U Clip u più goffu di u mondu

Si chjama què un «lipdub» : un clip prumuziunale induve a ghjente cantanu in playback. In generale hè una piccula videò fatta da giovani pè ride, per fassi cunnosce nant'à u web.

Quandu sò studienti chì facenu un lipdub nant'à una canzona di i Black Eyed Peas, pò andà.

Ma l'affare diventa pèssimu quandu in giovani di l'UMP decidenu di fà u so lipdub cù i vechji di l'UMP.

Difficiule di fà peghju. À principiu ùn ci cridite micca. Vi dite ch'elli sò sosies, ch'ellu hè un muntame, ch'elle sò e mariunette di i Guignols...

Ma nò ! U casting face a paura : Christine Lagarde, Frédéric Lefebvre, Jean-Pierre Raffarin, Xavier Darcos... in traccia di ballà (cum'è conni) è di fà nice di cantà (cù un'aria ancu più conna).

In u so propiu campu, falanu cutrate : pè Luc Ferry, stu clip hè "dégoulinant de bêtise".

Sta brutta cosa si passa di cummenti. Ma chì face u CSA ? Cumu ministri di u guvernu anu pussutu fà què ? Averanu pigliatu a droga ? Ci vole à chjodeli ? Quale balla ancu più male ch'è Xavier Darcos ? Christine Lagarde merita l'esiliu à vita o solu a prigiò ???

Certi sò stati mandati in Sainte Hélène per menu chè quessa.

Allora, à quandu u primu lipdub corsu ? Preparatevi psicologicamente à vede Paul Giacobbi è Camille de Rocca Serra chì cantanu nant'à I will survive...