Bravu è ancu bravissimi, l'algerinu so stati bravi

120 anni, è po dopu so diventati gattivi, appena cume i corsi, mà noi ùn avemu sapiutu

(o vussutu) esse gattivi.

Ognunu nè pisenrà cio chi vole...

20.mandatu da Harry cumandu u 14/11/2010 18:39
* Ci vole..

21.mandatu da per ride u 14/11/2010 20:25
s'omu vole campa ci vole a esse cume tuttu u mondu ...a dice antò

A Piazzetta ùn hè cum'è tutti...finu à quandu, iè, finu à quandu... ma ogni porta chì si chjudi da u bughju centu ni caccia torna...

È a me penna s'infiara...

22.mandatu da Madamicella u 14/11/2010 22:27
Solu l'omi so, è ponu esse gattivi.noi altre, ghjustu qualchi volte....

Novu cumentu :