Timpesta in un benedittinu

Ottobre 2010, a merria di Parigi interdisce à i menu di 18 anni, l’espusizione di u futografu Larry Clark à u Museu d’Arte Mudernu di a cità. U so travagliu nantu à l’addisperu d’una ghjuventù americana disgraziata è misera campendu in margina di u sistemu chì sprufonda in a droga, a viulenza o u sessu hè qualificatu d’opera di pornografia è censuratu. U ghjurnale Libération ne ferà una cuprendula degna di e più belle annate di a cuntestazione, di u ricusu di u cunfurmisimu è di a custruzzione fatta è lesta di u pensà è di u parè criticu. Hè statu avanzatu u fattu chì i giovani chì vederebbinu sti ritratti puderebbinu esse cumossi. Quand’ellu si cunsidereghja chì You Porn riceve millaie è millaie di visitori, hè statu un peccatu chì sta giuventù sippi stata privata di a retruspettiva di Clark, allora chì era à sta generazione ghjustu à puntu ch’ella era stata addirizzata.

Nuvembre 2011: U lucale di u ghjurnale satiricu Charlie Hebdo hè disguastatu da u focu dopu ch’elli sippinu stati lanciati uni pochi di cocktails molotov contru à a facciata di u casamentu. Charlie Hebdo e face falà scutrate contru à tutti i tippi d’integrisimi, ch’elli fussinu religiosi o pulitichi.

Nuvembre 2011 : Unhate, a nova campagna publicitaria di Oliviero Toscani mette a puzza. Si ponu vede parechje persunalità pulitiche è religiose di primu pianu basgendu si nantu à a bocca. Unu di st’affissi riprisenta u Papa Benedettu XVI è Ahmed el Tayyeb, l’imam di l'Università Al-Azhar di u Cairu, chì si leccanu a lingua. Reazzione indignata di u Vaticanu chì denuncia « un’utilizazione inaccettevule di a maghjina di u Saint-Père, manipulata è instrumentalizata. » Miraculu, Benetton face ritirà stu ritrattu. Toscani cede à a pressione di a Chjesa.

Nuvembre 2011 : Trè à quattru centu integristi cattolichi manifesteghjanu in Toulouse contru à una riprisentazione di u Teatru Garonne. Volenu fà interdisce a pezza Golgota Picnic chì secondu elli hè ghjastematoria è parlanu di cristianufubia. Anu sfilatu preghendu in i carrughji di a cità rosa tutti i paternustraghji è prumettenu azzione in Parigi quand’ella serà ghjucata sta pezza à u Teatru di u Rond-Point. Una crucifissione trash, un Cristu terruristu puttana di u Diavule, un pianistu spugliatu ghjuchendu nantu à a scena, anu pruvucatu a cunsternazione ind’è i fundamentalisti cattolichi.

Nuvembre 2011 : L’ultima tentazione d’un studiente d’arte plasticu di l’Università di Corti face nasce u scandalu cù un affissu chì ùn hè mancu appena di u gustu di i sindicati studientini. U ritrattu face vede un cazzu ingiratu d’un paternostru. Micca un cazzu arrittu, sticchitu, in erezzione. Nò, ghjustu un cazzu spendichendu molle molle. Nunda à chì vede cù u Cristu nantu à a croce.

In u locu simbolicu di a cuntestazione, di l’estru libertariu, di a liberazione sessuale, di u sustegnu à e revuluzione internaziunaliste, di a cunniscenza, di a spartera di u sapè, di a tullerenza, di a cuncertazione, di a lotta per una lingua disprezzata, uni pochi di studienti radicali anu mancatu di pocu d’impiccà stu poveru artistu chì ci hà capitu tuttu per fà parlà d’ellu senza spende troppu. Gainsbourg, assu di a pruvucazione cum’è Coluche o Desproges, avia dettu qualchì ghjornu dopu à avè brusgiatu quellu bigliettu di banca ch’ellu ùn li era custatu chè cinque centu franchi per pagà si pagine è pagine di publicità in tutti i cuttidiani naziunali francesi. Si sò incaricati i radicali di u campus, i reazziunari bobo di fà annulà l’espusizione di l’artistu maladettu. Marturiati, scandalizati, sturduliti, indignati di cunstatà ch’ellu avia avutu u stomacu d’assucià (asciuvà ?) u culu cù a religione. Sò ancu ghjunti i flicchi è e bighinacce basgiasanti à l’università… Timpesta in un benedittinu !!!

Un leader culturale hà dettu nantu à Via Stella ch’ellu era un colpu à i valori murali di i Corsi.

À u Yemen, una donna hè lapidata per menu chè què.

In Arabia Saudita, un omu hè scapatu per menu chè què.

Pocu affare !

Sò forse più riprisentativi di l’usi corsi è di e tradizione, i studienti chì caccianu e pistole à u cuntuaru d’un stabilimentu di notte è chì tiranu, chì si facenu entre cucaina in u nasu in i cabinetti di i caffè, chì beienu cum’è tufoni di rena o chì vanu à futte e puttane di i caboulots di Bastia, Barcelona, Praga o Amsterdam.

À quessi i studienti : Prima d’andà à dorme, una preghera, duie seghe è a messa hè detta.
È ùn vale à fà ne un cuncistoriu.