Accueil
Envoyer à un ami
Version imprimable
Partager

Vutate pè a vostra persunalità corsa preferita

È s'è no tiravamu u bilanciu di 10.000 anni di storia ? Vi prupunemu di vutà per a persunalità a più forte di a nostra storia, à a manera di A Piazzetta... Allora vutate !



Vutate pè a vostra persunalità corsa preferita
A donna di Bunifaziu : Hè a nostra antica a più vechja ch'è no cunniscimu (circa 7000 nanz'à Cristu) è si pò sempre vede à u museu di Livia).
  • Pusitivu : Hè stata a prima Corsa à entre in un museu
  • Negativu : Hà forse lanciatu a "museificazione" di i Corsi.

Sampieru Corsu : Omu di guerra di prima trinca, Sampieru era un veru diàvule, un veru "lider" carismàticu.
  • Pusitivu : forte in relazione internaziunale, hà ancu riesciutu à cunvince i Turchi di battaglià cun ellu. Ci vulia à falla...
  • Negativu : Hà sceltu di difende u partitu francese è quellu di François 1er.
Hà dinù strangulatu a so moglia (pusitivu o negativu ?) è inspiratu Othello di Shakespeare.

Arrigu Bel Messere : Sceffu di a Corsica in l'annu 1000.
  • Pusitivu : riesce à fà l'unità di a Corsica, ci vulia à falla. Più nimu hà riesciutu dapoi.
  • Negativu : Assassinatu, hà lasciatu u dettu : "Hè mortu Arrigu Bel Messere, è Corsica sarà di male in peghju". Mille anni dopu, cuntinuveghja a maledizzione.

Sambucucciu d'Àlandu : Capimachja di a rivolta pupulare contr'à i signori in l'anni 1357-1358.
  • Pusitivu : Solu Corsu hà avè riesciutu una rivuluzione.
  • Negativu : Hà riesciutu à caccià i sgiò... ma hà datu a Corsica à Genuva. Gattiva scelta o Sambucù.

Vincentellu d'Istria : Altru sceffu di a Corsica à u XVesimu seculu. Era un omu cumplettu è pulivalente : signore, pirata, omu di guerra, custruttore di a citatella di Corti è capimachja militare.
  • Pusitivu : Stu feudale hè statu un infernu per i Genuvesi à ellu solu.
  • Negativu : 600 anni dopu, ferma scunnisciutu.

Pasquale Paoli : Quessu u cunniscite tutti... U Capigenerale hà fattu di a Corsica una vera nazione muderna è democràtica nanzu à parechji altri. Ùn avemu mai fattu megliu da poi.
  • Pusitivu : Bilanciu pusitivu per l'inseme di a so opera, ancu l'Americani l'anu cupiatu. Ùn risicheghja micca di pruducesi torna.
  • Negativu : una disfatta imperdunèvule in Ponte Novu è u principiu di i castichi. Questa, ùn ci vulia micca à perdela, o Pasquà...

Faustina Gaffory : diavulessa nustrale. Moglia di u generale curtinese Ghjuvanpetru Gaffory, hà cummandatu i suldati corsi chì assaltavanu a citatella di Corti mentre chì i Genuvesi avianu u so figliolu in ostagiu è l'utilizavanu cum'è "bouclier humain". Frasa a più cunnisciuta prununziata : "tumbatelu puru, ma ùn vi rendite micca !".
  • Pusitivu : 50 donne cusì è in Ponte Novu averiamu vintu. In più u so figliolu ùn hè micca mortu.
  • Negativu : Episodiu cuntestatu da i sturiani. Ma chì pò fà ?

Napuliò : Solu Corsu diventatu maestru di u mondu.
  • Pusitivu : Riesce à fassi sceglie imperatore di i Francesi.
  • Negativu : Fassi adattà à a tv da Christian Clavier.

Jean Nicoli : Resistente corsu marturiatu è tombu da i facisti.
  • Pusitivu : "in segnu di dolu purterete a Testa di Moru è u fiore rossu"...
  • Negativu : dinù un nome di un battellu di a SNCM.

Claude Papi : futbalore corsu u più forte di u mondu in l'anni 70
  • Pusitivu : fuoriclasse assulutu, numeru 10 di classa mundiale, mudestia, semplicità è attaccamentu à a so terra. Hà preferitu stassine in Corsica per andà à caccighjà piuttostu ch'è di parte pè vince i soldi in un altru club di futbol (Cosmos di New York è altri...). Impensèvule di i nostri tempi.
  • Negativu : S'hè fattu piglià a so piazza da un mullizzu chjamatu Platini.

Anghjulu Mariani : farmacistu di Peru Casevechje è creatore di u Coca Cola.
  • Pusitivu : Hà inventatu a sosula di u French Wine Cola, antenatu di u Coca Cola.
  • Negativu : Hà inventatu a bivenda a più cunnisciuta di u mondu ma sò l'americani à avè incasciatu i soldi. Peru Casevechje averia pussutu diventà Atlanta...

Charles Pasqua : omu puliticu francese, impiegatu di a sucetà Ricard è trafficone di livellu internaziunale.
  • Pusitivu : hà sappiutu fà i so affari, ghjunghje à u capu di u Statu Francese è diventà u sceffu di l'Africa.
  • Negativu : à l'orìgine di 70% di i danni di a Corsica oghje.

Mac Gyver : ùn a sapete micca ch'ellu era corsu ?
  • Pusitivu : cù un slip, un pneu è una buttiglia di Moussor ci la face à fà splusà una centrale nucleare.
  • Negativu : ùn hà mai dettu ch'ellu era corsu.

Pierre Cangioni : giurnalistu spurtivu in l'anni 70-80.
  • Pusitivu : hà inventatu l'emissione "Téléfoot".
  • Negativu : averia pussutu sceglie un'antru nome ch'è "Téléfoot" è ùn micca imbuscià à Thierry Roland.

Philippe Risoli : canterinu è presentatore telè.
  • Pusitivu : hà quantunque presentatu Le tirage du Millionnaire, Sacrée Soirée, Jéopardy, Le Juste Prix è Intervilles.
  • Negativu : hà quantunque presentatu Le tirage du Millionaire, Sacrée Soirée, Jéopardy, Le Juste Prix è Intervilles.

Carlu Rocchi : Più bella voce di a storia di a Corsica.
  • Pusitivu : tuttu.
  • Negativu : ùn ci ne serà mai più cusì.

Ghjuvanpaulu Poletti : Capimachja di u Riacquistu.
  • Pusitivu : Canzona Vagabonda, Lettera di u Mulatteru à u Corsu, Arietta, Un Paisanu, Surella d'Irlanda, Mal'Cunsigliu, L'Ancura di Misericordia, Un passu ver'di u celu, L'Affissu, Perchè cantu, Di tè... è sopr'à tuttu l'Alta Strada.
  • Negativu : passà per un azezu allora ch'ellu rapresenta 80% di e più belle canzone corse.

Merry Krimau : Attaccante di u SECB.
  • Pusitivu : dui but in Torino per a più bella pagina di a storia di a Corsica.
  • Negativu : ùn avè micca marcatu contr'à u PSV Eindhoven è perde a finale.

Muammar Kadhafi : Unicu dirigente corsu di livellu internaziunale.
  • Pusitivu : Solu corsu à avè veramente riesciutu in pulitica. À capu di a Libia dapoi 1970 è nisuna oposizione.
  • Negativu : E so orìgine corse sò cuntestate. Solu un test ADN puderà dimustrà ch'ellu hà u sangue corsu.

Averiamu pussutu sceglie ne assai d'altri... ma ùn c'era più piazza. À voi di vutà è di dà u vostru parè. Lasciate un cummentu !

u 27 di Ghjenaghju 2011
U Webmaestru


Da u più recente à u più anzianu | Da u più anzianu à u più recente

56.mandatu da J G u 10/04/2012 17:34
Per quale votà ?

Per Nicolu ? ssu sbacone , chi si piglia pé Napulione e chi ci porta di fole in canzone

Pe Marina ? ssa mattrona chi un aspetta che di ghjunghje a à cummandatura per fà a so dittatura ?

Pe Ghjuan Lucca ? chi predicheghja a spertera cun tutti : i neri , i gialli , i budiri ........

