Accueil
Envoyer à un ami
Version imprimable
Partager

100 anni fà escia A Cispra

Di marzu 1914 era publicatu u primu numeru di a rivista "A Cispra". Si pudia leghje chì : "a Corsica ùn hè micca un dipartimentu francese, hè una Nazione vinta chì hà da rinasce !". Ùn ci serà micca un segondu numeru, chì subbitu dopu principia a guerra. Ma a so influenza pulitica è linguistica hè stata maiò.



100 anni fà escia A Cispra
Di marzu 14, malgradu sti tempi di bughjura chì s’avvicinavanu, nasce una rivista in lingua corsa : A Cispra. Battizata di u stessu nome ch'è u longu fucile à scaglia purtatu da e milizie pauline à u XVIIImu seculu è da i banditi di u XIXmu, stu libru ferà offiziu d’arma culturale à u XXmu, in una guerra intellettuale contr'à a francisata viulente di a Corsica.

I so dui creatori sò Saveriu Paoli di San Martinu di Letia è Ghjacumu Santu Versini di Marignana, tramindui stitutori. A rivista hè bislingua, ma ghjucherà un rollu impurtante assai in l'affirmazione di a lingua corsa.

Si leghje : "entre deux formes également usitées, nous préférons celle qui s'éloigne le plus de l'italien (...) il faut s'affranchir de la servitude toscane".

L'edituriale, piuttostu viulente, hè di Saveriu Paoli è hè cunsideratu cum'è "le manifeste du nationalisme corse politique et littéraire" (Farrandu Ettori).

A Cispra dichjara chì « a Corsica ùn hè micca un dipartimentu francese, hè una Nazione vinta chì hà da rinasce ». U sintimu naziunalistu di u XXmu seculu nasce incù sta dichjarazione.

U scopu era doppiu : fà rinvivisce a lingua è accertà i fundamenti di ciò chi serà u naziunalismu mudernu.

Scrive Ghjacumu Fusina à prupositu di Ghjacumu Santu Versini ch'ellu testimuniava "d'une ouverture d'esprit et d'une réelle modernité pour l'époque (socialisme, syndicalisme, féminisme, nouvelles pédagogies)" in più d'esse un pueta di prima trinca ("Neve", "M'innamoru"...).

Parechji pueti s’adduniscenu à stu travagliu cum'è Ghjuvanpetru Lucciardi di Santu Petru di Tenda chì avia messu in scrittura a storia di Maria Ghjentile, l'Antigona corsa, è ci arreca una puesia chjamata "I Galli rivali".

A Cispra publicheghja dinù a e « Ballate di Spanettu », di Santu Casanova (fundatore d'un'altra rivista maiò in lingua corsa, "A Tramuntana"). Una passata di sta puesia hè cunnisciuta da tutti i paghjellaghji di u mondu :

« Vurria chì la me voce
Trapanassi ogni muntagna
Ch’ella ghjugnissi in Niolu,
Risunà per la Balagna,
Ch’ella passassi lu mare
E le fruntiere di Spagna »

Vi rammenta qualcosa ?

In st’opera, veru veculu di tutte l’altre creazione in lingua nostra (A Muvra, l’Annu corsu… chì veneranu dopu), i dui scrittori pruponenu ancu una lezzione d’ortografia chjamata « Notre orthographe ». Ùn vi pare nunda ? Simu in 14.

A Cispra hè stata un « One Shot » cum’ellu si dice in Inglese, un solu colpu tiratu. Bellu paragone incù u nome di sta rivista chì ùn publicherà ch’è un solu esemplariu.

A nascita di ciò ch'è no chjamemu u Riacquistu si trova in ste pagine stampate. A nascita di u sintimu naziunalistu dinù.

Quist’annu dinù, simu in 14.

A Cispra hè da leghje in linea nant'à Gallica
Un'edizione hè stata publicata in u 2009 ind'è l'editore Alain Piazzola, cù intruduzzione, note è "postface" di Dumenicantone Geronimi è François Paoli, niputinu di Saveriu Paoli, unu di i fundatori.

u 23 d'Utrovi 2014
Pinnatu



1.mandatu da capicursina u 23/10/2014 21:58
a più bella ghjè " a neve "

2.mandatu da àpopulufattubisognamarchjà u 24/10/2014 10:14
è dì chì ci sò chì si sò battuti è chì sò ancu morti pè ghjunghje ne quì..... chì populu!!

3.mandatu da Hugo u 24/10/2014 15:55
a più bella ghjè " a neve " +1

4.mandatu da Giacomoni u 26/10/2014 14:23
In bendita. Avà scrivimu vendita, prununciendu quantunque bendita. U « v » in pusizione forte, prununziatu [b], ghjè maggiuritariu in u spaziu di a Corsica.
Oghje quantu ci n’hè per Via Stella chì prununzianu [bia] ?

Luigi G.

5.mandatu da capicursina u 01/11/2014 05:39
E' vi pare megliu a publicità nant'à via stella : " site prutesi bè " . Quand'hè chì l'hanu da currege ? Mi strappa l 'arrechja ogni volta ch'o a sentu !

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta