Accueil
Envoyer à un ami
Version imprimable
Partager

U tràfficu di pomidori più lucrativu ch'è quellu di a droga 

« Daretu à a pumata si piatta una strema viulenza » scrive Jean-Baptiste Malet in u so libru « L’empire de l’or rouge », una inchiesta mundiale nant’à u cummerciu di u fruttu u più pupulare di u mondu.



Fiura : Wikimedia Commons
Fiura : Wikimedia Commons
Ogni abitante di u pianeta cunsuma cinque chilò di pomidoru à l’annu, in cunserva per u più. Ghjè un mercatu gigante chì tutte e maffie fidighjavanu cun ochji sburlati è chì oramai, hè cuntrullatu o guasi da a Camorra, ‘Ndranghetta, a Cosa nostra, a Sacra Curona Unita, a maffia chinese è tutte isse belle imprese di beneficenza.

Sguassate puru a maghjina di a vostra mammone chì d'istatina facia e cunserve di pomidoru cù i frutti suchjosi di l’Ortu Supranu, chì vi paria ch’ella mettessi u sole in un caraffone. E cose sò cambiate assai.

Eccu ciò chì ci conta Ghjuvan-Battì in u so libru : un agromaffia mundialisata face travaglià i zitelli o i migranti pè una paga mischina, pruduce pumate in u Xinjiang o in altrò, manda e botte in Italia, scrive made in Italy nant’à l’etichetta, sciacca una vespa o una bandera culor di pizza Margherita  nant’à l’imballasgiu è... u Mezzogiorno hè in la scatula.

In corte parolle, ùn sì pò micca sapè cìo ch’omu manghja è ci vuleria à fidighà e salse industriale in caterochju.

Ùn vale à svenesi, à « cascà nu i pomi » (puru d’oru) chì e mammone sò più forte chè a Maffia è c'insegnanu a strada di l’avvene : scucinà à di per sè incù pomi d’oru colti pè sti pughjali.


u 29 di Maghju 2017
Zenbucucciu


Novu cumentu :