Pe Francescu Bay puru ? u poveracciu !

Pe francescu u casgiudu ?




55.mandatu da J G u 04/07/2011 06:05
dopu a avé vistu tuttu stu tralalà pé u matrimonio di u principe Albert secondu di Monaco m'hé venuta a voglia di votà pé u principe Charles Napoleon per esse ancu noi una principotà cume Monaco , dunque Charles Napoleon presidente di a Francia e principe di a corsica , dunque corsi di qui o d'altrô in 2012 votemu tutti pe Charles Napoleon , femmu u nostru buglietinu a a manu e lampemulu in l'urna , fate circulà stu novu muvimentu e cusi sia .

54.mandatu da .... u 16/03/2011 19:41
Pasquale Paoli !

53.mandatu da Goldoraccu u 07/03/2011 21:32
ùn ci scurdemu di stu leone di Freddy Antonetti, è dinù di i Chjami Aghjalesi !

52.mandatu da campile u 02/03/2011 21:35
nimu un a pensatu a madamicella Sufiani ?
a sola donna indè stu mondu a pida in publicu !

51.mandatu da U Castellerese u 27/02/2011 18:58
Eu u lampu per Carlu Rocchi.

50.mandatu da aschese u 26/02/2011 15:48
eiu votu per Ghjacumu Fusina !

49.mandatu da Jürgen di Filitosa u 26/02/2011 15:06
nimu hà pensatu à cità Jean-Paul de Rocca Serra ?

48.mandatu da Ghjacumu u 26/02/2011 15:05
Buteau, Guelfucci, Poletti è Minicale per avè salvatu una grande parte di a cultura corsa in l'anni 70 è creatu u gruppu miticu di Canta u Populu Corsu

47.mandatu da Micca nomi u 03/02/2011 16:55
manc'una pruposta di donne; mi parite tutti miso. Purtantu ùn mancanu micca quelle chi meritanu u tittulu di prima persùnalità : Daniele Casanova, Marcelle Conrad, Noelle Vincensini, Stéphania di Monacù, Anna Maria Nadal (mamma di Rafael), Marina Raibaldi è tant'altre.....

46.mandatu da U Falzu testimone u 03/02/2011 10:54
È Yvan Colonna cumu hè chì nimu l'hà mintuvatu?

Commediante Tragediante... Megliu cà Cesar VEZZANI

45.mandatu da henry smart u 02/02/2011 21:53
Charles pieri per u so umanisimu

44.mandatu da Urelianu u 30/01/2011 22:59
Eiu votu per Tollinchi!!! l'Obama nustrale!! c'ha da salvà o figliò!!

43.mandatu da Sciacarellu u 29/01/2011 17:43
Alexandre-Guillaume Tollinchi
Pusitivu: un raprisententu di razzinu corsu di prima trinca chi travaglia per Berlusconi è innamuratu di a so isula
Negativu: un fake tremendu mentuvatu da nimu

Peggy A Luviona
Positivu: dui puppuli spaventosi
Negativu: u so straponu

42.mandatu da Corsica mea u 29/01/2011 16:28
È Tommy Recco?!
Chì tanti à Dutroux...
Semu i più forti nant'à tutti i duminii!

41.mandatu da boum étienne u 29/01/2011 12:21
Petru Rocca, u capu di i muvristi, chì hà pisatu a bandera quandu tutti ghjimbavanu u capu.

40.mandatu da U Palatinu u 29/01/2011 11:46
Grazie milla o "Eiu" per u cumpiimentu.
Parlendu per mè, ùn pensu micca necessariamente esse a prova chì tuttu ùn sia compiu in stu paese.
A prova hè chì ancu u mio forum in lingua corsa, l'Appuntamentu Corsu di a Tela (da u quale mettu u ligame ogni volta ch'o scrivu qualcosa quì) ùn viaghja micca tantu bè.
Disgraziamente.

Ancu di grazie ch'elli ci fubbinu qualchi siti chì viaghjessinu quantunque, cume a Piazzetta, di sicuru !

