Accueil
Envoyer à un ami
Version imprimable
Partager

Sta volta po nò, u sumerismu di certi ùn turnerà micca cunsumerisimu

Un altru magazinone di millaie di metri quadrati hà da apre in a periferia d'Aiacciu. Ma sta volta, da i quattru orizonti di l'isula, da e cime altiere à e sponde di u Mare Terraniu, si pesa un ventu di rivolta.



Sta volta po nò, u sumerismu di certi ùn turnerà micca cunsumerisimu
- Cumu, dicenu e donne, ci volenu mette in cascia, pruponeci un impiegu à vint'ore à simana, mancu un stantapane, incù un spartitempu flessìbile, è una paga mischina, curate da una càmera da a mane à a sera, à ripete i listessi gesti, senza pudè girà u capu, à abbuchjassi centinaie di clienti corti di pazienza chì trepidanu è sceffi chì abbaghjanu, serà què u prugressu ?

- Cumu, dichjaranu l'operai sindicati (quelli chì ùn sò ancu sdinticati), hà da stallassi torna una impresa gigante, diretta da azziunarii anònimi è cìnichi chì si n'infuttenu di a nostra vita isulana ?

- Cumu, serà pussìbule, pè sti lochi, s'inzerganu i paisani, di lascià fà custruzzioni chì anu da copre parechji èttare di terra è patroni ingordi di soldi chì anu da mette i pruduttori lucali in ghjinochje ?

- Cumu, aghjunghjenu i savii à l'anticu è e mammone astute, vende frutti è legumi impurtaticci, fora di stagione, piatti scucinati senza gustu, attrazzi ghjittevuli ? Spulà a nutritura ? Pocu travagliu quessu !

- Cumu, si stonanu i machjaghjoli è e pin-up biò à chjome sciolte, avidi d'aria fresca, averemu à chjodeci in un casamentu goffu tutti i sabbati è à trascinà un caddie tracarcu d'emballasgii più chè di marcanzia ?

- Cumu, ripiglianu l'amurosi di i carrughji aiaccini, volenu tumbà a vita in core di a cità è incuragisce torna "l'étalement urbain" ?

- Ah iè, simu bè !! dicenu i giovanni idealisti, torna un magazinone ? Quella vechja ecunumia superata, centralizata, alienante, ieràrchica, sucicante, ? Serà a Corsica ubligata di passà per custì ?

Sta volta, po nò, u sumerismu di certi ùn tornerà micca cunsumerisimu.


u 24 di Marzu 2015
Zenbucucciu



1.mandatu da UNGHERIA 1956 u 24/03/2015 19:59
PERCHE E UNA SCUPERTA CHE STU TIPU DI NON CIVILTA SPACCA TUTTU INFRACECCA TUTTI FACE DI A GHJENTE UNA MANSA DI BOVI ABAMBANATI E STRALUNATI:STA VOLTE QUALE E U MAFIOSU DARETU A STA NOVA PURCHERIA QUELLU CHI VOLE CUMPRA A SNCM?FERMA QUALCOSA A SBUNDA?FERMA UNA CITA A COMPIE?FERMA QUALCUNU
CHI CAMPA DI U SO TRAVAGLIU A STIRPA PER INGRASSA UNA MANSA DI BASTARDI CHI CIRCULEGHJANU IN VITTURONE COMPRATE NANTA U SPINU DI QUELLI CH'UN VOLENU MANGHJA A L'ALTRI.

2.mandatu da ècusisia u 25/03/2015 09:24
simu parechji à pensà cum'è Ungheria 1956, ma chì ci ferma à fà ? ùn sò ? eo sò stancu di sente sempre i listessi affari, s'è no leghjimu certi articuli (ultimu di Le Monde cù e cumbricule di u CG è i nostri soldi..) ci hè da rende...Ma ralegremu ci leghjendu i risultati di l'ultime elezzione tantu capimu quale simu....

3.mandatu da ronaldu u 25/03/2015 09:28
FORA DECATHLON, KFC, MC DO, FLUNCH (i cughjoni) è tutte ste grosse strutture, quellu chi vole fà l'ecunumie ch'ellu pichji nant'à google.

4.mandatu da Ghjuvanluca u 25/03/2015 10:08
Si principia cu ù Colonialismu ecunomicu.....dopu si palesa quellu politicu....a fermà in fine tutti schiavi .........solu pè unu cucchiarone di suppa (surghjielata).
In Cagliari issa pulitica ecunomica avida e cìnica à tumbatu ù centru cummerciale cittadinu. Carrughji cume a "via Garibaldi","via Manno","via Dante"."via Alghero" chi tempi fà eranu preferite da i cagliaritani,ritrovu di a noscia vita suciali ,avà sò viote, l'imprese chjiudenu una dopu l'altra.
ùn simu più patroni di nudda....chjosi in un' immensa RISERVA INDIANA.
Tottu pò cambià ,si cambia ù nostru ciarbellu e a seguità, puru i bisogni .

5.mandatu da luntanu u 25/03/2015 12:13
ci mettimu ind'a merda da per noi: a corsica hè à l'orlu di ciuppicà è à l'ultime elezzione emu vutatu torna per quelli chì ci hanu messu ne sta merda Ùn c'hè nunda da cacciacci

6.mandatu da capicursina u 25/03/2015 12:18
ma ghjè un sonniu, affari cusì ùn si ne sente inlocu

7.mandatu da u neru u 25/03/2015 12:42
iè capicursina. pensu ch'ellu hè irunia...

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta