Accueil
Envoyer à un ami
Version imprimable
Partager

Voli ghjucà à Clearstream cun mè ?

Si tratta di note falsificate è purtantu u sugettu ùn hè micca l’ùltima canzona di Hubert Tempête. L’affare Clearstream hè di più cumplicatu è nimu ci hà capitu nunda. Dumandate un pocu à qualchissìa di spiegavvi tuttu o circate puru voi à riassume a situazione… Micca fàciule chè ?



Voli ghjucà à Clearstream cun mè ?
Duie cose da ritene malgratu tuttu :

Una, hè chì à u più altu livellu di un statu maiò, si tratta di una baruffa degna di a corte di recreaziò di una scola primaria (per ùn dì materna).
« O Maè, hè ellu u bruttu chì hà dettu ch’eo era gattivu per chì i camerati ùn mi votìnu micca per esse sceffu di scola ! Mughjàtelu o Maè ! Eiu ùn aghju fattu nunda sapete, sò bravu bravu ! ».
Rimpiazzate sceffu di scola pè Presidente di a Repùblica, gattivuscruccone è bruttuPrimu Ministru, è avete à pocu pressu a storia di l’affare Clearsrteam.

Segonda, hè chì l’Omu ùn hè fattu per tene u Pudere, chì sùbitu ne face u so ghjòculu persunale. Innò, l’Omu hè fattu pè arrubà, diciulà, tradisce è circà di piscià più luntanu ch’è u vicinu. I santi sò impetrificati in chjesa, u restu ùn sò ch’è fole è paghjelle in trà d’amici. U pocu chì s’impegna à serve u cumunu sopr’à sta terra si stà chjosu in prigiò ch’è un pezzu, si sà.

Rendìtevi contu, un Generale di l’Armata Francese, un Primu Ministru è un Ministru di l’Ecunumìa (à l’èpica) in eserciziu è diventatu in u frattempu Imperatore di… euh, Presidente di a Repùblica. Eccu. Micca male per un casting di zitellacci techji cappiati nù a sala di ghjocu di i so sogni nò ?

È tutti ghjòcanu inseme mirà, Georges W. Bush, chì dichjarò a guerra à a metà di u mondu per vede i so carri armati à a televisiò, eppo avà ci hè dinù Ahmadinedjad è un antru scemu cappiatu in Corea di u Nordu chì vòlenu à tutti patti a so bombarella per Natale… Eri hè u puverettu di Silvio Berlusconi chì hà minacciatu i so camerati d’ùn vulè più ghjucà cun elli è di scappà à falli u musu in altrò s’elli ùn piantàvanu micca subitu subitu d’annuiallu. È tuttu què, si chjama u Mondu o cari!

Ghjucheremu u nostru rollu ancu noi allora tandu… Certi scèglienu di passà a so vita à ughjulà cum'è persi nù i tribunali à mezu à giandarmi (i bravi) è ladri (i gattivi gattivi), eppo ci sò chì ghjòcanu à u maestru, à u Rè, à u cow-boy… Infine, ci sò e ghjente oneste, chì ci l’anu fatta à fanne un misitieru sèriu, canterini, cumedianti o ghjucadori di ballò… Elli ghjòcanu ma omancu a dìcenu.

Ek’ !

u 7 d'Utrovi 2009
Ussamà Ben Lazezu



1.mandatu da KÜG u 07/10/2009 10:13
VILLEPIN

2.mandatu da LIve from Bustanicu u 07/10/2009 10:45
O VILLEUPIN !!

3.mandatu da Acqualacciu u 07/10/2009 14:23
Eui ciò ch'aghju vistu hè a faccia di Sarkozy dicendu "culpevule" nant'à tutti i ghjurnali TV.
Per Ivan Colonna, un' era micca cusì !

Novu cumentu :