Accueil
Envoyer à un ami
Version imprimable
Partager

12 altre date per festighjà a nazione corsa

L'ottu di dicembre hè u ghjornu di a Festa di a Nazione. È cum'è no semu troppu azezi, vi prupunemu di fà festa ancu d'altri ghjorni. Eccu d'altre pruposte di feste naziunale corse.



A bandera chì era in Ponte Novu
A bandera chì era in Ponte Novu
I fundamentalisti anti-corsi ùn volenu sente parlà di festa di a nazione l'ottu di dicembre. Ùn li piace ch'ellu sia statu sceltu u ghjornu di l'Immaculata Cuncezzione (vede a storia quì). Troppu religiosu dicenu. Purtantu, sì certi ci vedenu una festa cristiana, ognunu ci mette ciò ch'ellu vole. D'altri ci vedenu una festa storica, una festa culturale... o una scusa per tuccassi un bichjeru di vinu è manghjassi una fetta di pulenda (hè sempre megliu ch'è di stà in casa à fidighjà TPMP, nò ?)

Ma forse a pretesa religiosa li face una bona scusa per ùn avè à celebrà un evenimentu troppu identitariu... Allora prupunemu d'altre date per turnà a fà a festa, è pudete prupone a vostra voi dinù.

U 4 d'aprile di u 1297 : a Corsica diventa aragunese
U papa Bunifaziu VIII crea u "Regnu di Corsica è Sardegna" ch'ellu dà à u Rè d'Aragone. Bon, difatti l'Aragunesi s'interessanu pocu è micca à a Corsica, è Genuva piglia a suprana in l'isula. Ma s'elli s'eranu mossi appena, oghje Bastia ghjucheria contr'à u Barça è si puderia avè una festa cummuna à e duie isule.

L'8 ghjennaghju di u 1735 : a prima custituzione corsa è a separazione cun Genuva
À a cunsulta d'Orezza, i trè capimachja Luigi Giafferri, Ghjacintu Paoli è Andria Ceccaldi ùn volenu sapè nunda. E terre chì appartenu à i Genuvesi sò ricuperate è a separazione cun Genuva hè qualificata d'"eterna". Pigliati què, Guvernatore.

14-15 di lugliu 1755 : l'elezzione di Pasquale Paoli
Era forse u più bellu ghjornu per fà una bella festa, ma a data di u 14 era digià pigliata. Peccatu, hè dinù u ghjornu di l'elezzione di Pasquale Paoli cum'è capigenerale di a nazione corsa. Era à u cunventu Sant'Antone di a Casabianca. In più cumu a cunsulta hè durata parechji ghjorni, si pò fà dui ghjorni di festa.

12 altre date per festighjà a nazione corsa

U 27 di ferraghju di u 1967 : a Corsica batte a Francia 2 à 0
Per aiutà l'Equipe de France, un geniu hà un'idea : organizà partite amichèvule contr'à squadre regiunale. Si cummencia dunque cù a Corsica. Ùn costa nunda è a vittoria hè assigurata pè i Bleus. Pensate... U macciu si passa in Marseglia, è gira à u fiascu. Etienne Sansonetti marca u primu, Jean-Pierre Serra u segondu. U publicu canta : "laissez-les marquer !". Umiliazione naziunale.

12 altre date per festighjà a nazione corsa


U 10 d'ottobre 1768 : a vittoria di U Borgu
Nanzu chì U Borgu si chjami Borgaux, c'era statu in stu paese in u 1768 dui ghjorni di battaglia accanita trà i partigiani di Paoli è quelli di u Rè di Francia. Risultatu : una concia d'antulugia pè i Francesi. 700 suldati fatti prigiuneri, è una vergogna tremenda per l'antichi di Chevènement. À tal puntu chì i Corsi ùn sanu chì fà di tutti quessi (ùn anu custruitu abbastanza prigiò...) è sò obligati di cappialli. Hè tandu chì Voltaire, ammirativu, scrive : "toute l'Europe est corse"... Stumacatu, u Rè pensa un certu tempu abbandunà st'isulottu chì l'hà ghjucatu à a risa. Ma l'orgogliu hè troppu forte è i Francesi metteranu u pacchettu dopu...

Un pin's corsu :

12 altre date per festighjà a nazione corsa

U 7 di dicembre 1977 : A vittoria di Turinu
A più grande partita di a storia di u Sporting, contr'à a più grossa squadra taliana di l'epica. U fretu, a neve, 15.000 Corsi, Papi, Rep è Krimau cù i so guanti rossi...

12 altre date per festighjà a nazione corsa


A nascita di Grossu Minutu
Bon d'accordu ùn si cunnosce micca u ghjornu esattu di a nascita di Grossu Minutu (solu l'annata, 1708), postu ch'ellu hà esistitu in veru. Si sà ch'ellu era di I Pirelli d'Alisgiani, ch'ellu era traculinu, è ch'ellu si chjamava Petru Ghjuvanni Ficoni. Qualcosa merita nò ?

U 17 di nuvembre 1993 : Kostadinov
Per l'inseme di a so opera una sera di nuvembre 1993 à u Parcu di i Principi, Emil Kostadinov hè pupulare assai in Corsica. Micca tantu ch'è a Madonna. Ma u so ghjornu di festa u si meriteghja anch'ellu.

U 17 di lugliu 1973 : a creazione di Canta u Populu Corsu
Hè u ghjornu di a festa di Sant'Alesiu in Sermanu. Petru Guelfucci vede ghjunghje à Minicale, Ghjuvanpaulu Poletti, Dumenicu Tognotti è Saveriu Valentini. Cù e paghjelle è u pastizzu nasce l'idea di fà qualcosa inseme. Racoglie, arregistrà, amparà... nanzu chì tuttu smarisca. Veneranu dinù Ceccè Buteau, Natale Luciani, Dumè Gallet, Alain Nicoli è tant'altri. Dui anni dopu esce Eri oghje dumane, u primu discu. Cunniscite a seguita...

18 d'ottobre 2014 : l'affare Jean-Louis Leca
10 segonde di bandera corsa nant'à u campu di Nizza dop'à a vittoria di Bastia è un scandalu naziunale. JLL più forte ch'è JPP. È pè a partita chì venerà dopu, u più bellu tifo di tutti i tempi in Furiani : un mare di bandere corse in e quattru tribune. Pigliati què, Didier Digard.


Ritrattu : Spiritu Turchinu.

27 di dicembre 1729 : u principiu di a rivuluzione corsa
Hè stu ghjornu chì i paisani di Bustanicu anu lampatu fora i Genuvesi chì eranu cullati per piglià l'impositu. Nanzu, avianu maltrattatu un vechjettu chì ùn pudia pagà è l'abitenti di u paese si sò ribellati. A rivolta sbuccerà nant'à una rivuluzione di quarant'anni. Hè una bella ragione per fà festa, ma trà Natale è capu d'annu, face forse troppu pulenda è vinu.
12 altre date per festighjà a nazione corsa

16 dicembre di u 1982 : a prima edizione di Corsica Sera
Da vede nant'à u situ di l'INA. Cumu, ùn hè micca una ragione per beie ?
12 altre date per festighjà a nazione corsa


D'altre idee di ghjornu di festa ? Lasciate un cummentu.
Publicatu u 8/12/2014
Messu à ghjornu u 8/12/2015

u 10 di Dicembre 2015



1.mandatu da u panatteru u 08/12/2014 09:50
BONA FESTA A TUTTI I CORSI

2.mandatu da A CISPRA 1914 u 08/12/2014 10:16
"A Corsica ùn hè un dipartimentu francese ma una nazione chì hà da rinasce"

3.mandatu da legion d'honneur u 08/12/2014 19:49
In 1840, interranu un corsu in pienu Parigi...ùn ci ponu vede ma l'amerdemu!!!

4.mandatu da Ghjuvanluca u 08/12/2014 20:36
Bona Festa oghj'è sempre a tutti i fratelli Corsi.

5.mandatu da sardu u 08/12/2014 22:54 (da un teleffuninu)
Bona festa Corsi. Perché anu interratu un corsu a pariggi in piena cità?

6.mandatu da tocca è lecca è fà falà u 09/12/2014 10:37
Napuliò, o Sardu ! dopu avè li guasi stirpati tutti, s'hè fattu interrà aux "Invalides"!!

7.mandatu da sardu u 09/12/2014 12:41 (da un teleffuninu)
Ie,he veru,chi scemu chi socu,era evidente,nabulio...scusate

8.mandatu da sardu u 09/12/2014 12:54 (da un teleffuninu)
Chi poi i francesi ebberu u permessu da u re d''inghilterra di ripiglià a salma di nabulió inde sant''elena e a purta la a les invalides,in 1840...

9.mandatu da Maestru shinigami u 10/12/2015 10:20 (da un teleffuninu)
Cosa he TPMP ?

10.mandatu da SOCIOS u 10/12/2015 14:57

16 aprile 1949 : nascita di Claude Papi

https://fr.wikipedia.org/wiki/Claude_Papi

11.mandatu da bouledecristal u 12/12/2015 07:57
12 di dicembre 2015 i naziunalisti piglianu a regione...!!!

12.mandatu da mimi castagnettes et tango u 14/12/2015 22:19
nò boulede...u 13!!!!! EVVIVA NOI

Novu cumentu :