Accueil
Envoyer à un ami
Version imprimable
Partager

6 dumande nant'à a xylellaccia fastidiosa

Eccu, ci semu. Dop'à un annu di penseri è di chjame à u perìculu, hè finita per ghjunghje a batteria chì s'arruvina l'arburi (è micca solu l'alivi). Oghje, hè a natura corsa chì hè minacciata. L'occasione di poneci unepoche di dumande



1. Chì fà sì a batteria si sparghje ?

A xylella fastidiosa s'attacca à 200 piante è arburi differenti. Per avà ùn ci hè trattamentu. Ci ne serà forse unu un ghjornu, ma oghje a sola suluzione hè di brusgià l'arburi tocchi. Ùn ci ferma dunque più ch'è i nostri ochji per pienghje.


2. Perchè tantu tempu pè reagisce ?

Face più d'un annu chì a minaccia hè cunnisciuta. Più d'un annu chì un cullettivu esiste è prevene. A Piazzetta avia fattu un articulu d'agostu 2014 è di settembre 2014. C'era una misura da piglià : l'interdizzione tutale di fà entre vegetali in Corsica.

U statu è l'Auropa anu messu assai tempu à reagisce malgradu e chjame. Oghje, e misure sò à l'altura di u perìculu ?

6 dumande nant'à a xylellaccia fastidiosa

Ah ma và bè, eri u prefettu di Corsica Suprana hà mandatu un tweet. Simu salvi.


3. Si pò veramente cuntrullà tuttu ciò chì ghjunghje da fora ?

Innò, hè impussibule. Nimu pò impedisce à qualchissia di sbarcà in Corsica in battellu cun piante cuntaminate. Ma ùn hè micca un argumentu per ùn fà nunda.

6 dumande nant'à a xylellaccia fastidiosa

4. Perchè a Corsica hè incapace di pruduce nunda ?

A Corsica pruduce pocu. S'è vo vulete piantà un melu o un persicu in u vostru giardinu, venerà d'una pepiniera frestera, cù i risichi d'introduce insetti o malatie. Ancu di quessa simu dipendenti ! Serà cusì difficiule purtantu ?

Si sviluppa a pepiniera di Castellucciu. Tantu megliu, ma ci vuleria à ponesi a dumanda di ciò ch'è no pudemu pruduce in Corsica per ùn esse dipendenti sempre da fora.
6 dumande nant'à a xylellaccia fastidiosa

5. Perchè tuttu ciò chì vene da fora hè megliu ?

Ùn ci semu ancu sbarazzati di u nostru cumplessu chì ci face pensà chì tuttu ciò chì vene da fora hè più bellu. L'auto-disprezzu passa è vince.

A prova ?

I nostri castagni ùn sò belli è ci vulia à fà vene razze orientale. Risultatu : u cynips.
E palme ci vulia à falle vene per decurà orti è giardini (di residenze segundarie ?). Risultatu : u pinzachju rossu (charançon rouge) chì si sterpa tuttu.
Oghje ci hè a fastidiosa, e furmicule d'Argentina, è ùn si sà ch'è torna...

Custì, u sbagliu hè cullettivu.
6 dumande nant'à a xylellaccia fastidiosa

6. È avà, chì fà ?

U giurnale sguizzeru Le Temps hà fattu parechji articuli nant'à a catastrofa accaduta in a regione taliana di e Puglie. È d'una sperienza :

"Le cœur de la zone infectée, quelque part entre Gallipoli et Sannicola, n’est que sécheresse et désolation. Tina nous emmène droit vers une oasis de verdure qui résiste effrontément à la maladie. Les oliviers y vivent en pleine forme. Par quel miracle? Experte en agronomie, la jeune femme explique que depuis janvier 2014, ces arbres sont traités «avec des pratiques agricoles adaptées». Les herbes dans lesquelles pondent les cicadelles sont arrachées, les branches des oliviers ne sont jamais coupées au-delà d’un certain diamètre pour préserver la vigueur des arbres, et des espèces dites symbiotiques sont plantées près des racines pour favoriser leur coopération mutuelle. Exemple, des pieds de fèves qui «enrichissent le sol en azote et décompactent la terre autour des racines». Tina Minerva insiste: il n’y a dans ces pratiques rien de nouveau, tout au plus s’agit-il d’usages oubliés ou négligés."

Una pista ?

u 25 di Lugliu 2015
U Webmaestru



1.mandatu da estrimei u 25/07/2015 22:23
a" xykella fastidiosa" l'aspettavammu , hè ghjunta !
forse dipoi tantu tempu (a saperemu da quì a pocu ) :ancu ghjente sgalabbata cume mè vere , dipoi ommancu un annu , siccassi e lecce .

paràalla ùn si pudia , chi ancu in una vittura , una zinzala chi purtava sta rubbaccia puia sbercà.
cìò chi hè sicuru hè hè chi prefetti , o ministri , o puru u presidente di a republica , ''ùn avianu piu i mezi "legalli " per piglià dispusizioni di sucurezza : u cummandu hè l'Eurotan chi l'hà , e a ella a terra , la Corsica , l' umanu , ùn li primureghjanu .; ella ùn hà che una primura u sollu .

ma ùn c'impesserimu , u presidente Giacobbi l'hà detta , ammaestra a situazione ; e pò in tutti i casi l'odarc , a camera d'agricultura , e a fdsea , prufitteranu di a situazione per buscassu , torna , nepoche di "prime"


"E famitu cume un braccu
Creparai nentru à un fossu.
Li padroni di l'usine
Diceranu :"Terra addossu,
Chi lu nostr'affare è fattu."
Pensa bè, rifletti, o Corsu."


Paoli di Tagliu
u Lamentu di u castagnu


... a chi vole capì , capisca !

2.mandatu da estrimei u 26/07/2015 07:52
scusate i mio sbaglii di scrittura .
mi dispiece ma nu i possu più curegge .
scusate .

3.mandatu da Guerrini u 27/07/2015 14:57
Sta batteria ; a xilella fastidiosa , hà da esse un scumpientu pè l'agricultori corsi ,s'ellu ùn ci si mette rimediu. cum'è u phiylloxéra in tempi passatoni. pè a vigna.

A causa principale hé u cummerciu planetariu .- tuttu si compra è si vende s'è a robba costa pocu.
Chì a robba venga da Francia o da China o da l'India.

4.mandatu da estrimei u 27/07/2015 19:33
a Guerrini ,

"Sta batteria ; a xilella fastidiosa , hà da esse un scumpientu pè l'agricultori corsi "

innò o amicu , sta batteria hà da esse un scumpientu pè a Corsica , pè tutti i corsi chi sò arradicati a a so terra .
l' "agricultori" sò i "prufeziunali " , ma ci sò dinnù i campagnoli , quelli ùn sò micca dichjarati ma chi campanu 'ncù a campagna .....

5.mandatu da Guerrini u 28/07/2015 16:41
Sò d'accunsentu cun tè o estrimei. A to precisione hè nicessaria.

cI VOLE DA SPERÀ CHÌ I SAPIENTI TRUVERANU U PIÙ PRESTU UN RIMEDIU DA PUDÈ CUNTRÀ ISSA BATTERIA : A XYLELLA FASTIDIOSA.

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta