Vogliu esse DJ anch'eiu !

Cumu si diventa DJ ?
Cum'ellu si diventa fliccu soca… Hè u listessu sbucinamentu : ci vole à fà qualcosa ind'a vita, hè sèmplice, è tuttu u mondu, o piuttostu n’importa quale u pò diventà. Allora perchè micca ?

Ci vole bè à stentà u so pane nò ? In tutti i casi sò cariere chì piàcenu à a ghjente. Prova si n'hè, Corse-Matin si ne techja è ne mette quant'ellu ne vene innù e so culonne. Di chè? Ebbè di DJ (quì è quì dinù) è di gendarmi, i dui puntelli più impurtanti di a sucetà Corsa oghjinca...

Vulete fà u DJ ancu voi allora? Perchè micca, pare fàciule, basta à passà mùsiche inventate da l'astri à ghjente in burdata chì ci capìscenu pocu. Sèmplice nò? È in più si vìncenu i soldi !!!

Per diventà DJ, hè prima un affare di look, ci vole à marcà bè, ci vole à curà u so fìsicu : pettinature andrògine, fransgiacce è brushings, sguardi di boi famiti, tattuasgi maori , t-shirt fluò, rise è scaccanate di u baullone di serviziu, eccu à pocu pressu a panuplìa di u DJettu capace.

Ma attenti ! Più và è più ci n'hè, anu tutti u so stile, a so identità, a so firma è cum'è ùnica discussione, un slogan, mughjatu à strappacanelle, allora vi ci vulerà à truvà a vostra identità propia. Qualchì esempiu :

DJ 2 di tensione, u lonzu, impalaficcatu daretu à e so mascine.
DJ fràcicu, chì vi passa dece volti l'ùltima canzona à a moda
DJ Coke, l’ochji stralunati, scatinatu è chì salta cum’un caprettu mentre tuttu u mondu dorme à comptoir
DJ Nervusellu o u cuginu Dj « Té-ci », from the Ghetto. Gattivi è chì anu un look à arruba e mubilette à i bravi burghesi.
DJ Ma chì facciu quì ? Ci n’hè sempre unu chì pare èssesi sbagliatu di porta...
È infine u mo preferitu, DJ Questions pour un champion, u palu à fasgiolu di dui metri, baullone chì si sbillicheghja solu solu daretu à e so plattine mentre tuttu u mondu face u musu ind’a buatta.

Rimercate, ùn ci hè tanta diferenza incù a crema di a nostra sucetà. Cumu dicìamu ? "Ci vole à marcà bè è cum'è ùnica discussione ci vole à mughjà slogan à strappacanelle ?"
Da DJ à puliticante (un antru mistieru Santu in Còrsica) u passu hè bellu chjucu allora... Innò ?

Spaventosu chè ?