39.mandatu da Eiu u 29/01/2011 11:03
ebbeh eiu vuleria felicità Palatinu, Urelianu è tutti l'altri pè i so cummenti interessanti, spirituosi o scherzosi... site a prova chi tuttu un hè ancu finitu in stu paese. ancu se no semu micca sempre d'accordu, mi campate !

38.mandatu da U Palatinu u 29/01/2011 10:45
Grazie per sta riposta o "No comment". Avia intesu parlà di e so dichjarazione (scandalose d'altronde, nimu ùn pò dì u cuntrariu, sopra tuttu quì).
Aghju da circà, è grazie una volta di più.

37.mandatu da no comment u 29/01/2011 00:03
o Palatì, Rinaldi avia dettu chì u corsu ghjuvava à fischjà e capre. Pichja angelo rinaldi langue corse, escenu tutte e so pazzie

36.mandatu da U Palatinu u 28/01/2011 17:30
Sughjunghjeraghju, o "Pinzuttu" ch'o seria propiu interessatu, d'avè una copia di e vergugnose è scandalose dichjarazione d'Angelot Rinaldì per e mio archive persunale.
Aghju circatu nant'à u net è ùn l'aghju trovu.

Grazie per una risposta.

35.mandatu da U Palatinu u 28/01/2011 17:26
Difficiule, u vostru sundaghju.
Ùn sì sà più s'ella hè macagna o s'ella hè seria.
Ognunu tene una parte di luce è una parte di bughju in a so vita, ma certi, mi dumandu cosa facenu quì.
Ùn aghju nunda di particulare contr'à Philippe Risoli, ma site sicuri, almenu, ch'ellu fussi corsu ?
Di a stessa manera, ùn sò micca troppu sicuru ch'e ste rubaccia infama di Napoléon è di Charles Pasquà ebbi una piazza in u classamentu di l'omi corsi i più valevuli.

Per avà, ùn votu micca. Forse dopu.

34.mandatu da pinzuttu u 28/01/2011 16:30
anghjulu rinaldi di l'academia francese chi ha dettu
a lingua corsa un'esiste micca

33.mandatu da Michè u fliccu u 28/01/2011 14:40
chi sundame di merda

32.mandatu da ANTO u 28/01/2011 14:32
Un ci n'hè che unu ghjè u prétè Mondoloni di Ponte a Leccia ,solu prétè di Corsica a esse vestutu a l'antigogna !Unu di l'ultimi veri corsi .

31.mandatu da Urelianu u 28/01/2011 13:12
Ghjè vera chi Giovanni della Grossa ghj'era appena mittò! Ma u pudemu accettà eh! Ghjè vera ancu chi Sambucucciu ha datu a Corsica a i genuvesi.... Ma più corsu di Salvatore Viale un ci n'hè mì! Ahò, a Dionomachia, i rapporti incù a Tuscana... Tradizione corsa è basta! :-P

30.mandatu da Chjerchju culturale "Pastizzu è azizume" u 28/01/2011 12:44
Sambucucciu di chè ? Stu grossu traditore à i Genuvesi, cunsacratu da figura di a resistenza corsa da une pochi di goscisti intalamati ! U prugettu suciale di chè ? Un cornu sì ! A Terra del Comune vulia dì terra del Comune di Genova, senza parla di sta razzaccia di capurali o quantu peghju chì i signori !

Salvatore Viale Corsu di chè ? Bastiacciu sì ! Corsu mai !

Giovanni della Grossa ? Primu sturianu corsu ? Un'antru cornu ! Primu mittò di a storia corsa sì !

O Louis ci servi per piacè !

29.mandatu da Eddy u 28/01/2011 12:44
S'è vo ci mittite G.P Poletti, pudete ancu mette Natale Luciani !

28.mandatu da Urelianu u 28/01/2011 12:36
a Via Sambucuccio d'Alando in Roma...
http://www.facebook.com/pages/Via-Sambucuccio-Dalando-Roma/73661870305?v=photos

27.mandatu da MARCUCCIU u 28/01/2011 11:45
oimé un' capité nunda !! l'omu corsu u più cunisciutu ghiéu nostru TINO ROSSI nazziunalé.Qualé c'hé di piu rinumatu mundialé corsu.Ricurdatevi,"o catarinetta bella tchi tchi,matteo,l'ajaccienne ,petit papa noel"hé tant' altré canzone....

26.mandatu da Urelianu u 28/01/2011 10:15
E bella sicura, era bastiacciu!!! :-P

25.mandatu da Urelianu u 28/01/2011 10:13
Ma Ugo Colonna un era mancu corsu...
Ci saria Salvatore Viale o figliò!! L'avemu sminticatu!!! U primu puetu ad avè scrittu un'opera letteraria in lingua corsa!!!

24.mandatu da canistrellu u 28/01/2011 03:27
Giovani della Grossa, u primu storianu Corsu

23.mandatu da ahmed zumare u 28/01/2011 00:44
Santu Federici

22.mandatu da bastiacciu u 28/01/2011 00:12 (da un teleffuninu)
Ghjuvan' Francescu Bernardini per e so parolle è a maghjina di a Corsica ch'ellu porta in lu mondu sanu. Pudemu ringrazià lu (dopu Pasquà di sicuru! Sarà sempre ellu l'omu maio di a Corsi

21.mandatu da briziu u 27/01/2011 20:32
è dinù Ugo Colonna chi hà messu fora i saracini ?

20.mandatu da Indigesta u 27/01/2011 20:20
U Sgaiuffu!! e Marilyn Panzonu !!!

19.mandatu da cantadore corsu di cismonte e pumonti u 27/01/2011 20:19
CARLU ROCCHI

A so voce s'alsava è ci paria un sole, un innu veranile chi discitava a terra,
indè i so ochji chjari, sintimenti è passione, di quellu chi purtava in core
l'estru di a tradizione, è ancu si di noi si tene più luntanu, u seculu un si scorda, di a voce di CARLU.
In memoria

18.mandatu da briziu u 27/01/2011 20:15
francis mariani ?

17.mandatu da picciaghjolu u 27/01/2011 20:00
ùn hè micca
"sò patriotu nanzu d'esse mamma"
qu'ella avia detta Faustina Gaffory ?

16.mandatu da a merula u 27/01/2011 18:13
ci manca a timpesta !

15.mandatu da À l'uva ! u 27/01/2011 17:29
Hep là ! Videau hè pumuntincu, Viculese. Ùn avaremu pò micca abbastanza martillati in Niolu ?

14.mandatu da Fiumorbacciu u 27/01/2011 18:04
Par me, a persunalità di l'annu ghjè Antoine Videau, u prete di Calacuccia chì s'hè arrubatu dui milioni d'euro. E manghjarie ùn esistenu micca che in pulitica...

13.mandatu da Pruprianincu u 27/01/2011 16:01
PA me , Hubert Tempete, Jerome valinco ,e ancu Regina e Bruno ( chi tanti Jackson e daft punck )

12.mandatu da heliofobu u 27/01/2011 15:15
Aioooo Pasquale Paoli di chè ?! Hà guasi inventatu sta demucrazia maladetta... Bellu risultatu : Una mansa di ladri cusanguini tratechji à u capu di un paese di sumeroni d'elettori...

11.mandatu da KÜG u 27/01/2011 14:27
Hubert Tempête

10.mandatu da Urelianu u 27/01/2011 14:17
Ahò! Vutà per Pasquale Paoli ghjè troppu faciule... A sapemu chi ghjè u "babbu di a patria"!! Ellu duveria esse "Persunalità corsa maiò ad honorem"....
Ma u più grande ghjè Sambucucciu o figliò!! t'ha ancu a so strada in Roma eh!!

9.mandatu da Grossu panzutu u 27/01/2011 13:09
P Paoli perche ghje ellu u patrone
C Rocchi idem
E Simeoni pe ave fattu rinasce "a cuscenza cumuna" e ave dattu una trentina d'anni di vita in piu a u populu corsu.

pierro bianconi pe nizza 92! wath else?!


8.mandatu da Battì u 27/01/2011 11:58
Ghjè faciule ! Petru Bianconi per e So sterpate in Furiani ! Ci simu assai campati !!

7.mandatu da Ghjustina u 27/01/2011 11:42
Pasquale Paoli, u babbu di a nazione, quellu chi ha imbintà "Le droit des peuples à disposer d'eux même"!!!

1 2
Novu cumentu :