Accueil
Envoyer à un ami
Version imprimable
Partager

Ghjennaghju di u 1765 : apre l'Università in Corti

Hè di ghjennaghju di u 1765 ch'ella apre l'Università di Corsica. Senza L'Oriente è L'Aventure.



L'università, una rivendicazione di u... 1731

Ghjennaghju di u 1765 : apre l'Università in Corti
L'apertura d'un'università in Corsica hè un'antica rivendicazione. I Corsi facianu u rimproveru à i Ghjenuvesi di manteneli in l'ignuranza (allora ch'ellu ùn si truvava micca università in Ghjenuva...), cun l'impussibilità di fà studii superiori. C'eranu dui cullegi di Ghjesuiti in Aiacciu è Bastia, ma nunda dopu.

Mentre chì in Sardegna c'eranu duie università, i giovani corsi primurosi di cuntinuvà i so studii duvianu parte in Pisa, Roma o Napuli.

Hè cusì chì l'apertura d'un'università hè una rivendicazione tocca a rivuluzione : in u 1731, ripigliata in u 1736 da Teodoru di Neuhoff, da Ghjuvanpetru Gaffori in u 1749 è in u 1756, è torna in una cunsulta in u 1763.


U prugettu di Pasquale Paoli

In fine di contu, hè cun Pasquale Paoli ch'ella sbuccerà. I statuti sò publicati di settembre di u 1764. A primura di u guvernu hè di dà à a ghjuventù corsa a pussibilità di struzzione sopr'à locu.

Hè à u patre Francescu Antone Mariani di Curbara (cugnumatu "U Rossu" per via di u culore di i so capelli) ch'ella vene a respunsabilità di l'università. Hè rettore di l'università d'Alcala, in Spagna, è hà accettatu a pruposta di Paoli di vene in Corti

L'apertura in u 1765

L'apertura si face u 3 di ghjennaghju di u 1765 cù una messa in San Marcellu in presenza di Pasquale Paoli è di i capimachja. Tandu, L'Oriente è e serate "karaoké" ùn esistianu.

I corsi principianu u 7 di ghjennaghju, cun sei modi di studii : teulugia dogmatica, teulugia murale, dirittu civile è canonicu, etica naturale è filusufia (cù e matematiche), retorica (vale à dì e lettere), più tardi venerà a fìsica.

Innò, ùn c'era mancu STAPS à l'epica.

L'insignanti eranu omi di u cleru, cum'ellu era spessu l'usu tandu. Fora di u rettore Mariani, si truvava Bonfigliu Guelfucci, di Belgudè pè a teulugia dogmatica, Anghjulu Stefani di Venacu è Patre Morazzani di Ruglianu pè a teulugia murale.

Pè a filusufia è e matematiche c'era Leunardu Grimaldi (di Campulori). Ghjuvanbattista Ferdinandi (di Brandu) è Antone Vincenti (di Santa Lucia) eranu incaricati di a retorica.

L'insignamentu hè gràtisi pè i studianti. I studii sò pagati cù i soldi di a Chjesa è i revenuti d'un pricoghju (un grande terrenu agrìculu) in Antisanti. Ci sò ancu borse per permette à i più poveru di studià.

Ma induve era a prima università ?

Si pensa spessu ch'ella si truvava à u Palazzu Naziunale, ma invece nò.

Era situata piazza Paoli, in un casale chì si chjamava « Casa Rossi ». Si truvava à u principiu di a Sculiscia. Si vede u casale nantu à e carte pustale antiche :

A casa Rossi serà trasfurmata in ospidale militare pè i suldati francesi, prigiuneri è feriti, dop'à a battaglia di U Borgu in u 1768.

Disgraziatamente, u bastimentu hè statu distruttu in l'anni 1970. Peccatu chì tantu ùn appianu pussutu salvatu. Si vede sempre nant'à e carte pustale di l'anni 60 :
Ghjennaghju di u 1765 : apre l'Università in Corti

Eccu u locu oghje. Ùn ci hè mancu una placca pè ramintà stu riccu passatu.

In locu è piazza di l'antica università ci hè... un parking è unepoche di rumenzule.

Ghjennaghju di u 1765 : apre l'Università in Corti

È i studianti ?

Si saria cuntatu 300 studianti per l'ultimu annu universitariu, in u 1767-1768, ma manchemu di ducumenti nant'à l'epica, peccatu. L'annu dopu, i corsi s'arrestanu per via di a guerra contr'à i Francesi.

Cumu seranu stati sti primi studianti ? Induve si sò passate e prime pastizzate studiantine ? John Symonds, un inglese, scrive :

"Chaque jeudi, la jeunesse studieuse dispute dans toutes les sciences qui en sont susceptibles ; et chaque samedi, on rend compte de ce qui a été appris la semaine (...) Une telle institution a déjà produit des effets remarquables ; et les encouragements constants que donne le Général aux étudiants et aux professeurs crée entre eux toute une émulation qu'il est rare de retrouver ailleurs."

(Bon d'accordu scriviva in inglese, ma a sola traduzzione ch'è no avemu trovu hè in francese)


Allora chì bilanciu fà di a prima università di Corsica chì duvia esse un puntellu di u prugettu di Pasquale Paoli ? Hè durata troppu pocu pè tirà una cunclusione. È pè a riapertura, ci vulerà à aspettà l'annu 1981. Cumu saria stata a Corsica s'ella ùn avessi mai chjosu ?


Bibliugrafia :

Le Mémorial des Corses, sott'à a direzzione di Francis Pomponi, 1980.
Histoire de Corte et des Cortenais, Jean Suberbielle, La Marge, 1989.
Storia corsa à fette, Victor Sinet, Le Temps Retrouvé, 1991.
Dictionnaire historique de la Corse, sott'à a direzzione d'Antoine-Laurent Serpentini, Albiana 2006.
En Corse au temps de Paoli, Paul Silvani, Albiana 2007.
Nantu à i passi di Pasquale Paoli, Antoine Marchini, CRDP di Corsica 2009.

Articulu publicatu u 08/01/2016, aghjurnatu u 03/01/2017

u 3 di Ghjenaghju 2017



1.mandatu da Giacomoni u 05/01/2017 11:17
In cumplementu è ch’aghju trovu in u libru "Histoire de l’école en Corse", edizione Albiana 2003, p 125 :
(traduciu) In u 1763, una cummissione custituita da nove persunalità, s’attacca à mette in opara e mudalità di l’università : (in nota) : Si trattava di patre Don Gregoriu Salvini di Balagna, Francescu Giannettini di Corti, Don Francescu Cittadella di a diocesi di Sagone, Ghjuvan Cosimu Quilichini di Sartè, Filippu Maria Cuttoli d’Ulmetu, Petru Cuttoli di u Celavu, Carlu Grimaldi di Caccia, Anton Battista Raffaelli di Bastia, è Ghjiseppu Maria Giuseppi di Petralba.

Luigi G.


Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta